ದಾಖಲೆಯ ಸೌರವಿದ್ಯುತ್ ಮತ್ತು ವಾಯುವಿದ್ಯುತ್ ಉತ್ಪಾದನಾ ಸಾಮರ್ಥ್ಯ ಹೆಚ್ಚಿಸಿಕೊಂಡ ಭಾರತ

ನವದೆಹಲಿ, ಜನವರಿ 11: ಪೆಟ್ರೋಲಿಯಂನಂತಹ ಪಳೆಯುಳಿಕೆ ಇಂಧನಗಳ ಬಳಕೆ ಕಡಿಮೆ ಮಾಡಲು ನಿರಂತರವಾಗಿ ಪ್ರಯತ್ನಿಸುತ್ತಿರುವ ಭಾರತ ಈ ನಿಟ್ಟಿನಲ್ಲಿ ಸಾಕಷ್ಟು ಪರ್ಯಾಯ ಇಂಧನಗಳ ಉತ್ಪಾದನೆಯತ್ತ ಗಮನ ಹರಿಸುತ್ತಿದೆ. ಸೌರಶಕ್ತಿ ಮತ್ತು ವಾಯುಶಕ್ತಿ ಬಳಸಿ ವಿದ್ಯುತ್ ಉತ್ಪಾದಿಸುವ ಕಾರ್ಯವನ್ನು ಹೆಚ್ಚಿಸಿದೆ. ಜೆಎಂಕೆ ರಿಸರ್ಚ್​ನ ವರದಿ ಪ್ರಕಾರ 2024ರಲ್ಲಿ 24.5 ಗೀಗಾವ್ಯಾಟ್​ನಷ್ಟು ಸೌರವಿದ್ಯುತ್ ಉತ್ಪಾದನಾ ಸಾಮರ್ಥ್ಯವನ್ನು ಹೆಚ್ಚಿಸಿಕೊಂಡಿದೆ. ಹಾಗೆಯೇ, ವಾಯುಶಕ್ತಿ ಮೂಲಕ ವಿದ್ಯುತ್ ಉತ್ಪಾದನಾ ಸಾಮರ್ಥ್ಯ ಕಳೆದ ವರ್ಷ 3.4 ಗೀಗಾವ್ಯಾಟ್​ನಷ್ಟು ಹೆಚ್ಚಿಸಿಕೊಂಡಿದೆ. ಇವು ಹೊಸ ದಾಖಲೆಗಳೇ ಆಗಿವೆ.

ಈ ಹೊಸ ಸೇರ್ಪಡೆಗಳೊಂದಿಗೆ ಭಾರತದಲ್ಲಿ ಒಟ್ಟಾರೆ ನವೀಕರಣ ಇಂಧನ ಉತ್ಪಾದನಾ ಸಾಮರ್ಥ್ಯ ಬರೋಬ್ಬರಿ 209.44 ಗಿಗಾವ್ಯಾಟ್​ಗೆ ಏರಿದೆ. ಇದರಲ್ಲಿ ಸೌರಶಕ್ತಿಯ ಪಾಲೇ ಶೇ. 47ರಷ್ಟಿದೆ. ನವೀಕರಣ ಇಂಧನ ಅಥವಾ ಮರುಬಳಕೆ ಇಂಧನ ಮೂಲಗಳಲ್ಲಿ ಸೌರಶಕ್ತಿಯೇ ಅಗ್ರಜ ಆಗಿದೆ.

ದೊಡ್ಡ ಮಟ್ಟದ ಸೌರಶಕ್ತಿ ಉತ್ಪಾದನಾ (Utility Scale Solar) ಸಾಮರ್ಥ್ಯ 2024ರಲ್ಲಿ 18.5 ಗಿಗಾವ್ಯಾಟ್​ನಷ್ಟು ಹೆಚ್ಚಾಗಿದೆ. ರಾಜಸ್ಥಾನ, ಗುಜರಾತ್ ಮತ್ತು ತಮಿಳುನಾಡಿನಲ್ಲಿ ಈ ರೀತಿಯ ಸೌರಘಟಕಗಳು ಅತಿಹೆಚ್ಚು ಸ್ಥಾಪಿತವಾಗಿವೆ. 2024ರಲ್ಲಿ ಹೊಸದಾಗಿ ಸೇರ್ಪಡೆಯಾದ ಸೌರ ಘಟಕಗಳಲ್ಲಿ ಈ ಮೂರು ರಾಜ್ಯಗಳ ಪಾಲು ಶೇ. 71ರಷ್ಟಿದೆ.

ಇದನ್ನೂ ಓದಿ: ಕಾಶ್ಮೀರ ಕಣಿವೆಯ ದುರ್ಗಮ ಹಾದಿಯಲ್ಲಿ ರೈಲು ಪ್ರಯೋಗ ಯಶಸ್ವಿ; ಶೀಘ್ರದಲ್ಲೇ ಜಮ್ಮು-ಕಾಶ್ಮೀರಕ್ಕೆ ನೇರ ರೈಲು ಸಂಪರ್ಕ

ಮನೆ ಮೇಲ್ಛಾವಣಿ ಸೌರಘಟಕ

ಭಾರತದಲ್ಲಿ ಮೇಲ್ಛಾವಣಿ ಸೌರವಿದ್ಯುತ್ ಘಟಕಗಳ ಸ್ಥಾಪನೆ ಕಾರ್ಯ ಭರದಿಂದ ಸಾಗಿದೆ. 2024ರಲ್ಲಿ 4.59 ಗಿಗಾವ್ಯಾಟ್​ನಷ್ಟು ಹೊಸ ಸೌರ ವಿದ್ಯುತ್ ಉತ್ಪಾದನಾ ಸಾಮರ್ಥ್ಯ ಸೇರ್ಪಡೆಯಾಗಿದೆ. ಹಿಂದಿನ ವರ್ಷದಕ್ಕಿಂತ ಇದು ಶೇ. 53ರಷ್ಟು ಹೆಚ್ಚಳವಾಗಿದೆ.

ಪಿಎಂ ಸೂರ್ಯಘರ್ ಯೋಜನೆಯು ಈ ಮನೆ ಮೇಲಿನ ಸೌರವಿದ್ಯುತ್ ಸಾಮರ್ಥ್ಯ ಹೆಚ್ಚಲು ಪ್ರಮುಖ ಕಾರಣವಾಗಿದೆ. ಕೇವಲ 10 ತಿಂಗಳ ಅವಧಿಯಲ್ಲಿ ದೇಶಾದ್ಯಂತ 7 ಲಕ್ಷ ಸೌರಘಟಕಗಳನ್ನು ಮೇಲ್ಛಾವಣಿಗಳ ಮೇಲೆ ಸ್ಥಾಪಿಸಲಾಗಿದೆ.

ಇದನ್ನೂ ಓದಿ: ತಮಿಳುನಾಡಿನಲ್ಲಿ ವಿಶ್ವದರ್ಜೆ ಲ್ಯಾಪ್​ಟಾಪ್ ನಿರ್ಮಾಣಕ್ಕೆ ಹೊಸ ಘಟಕ; ಕೇಂದ್ರ ಸಚಿವ ಎ ವೈಷ್ಣವ್​ರಿಂದ ಅಡಿಗಲ್ಲು

ವಾಯುಶಕ್ತಿ ಮೂಲದ ವಿದ್ಯುತ್ ಉತ್ಪಾದನೆ ಶೇ. 21ರಷ್ಟು ಹೆಚ್ಚಳ

2024ರಲ್ಲಿ 3.4 ಗಿಗಾವ್ಯಾಟ್​ನಷ್ಟು ವಾಯು ವಿದ್ಯುತ್ ಉತ್ಪಾದನಾ ಸಾಮರ್ಥ್ಯ 2024ರಲ್ಲಿ ಸೇರ್ಪಡೆಯಾಗಿದೆ. ಇದರಲ್ಲಿ ಗುಜರಾತ್ ಮತ್ತು ಕರ್ನಾಟಕ ಮುಂಚೂಣಿಯಲ್ಲಿವೆ. 2024ರಲ್ಲಿ ಗುಜರಾತ್​ನಲ್ಲಿ 1,250 ಮೆಗಾವ್ಯಾಟ್, ಕರ್ನಾಟಕದಲ್ಲಿ 1,135 ಮೆಗಾವ್ಯಾಟ್ ಮತ್ತು ತಮಿಳುನಾಡಿನಲ್ಲಿ 980 ಮೆಗಾವ್ಯಾಟ್ ವಿಂಡ್ ಎನರ್ಜಿ ಸಾಮರ್ಥ್ಯ ಸೇರ್ಪಡೆಯಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ