GST Rates Revision: ಜಿಎಸ್ಟಿ ಪರಿಷ್ಕರಣೆ ನಂತರ ದುಬಾರಿ- ಅಗ್ಗ ಆದ ವಸ್ತುಗಳು ಯಾವುವು ಎಂಬ ಪಟ್ಟಿ ಇಲ್ಲಿದೆ
ಜಿಎಸ್ಟಿ ಪರಿಷ್ಕರಣೆ ಆದ ನಂತರ ಯಾವ್ಯಾವ ವಸ್ತುಗಳು ದುಬಾರಿ ಆದವು ಹಾಗೂ ಅಗ್ಗ ಆದವು ಎಂಬ ಬಗ್ಗೆ ಮಾಹಿತಿ ಈ ಲೇಖನದಲ್ಲಿದೆ.
Updated on: Jun 29, 2022 | 7:19 PM
ಚಂಡೀಗಢದಲ್ಲಿ ನಡೆದ 47ನೇ ಜಿಎಸ್ಟಿ (GST) ಕೌನ್ಸಿಲ್ ಸಮಿತಿ ಸಭೆಯಲ್ಲಿ ಇನ್ನಷ್ಟು ವಸ್ತುಗಳನ್ನು ಜಿಎಸ್ಟಿ ವ್ಯಾಪ್ತಿಯೊಳಗೆ ತರುವುದಕ್ಕೆ ನಿರ್ಧರಿಸಲಾಗಿದೆ. ಇದರಿಂದಾಗಿ ಶ್ರೀ ಸಾಮಾನ್ಯರ ಪಾಲಿಗೆ ಕೆಲವು ಹೊರೆ ಆಗಲಿವೆ. ಪ್ರೀ ಪ್ಯಾಕ್ಡ್ ಆಹಾರ ವಸ್ತುಗಳ ಮೇಲೆ ಜಿಎಸ್ಟಿ ಹಾಕುವುದಕ್ಕೆ ನಿರ್ಧರಿಸಲಾಗಿದೆ. ಅದರಲ್ಲಿ ಆಹಾರ ಧಾನ್ಯ ಸಹ ಒಳಗೊಂಡಿದೆ. ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಸಚಿವರ ಗುಂಪು ತಮ್ಮ ಶಿಫಾರಸುಗಳನ್ನು ಮಾಡಿದೆ. ಜಿಎಸ್ಟಿ ಸಮಿತಿಯ ವಿನಾಯಿತಿ ಮತ್ತು ಇನ್ವರ್ಷನ್ ತಿದ್ದುಪಡಿ ಈ ವರ್ಷದ ಜುಲೈ 18ರಿಂದ ಜಾರಿಗೆ ಬಂದಿದೆ. ಜಿಎಸ್ಟಿ ಪರಿಷ್ಕರಣೆ ನಂತರ ಏರಿಕೆ ಹಾಗೂ ಇಳಿಕೆ ಕಾಣುವ ವಸ್ತುಗಳ ವಿವರ ಇಲ್ಲಿದೆ:
ದುಬಾರಿ ಆಗಲಿರುವ ವಸ್ತುಗಳು:
ಪ್ಯಾಕೇಜ್ಡ್ ಫುಡ್: ಪ್ರೀ- ಪ್ಯಾಕ್ಡ್, ಪ್ರೀ- ಲೇಬಲ್ಡ್ ಮೊಸರು, ಲಸ್ಸಿ ಮತ್ತು ಮಜ್ಜಿಗೆ ಮತ್ತಿತರ.
ಬ್ಯಾಂಕ್ ಚೆಕ್ ಬುಕ್ ವಿತರಣೆ: ಬ್ಯಾಂಕ್ ಚೆಕ್ಗಳ (ಬಿಡಿ ಅಥವಾ ಪುಸ್ತಕ ಸ್ವರೂಪದಲ್ಲಿ) ವಿತರಣೆ ಮೇಲೆ ಶೇ 18ರಷ್ಟು ಜಿಎಸ್ಟಿ ಶುಲ್ಕ.
ಹೋಟೆಲ್ ಕೋಣೆಗಳು: ಒಂದು ದಿನಕ್ಕೆ 1000 ರೂಪಾಯಿ ಒಳಗಿನ ಹೋಟೆಲ್ ರೂಮ್ಗೆ ಶೇ 12ರಷ್ಟು ಜಿಎಸ್ಟಿಗೆ ತರಲಾಗಿದೆ. ಸದ್ಯಕ್ಕೆ ಅದು ವಿನಾಯಿತಿ ಕೆಟಗರಿಯಲ್ಲಿತ್ತು.
ಆಸ್ಪತ್ರೆ ಬೆಡ್ಗಳು: ರೂಮ್ ಬಾಡಿಗೆ (ಐಸಿಯು ಹೊರತುಪಡಿಸಿ) ದಿನಕ್ಕೆ 5 ಸಾವಿರ ರೂಪಾಯಿ ಮೇಲ್ಪಟ್ಟು ವಿಧಿಸುವ ಆಸ್ಪತ್ರೆಗಳಲ್ಲಿ ಶೇ 5ರಷ್ಟನ್ನು ಐಟಿಸಿ ಹೊರತು ನೀಡಬೇಕು.
ಎಲ್ಇಡಿ ದೀಪ, ಲ್ಯಾಂಪ್ಸ್: ಎಲ್ಇಡಿ ದೀಪಗಳು, ಸಲಕರಣೆಗಳು, ಎಲ್ಇಡಿ ಲ್ಯಾಂಪ್ಗಳ ಬೆಲೆಯಲ್ಲಿ ಏರಿಕೆ ಆಗಲಿದೆ. ಜಿಎಸ್ಟಿ ಸಮಿತಿಯು ಶಿಫಾರಸು ಮಾಡಿರುವಂತೆ ಇನ್ವರ್ಟೆಡ್ ಸುಂಕ ರಚನೆ ಶೇ 12ರಿಂದ 18ಕ್ಕೆ ಏರಿಸಲಾಗಿದೆ.
ಚಾಕುಗಳು: ಚಾಕುಗಳು ಜತೆಗೆ ಕತ್ತರಿಸಿದ ಬ್ಲೇಡ್ಗಳು, ಪೇಪರ್ ಕತ್ತರಿಗಳು, ಪೆನ್ಸಿಲ್ ಶಾರ್ಪ್ನರ್ಗಳು ಮತ್ತು ಬ್ಲೇಡ್ಗಳು, ಸ್ಕಿಮ್ಮರ್ಸ್, ಕೇಕ್ ಸರ್ವರ್ಸ್ ಮುಂತಾದವುಗಳಿಗೆ ಶೇ 12ರಿಂದ 18ರಷ್ಟು ತೆರಿಗೆ ಹಾಕಲಾಗುತ್ತದೆ.
ಪಂಪ್ಸ್ ಮತ್ತು ಮಶೀನ್ಗಳು; ಸಬ್ ಮರ್ಸಬಲ್ ಪಂಪ್ಗಳು, ಬೈಸಿಕಲ್ ಪಂಪ್ಗಳು ಸೇರಿದಂತೆ ಇತರ ಮಶೀನ್ಗಳ ಮೇಲಿನ ಜಿಎಸ್ಟಿಯನ್ನು ಶೇ 12ರಿಂದ ಶೇ 18ಕ್ಕೆ ಏರಿಸಲಾಗಿದೆ.
ಪರಿಷ್ಕರಣೆ ನಂತರ ಅಗ್ಗ ಆಗುವ ವಸ್ತುಗಳು:
ರೋಪ್ವೇ ರೈಡ್ಗಳು: ರೋಪ್ವೇಗಳ ಮೂಲಕ ಸರಕುಗಳು ಮತ್ತು ಪ್ರಯಾಣಿಕರನ್ನು ಒಯ್ಯುವ ದರವನ್ನು ಶೇ 18ರಿಂದ ಶೇ 5ಕ್ಕೆ ಇಳಿಸಿದ್ದು, ಜತೆಗೆ ಇನ್ಪುಟ್ ಟ್ಯಾಕ್ಸ್ ಕ್ರೆಡಿಟ್ ಸೇವೆ ದೊರೆಯುತ್ತದೆ.
ಗೂಡ್ಸ್ ಒಯ್ಯುವ ಬಾಡಿಗೆ: ಗೂಡ್ಸ್ ಒಯ್ಯುವುದು ಜತೆಗೆ ತೈಲ ಮತ್ತು ಆಪರೇಟರ್ಸ್ ವೆಚ್ಚ ಜಿಎಸ್ಟಿ ಶೇ 18ರಿಂದ ಶೇ 12ಕ್ಕೆ ಇಳಿದಿದೆ.
ಅರ್ಥೋಪೆಡಿಕ್ ಅಪ್ಲೈಯನ್ಸಸ್: ಸ್ಪ್ಲಿಂಟ್ಸ್ ಮತ್ತು ದೇಹದ ಇತರ ಕೃತಕ ಭಾಗಗಳಿಗಾಗಿ ಶೇ 12ರಿಂದ ಶೇ 5ಕ್ಕೆ ಇಳಿಸಲಾಗಿದೆ.
ರಕ್ಷಣಾ ವಸ್ತುಗಳು: ಖಾಸಗಿ ಮಾರಾಟಗಾರರು/ಸಂಸ್ಥೆಗಳು ಆಮದು ಮಾಡಿಕೊಳ್ಳುವ ನಿರ್ದಿಷ್ಟ ವಸ್ತುಗಳ ಮೇಲೆ ಐಜಿಎಸ್ಟಿಯನ್ನು ವಿನಾಯಿತಿ ನೀಡಲಾಗಿದೆ.
ಇದನ್ನೂ ಓದಿ: GST: 1000 ರೂಪಾಯಿ ಒಳಗಿನ ಹೋಟೆಲ್ ಕೋಣೆಗಳಿಗೆ ವಿನಾಯಿತಿ ವಾಪಸ್, ಪ್ರೀ ಪ್ಯಾಕ್ಡ್ ಆಹಾರಗಳಿಗೆ ಜಿಎಸ್ಟಿ
