ಭರ್ಜರಿ ಮೈಲೇಜ್ ನೊಂದಿಗೆ ರೀ ಎಂಟ್ರಿ ಕೊಟ್ಟ ಹೊಸ ಹೀರೋ ಡೆಸ್ಟಿನಿ 125 ಸ್ಕೂಟರ್

ದೇಶದ ಜನಪ್ರಿಯ ಬೈಕ್ ಉತ್ಪಾದನಾ ಕಂಪನಿಯಾಗಿರುವ ಹೀರೋ ಮೋಟೊಕಾರ್ಪ್ (Hero Motocorp) ತನ್ನ ನವೀಕೃತ ಡೆಸ್ಟಿನಿ 125 ಸ್ಕೂಟರ್ ಅನಾವರಣಗೊಳಿಸಿದ್ದು, ಹೊಸ ಸ್ಕೂಟರ್ ಮಾದರಿಯನ್ನು ಪ್ರತಿಸ್ಪರ್ಧಿ ಮಾದರಿಗಳಿಗೆ ಪೈಪೋಟಿಯಾಗಿ ಹಲವಾರು ಬದಲಾವಣೆಯೊಂದಿಗೆ ಸಿದ್ದಪಡಿಸಲಾಗಿದೆ. ಹೊಸ ಸ್ಕೂಟರ್ ಮುಂದಿನ ಕೆಲವೇ ವಾರಗಳಲ್ಲಿ ಅಧಿಕೃತವಾಗಿ ಬಿಡುಗಡೆಯಾಗಲಿದ್ದು, ಇದು 125 ಸಿಸಿ ಸ್ಕೂಟರ್ ವಿಭಾಗದಲ್ಲಿ ಹೊಸ ಸಂಚಲನ ಮೂಡಿಸುವ ತವಕದಲ್ಲಿದೆ.

ಸುಮಾರು 6 ವರ್ಷಗಳ ನಂತರ ಡೆಸ್ಟಿನಿ 125 ಸ್ಕೂಟರ್ ಮಾದರಿಯನ್ನು ಮರುಬಿಡುಗಡೆ ಮಾಡುತ್ತಿರುವ ಹೀರೋ ಮೋಟೊಕಾರ್ಪ್ ಕಂಪನಿಯು ಗ್ರಾಹಕರ ಸಲಹೆಗಳು ಮತ್ತು ಪ್ರತಿಸ್ಪರ್ಧಿ ಮಾದರಿಗಳಿಗೆ ಪೈಪೋಟಿಯಾಗುವ ಅಂಶಗಳನ್ನು ಒಳಗೊಂಡು ಹೊಸ ಮಾದರಿಯನ್ನು ಸಿದ್ದಪಡಿಸಲಾಗಿದೆ.

ಹೊಸ ಡೆಸ್ಟಿನಿ 125 ಸ್ಕೂಟರ್ ಮಾದರಿಯು ವಿಎಕ್ಸ್, ಜೆಡ್ಎಕ್ಸ್ ಮತ್ತು ಜೆಡ್ಎಕ್ಸ್ ಪ್ಲಸ್ ವೆರಿಯೆಂಟ್ ಗಳನ್ನು ಹೊಂದಿರಲಿದ್ದು, ಹಲವಾರು ಸ್ಟ್ಯಾಂಡರ್ಡ್ ಫೀಚರ್ಸ್ ಹೊಂದಿರಲಿವೆ. ಹೊಸ ಸ್ಕೂಟರಿನ ವಿಎಕ್ಸ್ ವೆರಿಯೆಂಟ್ ನಲ್ಲಿ ಡ್ರಮ್ ಬ್ರೇಕ್ ಸೇರಿದಂತೆ ಸಾಧರಣವಾದ ಅಗಲಾಗ್ ಡ್ಯಾಶ್ ಬೋರ್ಡ್, ಸಣ್ಣದಾಗಿರುವ ಎಲ್ಇಡಿ ಲೈಟ್ ಹೊಂದಿದ್ದು, ಇದರಲ್ಲಿ ಬೆಲೆ ಕಡಿಮೆ ಮಾಡಲು ಇಂಧನ ದಕ್ಷತೆ ಹೆಚ್ಚಿಸುವ ಹೀರೋ ಐ3ಎಸ್ ತಂತ್ರಜ್ಞಾನವನ್ನು ನೀಡಲಾಗಿಲ್ಲ.

ಜೆಡ್ಎಕ್ಸ್ ವೆರಿಯೆಂಟ್ ಖರೀದಿಸುವ ಗ್ರಾಹಕರಿಗೆ ಹೊಸ ಸ್ಕೂಟರ್ ನಲ್ಲಿ ಫ್ರಂಟ್ ಡಿಸ್ಕ್ ಬ್ರೇಕ್ ಸೇರಿದಂತೆ ಬ್ಲೂಟೂಥ್ ಕನೆಕ್ವಿಟಿ ಹೊಂದಿರುವ ಡಿಜಿಟಲ್ ಡ್ಯಾಶ್ ಬೋರ್ಡ್, ಬ್ಲಾಕ್ ಲಿಟ್ ಸ್ಟಾರ್ಟರ್ ಬಟನ್, ಪಿಲಿಯನ್ ಬ್ಲಾರ್ ರೆಸ್ಟ್, ಆಟೋ ಕಾನ್ಸಲ್ಲಿಂಗ್ ಇಂಡಿಕೇಟರ್ ಮತ್ತು ಇಂಧನ ದಕ್ಷತೆ ಹೆಚ್ಚಿಸುವ ಹೀರೋ ಐ3ಎಸ್ ತಂತ್ರಜ್ಞಾನವನ್ನು ನೀಡಲಾಗಿದೆ. ಇದರೊಂದಿಗೆ ಜೆಡ್ಎಕ್ಸ್ ಪ್ಲಸ್ ವೆರಿಯೆಂಟ್ ನಲ್ಲಿ ಜೆಡ್ಎಕ್ಸ್ ನಲ್ಲಿರುವ ಎಲ್ಲಾ ಸೌಲಭ್ಯಗಳೊಂದಿಗೆ ಹೆಚ್ಚುವರಿಯಾಗಿ ಕ್ರೋಮ್ ಆಕ್ಸೆಂಟ್ ಜೊತೆಗೆ ಮಷಿನ್ ಫೀನಿಶ್ಡ್ ಅಲಾಯ್ ವ್ಹೀಲ್ ಗಳನ್ನು ನೀಡಲಾಗಿದೆ.

ಮೂರು ವೆರಿಯೆಂಟ್ ಗಳಿಗೂ ಅನ್ವಯಿಸುವಂತೆ ಸಿಬಿಎಸ್ ಬ್ರೇಕಿಂಗ್ ಸಿಸ್ಟಂ, ಸೈಡ್ ಸ್ಟ್ಯಾಂಡ್ ಕಟ್ಅಪ್, ಬೂಟ್ ಲೈಟ್, ಯುಎಸ್ ಬಿ ಚಾರ್ಜಿಂಗ್ ಪೋರ್ಟ್ ಮತ್ತು ಹೊರಭಾಗದಲ್ಲಿರುವ ಫ್ಯೂಲ್ ಫಿಲ್ಲರ್ ನೀಡಲಾಗಿದ್ದು, 19 ಲೀಟರ್ ಸಾಮರ್ಥ್ಯದ ಅಂಡರ್ ಸೀಟ್ ಸ್ಟೋರೇಜ್, ಫ್ರಂಟ್ ಲಗೇಜ್ ಹುಕ್ ಸೌಲಭ್ಯಗಳಿರಲಿವೆ. ಜೊತೆಗೆ ಹೊಸ ಸ್ಕೂಟರ್ ನಲ್ಲಿ ಎರಡು ಬದಿಯಲ್ಲೂ 12 ಇಂಚಿನ ಟೈರ್ಸ್ ಸೇರಿದಂತೆ ಚಾರ್ಸಿನ್ ನಲ್ಲಿ ಬದಲಾವಣೆ ಮಾಡಲಾಗಿದೆ.

ಹೊಸ ಡೆಸ್ಟಿನಿ 125 ಸ್ಕೂಟರ್ ಚಾರ್ಸಿಸ್ ಈ ಹಿಂದಿನ ಮಾದರಿಗಿಂತಲೂ ತುಸು ಬದಲಾವಣೆ ಮಾಡಲಾಗಿದ್ದು, ಹೆಚ್ಚಿನ ಗಾತ್ರದ ಟೈರ್ ಬಳಕೆಗೆ ಅನುಕೂಲಕರವಾಗುವಂತೆ ವ್ಹೀಲ್ ಬೆಸ್ ಹೆಚ್ಚಿಸಲಾಗಿದೆ. ಹೊಸ ಸ್ಕೂಟರ್ ನಲ್ಲಿ ಈ ಹಿಂದಿನ ಮಾದರಿಗಿಂತ 57 ಎಂಎಂ ನಷ್ಟು ವ್ಹೀಲ್ ಬೆಸ್ ಹೆಚ್ಚಿಸಲಾಗಿದ್ದು, ಎಂಜಿನ್ ಆಯ್ಕೆಯಲ್ಲಿ ಯಾವುದೇ ಬದಲಾವಣೆ ಮಾಡಲಾಗಿಲ್ಲ.

ಡೆಸ್ಟಿನಿ 125 ಮಾದರಿಯಲ್ಲಿ ಹೀರೋ ಕಂಪನಿಯು ಈ ಹಿಂದಿನ 124.6 ಸಿಸಿ ಎಂಜಿನ್ ಏರ್ ಕೂಲ್ಡ್ ಎಂಜಿನ್ ನೀಡಿದ್ದು, ಇದು ಸಿವಿಟಿ ಗೇರ್ ಬಾಕ್ಸ್ ನೊಂದಿಗೆ 9 ಹಾರ್ಸ್ ಪವರ್ ಮತ್ತು 10 ಎನ್ಎಂ ಟಾರ್ಕ್ ಉತ್ಪಾದಿಸುತ್ತದೆ. ಹಾಗೆಯೇ ಹೊಸ ಸ್ಕೂಟರ್ ಸುಧಾರಿತ ತಂತ್ರಜ್ಞಾನ ಪ್ರೇರಿತ ಐ3ಎಸ್ ಸೌಲಭ್ಯದೊಂದಿಗೆ ಪ್ರತಿ ಲೀಟರ್ ಪೆಟ್ರೋಲ್ ಗೆ 59 ಕಿ.ಮೀ ಮೈಲೇಜ್ ನೀಡುವುದಾಗಿ ಭರವಸೆ ನೀಡಿದ್ದು, ಇದು ಎಕ್ಸ್ ಶೋರೂಂ ಪ್ರಕಾರ ರೂ. 85 ಸಾವಿರದಿಂದ ರೂ. 92 ಸಾವಿರ ಬೆಲೆ ಪಡೆದುಕೊಳ್ಳುವ ಸಾಧ್ಯತೆಗಳಿವೆ.