ಅಕ್ಟೋಬರ್​ನಲ್ಲಿ ಆಮದು ಮತ್ತು ರಫ್ತು ಎರಡೂ ಹೆಚ್ಚಳ; ಟ್ರೇಡ್ ಡೆಫಿಸಿಟ್ ಹೊಸ ದಾಖಲೆ ಮಟ್ಟದಲ್ಲಿ

ನವದೆಹಲಿ, ನವೆಂಬರ್ 15: ಭಾರತದ ಅಂತಾರಾಷ್ಟ್ರೀಯ ವ್ಯಾಪಾರ ವಹಿವಾಟು ಅಕ್ಟೋಬರ್​ನಲ್ಲಿ ಹೆಚ್ಚಾಗಿದೆ. ಸರ್ಕಾರ ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ ರಫ್ತು ಮತ್ತು ಆಮದು ಎರಡೂ ಕೂಡ ಹೆಚ್ಚಾಗಿದೆ. ಅಕ್ಟೋಬರ್​ನಲ್ಲಿ ಭಾರತದ ರಫ್ತು (India exports) ಶೇ. 6.21ರಷ್ಟು ಹೆಚ್ಚಾಗಿದೆ. ಕಳೆದ ವರ್ಷದ ಅಕ್ಟೋಬರ್​ನಲ್ಲಿ 31.6 ಬಿಲಿಯನ್ ಡಾಲರ್​ನಷ್ಟಿದ್ದ ರಫ್ತು ಈ ಬಾರಿ 33.57 ಬಿಲಿಯನ್ ಡಾಲರ್​ಗೆ (2.8 ಲಕ್ಷ ಕೋಟಿ ರೂ) ಏರಿದೆ. ಇನ್ನು, ಆಮದು ಪ್ರಮಾಣ 2022ರ ಅಕ್ಟೋಬರ್​ನಲ್ಲಿ 57.91 ಬಿಲಿಯನ್ ಡಾಲರ್ ಇದ್ದದ್ದು ಈಗ 65.03 ಬಿಲಿಯನ್ ಡಾಲರ್​ಗೆ (5.4 ಲಕ್ಷ ಕೋಟಿ ರೂ) ಎರಿದೆ. ಇದರೊಂದಿಗೆ ಭಾರತದ ವ್ಯಾಪಾರ ಅಂತರ ಅಥವಾ ಟ್ರೇಡ್ ಡೆಫಿಸಿಟ್ 31.46 ಬಿಲಿಯನ್ ಡಾಲರ್​ನಷ್ಟಿದೆ.

ಅಕ್ಟೋಬರ್ ತಿಂಗಳಲ್ಲಿ ರಫ್ತು ಹೆಚ್ಚಾಗಿದ್ದರೂ ಈ ಹಣಕಾಸು ವರ್ಷದಲ್ಲಿ ಒಟ್ಟಾರೆಯಾಗಿ ರಫ್ತು ಇಳಿಕೆಯಾಗಿದೆ. ಏಪ್ರಿಲ್​ನಿಂದ ಅಕ್ಟೋಬರ್​ವರೆಗೆ 7 ತಿಂಗಳಲ್ಲಿ ಒಟ್ಟಾರೆ 244.89 ಬಿಲಿಯನ್ ಡಾಲರ್​ನಷ್ಟು ರಫ್ತಾಗಿದೆ. ಹಿಂದಿನ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ರಫ್ತು ಪ್ರಮಾಣ ಶೇ. 7ರಷ್ಟು ಕಡಿಮೆ ಆಗಿದೆ.

ಇದನ್ನೂ ಓದಿ: ಈ ಹಬ್ಬದ ಸೀಸನ್​ನಲ್ಲಿ ರೀಟೇಲ್ ಮಾರುಕಟ್ಟೆಯಲ್ಲಿ 3.75 ಲಕ್ಷಕೋಟಿ ರೂ ವಹಿವಾಟು; ಇದು ಹೊಸ ದಾಖಲೆ

ಆಮದು ವಿಚಾರದಲ್ಲೂ ಇದೇ ಟ್ರೆಂಡ್ ಇದೆ. ಅಕ್ಟೋಬರ್​ನಲ್ಲಿ ಆಮದು ಪ್ರಮಾಣ ಹೆಚ್ಚಾದರೂ ಏಪ್ರಿಲ್​ನಿಂದೀಚೆಗಿನ ದತ್ತಾಂಶ ಗಮನಿಸಿದರೆ ಆಮದು ಪ್ರಮಾಣ ಶೇ. 8.95ರಷ್ಟು ಇಳಿಮುಖ ಆಗಿದೆ. ಏಪ್ರಿಲ್​ನಿಂದ ಅಕ್ಟೋಬರ್​ವರೆಗೆ ಭಾರತ ಮಾಡಿರುವ ಒಟ್ಟಾರೆ ಆಮದು 391.96 ಬಿಲಿಯನ್ ಡಾಲರ್​ನಷ್ಟು ಎಂದು ಹೇಳಲಾಗಿದೆ.

ಇನ್ನಷ್ಟು ಹಿಗ್ಗಿದ ಟ್ರೇಡ್ ಡೆಫಿಸಿಟ್

ಅಕ್ಟೋಬರ್ ತಿಂಗಳಲ್ಲಿ ಭಾರತದ ಆಮದು ಮತ್ತು ರಫ್ತು ಹೆಚ್ಚಾಗಿದೆ. ಆದರೆ, ರಫ್ತಿಗೆ ಹೋಲಿಸಿದರೆ ಆಮದು ಬಹಳ ಹೆಚ್ಚಾಗಿದೆ. ಒಟ್ಟಾರೆ ಟ್ರೇಡ್ ಡೆಫಿಸಿಟ್ 26.3 ಬಿಲಿಯನ್ ಡಾಲರ್​ನಿಂದ 31.46 ಬಿಲಿಯನ್ ಡಾಲರ್​ಗೆ ಏರಿದೆ. ಒಂದು ತಿಂಗಳಲ್ಲಿ ವ್ಯಾಪಾರ ಅಂತರ ಅತಿಹೆಚ್ಚಾಗಿದ್ದು ಇದೇ ಮೊದಲೆನ್ನಲಾಗಿದೆ.

ಇದನ್ನೂ ಓದಿ: ಇನ್​ಫ್ಲೇಷನ್ ವರದಿ ಬಿಡುಗಡೆ; ಅಕ್ಟೋಬರ್​ನಲ್ಲಿ ಹಣದುಬ್ಬರ ಶೇ. 4.87ಕ್ಕೆ ಇಳಿಕೆ; ರಾಯ್ಟರ್ಸ್ ಪೋಲ್ ನಿರೀಕ್ಷೆ ನಿಜ

ಟ್ರೇಡ್ ಡೆಫಿಸಿಟ್ ಹೆಚ್ಚಾಗಲು ಚಿನ್ನದ ಆಮದು ಹೆಚ್ಚಳ ಕಾರಣವಾಗಿದೆ. ಕಳೆದ ವರ್ಷದ ಅಕ್ಟೋಬರ್​ಗೆ ಹೋಲಿಸಿದರೆ ಈ ಬಾರಿ ಚಿನ್ನದ ಆಮದು ದ್ವಿಗುಣಗೊಂಡಿದೆ. 3.7 ಬಿಲಿಯನ್ ಡಾಲರ್ ಇದ್ದ ಚಿನ್ನದ ಆಮದು ಈಗ 7.2 ಬಿಲಿಯನ್ ಡಾಲರ್​ಗೆ ಏರಿದೆ. ದೀಪಾವಳಿ ಹಬ್ಬದ ಕಾರಣ ಚಿನ್ನದ ಆಮದು ಏರಿಕೆ ಆಗಿದೆ. ಆರ್​ಬಿಐ ಕೂಡ ಚಿನ್ನದ ಮೀಸಲು ನಿಧಿಯನ್ನು ಹೆಚ್ಚಿಸುತ್ತಿದೆ. ಇದು ಒಟ್ಟಾರೆ ಟ್ರೇಡ್ ಡೆಫಿಸಿಟ್ ದಾಖಲೆ ಮಟ್ಟಕ್ಕೆ ಹಿಗ್ಗಲು ಕಾರಣವಾಗಿರುವುದು ತಿಳಿದು ಬಂದಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ