ITR: ಆದಾಯ ತೆರಿಗೆ ಕಟ್ಟಿದ್ದೀರಾ? ಈ ಮೀಮ್​ಗಳನ್ನು ನೋಡಿ ನಿಟ್ಟುಸಿರು ಬಿಡಿ

ಆದಾಯ ತೆರಿಗೆ ಪಾವತಿಗೆ ಜುಲೈ 31 ಅಂತಿಮ ದಿನಾಂಕವಾಗಿತ್ತು. ಅವಧಿ ಸಮೀಪಿಸುತ್ತಿದ್ದಂತೆ ಆನ್​ಲೈನ್​ನಲ್ಲಿ ಗಡುವನ್ನು ವಿಸ್ತರಿಸಲು ತೆರಿಗೆ ಪಾವತಿದಾರರು #Extend_Due_Date_Immediately ಎಂಬ ಹ್ಯಾಷ್​ಟ್ಯಾಗ್​ನಡಿ ಕೋರಿಕೆ ಸಲ್ಲಿಸಿದರು. ಈತನಕ ಸುಮಾರು 5,000 ಜನ ಪೋಸ್ಟ್​ಗಳನ್ನು ಟ್ವಿಟರ್​ನಡಿ ನೋಡಬಹುದಾಗಿದೆ. ಆದರೆ ಸರ್ಕಾರ ಅವಧಿ ವಿಸ್ತರಣೆಗೆ ಸಂಬಂಧಿಸಿದಂತೆ ಈ ಮನವಿ ಕುರಿತು ಯಾವುದೇ ಅಧಿಸೂಚನೆ ಹೊರಡಿಸಿಲ್ಲ. ಈ ಮಧ್ಯೆ ಕಳೆದ ಮೂರು ವರ್ಷಗಳಲ್ಲಿ ಆದಾಯ ತೆರಿಗೆ ಪಾವತಿಸಲು (ITR Filing) ಅವಧಿ ವಿಸ್ತರಿಸದೇ ಇರುವುದು ಇದೇ ಮೊದಲು ಎಂಬುದು ಗಮನಾರ್ಹ. ಹೀಗಾಗಿ ಬೇಸತ್ತ ಜನ ಟ್ವಿಟರ್​ನಲ್ಲಿ ಸಾಕಷ್ಟು ಮೀಮ್​ಗಳನ್ನು ಹಂಚಿಕೊಳ್ಳುವುದರ ಮೂಲಕ ತಮ್ಮ ಅಸಮಾಧಾನ ಹೊರಗೆಡವಿದ್ದಾರೆ. ಇಂಟರ್‌ನೆಟ್ ಸಮಸ್ಯೆ, ಲಾಗಿನ್ ಸಮಸ್ಯೆ, ಪ್ಯಾನ್​ಕಾರ್ಡ್​ ಹುಡುಕುವುದು ಹೀಗೆ ಫೈಲಿಂಗ್ ಮಾಡಬೇಕಾದ ಸಂದರ್ಭದಲ್ಲಿ ಎದುರಿಸುವ ಸಮಸ್ಯೆಗಳನ್ನಿಟ್ಟುಕೊಂಡೇ ಮೀಮ್​ಗಳು (ITR Meme) ಸೃಷ್ಟಿಯಾಗಿವೆ.

ಆದಾಯ ತೆರಿಗೆ ವೆಬ್‌ಸೈಟ್ ಪ್ರಕಾರ, ಜುಲೈ 28 ರವರೆಗೆ ಒಟ್ಟು 4,09,49,663 ಪಾವತಿದಾರರು ಆದಾಯ ತೆರಿಗೆ ಪಾವತಿಸಿದ್ದಾರೆ. ಈ ಪೈಕಿ 2,41,15,777 ಪಾವತಿಗಳನ್ನು ಪರಿಶೀಲಿಸಲಾಗಿದೆ. ಆದರೆ ಆದಾಯ ತೆರಿಗೆ ಪೋರ್ಟಲ್ ಮಾಹಿತಿಯ ಪ್ರಕಾರ, 10,45,31,679 ಜನರು ನೋಂದಾಯಿಸಿಕೊಂಡಿದ್ದರೂ ಪಾವತಿಯಾಗಿದ್ದು ಕೇವಲ ಶೇ. 40.

ಇದಕ್ಕೆ ಕಾರಣ, ಪೋರ್ಟಲ್​ನಲ್ಲಿ ಮಾಹಿತಿಯನ್ನು ತುಂಬುವಾಗ ವಿವಿಧ ರೀತಿಯ ತಾಂತ್ರಿಕ ಸಮಸ್ಯೆಗಳು ಎದುರಾಗಿದ್ದು. ಈ ಸಮಸ್ಯೆಗಳನ್ನೇ ಸಾಕಷ್ಟು ಜನರು ಟ್ವಿಟರ್​ ಮೂಲಕ ಹ್ಯಾಷ್​ಟ್ಯಾಗ್​ನಡಿ ವ್ಯಕ್ತಪಡಿಸಿ ಅಸಮಾಧಾನ ತೋರಿದ್ದಾರೆ. ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಮತ್ತು ಕೇಂದ್ರೀಯ ನೇರ ತೆರಿಗೆ ಮಂಡಳಿ ಮತ್ತಿತರ ಟ್ವಿಟರ್ ಖಾತೆಗಳಿಗೆ ಟ್ಯಾಗ್ ಮಾಡಿದ್ದಾರೆ. ಅನೇಕ ಕ್ಷೇತ್ರತಜ್ಞರು ತೆರಿಗೆ ಪಾವತಿಸಲು ಗಡುವನ್ನು ವಿಸ್ತರಿಸುವುದಿಲ್ಲವೆಂಬ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.