ಆರ್​ಬಿಐ ದರ ಹೆಚ್ಚಳದ ಬಳಿಕ ಫಿಕ್ಸೆಡ್ ಡೆಪಾಸಿಟ್ ದರ ಪರಿಷ್ಕರಣೆಯ ನಿರೀಕ್ಷೆ; ಠೇವಣಿ ದರ ಹೆಚ್ಚಿದರೆ ಎಷ್ಟು ಲಾಭ? ಇಲ್ಲಿದೆ ಡೀಟೇಲ್ಸ್

ನವದೆಹಲಿ, ಅಕ್ಟೋಬರ್ 7: ಭಾರತೀಯ ರಿಸರ್ವ್ ಬ್ಯಾಂಕ್​ನ ಹಣಕಾಸು ನೀತಿ ಸಮಿತಿಯು ರೆಪೋ ದರವನ್ನು 25 ಮೂಲಾಂಕಗಳಷ್ಟು ಹೆಚ್ಚಿಸಿದೆ. ಇದರಿಂದ ಗೃಹ ಸಾಲಗಳಿಗೆ ಬಡ್ಡಿದರ ಹೆಚ್ಚುವ ಸಾಧ್ಯತೆ ಇದೆ. ಹಾಗೆಯೇ, ಬ್ಯಾಂಕುಗಳು ಠೇವಣಿ ದರಗಳನ್ನೂ ಹೆಚ್ಚಿಸುವ ಸಾಧ್ಯತೆ ಇದೆ. ಎಷ್ಟು ಪ್ರಮಾಣದಲ್ಲಿ ಎಫ್​ಡಿ ದರಗಳು ಏರುತ್ತವೆ ಎಂಬುದು ಮುಂದಿನ ದಿನಗಳಲ್ಲಿ ಬ್ಯಾಂಕುಗಳ ನಿರ್ಧಾರದ ಮೇಲೆ ಅವಲಂಬಿತವಾಗಿರುತ್ತದೆ.

ಹಾಲಿ ಇರುವ ಎಫ್ಡಿಗಳಲ್ಲಿ ಬದಲಾವಣೆ ಇರುವುದಿಲ್ಲ…

ಫಿಕ್ಸೆಡ್ ಡೆಪಾಸಿಟ್ ಪ್ಲಾನ್​ಗಳಲ್ಲಿ ಬಡ್ಡಿದರ ಪೂರ್ವನಿಶ್ಚಿತವಾಗಿರುತ್ತದೆ. ಮಧ್ಯದಲ್ಲಿ ಬಡ್ಡಿದರ ಪರಿಷ್ಕರಣೆ ಆಗುವುದಿಲ್ಲ. ಹೀಗಾಗಿ, ಈಗಾಗಲೇ ಠೇವಣಿ ಇಟ್ಟಿರುವವರಿಗೆ ನಿಗದಿತ ಬಡ್ಡಿದರವೇ ಮುಂದುವರಿಯುತ್ತದೆ. ಠೇವಣಿ ದರ ಪರಿಷ್ಕರಣೆ ಬಳಿಕ ಬ್ಯಾಂಕುಗಳಲ್ಲಿ ಇಡುವ ಡೆಪಾಸಿಟ್​ಗಳಿಗೆ ಹೊಸ ಬಡ್ಡಿದರ ನಿಗದಿ ಆಗಬಹುದು. ಅಥವಾ ಹಾಲಿ ಇರುವ ಎಫ್​ಡಿ ಮೆಚ್ಯೂರ್ ಆಗಿ ಅದನ್ನು ರಿನಿವಲ್ ಮಾಡುವಾಗ ಹೊಸ ದರ ಅನ್ವಯ ಆಗಬಹುದು.

ಇದನ್ನೂ ಓದಿ: ಆರ್​ಬಿಐ ರೆಪೋ ದರ ಹೆಚ್ಚಳ; ಸಾಲಗಳ ಇಎಂಐನಲ್ಲಿ ಎಷ್ಟು ಹೆಚ್ಚಳವಾಗಬಹುದು ಇತ್ಯಾದಿ ವಿವರ ಇಲ್ಲಿದೆ

ಯಾವ ಬ್ಯಾಂಕುಗಳಲ್ಲಿ ಠೇವಣಿಗಳಿಗೆ ಹೆಚ್ಚು ಬಡ್ಡಿ ಸಿಗುತ್ತದೆ?

ಸಹಕಾರಿ ಬ್ಯಾಂಕುಗಳು, ಸ್ಮಾಲ್ ಫೈನಾನ್ಸ್ ಬ್ಯಾಂಕುಗಳಲ್ಲಿ ಸಾಮಾನ್ಯವಾಗಿ ಎಫ್​ಡಿ ದರಗಳು ಹೆಚ್ಚಿರುತ್ತವೆ. ಸೂರ್ಯೋದಯ್ ಸ್ಮಾಲ್ ಫೈನಾನ್ಸ್ ಬ್ಯಾಂಕ್, ಶಿವಾಲಿಕ್ ಎಸ್​ಎಂಬಿ ಇತ್ಯಾದಿ ಸ್ಮಾಲ್ ಫೈನಾನ್ಸ್ ಬ್ಯಾಂಕುಗಳಲ್ಲಿ ಠೇವಣಿ ದರ ಶೇ. 8ರ ಆಸುಪಾಸಿನಲ್ಲಿದೆ. ಕೆಲ ಬ್ಯಾಂಕುಗಳಲ್ಲಿ ಹಿರಿಯ ನಾಗರಿಕರ ಕೆಲ ಠೇವಣಿಗಳಿಗೆ ಶೇ. 9ರವರೆಗೂ ಬಡ್ಡಿ ನೀಡುವುದುಂಟು.

ಈ ಕಿರು ಬ್ಯಾಂಕುಗಳಿಗೆ ಹೋಲಿಸಿದರೆ ಪ್ರಮುಖ ಖಾಸಗಿ ಬ್ಯಾಂಕುಗಳು ಹಾಗೂ ಪಿಎಸ್​ಯು ಬ್ಯಾಂಕುಗಳಲ್ಲಿ ಠೇವಣಿ ದರ ಕಡಿಮೆ ಇರುತ್ತದೆ. ಅದರಲ್ಲೂ ಎಸ್​ಬಿಐ ಇತ್ಯಾದಿ ಪಿಎಸ್​ಯು ಬ್ಯಾಂಕುಗಳಲ್ಲಿ ಬಹಳ ಕಡಿಮೆ ಎಫ್​ಡಿ ದರಗಳಿರುತ್ತವೆ. ಇದಕ್ಕೆ ಕಾರಣ, ಸರ್ಕಾರಿ ಬ್ಯಾಂಕುಗಳಲ್ಲಿ ಅಪಾರ ಮೊತ್ತದ ಠೇವಣಿಗಳು ಹರಿದುಬರುತ್ತವೆ. ಮತ್ತು ಕಡಿಮೆ ಬಡ್ಡಿದರದಲ್ಲಿ ಸಾಲಗಳನ್ನು ನೀಡುತ್ತವೆ. ಸಣ್ಣ ಬ್ಯಾಂಕುಗಳು ಆಕರ್ಷಕ ಬಡ್ಡಿ ಆಫರ್ ಮಾಡಿ ಠೇವಣಿಗಳನ್ನು ಆಕರ್ಷಿಸುವುದು ಅನಿವಾರ್ಯ. ಇಲ್ಲದಿದ್ದರೆ ಅವುಗಳು ಜೀವಂತ ಉಳಿಯುವುದು ಕಷ್ಟ.

ಇದನ್ನೂ ಓದಿ: ಆರ್​ಬಿಐ ಎಂಪಿಸಿ ಸಭೆ: ರೆಪೋ ದರ ಶೇ. 5.50 ಗೆ ಏರಿಕೆ

25 ಮೂಲಾಂಕ ಬಡ್ಡಿ ಹೆಚ್ಚಿದರೆ ಎಷ್ಟು ಲಾಭ?

25 ಮೂಲಾಂಕಗಳಷ್ಟು ಬಡ್ಡಿ ಹೆಚ್ಚಿದರೆ ಅದರಿಂದ ಸಿಗುವ ರಿಟರ್ನ್ಸ್ ಗಮನಾರ್ಹವಾಗಿ ಹೆಚ್ಚುತ್ತದೆ. ಉದಾಹರಣೆಗೆ, ಎಚ್​ಡಿಎಫ್​ಸಿ ಬ್ಯಾಂಕ್​ನಲ್ಲಿ ಸಾಮಾನ್ಯ ಗ್ರಾಹಕನ 4 ವರ್ಷದ ಡೆಪಾಸಿಟ್​ಗೆ ಶೇ. 6.5 ವಾರ್ಷಿಕ ಬಡ್ಡಿದರ ಇದೆ. ನೀವು 5 ಲಕ್ಷ ರೂ ಅನ್ನು 4 ವರ್ಷಕ್ಕೆ ಡೆಪಾಸಿಟ್ ಇಟ್ಟರೆ, ಮೆಚ್ಯೂರಿಟಿ ವೇಳೆ, ನಿಮಗೆ 6,47,111 ರೂ ಸಿಗುತ್ತದೆ.

ಈಗ ಬಡ್ಡಿದರ ಶೇ. 6.75ಕ್ಕೆ ಏರಿದಲ್ಲಿ ನಿಮ್ಮ 5 ಲಕ್ಷ ರೂ ಠೇವಣಿಯು 4 ವರ್ಷದಲ್ಲಿ 6,317 ರೂ ಹೆಚ್ಚುವರಿ ಲಾಭ ಪಡೆಯುತ್ತದೆ. ಮೆಚ್ಯೂರಿಟಿಯಲ್ಲಿ ನಿಮಗೆ ಸಿಗುವ ರಿಟರ್ಸ್ 6,53,428 ರೂ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ