ಶ್ವೇತಭವನದಲ್ಲಿ ಟ್ರಂಪ್ ಔತಣಕೂಟ: ಚೀನಾ-ಯುಎಸ್ ಸ್ನೇಹದ ಹೂವುಗಳನ್ನು ಪೋಷಿಸೋಣ ಎಂದ ಷಿ ಜಿನ್‌ಪಿಂಗ್

ವಾಷಿಂಗ್ಟನ್, ಸೆಪ್ಟೆಂಬರ್ 25: ಅಮೆರಿಕ ಪ್ರವಾಸದಲ್ಲಿರುವ ಚೀನಾ ಅಧ್ಯಕ್ಷ ಷಿ ಜಿನ್‌ಪಿಂಗ್ ಹಾಗೂ ಪ್ರಥಮ ಮಹಿಳೆ ಪೆಂಗ್ ಲಿಯುವಾನ್ ಅವರಿಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಮೆಲಾನಿಯಾ ಟ್ರಂಪ್ ದಂಪತಿ ಶ್ವೇತಭವನದಲ್ಲಿ ಭವ್ಯ ಅಧಿಕೃತ ಭೋಜನಕೂಟವನ್ನು ಆಯೋಜಿಸಿದ್ದರು. ಈ ಸಂದರ್ಭದಲ್ಲಿ ಮಾತನಾಡಿದ ಉಭಯ ನಾಯಕರು, ಭಿನ್ನ ರಾಜಕೀಯ ಮತ್ತು ಆಡಳಿತ ವ್ಯವಸ್ಥೆಗಳ ನಡುವೆಯೂ ಜಾಗತಿಕ ಶಾಂತಿ ಮತ್ತು ಆರ್ಥಿಕ ಸಮೃದ್ಧಿಗಾಗಿ ಹೊಸ ಮೈತ್ರಿಯ ಅಧ್ಯಾಯ ಬರೆಯಲು ಕರೆ ನೀಡಿದ್ದಾರೆ.

ತಮ್ಮ ಭಾಷಣದಲ್ಲಿ ಕಾವ್ಯಾತ್ಮಕವಾಗಿ ಮಾತನಾಡಿದ ಚೀನಾ ಅಧ್ಯಕ್ಷ ಷಿ ಜಿನ್‌ಪಿಂಗ್, ಎಂದಿಗೂ ನಿಲ್ಲದೆ ಹರಿಯುವ ನದಿಯಂತೆ ಇತಿಹಾಸವು ಸದಾ ಮುನ್ನಡೆಯುತ್ತದೆ. ಎರಡು ಬಲಿಷ್ಠ ದೇಶಗಳ ಜನರ ನಡುವಿನ ಸ್ನೇಹವು ಭವಿಷ್ಯಕ್ಕೆ ಮಹತ್ತರವಾದ ಭರವಸೆ ತಂದುಕೊಡಬಲ್ಲದು. ನಾವಿಬ್ಬರೂ ಕೈಜೋಡಿಸಿ ಒಟ್ಟಾಗಿ ಸಾಗೋಣ, ಚೀನಾ-ಯುಎಸ್ ಸ್ನೇಹದ ಸುಂದರ ಹೂವುಗಳನ್ನು ಪೋಷಿಸಿ, ನಮ್ಮ ಬಾಂಧವ್ಯದಲ್ಲಿ ಹೊಸ ಸುವರ್ಣ ಅಧ್ಯಾಯವನ್ನು ಬರೆಯೋಣ ಎಂದು ಆಶಿಸಿದರು.

ಶ್ವೇತಭವನದಲ್ಲಿ ತಮಗೆ ನೀಡಿದ ಅದ್ಧೂರಿ ಮತ್ತು ಆತ್ಮೀಯ ಆತಿಥ್ಯಕ್ಕೆ ಟ್ರಂಪ್ ದಂಪತಿಗೆ ಧನ್ಯವಾದ ಅರ್ಪಿಸಿದ ಅವರು, ನಿಮ್ಮ ಕಾಳಜಿಯುತ ವ್ಯವಸ್ಥೆಯಿಂದಾಗಿ ನಮಗೆ ಸ್ವಂತ ಮನೆಯಲ್ಲಿರುವಂತಹ ಅನುಭವವಾಗಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

ಮತ್ತಷ್ಟು ಓದಿ: ವೈಟ್‌ಹೌಸ್‌ನಲ್ಲಿ ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್‌ಗೆ ಟ್ರಂಪ್ ದಂಪತಿಯಿಂದ ಅದ್ಧೂರಿ ಸ್ವಾಗತ

ಕಳೆದ ಮೇ ತಿಂಗಳಲ್ಲಿ ಡೊನಾಲ್ಡ್ ಟ್ರಂಪ್ ಅವರು ಚೀನಾಕ್ಕೆ ಭೇಟಿ ನೀಡಿದ್ದನ್ನು ನೆನಪಿಸಿದ ಷಿ ಜಿನ್‌ಪಿಂಗ್, ಕೇವಲ ಆರು ತಿಂಗಳಿಗಿಂತ ಕಡಿಮೆ ಅವಧಿಯಲ್ಲಿ ಎರಡೂ ದೇಶಗಳ ರಾಷ್ಟ್ರಪತಿಗಳು ಪರಸ್ಪರ ದೇಶಗಳಿಗೆ ಭೇಟಿ ನೀಡಿರುವುದು ರಾಜತಾಂತ್ರಿಕ ಇತಿಹಾಸದಲ್ಲೇ ಮಹತ್ವದ ಕ್ಷಣವಾಗಿದೆ.

ಈ ಭೇಟಿಯ ವೇಳೆ ನಾವು ಆಳವಾದ ಹಾಗೂ ಪ್ರಾಮಾಣಿಕ ಚರ್ಚೆಗಳನ್ನು ನಡೆಸಿದ್ದು, ಹಲವು ಜಾಗತಿಕ ಮತ್ತು ಕಾರ್ಯತಂತ್ರದ ವಿಷಯಗಳಲ್ಲಿ ಸಾಮಾನ್ಯ ಒಮ್ಮತಕ್ಕೆ ಬಂದಿದ್ದೇವೆ ಎಂದು ಹೇಳಿದರು.

ವಿಡಿಯೋ

#WATCH | Chinese President Xi Jinping says, “Thank you, Mr. President and Mrs. Trump, for extending to my wife and me your gracious hospitality and thoughtful arrangements. You and Mrs. Trump have made many special arrangements for our visit, all prepared with meticulous care and… pic.twitter.com/pyr9X32XoD

— ANI (@ANI) September 25, 2026

ಟ್ರಂಪ್ ಮಾತನಾಡಿ, ನಾವಿಬ್ಬರೂ ವಿಭಿನ್ನ ಆಡಳಿತ ವ್ಯವಸ್ಥೆಗಳನ್ನು ಪ್ರತಿನಿಧಿಸುತ್ತೇವೆ ಎಂಬುದು ನಮಗೆ ತಿಳಿದಿದೆ. ಆದರೆ ನಮ್ಮ ಜನರ ನಡುವಿನ ಸ್ನೇಹ ಶಾಶ್ವತವಾದದ್ದು. ಪ್ರಸ್ತುತ ನಮ್ಮ ಬಾಂಧವ್ಯ ಹಿಂದೆಂದಿಗಿಂತಲೂ ಅತ್ಯುತ್ತಮ ಮಟ್ಟದಲ್ಲಿದೆ. ಮುಂದಿನ ಪೀಳಿಗೆಯ ಭದ್ರತೆ ಮತ್ತು ಸಮೃದ್ಧಿಗಾಗಿ ಈ ಸ್ನೇಹ ಮುಂದುವರಿಯಲಿದೆ” ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಶ್ವೇತಭವನದ ಈ ಮಹತ್ವದ ಔತಣಕೂಟದಲ್ಲಿ ಕೇವಲ ರಾಜಕಾರಣಿಗಳಷ್ಟೇ ಅಲ್ಲದೆ, ಜಾಗತಿಕ ತಂತ್ರಜ್ಞಾನ ಮತ್ತು ವ್ಯಾಪಾರ ಕ್ಷೇತ್ರದ ಪ್ರಮುಖರಾದ ಎಲೋನ್ ಮಸ್ಕ್, ಟಿಮ್ ಕುಕ್ (Apple), ಸ್ಯಾಮ್ ಆಲ್ಟ್‌ಮನ್ (OpenAI), ಜೆನ್ಸನ್ ಹುವಾಂಗ್ (Nvidia) ಮತ್ತು ಸುಂದರ್ ಪಿಚೈ ಸೇರಿದಂತೆ ಅಮೆರಿಕದ ಅಗ್ರ ಸಿಇಒಗಳು ಭಾಗವಹಿಸಿದ್ದು ವಿಶೇಷವಾಗಿತ್ತು.

ತೈವಾನ್, ಕೃತಕ ಬುದ್ಧಿಮತ್ತೆ (AI) ಮತ್ತು ಸುಂಕಗಳ (Tariffs) ಕುರಿತು ಭಿನ್ನಾಭಿಪ್ರಾಯಗಳು ಜೀವಂತವಾಗಿದ್ದರೂ, ಉಭಯ ದೇಶಗಳು ತಮ್ಮ ಸುಂಕ ವಿನಾಯಿತಿ ಒಪ್ಪಂದವನ್ನು ಜನವರಿವರೆಗೆ ವಿಸ್ತರಿಸಿ ಜಾಗತಿಕ ಷೇರು ಮಾರುಕಟ್ಟೆಗೆ ಸಮಾಧಾನ ತಂದಿವೆ. ಈ ಭೋಜನಕೂಟಕ್ಕೆ ಮುನ್ನ ನಡೆದ ಹಣಕಾಸು ಮಟ್ಟದ ಮಾತುಕತೆಗಳಲ್ಲಿ ಅಮೆರಿಕದ ಕೃಷಿ ಉತ್ಪನ್ನಗಳ ಬೃಹತ್ ಖರೀದಿ ಮತ್ತು ಹೈಟೆಕ್ ರಫ್ತು ನಿಯಮಗಳ ಸಡಿಲಿಕೆಯ ಕುರಿತು ಪ್ರಾಥಮಿಕ ಒಪ್ಪಂದಗಳಿಗೆ ಬರಲಾಗಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ