Amazon Great Indian Festival: ಅಮೆಜಾನ್ ಗ್ರೇಟ್ ಇಂಡಿಯನ್ ಫೆಸ್ಟಿವಲ್ ಸೇಲ್, ಕೋಟ್ಯಧಿಪತಿಗಳಾದ 650 ಮಾರಾಟಗಾರರು
ಈ ವರ್ಷದ ಗ್ರೇಟ್ ಇಂಡಿಯನ್ ಫೆಸ್ಟಿವಲ್ ಸೇಲ್ನಲ್ಲಿ 650 ಮಾರಾಟಗಾರರು ಕೋಟ್ಯಧಿಪತಿಗಳಾಗಿದ್ದಾರೆ ಎಂದು ಅಮೆಜಾನ್ ಗುರುವಾರ ತಿಳಿಸಿದೆ.
ನವದೆಹಲಿ: ಗ್ರೇಟ್ ಇಂಡಿಯನ್ ಫೆಸ್ಟಿವಲ್ ಸೇಲ್ನಲ್ಲಿ (Amazon Great Indian Festival) ಈವರೆಗೆ ಒಟ್ಟು 4.75 ಲಕ್ಷ ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಗಾತ್ರದ ಉದ್ದಿಮೆಗಳು ಭಾಗಿಯಾಗಿವೆ. 650 ಮಾರಾಟಗಾರರು ಕೋಟ್ಯಧಿಪತಿಗಳಾಗಿದ್ದಾರೆ ಎಂದು ಅಮೆಜಾನ್ (Amazon) ಗುರುವಾರ ತಿಳಿಸಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ಅಮೆಜಾನ್ ಬ್ಯುಸಿನೆಸ್ನಲ್ಲಿ ಖಾತೆ ತೆರೆದವರ ಪ್ರಮಾಣ ಶೇಕಡಾ 44ರಷ್ಟು ಹೆಚ್ಚಾಗಿದೆ. 6,000ದಷ್ಟು ಮಾರಾಟಗಾರರು ಇದೇ ಮೊದಲ ಬಾರಿ ಉತ್ಪನ್ನಗಳ ನೇರ ಮಾರಾಟಕ್ಕೆ (B2B) ಅವಕಾಶ ಪಡೆದಿದ್ದಾರೆ ಎಂದು ಕಂಪನಿ ತಿಳಿಸಿದೆ.
ಸಣ್ಣ ಹಾಗೂ ಮಧ್ಯಮ ಗಾತ್ರದ ಉದ್ದಿಮೆಗಳು, ಸ್ಟಾರ್ಟಪ್ಗಳು, ಮಹಿಳಾ ಉದ್ಯಮಿಗಳು ಗ್ರಾಹಕರಿಗೆ ದೇಶದಾದ್ಯಂತ ಅನೇಕ ರೀತಿಯ ಖರೀದಿಯ ಆಯ್ಕೆಗಳನ್ನು ಒದಗಿಸಿಕೊಟ್ಟಿದ್ದಾರೆ. ಹಬ್ಬದ ಅವಧಿಯಲ್ಲಿ ಪ್ರೈಂ ಸದಸ್ಯರ ಸಂಖ್ಯೆ ಹೆಚ್ಚಾಗಿದೆ. ಇನ್ನಷ್ಟು ಮಾರಾಟಗಾರರು, ವಿಶೇಷವಾಗಿ 2-3ನೇ ಹಂತದ ನಗರಗಳಿಂದ ನಮ್ಮ ಜತೆ ಸೇರಿಕೊಳ್ಳುತ್ತಿದ್ದಾರೆ ಎಂದು ಅಮೆಜಾನ್ ಇಂಡಿಯಾದ ಗ್ರಾಹಕ ವ್ಯವಹಾರಗಳ ನಿರ್ವಾಹಕ ಮನೀಷ್ ತಿವಾರಿ ತಿಳಿಸಿದ್ದಾರೆ.
ಲಕ್ಷ, ಕೋಟ್ಯಧಿಪತಿಗಳಾದ ಮಾರಾಟಗಾರರು:
ಈ ಬಾರಿ ಹಬ್ಬದ ಅವಧಿಯ ಮಾರಾಟ ಮೇಳದಲ್ಲಿ 650 ಮಾರಾಟಗಾರರು ಕೋಟಿ ಗಳಿಸಿದ್ದಾರೆ. 23,000 ಮಾರಾಟಗಾರರು ಲಕ್ಷಾಧಿಪತಿಗಳಾಗಿದ್ದಾರೆ. 35,000 ಮಾರಾಟಗಾರರು ದಿನವೊಂದರ ಗರಿಷ್ಠ ಗಳಿಕೆ ದಾಖಲಿಸಿದ್ದಾರೆ. ಈ ಪೈಕಿ ಶೇಕಡಾ 70ರಷ್ಟು ಮಾರಾಟಗಾರರು ಎರಡು ಹಾಗೂ ಮೂರನೇ ಹಂತದ ನಗರಗಳಿಂದ ಉದ್ದಿಮೆಯಲ್ಲಿ ತೊಡಗಿಸಿಕೊಂಡವರು. ಗೃಹ, ಸೌಂದರ್ಯ, ಅಡುಗೆ ಸಲಕರಣೆಗಳು ವಿಭಾಗಗಳಲ್ಲಿ 4,000 ಮಾರಾಟಗಾರರು ಹೆಚ್ಚಿನ ಗಳಿಕೆ ದಾಖಲಿಸಿದ್ದಾರೆ ಎಂದು ಕಂಪನಿ ತಿಳಿಸಿದೆ.
ಪ್ರತಿ ವರ್ಷ ಹಬ್ಬದ ಸೀಸನ್ನಲ್ಲಿ ಅಮೆಜಾನ್ ಗ್ರೇಟ್ ಇಂಡಿಯನ್ ಫೆಸ್ಟಿವಲ್ ಸೇಲ್ ಹಮ್ಮಿಕೊಳ್ಳುತ್ತದೆ. ವಾಲ್ಮಾರ್ಟ್ ಒಡೆತನದ ಪ್ರಸಿದ್ಧ ಇ ಕಾಮರ್ಸ್ ತಾಣ ಫ್ಲಿಪ್‌ಕಾರ್ಟ್ ಕೂಡ ಇಂಥದ್ದೇ ಹಬ್ಬದ ವಿಶೇಷ ಮಾರಾಟ ಹಮ್ಮಿಕೊಳ್ಳುತ್ತದೆ. ಅನೇಕ ಆಫರ್ಗಳು, ರಿಯಾಯಿತಿ ಕೊಡುಗೆ ಮಾರಾಟ, ರಿವಾರ್ಡ್ಗಳನ್ನು ಗೆಲ್ಲುವ ಅವಕಾಶವನ್ನು ಗ್ರಾಹಕರಿಗೆ ನೀಡಲಾಗುತ್ತದೆ. ಪ್ರೈಮ್‌ ಸದಸ್ಯರಿಗೆ ವಿಶೇಷ ರಿಯಾಯಿತಿಗಳನ್ನೂ ನೀಡಲಾಗುತ್ತಿದೆ. ಈ ಬಾರಿ ಫೆಸ್ಟಿವಲ್ ಸೇಲ್ನ ಆರಂಭಿಕ ದಿನದಂದು ಪ್ರೈಮ್‌ ಸದಸ್ಯರಾಗಿರುವ ಗ್ರಾಹಕರಿಗೆ ಪ್ರತಿ 6 ಗಂಟೆಗಳಿಗೊಮ್ಮೆ ಹೊಸ ಆಫರ್‌ಗಳನ್ನು ನೀಡಲಾಗಿತ್ತು. ಈ ಬಾರಿಯ ಗ್ರೇಟ್ ಇಂಡಿಯನ್ ಫೆಸ್ಟಿವಲ್ ಸೇಲ್ ಸೆಪ್ಟೆಂಬರ್ 23ರಂದು ಆರಂಭವಾಗಿದ್ದು, ಒಂದು ತಿಂಗಳ ಕಾಲ ನಡೆಯುತ್ತಿದೆ.
