ಬಿಲ್ನಲ್ಲಿ ನಕಲಿ ಜಿಎಸ್ಟಿ ನಂಬರ್ ಕೊಟ್ಟು ಸರ್ಕಾರಕ್ಕೂ, ಗ್ರಾಹಕರಿಗೂ ಯಾಮಾರಿಸುತ್ತಾರೆ; ಅಸಲಿ ಪತ್ತೆ ಹಚ್ಚೋದು ಹೇಗೆ?
Know how to check authenticity of GST number: ಬಿಲ್ನಲ್ಲಿ ಜಿಎಸ್ಟಿ ಹೆಸರಿನಲ್ಲಿ ಹೆಚ್ಚುವರಿ ಹಣ ಪಡೆಯಲಾಗುತ್ತದೆ. ಆದರೆ, ಅಸಲಿಗೆ ಜಿಎಸ್ಟಿ ನೊಂದಾವಣಿಯೇ ಆಗಿರುವುದಿಲ್ಲ. ಇಂಥ ಹಲವು ಬ್ಯುಸಿನೆಸ್ಗಳು ಕಾಣದ ಕಣ್ಮರೆಯಲ್ಲಿ ವ್ಯಾಪಾರ ಮಾಡುತ್ತಿರುತ್ತವೆ. ಗ್ರಾಹಕ ಮತ್ತು ಸರ್ಕಾರ ಇಬ್ಬರಿಗೂ ಆಗುತ್ತಿರುವ ವಂಚನೆ ಇದು. ಒಂದು ಬ್ಯುಸಿನೆಸ್ನ ಜಿಎಸ್ಟಿ ನಂಬರ್ ಅಸಲಿಯಾ ಅಥವಾ ನಕಲಿಯಾ ಎಂದು ಪತ್ತೆ ಮಾಡುವುದು ಹೇಗೆ, ದೂರು ಕೊಡುವುದು ಹೇಗೆ ಎನ್ನುವ ವಿವರ ಇಲ್ಲಿದೆ.
Updated on: Jan 09, 2026 | 3:58 PM
ನೀವು ಹೋಟೆಲ್ಗೆ ಹೋದಾಗ ಅಥವಾ ಏನಾದರೂ ಸರಕು ಖರೀದಿಸಿದಾಗ ಜಿಎಸ್ಟಿ (GST) ಸೇರಿಸಿ ಬಿಲ್ ಹಾಕುತ್ತಾರೆ. ಬಿಲ್ನಲ್ಲಿ ಜಿಎಸ್ಟಿ ಶೇ. 5 ಅಥವಾ ಶೇ. 18 ಸೇರಿಸಲಾಗಿರುತ್ತದೆ. ಜೊತೆಗೆ ಜಿಎಸ್ಟಿ ನಂಬರ್ ಕೂಡ ನಮೂದಾಗಿರುತ್ತದೆ. ಇದನ್ನು ಕಂಡಾಗ ಅಧಿಕೃತವಾಗಿ ನಡೆಯುವ ಬ್ಯುಸಿನೆಸ್ ಎಂದು ಮೇಲ್ನೋಟಕ್ಕೆ ಗೊತ್ತಾಗುತ್ತದೆ. ಆದರೆ, ಕೆಲವರು ಬಿಲ್ನಲ್ಲಿ ಜಿಎಸ್ಟಿ ಸೇರಿಸಿರುತ್ತಾರೆ, ಆದರೆ, ಜಿಎಸ್ಟಿ ನಂಬರ್ ಏನು ಅಂತ ಹಾಕಿರೋದಿಲ್ಲ. ಜಿಎಸ್ಟಿ ನಂಬರ್ ಹಾಕಿದರೂ ಅದು ಅಸಲಿಯೋ ಅಥವಾ ನಕಲಿಯೋ ಎಂದು ಯಾರಿಗೆ ಗೊತ್ತು?
ಕೆಲ ವಂಚಕರು ನಕಲಿ ಜಿಎಸ್ಟಿ ನಂಬರ್ ಮತ್ತು ನಕಲಿ ಬಿಲ್ ಕೊಟ್ಟು ಗ್ರಾಹಕರ ಹಾಗೂ ಸರ್ಕಾರ ಇಬ್ಬರಿಗೂ ಪಂಗನಾಮ ಹಾಕುವುದುಂಟು. ಗ್ರಾಹಕರ ಜಾಗದಲ್ಲಿ ಉದ್ಯಮಿಯೇ ಆಗಿದ್ದರೆ ನಕಲಿ ಜಿಎಸ್ಟಿ ಕಾರಣದಿಂದ ಅವರಿಗೆ ಇನ್ಪುಟ್ ಟ್ಯಾಕ್ಸ್ ಕ್ರೆಡಿಟ್ ಕೂಡ ಸಿಕ್ಕೋದಿಲ್ಲ. ಅಷ್ಟಕ್ಕೂ, ನಕಲಿ ಜಿಎಸ್ಟಿ ನಂಬರ್ ಅನ್ನು ಪತ್ತೆ ಮಾಡುವುದು ಹೇಗೆ? ಈ ಕ್ರಮ ಬಹಳ ಸುಲಭ.
ಇದನ್ನೂ ಓದಿ: ಆನ್ಲೈನ್ ಫ್ರಾಡ್ ಆದರೆ, ಹೂಡಿಕೆ ಸ್ಕೀಮ್ ಬಗ್ಗೆ ಅನುಮಾನ ಬಂದರೆ ಆರ್ಬಿಐನ ಸಚೇತ್ ಪೋರ್ಟಲ್ ಮೊರೆಹೋಗಿ
ಪ್ಯಾನ್ ರೀತಿ ಜಿಎಸ್ಟಿನ್ಗೂ ಅರ್ಥಗರ್ಭಿತ ಅಂಕಿ ಅಕ್ಷರ ಸಂಯೋಜನೆ…
ಬ್ಯುಸಿನೆಸ್ ನಡೆಸುವ ಪ್ರತಿಯೊಬ್ಬ ವ್ಯಕ್ತಿ ಮತ್ತು ಸಂಸ್ಥೆಯೂ ಜಿಎಸ್ಟಿಗೆ ನೊಂದಾಯಿಸಿರಬೇಕು. ಹೀಗೆ ರಿಜಿಸ್ಟರ್ ಮಾಡಿಕೊಂಡಿದ್ದರೆ ವಿಶೇಷವಾದ 15 ಅಂಕಿಗಳಿರುವ ಜಿಎಸ್ಟಿ ನಂಬರ್ ನೀಡಲಾಗುತ್ತದೆ. ತೆರಿಗೆ ಪಾವತಿದಾರರಿಗೆ ಪ್ಯಾನ್ ನಂಬರ್ ಇದ್ದಂತೆ ಬ್ಯುಸಿನೆಸ್ಮ್ಯಾನ್ಗಳಿಗೆ ಜಿಎಸ್ಟಿ ನಂಬರ್ ಇರುತ್ತದೆ.
ಜಿಎಸ್ಟಿ ನಂಬರ್ 15 ಅಂಕಿಯದ್ದಾಗಿರುತ್ತದೆ. ರಾಜ್ಯದ ಕೋಡ್, ಬ್ಯುಸಿನೆಸ್ನ ಪ್ಯಾನ್ ನಂಬರ್ ಇತ್ಯಾದಿ ಇರುತ್ತವೆ. ಮೊದಲ ಎರಡು ಡಿಜಿಟ್ಗಳು ಅಂಕಿಯದ್ದಾಗಿರುತ್ತವೆ. ಕರ್ನಾಟಕದ್ದು 29 ಇರುತ್ತದೆ. ಮಹಾರಾಷ್ಟ್ರದ್ದು 27 ಇರುತ್ತದೆ. ಹೀಗೆ ಬೇರೆ ಬೇರೆ ರಾಜ್ಯಗಳಿಗೆ ಬೇರೆ ಬೇರೆ ಕೋಡ್ ಇರುತ್ತದೆ. ನಂತರದ 10 ಡಿಜಿಟ್ಗಳು, ಅಂದರೆ 3ರಿಂದ 12ರ ಅಂಕಿಗಳು ಪ್ಯಾನ್ ನಂಬರ್ ಆಗಿರುತ್ತದೆ. 13ನೇ ಅಂಕಿಯು ಆ ಪ್ಯಾನ್ ಅಡಿಯಲ್ಲಿ ಆ ರಾಜ್ಯದೊಳಗೆ ಎಷ್ಟು ನೊಂದಣಿ ಮಾಡಿಕೊಳ್ಳಲಾಗಿದೆ ಆ ಸಂಖ್ಯೆಯಾಗಿರುತ್ತದೆ. ಇನ್ನು, 14ನೇ ಅಂಕಿ ಡೀಫಾಲ್ಟ್ ಆಗಿ Z ಆಗಿರುತ್ತದೆ. ಕೊನೆಯ ಹಾಗು 15ನೇ ಅಂಕಿಯು ದೋಷ ಪತ್ತೆಗೆಂದು ಚೆಕ್ ಕೋಡ್ ಆಗಿ ಒಂದು ಅಂಕಿಯನ್ನೋ ಅಥವಾ ಅಕ್ಷರವನ್ನೋ ನೀಡಲಾಗಿರುತ್ತದೆ.
ನಕಲಿ ಜಿಎಸ್ಟಿ ನಂಬರ್ ಪತ್ತೆ ಮಾಡುವ ಕ್ರಮ ಹೇಗೆ?
ಜಿಎಸ್ಟಿ ನಂಬರ್ ನೊಂದಾಯಿತವಾಗಿದೆಯಾ, ಅಸಲಿಯಾ, ಅಲ್ಲವಾ ಎಂಬುದನ್ನು ಪತ್ತೆ ಮಾಡಬಹುದು. ಅದರ ಕ್ರಮ ಹೀಗೆ:
- ಜಿಎಸ್ಟಿ ಪೋರ್ಟಲ್ಗೆ ಹೋಗಿ. ಅದರ ವಿಳಾಸ: www.gst.gov.in/
- ಇಲ್ಲಿ ‘ಸರ್ವಿಸಸ್’ ಟ್ಯಾಬ್ನಲ್ಲಿ ‘ಸರ್ಚ್ ಟ್ಯಾಕ್ಸ್ಪೇಯರ್’ ಅನ್ನು ಕ್ಲಿಕ್ ಮಾಡಿ.
- ನಂತರ, ‘ಸರ್ಚ್ ಬೈ ಜಿಎಸ್ಟಿನ್/ಯುಐಎನ್’ ಆಯ್ಕೆ ಮಾಡಿ.
- ಸರ್ಚ್ ಬಾರ್ನಲ್ಲಿ 15 ಅಂಕಿಗಳ ಜಿಎಸ್ಟಿ ನಂಬರ್ ನಮೂದಿಸಿರಿ. ಬಳಿಕ ಕ್ಯಾಪ್ಚಾ ಹಾಕಿ ಸಬ್ಮಿಟ್ ಬಟನ್ ಒತ್ತಿರಿ.
ಇದನ್ನೂ ಓದಿ: ಪಿಎಫ್ ಹಣಕ್ಕೆ ಟ್ಯಾಕ್ಸ್ ಅನ್ವಯ ಆಗುತ್ತಾ? ವಿತ್ಡ್ರಾ ಮಾಡಿದಾಗ ಟ್ಯಾಕ್ಸ್ ಎಷ್ಟು? ನೀವು ತಿಳಿದಿರಬೇಕಾದ ಸಂಗತಿಗಳಿವು…
ಈಗ ಜಿಎಸ್ಟಿ ನಂಬರ್ ನೊಂದಾಯಿಸಿದ ಬ್ಯುಸಿನೆಸ್ ಸಂಸ್ಥೆಯ ಎಲ್ಲಾ ಜಾತಕ ಬಹಿರಂಗಗೊಳ್ಳುತ್ತದೆ. ಬ್ಯುಸಿನೆಸ್ನ ನೊಂದಾಯಿತ ಹೆಸರು, ಯಾವ ಕ್ಷೇತ್ರಗಳಲ್ಲಿ ವ್ಯಾಪಾರ, ರಿಜಿಸ್ಟ್ರೇಶನ್ ಆಗಿದ್ದು ಯಾವಾಗ, ಎಲ್ಲಿ ಇವೇ ಮುಂತಾದ ವಿವರಗಳನ್ನು ಯಾರು ಬೇಕಾದರೂ ನೋಡಬಹುದು.
ಜಿಎಸ್ಟಿ ನಂಬರ್ ನಕಲಿಯಾಗಿದ್ದರೆ ಏನು ಮಾಡಬೇಕು?
ಒಂದು ವೇಳೆ ಜಿಎಸ್ಟಿ ನಂಬರ್ ನಕಲಿಯಾಗಿದ್ದು ಗೊತ್ತಾದಾಗ ಅಲ್ಲಿ ವ್ಯಾಪಾರ ಮಾಡಬೇಡಿ. ಬಿಲ್ನಲ್ಲಿ ಸುಮ್ಮನೆ ಜಿಎಸ್ಟಿ ತೋರಿಸಿ ಗ್ರಾಹಕರಿಂದ ಹೆಚ್ಚು ಹಣ ವಸೂಲಿ ಮಾಡುತ್ತಿರಬಹುದು. ಸರ್ಕಾರಕ್ಕೆ ಹೋಗಬೇಕಾದ ಹಣವನ್ನು ತಾವೇ ಇಟ್ಟುಕೊಳ್ಳುತ್ತಿರಬಹುದು. ಹೀಗೆ ನಕಲಿ ಜಿಎಸ್ಟಿ ನಂಬರ್ ಹೊಂದಿರುವ ಕಂಪನಿ ವಿರುದ್ಧ ಹೆಲ್ಪ್ಡೆಸ್ಕ್ಗೆ ಇಮೇಲ್ ಕಳುಹಿಸಬಹುದು. ಅದರ ವಿಳಾಸ: helpdesk@gst.gov.in .
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
