ನೂರು ವಂದೇ ಭಾರತ್ ರೈಲುಗಳ ತಯಾರಿಕೆಗೆ ಕರೆದಿದ್ದ 30,000 ಕೋಟಿ ರೂ ಟೆಂಡರ್ ರದ್ದು; ಫ್ರೆಂಚ್ ಸಂಸ್ಥೆಗೆ ನಿರಾಸೆ
Vande Bharat train manufacturing: ರೈಲ್ವೆ ಇಲಾಖೆ 2023ರ ಮೇನಲ್ಲಿ 100 ವಂದೇ ಭಾರತ್ ರೈಲುಗಳ ತಯಾರಿಕೆಗೆ ಕರೆಯಲಾಗಿದ್ದ ಟೆಂಡರ್ ಅನ್ನು ಈಗ ರದ್ದುಗೊಳಿಸಿದೆ. ಸಮಾಧಾನವಾಗುವಂತಹ ಬೆಲೆ ಸಿಕ್ಕದ ಹಿನ್ನೆಲೆಯಲ್ಲಿ ಟೆಂಡರ್ ಹಿಂಪಡೆಯಲಾಗಿರುವುದು ತಿಳಿದುಬಂದಿದೆ. ಎರಡು ಕಂಪನಿಗಳು ಮಾತ್ರವೇ ಬಿಡ್ ಸಲ್ಲಿಸಿದ್ದವು. ಈ ಪೈಕಿ ಫ್ರಾನ್ಸ್ ಮೂಲದ ಆಲ್ಸ್ಟೋಮ್ ಇಂಡಿಯಾ ಒಂದು ಟ್ರೈನ್ ಸೆಟ್ಗೆ 150.9 ಕೋಟಿ ರೂ ಬೆಲೆ ಹಾಕಿತ್ತು. ಇಲಾಖೆ ಮತ್ತೊಮ್ಮೆ ಬಿಡ್ ಆಹ್ವಾನಿಸುವ ಸಾಧ್ಯತೆ ಇದೆ.
ನವದೆಹಲಿ, ಆಗಸ್ಟ್ 13: ನೂರು ವಂದೇ ಭಾರತ್ ರೈಲುಗಳ ತಯಾರಿಕೆ ಮತ್ತು ನಿರ್ವಹಣೆಗೆ ಕಳೆದ ವರ್ಷ ಕರೆಯಲಾಗಿದ್ದ 30,000 ಕೋಟಿ ರೂ ಮೊತ್ತದ ಟೆಂಡರ್ ಅನ್ನು ಭಾರತೀಯ ರೈಲ್ವೇಸ್ ರದ್ದುಗೊಳಿಸಿದೆ. ಟೆಂಡರ್ನಲ್ಲಿ ಭಾಗಿಯಾಗಿದ್ದ ಎರಡು ಕಂಪನಿಗಳಲ್ಲಿ ಅತಿಕಡಿಮೆಗೆ ಬಿಡ್ ಮಾಡಿದ್ದು ಫ್ರಾನ್ಸ್ ಮೂಲದ ಆಲ್ಸ್ಟಾಮ್ ಇಂಡಿಯಾ ಸಂಸ್ಥೆ. ಟೆಂಡರ್ ರದ್ದುಗೊಳಿಸಲಾಗಿರುವುದನ್ನು ಈ ಫ್ರೆಂಚ್ ಸಂಸ್ಥೆಯ ಎಂಡಿ ಓಲಿವಿಯರ್ ಲೋಯ್ಸನ್ ಹೇಳಿದ್ದಾರೆ. ಮತ್ತೊಮ್ಮೆ ಅವಕಾಶ ಸಿಕ್ಕಿದರೆ ಮತ್ತೆ ಬಿಡ್ ಸಲ್ಲಿಸಿ ವಂದೇ ಭಾರತ್ ರೈಲುಗಳನ್ನು ತಯಾರಿಸುವುದಾಗಿ ಅವರು ಹೇಳಿದ್ದಾರೆ.
ಟೆಂಡರ್ ರದ್ದುಗೊಳಿಸಲು ಅಧಿಕ ಬೆಲೆ ಕಾರಣ
2023ರ ಮೇ 30ರಂದು ಅಲೂಮಿನಿಯಮ್ನಿಂದ 100 ವಂದೇ ಭಾರತ್ ರೈಲುಗಳನ್ನು ತಯಾರಿಸಲು ಟೆಂಡರ್ ಕರೆಯಲಾಗಿತ್ತು. ಐದಾರು ಕಂಪನಿಗಳು ಆಸಕ್ತಿ ತೋರಿದವರಾದರೂ ತಾಂತ್ರಿಕ ಅರ್ಹತೆ ಗಿಟ್ಟಿಸಲು ಹೆಚ್ಚಿನವು ವಿಫಲವಾಗಿದ್ದವು. ಅಂತಿಮವಾಗಿ ಫ್ರಾನ್ಸ್ನ ಆಲ್ಸ್ಟೋಮ್ ಇಂಡಿಯಾ ಮತ್ತು ಸ್ವಿಟ್ಜರ್ಲ್ಯಾಂಡ್ ಮೂಲದ ಸ್ಟಾಡ್ಲರ್ ರೈಲ್ ಸಂಸ್ಥೆ ಮಾತ್ರವೆ ಬಿಡ್ ಸಲ್ಲಿಸಿದ್ದು. ಹೈದರಾಬಾದ್ನ ಮೇಧಾ ಸರ್ವೋ ಡ್ರೈವ್ಸ್ ಮತ್ತು ಸ್ಟಾಡ್ಲರ್ ರೈಲ್ ಜಂಟಿಯಾಗಿ ಬಿಡ್ ಸಲ್ಲಿಸಿದ್ದವು. ಫ್ರೆಂಚ್ ಕಂಪನಿ ಒಂದು ರೈಲಿಗೆ 150.9 ಕೋಟಿ ರೂ ಬೆಲೆ ಪಟ್ಟಿ ಕೊಟ್ಟಿತ್ತು. ಸ್ವಿಸ್ ಕಂಪನಿ ನಿಗದಿ ಮಾಡಿದ ಬೆಲೆ 170 ರೂ ಆಗಿತ್ತು.
ಇದನ್ನೂ ಓದಿ: ಉತ್ತರ ಪ್ರದೇಶ: 111 ಕಿಲೋಮೀಟರ್ ಕನ್ವರ್ ಮಾರ್ಗ ನಿರ್ಮಾಣಕ್ಕಾಗಿ 1 ಲಕ್ಷ ಮರ ಕಡಿಯಲಾಗಿತ್ತೇ?
ಆದರೆ, ರೈಲ್ವೆ ಇಲಾಖೆ ಒಂದು ರೈಲಿಗೆ 140 ಕೋಟಿ ರೂನಂತೆ ಗುತ್ತಿಗೆ ಪಡೆಯುವ ಗುರಿ ಹೊಂದಿದೆ. ಎರಡು ಬಿಡ್ಗಳಲ್ಲಿ ಅತಿಕಡಿಮೆ ಬೆಲೆ 150 ರೂ ಆಗಿತ್ತು. ಇದು ದುಬಾರಿ ಎನಿಸಿದ್ದರಿಂದ ರೈಲ್ವೆ ಇಲಾಖೆ ಟೆಂಡರ್ ಅನ್ನು ರದ್ದುಗೊಳಿಸಲು ನಿರ್ಧರಿಸಿತು ಎನ್ನಲಾಗಿದೆ.
ಮತ್ತೆ ಹೊಸದಾಗಿ ಬಿಡ್ ಕರೆಯಲು ಇಲಾಖೆ ಸಜ್ಜು
ಕಳೆದ ವರ್ಷ ಕರೆಯಲಾಗಿದ್ದ ಟೆಂಡರ್ನಲ್ಲಿ ಹೆಚ್ಚು ಕಂಪನಿಗಳು ತಾಂತ್ರಿಕ ಕಾರಣಕ್ಕೆ ಬಿಡ್ ಸಲ್ಲಿಸಲು ಆಗಿರಲಿಲ್ಲ. ಟ್ರೈನ್ ತಯಾರಿಸುವ ಸಂಸ್ಥೆ ಆರ್ ಅಂಡ್ ಡಿ ಘಟಕ ಹೊಂದಿರಬೇಕು. ವರ್ಷಕ್ಕೆ ಕನಿಷ್ಠ ಐದು ಟ್ರೈನ್ ಸೆಟ್ಗಳನ್ನು ಹೊಂದಿಸುವ ಸಾಮರ್ಥ್ಯ ಇರಬೇಕು ಎಂಬುದು ತಾಂತ್ರಿಕ ಅರ್ಹತೆಗೆ ಇರುವ ಮಾನದಂಡ.
ರಷ್ಯಾದ ಟ್ರಾನ್ಸ್ಮ್ಯಾಷ್ ಹೋಲ್ಡಿಂಗ್ ಮತ್ತು ರೈಲ ವಿಕಾಸ್ ನಿಗಮ್; ಜರ್ಮನಿಯ ಸೀಮನ್ಸ್ ಮತ್ತು ಬೆಮೆಲ್ ಮೊದಲಾದ ಕಂಪನಿಗಳು ಕಳೆದ ವರ್ಷದ ಬಿಡ್ಡಿಂಗ್ನಲ್ಲಿ ವಿಫಲಗೊಂಡಿದ್ದವು. ಈಗ ಅವುಗಳಿಗೆ ತಾಂತ್ರಿಕ ಮಾನದಂಡಗಳನ್ನು ಪೂರೈಸಲು ಹೆಚ್ಚಿನ ಕಾಲಾವಕಾಶ ಕೊಟ್ಟು ಬಿಡ್ಡಿಂಗ್ ಸಲ್ಲಿಸುವಂತೆ ರೈಲ್ವೆ ಇಲಾಖೆ ಉತ್ತೇಜಿಸುವ ಸಾಧ್ಯತೆ ಇದೆ.
ಇದನ್ನೂ ಓದಿ: ಹುಟ್ಟಿಸಿದವರ ಅಹಂ..! ಪೇಟಿಎಂ, ಬೈಜುಸ್ ವೈಫಲ್ಯಕ್ಕೆ ಕಾರಣ ಹುಡುಕಿದ ಸಂಜಯ್ ನಾಯರ್
ಅಲೂಮಿನಿಯನ್ ಟ್ರೈನ್ ಯಾಕೆ?
ಹಿಂದೆ ಸ್ಟೈನ್ಲೆಸ್ ಸ್ಟೀಲ್ನ 200 ವಂದೇ ಭಾರತ್ ಟ್ರೈನ್ಗಳ ತಯಾರಿಕೆಗೆ ಗುತ್ತಿಗೆ ಕೊಡಲಾಗಿತ್ತು. ಇದರ ಒಂದು ಟ್ರೈನ್ ಸೆಟ್ ತಯಾರಿಕೆಗೆ 160 ಕೋಟಿ ರೂಗೂ ಹೆಚ್ಚು ವೆಚ್ಚವಾಗುತ್ತದೆ. ಅಲೂಮಿನಿಯಮ್ನ ಟ್ರೈನುಗಳು ಹೆಚ್ಚು ಹಗುರವಾಗಿರುತ್ತವೆ. ಹೆಚ್ಚು ವೇಗದಲ್ಲಿ ಹೋಗಬಲ್ಲುವು.
ಹೊಸ ವಂದೇ ಭಾರತ್ ರೈಲುಗಳು ಬಹಳ ಕಡಿಮೆ ಸಮಯದಲ್ಲಿ ಗರಿಷ್ಠ ವೇಗ ಪಡೆದುಕೊಳ್ಳುವಷ್ಟು ಸಮರ್ಥವಾಗಿರಲಿವೆ. ಗಂಟೆಗೆ 160 ಕಿಮೀ ವೇಗ ಪಡೆಯಲು ಕೇವಲ 140 ಸೆಕೆಂಡ್ ಸಾಕಾಗುತ್ತದೆ. ಈ ರೈಲುಗಳನ್ನು ನಿಲ್ಲಿಸಲು ಆಗುವ ಅವಧಿ ಕೂಡ ಬಹಳ ಕಡಿಮೆ ಹಿಡಿಯುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ