Indigo record: ವಿಶ್ವದ ಅತಿಮೌಲ್ಯಯುತ ಏರ್ಲೈನ್ಸ್ ಕಂಪನಿ ಎನಿಸಿದ ಭಾರತದ ಇಂಡಿಗೋ
India's Indigo become most valuable airlines: 20 ವರ್ಷದ ಹಿಂದೆ ಸ್ಥಾಪನೆಯಾದ ಭಾರತದ ಇಂಡಿಗೋ ಏರ್ಲೈನ್ಸ್ ವಿಶ್ವದ ಅತಿದೊಡ್ಡ ವಿಮಾನ ಸಂಸ್ಥೆಗಳಲ್ಲಿ ಒಂದೆನಿಸಿದೆ. ಮಾರುಕಟ್ಟೆ ಮೌಲ್ಯದಲ್ಲಿ ಅದು ವಿಶ್ವದ ಅತಿದೊಡ್ಡ ಏರ್ಲೈನ್ಸ್ ಎನಿಸಿದೆ. ಈ ವರ್ಷ ಮಾರುಕಟ್ಟೆ ಕುಸಿದರೂ ಇಂಡಿಗೋ ಏರ್ಲೈನ್ಸ್ ಷೇರು ಬೆಲೆ ಹೆಚ್ಚಿದ್ದು ಅದರ ಮಾರುಕಟ್ಟೆ ಸಂಪತ್ತು 2 ಲಕ್ಷ ಕೋಟಿ ರೂ ದಾಟಿದೆ.
ನವದೆಹಲಿ, ಏಪ್ರಿಲ್ 10: ಭಾರತದ ಅತಿದೊಡ್ಡ ಏರ್ಲೈನ್ಸ್ ಎನಿಸಿರುವ ಇಂಡಿಗೋ (Indigo Airlines) ಹೊಸ ದಾಖಲೆ ಮಾಡಿದೆ. ವಿಶ್ವದಲ್ಲೇ ಅತಿಹೆಚ್ಚು ಮಾರುಕಟ್ಟೆ ಮೌಲ್ಯ (Market cap) ಹೊಂದಿದ ಏರ್ಲೈನ್ಸ್ ಎನ್ನುವ ದಾಖಲೆ ಇಂಡಿಗೋ ಹೆಸರಲ್ಲಿ ದಾಖಲಾಯಿತು. ಅಮೆರಿಕದ ಡೆಲ್ಟಾ ಏರ್ಲೈನ್ (Delta Airline), ಐರ್ಲೆಂಡ್ನ ರಯಾನ್ಏರ್ ಹೋಲ್ಡಿಂಗ್ಸ್ ಸಂಸ್ಥೆಗಳ (RyanAir Holdings) ಮಾರುಕಟ್ಟೆ ಮೌಲ್ಯವನ್ನೂ ಮೀರಿಸಿತು ಇಂಡಿಗೋ. ಬುಧವಾರ ಕೆಲ ಹೊತ್ತಿನವರೆಗೂ ಈ ದಾಖಲೆ ಇಂಡಿಗೋ ಹೆಸರಲ್ಲಿ ಇತ್ತು. ಒಂದು ಹಂತದಲ್ಲಿ ಇದರ ಮಾರುಕಟ್ಟೆ ಮೌಲ್ಯ 23 ಬಿಲಿಯನ್ ಡಾಲರ್ ದಾಟಿ ಹೋಗಿತ್ತು.
ಕಡಿಮೆ ದರದಲ್ಲಿ ವಿಮಾನ ಪ್ರಯಾಣ ಸೇವೆ ಒದಗಿಸುವ ಇಂಡಿಗೋ ಈ ವರ್ಷ ಶೇ. 13ರಷ್ಟು ಷೇರು ಮೌಲ್ಯ ಹೆಚ್ಚಿಸಿಕೊಂಡಿದೆ. ಮಾರುಕಟ್ಟೆ ಕುಸಿತ ಕಂಡರೂ ಇಂಡಿಗೋ ಮೌಲ್ಯ ಹೆಚ್ಚಿಸಿಕೊಂಡಿದ್ದು ಗಮನಾರ್ಹ. 5,195 ರೂ ಷೇರುಬೆಲೆ ಹೊಂದಿದ್ದು, ಈ ವರ್ಷ 600 ರೂ ಮೌಲ್ಯ ಹೆಚ್ಚಳ ಆಗಿದೆ. ಅದರ ಒಟ್ಟು ಮಾರುಕಟ್ಟೆ ಮೌಲ್ಯ 2.01 ಲಕ್ಷ ಕೋಟಿ ರೂನಷ್ಟಿದೆ.
ಇದನ್ನೂ ಓದಿ: ಡಿಪಿಡಿಪಿ ಕಾಯ್ದೆಯೊಂದಿಗೆ ತಾಳೆಯಾಗುವ ಹೊಸ ಆಧಾರ್ ಕಾನೂನು ತಯಾರಿಯಲ್ಲಿ ಸರ್ಕಾರ
ಭಾರತದ ದೈತ್ಯ ಏರ್ಲೈನ್ಸ್ ಕಂಪನಿ ಇಂಡಿಗೋ
ಸರಿಯಾಗಿ 20 ವರ್ಷದ ಹಿಂದೆ ಸ್ಥಾಪನೆಯಾದ ಇಂಡಿಗೋ ಏರ್ಲೈನ್ಸ್ ಸಂಸ್ಥೆ ಇದೀಗ ಭಾರತದ ಏವಿಯೇಶನ್ ಮಾರುಕಟ್ಟೆಯ ಶೇ. 60ಕ್ಕಿಂತಲೂ ಹೆಚ್ಚಿನ ಪಾಲು ಹೊಂದಿದೆ. ರಾಹುಲ್ ಭಾಟಿಯಾ ಮತ್ತು ರಾಕೇಶ್ ಗಂಗವಾಲ್ ಸ್ಥಾಪಿಸಿದ ಈ ಕಂಪನಿ ಭಾರತ ಮಾತ್ರವಲ್ಲ, ಏಷ್ಯಾದ ಅತಿದೊಡ್ಡ ಏರ್ಲೈನ್ ಎನಿಸಿದೆ. ವಿಶ್ವದ ಅತಿದೊಡ್ಡ ಏರ್ಲೈನ್ಗಳ ಸಾಲಿನಲ್ಲಿ ಅದು ನಿಲ್ಲುತ್ತದೆ.
ದೇಶದ 91 ನಗರಗಳು ಮತ್ತು ವಿಶ್ವದ 37 ನಗರಗಳನ್ನು ಸಂಪರ್ಕಿಸುವ ಈ ಏರ್ಲೈನ್ಸ್ ನಿತ್ಯವೂ 2,200ಕ್ಕೂ ಹೆಚ್ಚು ಫ್ಲೈಟ್ಗಳ ಸೇವೆ ನೀಡುತ್ತದೆ. ವರ್ಷಕ್ಕೆ 10 ಕೋಟಿಗೂ ಅಧಿಕ ಪ್ರಯಾಣಿಕರು ಇಂಡಿಗೋ ಬಳಸುತ್ತಾರೆ.
ಇಂಡಿಗೋ ಏರ್ಲೈನ್ಸ್ ಬಳಿ ಸದ್ಯ 439 ವಿಮಾನಗಳಿವೆ. ಈ ಹಣಕಾಸು ವರ್ಷದಲ್ಲಿ 50 ಹೊಸ ವಿಮಾನಗಳನ್ನು ಹೊಂದಲು ಅದು ಯೋಜಿಸಿದೆ.
ಇದನ್ನೂ ಓದಿ: ಭಾರತ ಹೊಸ ಮೈಲಿಗಲ್ಲು; ಒಂದು ವರ್ಷದಲ್ಲಿ 2 ಲಕ್ಷ ಕೋಟಿ ರೂ ಮೌಲ್ಯದ ಸ್ಮಾರ್ಟ್ಫೋನ್ ರಫ್ತು
ಉತ್ತಮ ಲಾಭದಲ್ಲಿ ಇಂಡಿಗೋ ಏರ್ಲೈನ್ಸ್
ಭಾರತದಲ್ಲಿ ಏರ್ಲೈನ್ ಸಂಸ್ಥೆಗಳು ಲಾಭ ಕಾಣುವುದು ದುಸ್ತರ. ಆದರೆ, ಬಜೆಟ್ ಏರ್ಲೈನ್ಸ್ ಆದರೂ ಇಂಡಿಗೋ ಉತ್ತಮ ಆದಾಯ ಮತ್ತು ಲಾಭ ಕಾಣುತ್ತಿದೆ. 2024ರ ಅಕ್ಟೋಬರ್ನಿಂದ ಡಿಸೆಂಬರ್ವರೆಗಿನ ಕ್ವಾರ್ಟರ್ನಲ್ಲಿ 22,111 ಕೋಟಿ ರೂ ಆದಾಯ ಕಂಡಿದೆ. ಅದರ ನಿವ್ವಳ ಲಾಭ 2,449 ಕೋಟಿ ರೂ ದಾಖಲಾಗಿದೆ.
ಹಿಂದಿನ ವರ್ಷದ ಅದೇ ಅವಧಿಗೆ ಹೋಲಿಸಿದರೆ ಆದಾಯದಲ್ಲಿ ತುಸು ಹೆಚ್ಚಳವಾದರೂ ನಿವ್ವಳ ಲಾಭ ಸ್ವಲ್ಪ ಕಡಿಮೆ ಆಗಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 11:47 am, Thu, 10 April 25