India Forex: ಭಾರತದ ವಿದೇಶ ವಿನಿಮಯ ಮೀಸಲು ನಿಧಿಯಲ್ಲಿ ಭರ್ಜರಿ ಏರಿಕೆ; ಟಾಪ್4 ರಾಷ್ಟ್ರದಲ್ಲಿ ಭಾರತ

ನವದೆಹಲಿ, ಜುಲೈ 23: ಭಾರತದ ವಿದೇಶ ವಿನಿಮಯ ಮೀಸಲು ನಿಧಿ (Forex Reserves) ಜುಲೈ 14ರಂದು ಅಂತ್ಯಗೊಂಡ ವಾರದಲ್ಲಿ 12.743 ಬಿಲಿಯನ್ ಡಾಲರ್​ನಷ್ಟು ಏರಿದೆ. ಇದರೊಂದಿಗೆ ಭಾರತದ ಫಾರೆಕ್ಸ್ ರಿಸರ್ವ್ಸ್ ನಿಧಿ ಮೊತ್ತ ಮತ್ತೊಮ್ಮೆ 600 ಬಿಲಿಯನ್ ಡಾಲರ್ ಗಡಿ ದಾಟಿದೆ. ಭಾರತದ ಆರ್ಥಿಕ ಚಟುವಟಿಕೆಗೆ ಅಗತ್ಯವಾಗಿರುವ ಫಾರೆಕ್ಸ್ ರಿಸರ್ವ್ಸ್ ಈಗ 609.022 ಬಿಲಿಯನ್ ಡಾಲರ್ ತಲುಪಿದೆ. ಅಂದರೆ ಸುಮಾರು 49.9 ಲಕ್ಷಕೋಟಿ ರೂಪಾಯಿಯಷ್ಟು ನಿಧಿ ಫಾರೆಕ್ಸ್ ಮೀಸಲಿನಲ್ಲಿದೆ.

ಕಳೆದ ಮೂರು ವಾರಗಳಿಂದ ಆರ್​ಬಿಐ ಬಹಳ ಸಮತೋಲಿತ ನಿರ್ಧಾರಗಳನ್ನು ಕೈಗೊಂಡಿದೆ. ಒಂದೆಡೆ ರಫ್ತು ಕುಂಠಿತವಾಗಬಾರದು, ರುಪಾಯಿ ಮೌಲ್ಯವೂ ಕುಸಿಯಬಾರದು, ಈ ದೃಷ್ಟಿಯಿಂದ ಆರ್​ಬಿಐ ತನ್ನ ಫಾರೆಕ್ಸ್ ನಿಧಿಗೆ ಡಾಲರ್​ಗಳನ್ನು ಖರೀದಿಸಿತ್ತು. ಏಷ್ಯಾದ ಇತರ ಕೆಲ ಕರೆನ್ಸಿಗಳು ಕುಸಿದರೂ ಭಾರತದ ಕರೆನ್ಸಿ ಮೌಲ್ಯ ಬಹುತೇಕ ಸ್ಥಿರವಾಗಿದೆ ಎಂಬ ಅಭಿಪ್ರಾಯ ಇದೆ.

ಇದನ್ನೂ ಓದಿ: Ajay Banga: ಚೀನಾ ಪ್ಲಸ್ ಒನ್ ಅವಕಾಶ 10 ವರ್ಷ ಇರಲ್ಲ, ಬೇಗ ಉದ್ಯೋಗಸೃಷ್ಟಿಸಿ: ವಿಶ್ವಬ್ಯಾಂಕ್ ಅಧ್ಯಕ್ಷ ಅಜಯ್ ಬಾಂಗ ಭಾರತಕ್ಕೆ ಸಲಹೆ

ಫಾರೆಕ್ಸ್​ನಲ್ಲಿ ಎಸ್​ಡಿಆರ್​ಗಳು ಹೆಚ್ಚು ಏರಿಕೆ

ಜುಲೈ 14ರಂದು ಅಂತ್ಯಗೊಂಡ ವಾರದಲ್ಲಿ ಫಾರೆಕ್ಸ್​ನಲ್ಲಿ 12.743 ಬಿಲಿಯನ್ ಡಾಲರ್​ನಷ್ಟು ಮೀಸಲು ನಿಧಿ ಹೆಚ್ಚಳವಾಗಿದೆ. ಇತ್ತೀಚಿನ ಕೆಲ ವಾರಗಳಲ್ಲಿ ಒಂದು ವಾರದಲ್ಲಿ ಭಾರತದ ಫಾರೆಕ್ಸ್ ಮೀಸಲು ನಿಧಿ ಕಂಡ ಅತಿಹೆಚ್ಚಳಗಳಲ್ಲಿ ಇದು ಒಂದು. ಫಾರೆಕ್ಸ್ ಮೀಸಲು ನಿಧಿಯಲ್ಲಿ ಇರುವ ಪ್ರಮುಖ ಅಂಶವಾದ ವಿದೆಶೀ ಕರೆನ್ಸಿ ಆಸ್ತಿ ಬರೋಬ್ಬರಿ 11.198 ಬಿಲಿಯನ್ ಡಾಲರ್​ನಷ್ಟು ಏರಿದೆ. ಗೋಲ್ಡ್ ರಿಸರ್ವ್ಸ್ 1.137 ಬಿಲಿಯನ್ ಡಾಲರ್ ಹಾಗು ಎಸ್​ಡಿಆರ್ (ಸ್ಪೆಷಲ್ ಡ್ರಾಯಿಂಗ್ ರೈಟ್ಸ್) 250 ಮಿಲಿಯನ್ ಡಾಲರ್​ನಷ್ಟು ಏರಿವೆ ಎಂದು ಆರ್​ಬಿಐ ಮಾಹಿತಿ ನೀಡಿದೆ. ಇನ್ನು ಐಎಎಂಎಫ್​ನೊಂದಿಗಿನ ಭಾರತದ ಮೀಸಲು ಪ್ರಮಾಣ 158 ಮಿಲಿಯನ್ ಡಾಲರ್​ನಷ್ಟು ಹೆಚ್ಚಾಗಿದೆ.

ಇದನ್ನೂ ಓದಿ: Car Loan: ಸೆಕೆಂಡ್ ಹ್ಯಾಂಡ್ ಕಾರು ಖರೀದಿಸುತ್ತೀರಾ? ಕಾರ್ ಲೋನ್ ಪಡೆಯುವ ಮುನ್ನ ಈ ವಿಚಾರ ತಿಳಿದಿರಿ

ಫಾರೆಕ್ಸ್ ರಿಸರ್ವ್ಸ್​ನಲ್ಲಿ ಭಾರತ ನಂ. 4

ಅತಿಹೆಚ್ಚು ವಿದೇಶ ವಿನಿಮಯ ಮೀಸಲು ನಿಧಿ ಹೊಂದಿರುವ ದೇಶಗಳ ಪೈಕಿ ಭಾರತವೂ ಒಂದು. ಈ ಪಟ್ಟಿ ಭಾರತ 4ನೇ ಸ್ಥಾನದಲ್ಲಿದೆ. ಚೀನಾ, ಜಪಾನ್ ಮತ್ತು ಸ್ವಿಟ್ಜರ್​ಲೆಂಡ್ ದೇಶಗಳು ಮೊದಲ 3 ಸ್ಥಾನದಲ್ಲಿವೆ. ಚೀನಾ ಬಳಿ 3,371 ಬಿಲಿಯನ್ ಡಾಲರ್​ನಷ್ಟು ಫಾರೆಕ್ಸ್ ಮೀಸಲು ನಿಧಿ ಇದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ