ಫಾರೆಕ್ಸ್ ರಿಸರ್ವ್ಸ್ ಸಾರ್ವಕಾಲಿಕ ದಾಖಲೆಯಾದ 689 ಬಿಲಿಯನ್ ಡಾಲರ್ ಮಟ್ಟಕ್ಕೆ ಏರಿಕೆ

ನವದೆಹಲಿ, ಸೆಪ್ಟೆಂಬರ್ 13: ಭಾರತದ ವಿದೇಶೀ ವಿನಿಮಯ ಮೀಸಲು ನಿಧಿ ಸೆ. 6ರಂದು 689.24 ಬಿಲಿಯನ್ ಡಾಲರ್ ಮಟ್ಟ ಮುಟ್ಟಿದೆ. ಫಾರೆಕ್ಸ್ ಇತಿಹಾಸದಲ್ಲೇ ಇದು ಸಾರ್ವಕಾಲಿಕ ದಾಖಲೆ ಎನಿಸಿದೆ. ಆಗಸ್ಟ್ 31ರಿಂದ ಸೆ. 6ರವರೆಗಿನ ಒಂದು ವಾರದಲ್ಲಿ 5.2 ಬಿಲಿಯನ್ ಡಾಲರ್​ನಷ್ಟು ಫಾರೆಕ್ಸ್ ನಿಧಿ ಉಬ್ಬಿದೆ. ಇದಕ್ಕೂ ಹಿಂದಿನ ವಾರದಲ್ಲೂ 2.3 ಬಿಲಿಯನ್ ಡಾಲರ್​ನಷ್ಟು ಹೆಚ್ಚಳವಾಗಿತ್ತು. 683.99 ಬಿಲಿಯನ್ ಡಾಲರ್ ಮೊತ್ತ ತಲುಪುವ ಮೂಲಕ ಹೊಸ ದಾಖಲೆ ಬರೆದಿತ್ತು. ಈಗ ಆ ದಾಖಲೆಯೂ ಅಳಿಸಿದ್ದು, 700 ಬಿಲಿಯನ್ ಡಾಲರ್ ಮೈಲಿಗಲ್ಲು ಮುಟ್ಟುವ ಹಾದಿಯಲ್ಲಿದೆ.

ಆರ್​ಬಿಐ ಇಂದು ಶುಕ್ರವಾರ ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ ಸೆ. 6ರ ವಾರದಲ್ಲಿ ಹೆಚ್ಚಳವಾದ 5.20 ಬಿಲಿಯನ್ ಡಾಲರ್​ನಲ್ಲಿ ವಿದೇಶೀ ಕರೆನ್ಸಿ ಆಸ್ತಿಯ ಪಾಲೇ 5.1 ಬಿಲಿಯನ್ ಡಾಲರ್​ನಷ್ಟಿದೆ. ಉಳಿದ ಮೂರು ಆಸ್ತಿಗಳೂ ಕೂಡ ಅಲ್ಪಸ್ವಲ್ಪ ಹೆಚ್ಚಳಗೊಂಡಿವೆ. ಚಿನ್ನದ ಮೀಸಲು ಸಂಪತ್ತು 129 ಮಿಲಿಯನ್ ಡಾಲರ್​ನಷ್ಟು ಹಿಗ್ಗಿದೆ. ಸ್ಪೆಷಲ್ ಡ್ರಾಯಿಂಗ್ ರೈಟ್ಸ್ ಅಥವಾ ಎಸ್​ಡಿಆರ್​ಗಳು 4 ಮಿಲಿಯನ್ ಡಾಲರ್​ನಷ್ಟು ಏರಿಕೆ ಆಗಿವೆ. ಐಎಂಎಫ್​ನೊಂದಿಗಿರುವ ನಿಧಿಯಲ್ಲಿ 9 ಮಿಲಿಯನ್ ಡಾಲರ್ ಹೆಚ್ಚಳವಾಗಿದೆ.

2024ರ ಸೆ. 6ರಂದು ಭಾರತದ ಫಾರೆಕ್ಸ್ ನಿಧಿ

ಒಟ್ಟು ಫಾರೆಕ್ಸ್ ನಿಧಿ: 689.24 ಬಿಲಿಯನ್ ಡಾಲರ್

• ಫಾರೀನ್ ಕರೆನ್ಸಿ ಅಸೆಟ್: 604.1 ಬಿಲಿಯನ್ ಡಾಲರ್
• ಗೋಲ್ಡ್ ರಿಸರ್ವ್ಸ್: 61.98 ಬಿಲಿಯನ್ ಡಾಲರ್
• ಎಸ್​ಡಿಆರ್: 18.47 ಬಿಲಿಯನ್ ಡಾಲರ್
• ಐಎಂಎಫ್​ನಲ್ಲಿನ ನಿಧಿ: 4.63 ಬಿಲಿಯನ್ ಡಾಲರ್

ಇದನ್ನೂ ಓದಿ: ಲಂಡನ್​ನಲ್ಲಿ ಓದಲು ಹೋಗೋರು ಗಮನಿಸಿ, ಮಾಸಿಕ ಮೈಂಟೆನೆನ್ಸ್ ಫಂಡ್ 1.63 ಲಕ್ಷ ರೂಗೆ ಏರಿಕೆ

ರುಪಾಯಿ ಮೌಲ್ಯ ಕುಸಿಯುವುದನ್ನು ತಡೆಯಲು, ರಫ್ತು ಆಮದು ಚಟುವಟಿಕೆ ಅಬಾಧಿತವಾಗಿ ನಡೆಯುವುದನ್ನು ಖಚಿತಪಡಿಸಲು, ಇವೇ ಮುಂತಾದ ಕಾರ್ಯಗಳಿಗೆ ಆರ್​ಬಿಐ ವಿದೇಶೀ ವಿನಿಮಯ ಮಾರುಕಟ್ಟೆಯ ಮೇಲೆ ನಿಗಾ ಇಟ್ಟಿರುತ್ತದೆ. ಅಗತ್ಯ ಬಿದ್ದಾಗ ಡಾಲರ್ ಆಸ್ತಿಯನ್ನು ಮಾರುತ್ತದೆ. ಅಥವಾ ಡಾಲರ್ ಖರೀದಿ ಹೆಚ್ಚಿಸುತ್ತದೆ. ಚಿನ್ನದ ಖರೀದಿ ಮಾಡಬಹುದು. ಇವೆಲ್ಲವೂ ಕೂಡ ಆರ್ಥಿಕ ಬೆಳವಣಿಗೆಗೆ ಪೂರಕವಾಗುವ ರೀತಿಯಲ್ಲಿ ಆರ್​ಬಿಐ ತೆಗೆದುಕೊಳ್ಳುವ ಕ್ರಮಗಳಾಗಿರುತ್ತವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ