ಟ್ರಂಪ್ ಆಡಳಿತದ ಕಠಿಣ ವಲಸೆ ನೀತಿ, ಪ್ರತಿ ಹೊಸ H-1B ವೀಸಾಗೆ 95 ಲಕ್ಷ ರೂ. ಶುಲ್ಕ ವಿಧಿಸಲು ಸಿದ್ಧತೆ, 60 ದಿನಗಳ ಗ್ರೇಸ್ ಅವಧಿಗೂ ಕತ್ತರಿ
ಡೊನಾಲ್ಡ್ ಟ್ರಂಪ್ ಆಡಳಿತವು ಹೊಸ H-1B ವೀಸಾಗಳಿಗೆ 103,265 ಡಾಲರ್ (ಸುಮಾರು 95 ಲಕ್ಷ ರೂ.) ಶುಲ್ಕ ವಿಧಿಸಲು ಮತ್ತು ನಿರುದ್ಯೋಗಿ H-1B ಉದ್ಯೋಗಿಗಳಿಗೆ 60 ದಿನಗಳ ಗ್ರೇಸ್ ಅವಧಿ ರದ್ದುಪಡಿಸಲು ಪ್ರಸ್ತಾಪಿಸಿದೆ. ಇದು ಅಮೆರಿಕದ ಕಂಪನಿಗಳಿಗೆ ವಿದೇಶಿ ನೇಮಕಾತಿ ದುಬಾರಿಯಾಗಿಸಲಿದೆ. ಇದರಿಂದ ಭಾರತೀಯ ಐಟಿ ವೃತ್ತಿಪರರಿಗೆ ತೀವ್ರ ಸಂಕಷ್ಟ ಎದುರಾಗಲಿದೆ.
Updated on: Aug 25, 2026 | 8:39 AM
ವಾಷಿಂಗ್ಟನ್, ಆಗಸ್ಟ್ 25: ಅಮೆರಿಕದ ಡೊನಾಲ್ಡ್ ಟ್ರಂಪ್(Donald Trump) ಆಡಳಿತವು ಹೊಸ H-1B ವೀಸಾಗಳ ಮೇಲೆ 103,265 ಡಾಲರ್ ಅಂದರೆ ಸುಮಾರು 95 ಲಕ್ಷ ರೂಪಾಯಿಗಳ ಬೃಹತ್ ಶುಲ್ಕವನ್ನು ಶಾಶ್ವತವಾಗಿ ವಿಧಿಸಲು ಹೊಸ ನಿಯಮಾವಳಿಯನ್ನು ಪ್ರಸ್ತಾಪಿಸಿದೆ. ಈ ಪ್ರಸ್ತಾವನೆಯು ಅಮೆರಿಕದ ಕಂಪನಿಗಳಿಗೆ ವಿದೇಶಿ ತಂತ್ರಜ್ಞರನ್ನು ನೇಮಿಸಿಕೊಳ್ಳುವುದನ್ನು ಅತ್ಯಂತ ದುಬಾರಿಯಾಗಿಸಲಿದ್ದು, ಈ ವೀಸಾದ ಅತಿದೊಡ್ಡ ಫಲಾನುಭವಿಗಳಾಗಿರುವ ಭಾರತೀಯ ಐಟಿ ವೃತ್ತಿಪರರ ಮೇಲೆ ಗಂಭೀರ ಪರಿಣಾಮ ಬೀರಲಿದೆ.
ಹೋಮ್‌ಲ್ಯಾಂಡ್ ಸೆಕ್ಯುರಿಟಿ ಇಲಾಖೆಯು (DHS) ಈ ಪ್ರಸ್ತಾವನೆಯನ್ನು ಬಿಡುಗಡೆ ಮಾಡಿದ್ದು, 30 ದಿನಗಳ ಸಾರ್ವಜನಿಕ ಅಭಿಪ್ರಾಯದ ಬಳಿಕ ವರ್ಷಾಂತ್ಯಕ್ಕೆ ಇದು ಜಾರಿಗೆ ಬರುವ ಸಾಧ್ಯತೆಯಿದೆ. ಯುಎಸ್ ಪೌರತ್ವ ಮತ್ತು ವಲಸೆ ಸೇವೆಗಳ (USCIS) ಅಂಕಿಅಂಶಗಳ ಪ್ರಕಾರ, ಮಂಜೂರಾಗುವ ಒಟ್ಟು H-1B ವೀಸಾಗಳಲ್ಲಿ ಶೇಕಡಾ 70 ಕ್ಕೂ ಹೆಚ್ಚು ಪಾಲು ಭಾರತೀಯರಿಗೆ ಸಲ್ಲುತ್ತದೆ.
ನೇರ ನೇಮಕಾತಿ ಇಳಿಕೆ: ಈ ಹಿಂದೆ ಕೇವಲ 2 ಸಾವಿರ ಡಾಲರ್ನಿಂದ 5 ಸಾವಿರ ಡಾಲರ್ ಇದ್ದ ಶುಲ್ಕ ಈಗ 1 ಲಕ್ಷ ಡಾಲರ್ಗೂ ಅಧಿಕವಾಗುವುದರಿಂದ, ಅಮೆರಿಕನ್ ಕಂಪನಿಗಳು ಭಾರತದಿಂದ ನೇರವಾಗಿ ನುರಿತ ಎಂಜಿನಿಯರ್‌ಗಳನ್ನು ನೇಮಿಸಿಕೊಳ್ಳಲು ಹಿಂಜರಿಯಬಹುದು.
ಮತ್ತಷ್ಟು ಓದಿ: ‘ಹಾರ್ಮುಜ್ ಜಲಸಂಧಿ ಅಮೆರಿಕನ್ ಭೂಭಾಗ’: ಇದು ನಿಮ್ಮ ಭ್ರಮೆ ಎಂದು ಟ್ರಂಪ್ಗೆ ಟಾಂಗ್ ನೀಡಿದ ಇರಾನ್
ಈಗಾಗಲೇ ಅಮೆರಿಕದಲ್ಲಿರುವ ವಿದ್ಯಾರ್ಥಿಗಳಿಗೆ ನೀಡಲಾಗುವ ವೀಸಾಗಳಿಗೆ ಅಥವಾ ಹಾಲಿ ಇರುವ H-1B ವೀಸಾಗಳ ನವೀಕರಣಕ್ಕೆ ಈ ಶುಲ್ಕ ಅನ್ವಯಿಸುವುದಿಲ್ಲ ಎಂದು ಸ್ಪಷ್ಟಪಡಿಸಲಾಗಿದೆ.
ಕೆಲಸ ಕಳೆದುಕೊಂಡರೆ ತಕ್ಷಣ ದೇಶ ತೊರೆಯಬೇಕು: ನಿರುದ್ಯೋಗಿಗಳಾದ H-1B ಉದ್ಯೋಗಿಗಳಿಗೆ ಹೊಸ ಕೆಲಸ ಹುಡುಕಲು ನೀಡಲಾಗುತ್ತಿದ್ದ 60 ದಿನಗಳ ಗ್ರೇಸ್ ಅವಧಿಯನ್ನು (Grace Period) ತೆಗೆದುಹಾಕಲು ಡಿಎಚ್‌ಎಸ್ ಪ್ರಸ್ತಾಪಿಸಿದೆ. ಇದು ಜಾರಿಯಾದರೆ ಕೆಲಸ ಕಳೆದುಕೊಂಡ ಕಾರ್ಮಿಕರು ತಕ್ಷಣವೇ ಅಮೆರಿಕ ತೊರೆಯಬೇಕಾಗುತ್ತದೆ.
ಅಮೆರಿಕದಲ್ಲಿ ವ್ಯಾಸಂಗ ಮುಗಿಸಿ ಉದ್ಯೋಗಕ್ಕೆ ತೆರಳುವ ವಿದೇಶಿ ವಿದ್ಯಾರ್ಥಿಗಳ ಎಫ್-1ಐಚ್ಛಿಕ ಪ್ರಾಯೋಗಿಕ ತರಬೇತಿ (OPT) ಅರ್ಜಿಗಳ ಮೇಲೂ ಸುಮಾರು 1 ಲಕ್ಷ ಡಾಲರ್ ಶುಲ್ಕ ವಿಧಿಸಲು ಪರಿಶೀಲನೆ ನಡೆಸಲಾಗುತ್ತಿದೆ.
ಸ್ಥಳೀಯರಿಗೆ ಆದ್ಯತೆ ನೀಡುವ ಟ್ರಂಪ್ ತಂತ್ರ: ಅಮೆರಿಕನ್ ಉದ್ಯೋಗಿಗಳನ್ನು ರಕ್ಷಿಸಲು ಮತ್ತು ಕಂಪನಿಗಳು ಕಡಿಮೆ ವೆಚ್ಚದ ವಿದೇಶಿ ಕಾರ್ಮಿಕರನ್ನು ಅವಲಂಬಿಸುವುದನ್ನು ತಪ್ಪಿಸಲು ಈ ಕಠಿಣ ನಿಯಮ ತರಲಾಗುತ್ತಿದೆ ಎಂದು ಶ್ವೇತಭವನ ಸಮರ್ಥಿಸಿಕೊಂಡಿದೆ.
ನ್ಯಾಯಾಲಯದ ಸವಾಲು: ಈ ಹಿಂದೆಯೂ ಟ್ರಂಪ್ ಆಡಳಿತ ತಂದಿದ್ದ 1 ಲಕ್ಷ ಡಾಲರ್ ಶುಲ್ಕವನ್ನು ಫೆಡರಲ್ ನ್ಯಾಯಾಲಯವು ತಡೆಹಿಡಿದಿತ್ತು. ಪ್ರಸ್ತುತ ಹೊಸ ನಿಯಮವೂ ಅಮೆರಿಕದ ಪ್ರಮುಖ ಟೆಕ್ ದೈತ್ಯ ಕಂಪನಿಗಳು ಹಾಗೂ ವಲಸೆ ಸಂಘಟನೆಗಳಿಂದ ತೀವ್ರ ಕಾನೂನು ಸವಾಲನ್ನು ಎದುರಿಸುವ ಸಾಧ್ಯತೆಯಿದೆ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
