ವಿಶ್ವ ಆರ್ಥಿಕ ವೇದಿಕೆ ಶೃಂಗಸಭೆ ಆರಂಭ; ಪ್ರಧಾನಿ ನರೇಂದ್ರ ಮೋದಿ, ಚೀನಾ ಅಧ್ಯಕ್ಷ ಷಿ ಜಿನ್​ಪಿಂಗ್ ಭಾಗಿ

ದೆಹಲಿ: ವಿಶ್ವ ಆರ್ಥಿಕ ವೇದಿಕೆಯ ಶೃಂಗಸಭೆಯು (World Economic Forum Summit-WEF) ಇಂದು (ಭಾನುವಾರ) ಆರಂಭಗೊಂಡಿದೆ. ಆರು ದಿನಗಳ ಕಾಲ ನಡೆಯಲಿರುವ ಈ ಆನ್​ಲೈನ್ ಶೃಂಗಸಭೆಯಲ್ಲಿ ಭಾರತದ ಪ್ರಧಾನಿ ನರೇಂದ್ರ ಮೋದಿ, ಚೀನಾ ಅಧ್ಯಕ್ಷ ಷಿ ಜಿನ್​ಪಿಂಗ್ ಭಾಗವಹಿಸಲಿದ್ದಾರೆ.

ಇದು ಜಾಗತಿಕ ಮಟ್ಟದಲ್ಲಿ ನಡೆಯಲಿರುವ ಪ್ರಸ್ತುತ ವರ್ಷದ ಮೊದಲ ಪ್ರಮುಖ ಶೃಂಗಸಭೆಯಾಗಿರಲಿದೆ. ವಿವಿಧ ಸರ್ಕಾರ, ರಾಜ್ಯಗಳ ನಾಯಕರು, ವಿಶ್ವದ ದೊಡ್ಡ ಸಂಸ್ಥೆಗಳ CEOಗಳು, ವಿವಿಧ ಸಂಸ್ಥೆಯ ಮುಖ್ಯಸ್ಥರ ಸಹಿತ ಒಂದು ಸಾವಿರಕ್ಕೂ ಅಧಿಕ ಜಾಗತಿಕ ನಾಯಕರು ಸಭೆಯಲ್ಲಿ ಭಾಗಿಯಾಗಲಿದ್ದಾರೆ.

ಬಹುಪಕ್ಷೀಯ ಸಂಸ್ಥೆಗಳ ಮುಖ್ಯಸ್ಥರು, ನಾಗರಿಕ ಸಮಾಜದ ಸದಸ್ಯರು ಸಭೆಯಲ್ಲಿ ಭಾಗವಹಿಸಿ, ಕೊವಿಡ್-19ರ ಬಳಿಕ ಜಾಗತಿಕ ವಲಯದ, ಆರ್ಥಿಕತೆ, ಪರಿಸರ, ಸಮಾಜ ಹಾಗೂ ತಂತ್ರಜ್ಞಾನದ ಸವಾಲುಗಳನ್ನು ಚರ್ಚಿಸಲಿದ್ದಾರೆ.

ಜನವರಿ 24ರಿಂದ 29ರ ವರೆಗೆ ನಡೆಯಲಿರುವ ಶೃಂಗಸಭೆಯಲ್ಲಿ, G20 ಮುಖ್ಯಸ್ಥರ 15 ವಿಶೇಷ ಭಾಷಣಗಳು ಇರಲಿವೆ. ಪ್ರಧಾನಿ ನರೇಂದ್ರ ಮೋದಿ, ಗುರುವಾರ ತಮ್ಮ ಭಾಷಣ ಮಾಡಲಿರುವ ಬಗ್ಗೆ WEFನಿಂದ ಮಾಹಿತಿ ಲಭ್ಯವಾಗಿದೆ. ಚೀನಾ ಪ್ರಧಾನಿ ಷಿ ಜಿನ್​ಪಿಂಗ್, ಸೋಮವಾರ ತಮ್ಮ ಭಾಷಣ ಮಾಡಲಿದ್ದಾರೆ. ವಿಶ್ವಸಂಸ್ಥೆಯ ಕಾರ್ಯದರ್ಶಿ ಅಂಟೋನಿಯೋ ಗುಟರೆಸ್ ಕೂಡ ಸಭೆಯಲ್ಲಿ ಮಾತನಾಡಲಿದ್ದಾರೆ.

ಕೇಂದ್ರ ಕೃಷಿ ಸಚಿವ ನರೇಂದ್ರ ಸಿಂಗ್ ತೋಮರ್, ಆರೋಗ್ಯ ಸಚಿವ ಹರ್ಷ ವರ್ಧನ್ ಹಾಗೂ ಪೆಟ್ರೋಲಿಯಂ ಮತ್ತು ಸ್ಟೀಲ್ ಸಚಿವ ಧರ್ಮೇಂದ್ರ ಪ್ರಧಾನ್ ಸಹಿತ ವಾಣಿಜ್ಯ ಕ್ಷೇತ್ರದ ಆನಂದ್ ಮಹೀಂದ್ರಾ, ಸಲೀಲ್ ಪರೇಖ್ ಹಾಗೂ ಶೋಭನಾ ಕಮಿನೇನಿ ಭಾರತದಿಂದ ಶೃಂಗಸಭೆಯಲ್ಲಿ ಪಾಲ್ಗೊಳ್ಳಲಿರುವ ಇತರರಾಗಿದ್ದಾರೆ.