ಚೀನಾದ ಕಾರ್ ಕಂಪನಿ ಬಿವೈಡಿ ಮೋಟಾರ್ಸ್ ವಿರುದ್ಧ ತೆರಿಗೆ ವಂಚನೆ ಆರೋಪ; ಡಿಆರ್​ಐನಿಂದ ತನಿಖೆ

ನವದೆಹಲಿ, ಆಗಸ್ಟ್ 2: ಚೀನಾದ ಅತಿದೊಡ್ಡ ಎಲೆಕ್ಟ್ರಿಕ್ ವಾಹನ ತಯಾರಕ ಸಂಸ್ಥೆ ಬಿವೈಡಿ ಮೋಟಾರ್ಸ್ (BYD Motors) ವಿರುದ್ಧದ ತೆರಿಗೆ ವಂಚನೆ ಆರೋಪ ಸಂಬಂಧ ಕಂದಾಯ ಗುಪ್ತಚರ ನಿರ್ದೇಶನಾಲಯ (DRI- Directorate of Revenue Intelligence) ತನಿಖೆ ನಡೆಸುತ್ತಿದೆ ಎಂದು ರಾಯ್ಟರ್ಸ್ ಸುದ್ದಿ ಸಂಸ್ಥೆ ಆಗಸ್ಟ್ 2ರಂದು ವರದಿ ಮಾಡಿದೆ. ಬಿವೈಡಿ ಸುಮಾರು 73 ಕೋಟಿ ರೂನಷ್ಟು ತೆರಿಗೆ ಪಾವತಿಸಿಲ್ಲ ಎಂಬುದು ಡಿಆರ್​ಐ ಆರೋಪ. ಡಿಅರ್​ಐನ ಪ್ರಾಥಮಿಕ ತನಿಖೆಯ ಬಳಿಕ ಈ ತೆರಿಗೆ ಹಣವನ್ನು ಬಿವೈಡಿ ಸಲ್ಲಿಸಿತ್ತಾದರೂ ಹೆಚ್ಚುವರಿ ತೆರಿಗೆ ಮತ್ತು ದಂಡ ಸಾಧ್ಯತೆಯನ್ನು ಅವಲೋಕಿಸಲು ಡಿಆರ್​ಐ ತನಿಖೆ ಕೈಗೊಂಡಿರುವುದು ತಿಳಿದುಬಂದಿದೆ. ಈ ಬಗ್ಗೆ ಡಿಆರ್​ಐನಿಂದ ಚೀನೀ ಕಾರ್ ಕಂಪನಿಗೆ ಅಂತಿಮ ನೋಟೀಸ್ ಸದ್ಯದಲ್ಲೇ ಸಲ್ಲಿಕೆಯಾಗಬಹುದು.

ಬಿವೈಡಿ ಮೋಟಾರ್ಸ್ ಚೀನಾದ ಅತಿದೊಡ್ಡ ಎಲೆಕ್ಟ್ರಿಕ್ ವಾಹನ ತಯಾರಕ ಸಂಸ್ಥೆ. ಭಾರತದಲ್ಲಿ ಅದರ ಎರಡು ಮಾಡೆಲ್​ಗಳು ಮಾರುಕಟ್ಟೆಯಲ್ಲಿವೆ. ಬಿವೈಡಿ ಇ6 ಮತ್ತು ಬಿವೈಡಿ ಆಟ್ಟೋ3 ಕಾರುಗಳು ಸುಮಾರು 30 ಲಕ್ಷ ರೂನಿಂದ 45 ಲಕ್ಷ ರೂವರೆಗೂ ಬೆಲೆ ಹೊಂದಿವೆ. ಈ ವರ್ಷದ ಕೊನೆಯಲ್ಲಿ ಬಿವೈಡಿ ಸೀಲ್ ಕಾರು ಮಾರುಕಟ್ಟೆಗೆ ಬರುವ ನಿರೀಕ್ಷೆ ಇದೆ.

ಇದನ್ನೂ ಓದಿ: IBC: ಬ್ಯಾಟರಿ ತಯಾರಿಕಾ ಘಟಕ ಸ್ಥಾಪನೆಗೆ ಕರ್ನಾಟಕ ಸರ್ಕಾರದೊಂದಿಗೆ ಐಬಿಸಿ ಒಪ್ಪಂದ

ಬಿವೈಡಿ ಸಂಸ್ಥೆ ಭಾರತದಲ್ಲಿ ಮಾರುವ ತನ್ನ ಕಾರುಗಳನ್ನು ಇಲ್ಲಿಯೇ ಅಸೆಂಬಲ್ ಮಾಡುತ್ತದೆ. ಇದರ ಬಿಡಿಭಾಗಗಳನ್ನು ಚೀನಾದಿಂದ ಆಮದು ಮಾಡಿಕೊಳ್ಳುತ್ತದೆ. ಈ ಬಿಡಿಭಾಗಗಳ ಆಮದಿಗೆ ಅದು ನಿಗದಿಗಿಂತ ಕಡಿಮೆ ತೆರಿಗೆ ಪಾವತಿಸಿರುವುದು ಭಾರತದ ಪ್ರಾಧಿಕಾರಗಳ ಗಮನಕ್ಕೆ ಬಂದಿದೆ. ಹೀಗಾಗಿ, ಡಿಆರ್​ಐನಿಂದ ತನಿಖೆ ನಡೆದಿರುವುದು.

ಎಲೆಕ್ಟ್ರಿಕ್ ಬಸ್ಸುಗಳನ್ನು ತಯಾರಿಸುವ ಒಲೆಕ್ಟ್ರಾ ಗ್ರೀನ್​ಟೆಕ್​ನ ಮಾಲೀಕ ಸಂಸ್ಥೆ ಮೇಘಾ ಎಂಜಿನಿಯರಿಂಗ್ ಅಂಡ್ ಇನ್​ಫ್ರಾಸ್ಟ್ರಕ್ಚರ್ಸ್ ಸಂಸ್ಥೆ ಬಿವೈಡಿ ಮೋಟಾರ್ಸ್ ಜೊತೆಗೂಡಿ ಹೈದರಾಬಾದ್​ನಲ್ಲಿ ಎಲೆಕ್ಟ್ರಿಕ್ ವಾಹನ ತಯಾರಿಕಾ ಘಟಕ ಸ್ಥಾಪಿಸುವ ಯೋಜನೆ ಪ್ರಸ್ತಾಪ ಇತ್ತು. ಹತ್ತರಿಂದ ಹದಿನೈದು ಸಾವಿರ ವಾಹನ ಉತ್ಪಾದನೆ ಸಾಧ್ಯವಿರುವ ಘಟಕಕ್ಕೆ ಮೇಘಾ ಎಂಜಿನಿಯರಿಂಗ್ ಸಂಸ್ಥೆ ಬಂಡವಾಳ ಹಾಕುವುದು, ಬಿವೈಡಿ ಮೋಟಾರ್ಸ್ ತಾಂತ್ರಿಕ ನೆರವು ಒದಗಿಸುವುದು ಎಂದು ಹೇಳಲಾಗಿತ್ತು. ಈ ಎರಡೂ ಕಂಪನಿಗಳು ಈ ಯೋಜನೆಯ ಪ್ರಸ್ತಾಪವನ್ನು ಡಿಪಿಐಐಟಿಗೆ ಸಲ್ಲಿಸಿದ್ದವು. ಕಳೆದ ತಿಂಗಳು ಕೇಂದ್ರ ಸರ್ಕಾರ ಈ ಪ್ರಸ್ತಾಪವನ್ನು ತಿರಸ್ಕರಿಸಿತು.

ಇದನ್ನೂ ಓದಿ: Loan: ಬೆಲೆ ಏರಿಕೆಯ ಬಿಸಿಯಲ್ಲಿ ಜೀವನ ನಡೆಸಲು ಸಾಲದ ಮೊರೆಹೋದ ಜನರು; ಕುತೂಹಲಕಾರಿ ಅಂಕಿಅಂಶಗಳು ಇಲ್ಲಿವೆ

ಚೀನಾದ ಹೂಡಿಕೆ ಮಿತಿಗೊಳಿಸುವುದು ಭಾರತದ ಉದ್ದೇಶ?

ಮೇಘಾ ಎಂಜಿನಿಯರಿಂಗ್ ಸಂಸ್ಥೆ ಜೊತೆ ಸೇರಿ ಭಾರತದಲ್ಲಿ ಕಾರು ಉತ್ಪಾದನೆ ಘಟಕ ಸ್ಥಾಪಿಸುವ ಬಿವೈಡಿ ಮೋಟಾರ್ಸ್ ಯೋಜನೆಯನ್ನು ಭಾರತ ಸರ್ಕಾರ ತಿರಸ್ಕರಿಸುವ ನಿರ್ಧಾರದ ಹಿಂದೆ ಕೇಂದ್ರದ ಎಫ್​ಡಿಐನ ಬದಲಾದ ನೀತಿ ಕೆಲಸ ಮಾಡಿದೆ. 2020ರ ಏಪ್ರಿಲ್​ನಲ್ಲಿ ವಿದೇಶೀ ನೇರ ಹೂಡಿಕೆ ನೀತಿಯಲ್ಲಿ ಕೇಂದ್ರ ಸರ್ಕಾರ ಒಂದು ಬದಲಾವಣೆ ಮಾಡಿತ್ತು. ಅದರ ಪ್ರಕಾರ ಭಾರತೀಯ ಕಂಪನಿಗಳಲ್ಲಿ ಹೂಡಿಕೆ ಮಾಡಲು ಬಯಸುವ ನೆರೆ ದೇಶದ ಸಂಸ್ಥೆಗಳು ಭಾರತ ಸರ್ಕಾರದಿಂದ ಅನುಮೋದನೆ ಪಡೆದುಕೊಳ್ಳಬೇಕು ಎಂಬುದು ಈ ನಿಯಮ.

ಸರ್ಕಾರ ಚೀನಾ ಹೆಸರನ್ನು ನೇರವಾಗಿ ಪ್ರಸ್ತಾಪಿಸದೇ ಹೋದರೂ, ಚೀನೀ ಕಂಪನಿಗಳು ಭಾರತದಲ್ಲಿ ಹೂಡಿಕೆ ಮಾಡುವುದನ್ನು ಮಿತಿಗೊಳಿಸಲು ಸರ್ಕಾರ ಈ ಕಾನೂನು ತಿದ್ದುಪಡಿ ಮಾಡಿರುವ ಸಾಧ್ಯತೆ ಇದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ