ಜಾಗತಿಕ ಸಾಲ 21 ಟ್ರಿಲಿಯನ್ ಡಾಲರ್ ಏರಿಕೆ; ಎಲ್ಲಾ ದೇಶಗಳ ಸಾಲ ಸೇರಿಸಿದರೆ ಎಷ್ಟಾಗುತ್ತೆ ಗೊತ್ತಾ?

Global debt of 337.7 trillion dollar: 2025ರ ಜನವರಿಯಿಂದ ಜೂನ್ವರೆಗಿನ ವರ್ಷದ ಮೊದಲಾರ್ಧದಲ್ಲಿ ಜಾಗತಿಕ ಸಾಲ 21 ಟ್ರಿಲಿಯನ್ ಡಾಲರ್ನಷ್ಟು ಹೆಚ್ಚಳ ಆಗಿದೆ. ಇಂಟರ್ನ್ಯಾಷನಲ್ ಫೈನಾನ್ಸ್ ಇನ್ಸ್ಟಿಟ್ಯೂಟ್ ಸಂಸ್ಥೆ ಬಿಡುಗಡೆ ಮಾಡಿದ ವರದಿಯಲ್ಲಿ ಈ ಅಂಶವನ್ನು ಎತ್ತಿ ತೋರಿಸಲಾಗಿದೆ. ಈ 21 ಟ್ರಿಲಿಯನ್ ಡಾಲರ್ ಏರಿಕೆಯೊಂದಿಗೆ ಜಾಗತಿಕವಾದ ಒಟ್ಟು ಸಾಲ 337.7 ಟ್ರಿಲಿಯನ್ ಡಾಲರ್ಗೆ ಏರಿದಂತಾಗಿದೆ.

ಜಾಗತಿಕ ಸಾಲ

ಸುಗ್ಗನಹಳ್ಳಿ ವಿಜಯಸಾರಥಿ |
Updated on: Sep 26, 2025 | 5:00 PM

ನವದೆಹಲಿ, ಸೆಪ್ಟೆಂಬರ್ 26: ಜಾಗತಿಕ ಸಾಲ ಜನವರಿಯಿಂದ ಜೂನ್ವರೆಗೆ 21 ಟ್ರಿಲಿಯನ್ ಡಾಲರ್ನಷ್ಟು ಏರಿಕೆ ಆಗಿದೆ ಎಂದು ಇನ್ಸ್ಟಿಟ್ಯೂಟ್ ಆಫ್ ಇಂಟರ್ನ್ಯಾಷನಲ್ ಫೈನಾನ್ಸ್ (Institute of International Finance) ಸಂಸ್ಥೆಯ ವರದಿಯೊಂದು ಹೇಳುತ್ತಿದೆ. ಈ ವರ್ಷದ ಮೊದಲ ಆರು ತಿಂಗಳು ಸಾಲದ (Debt) ಪ್ರಮಾಣ ಹೆಚ್ಚಲು ಮುಖ್ಯ ಕಾರಣಗಳಲ್ಲಿ ಅಮೆರಿಕನ್ ಡಾಲರ್ ಮೌಲ್ಯ ಕಡಿಮೆ ಆಗಿರುವುದೂ ಒಂದು. ಈ 21 ಟ್ರಿಲಿಯನ್ ಡಾಲರ್ನಷ್ಟು ಸಾಲ ಏರಿಕೆಯೊಂದಿಗೆ ಇದೀಗ ಜಾಗತಿಕವಾಗಿ ಇರುವ ಸಾಲದ ಮೊತ್ತ 337.7 ಟ್ರಿಲಿಯನ್ ಡಾಲರ್ಗೆ ಏರಿದಂತಾಗಿದೆ. ಅಂದರೆ, ಅಮೆರಿಕ ಜಿಡಿಪಿಯ 11 ಪಟ್ಟು ಹೆಚ್ಚು ಮೊತ್ತದಷ್ಟು ಸಾಲವು ಜಾಗತಿಕವಾಗಿ ಇದೆ ಎಂದಾಗುತ್ತದೆ.

ಮೊದಲ ಆರು ತಿಂಗಳು ಹೆಚ್ಚಳವಾದ 21 ಟ್ರಿಲಿಯನ್ ಡಾಲರ್ ಸಾಲಕ್ಕೆ ಅತಿಹೆಚ್ಚು ಕೊಡುಗೆ ಬಂದಿರುವುದು ಚೀನಾ, ಫ್ರಾನ್ಸ್, ಅಮೆರಿಕ, ಜರ್ಮನಿ, ಬ್ರಿಟನ್ ಮತ್ತು ಜಪಾನ್ ದೇಶಗಳಿಂದ. ಕೋವಿಡ್ ಸಂದರ್ಭದಲ್ಲಿ ಮಾತ್ರ ಈ ಪರಿಯ ಸಾಲ ಏರಿಕೆ ಕಂಡುಬಂದಿತ್ತು ಎಂದು ಹೇಳುತ್ತದೆ ಐಐಎಫ್.

ಇದನ್ನೂ ಓದಿ: ಅಕ್ಟೋಬರ್ನಲ್ಲಿ ಹೊಸ ನಿಯಮಗಳು; ಯುಪಿಐ, ಎಲ್ಪಿಜಿ, ಬಡ್ಡಿಯಲ್ಲಿ ಬದಲಾವಣೆ?

ಇನ್ನು, ಭಾರತ ಸೇರಿದಂತೆ ಉದಯೋನ್ಮುಖ ಮಾರುಕಟ್ಟೆಗಳ ದೇಶಗಳಲ್ಲಿ ಸಾಲವು ಈ ಆರು ತಿಂಗಳಲ್ಲಿ 3.4 ಟ್ರಿಲಿಯನ್ ಡಾಲರ್ ಡಾಲರ್ನಷ್ಟು ಏರಿದೆ. ಈ ಎಮರ್ಜಿಂಗ್ ಮಾರ್ಕೆಟ್ಗಳ ಒಟ್ಟು ಸಾಲ 109 ಟ್ರಿಲಿಯನ್ ಡಾಲರ್ನಷ್ಟಿದೆ.