ವಂಚಕರಿದ್ದಾರೆ ಹುಷಾರ್..! ಆಧಾರ್ ನಂಬರ್ ಬಹಿರಂಗಪಡಿಸಬೇಡಿ; ಅರೆಮುಚ್ಚಿದ ನಂಬರ್​ನ ಆಧಾರ್ ಡೌನ್​ಲೋಡ್ ಮಾಡಿ

ತಂತ್ರಜ್ಞಾನ ಹೆಚ್ಚಿದಂತೆ ಅದನ್ನು ದುರ್ಬಳಕೆ ಮಾಡಿಕೊಳ್ಳುವ ವಂಚಕರ ತಂತ್ರಗಾರಿಕೆಗಳೂ ಹಲವಿರುತ್ತವೆ. ಆರ್ಥಿಕ ವ್ಯವಸ್ಥೆಗೆ ಅನಿವಾರ್ಯದಂತೆಯೇ ಆಗಿ ಹೋಗಿರುವ ಆಧಾರ್ ಕಾರ್ಡ್ ಅನ್ನು ದುರುಳರು ದುರುಪಯೋಗ ಮಾಡಿಕೊಳ್ಳುತ್ತಿರುವ ಹಲವು ಪ್ರಕರಣಗಳು ದೇಶಾದ್ಯಂತ ಬೆಳಕಿಗೆ ಬರುತ್ತಲೇ ಇವೆ. 12 ಅಂಕಿಗಳಿರುವ ಆಧಾರ್ ನಂಬರ್ ಅನ್ನು ದುರ್ಬಳಕೆ ಮಾಡಿಕೊಳ್ಳುವ ಸಾಧ್ಯತೆ ಇರುತ್ತದೆ. ಇದನ್ನು ತಡೆಯಲು ಯುಐಡಿಎಐನಿಂದ ಮಾಸ್ಕ್ಡ್ ಆಧಾರ್ (Masked Aadhaar) ಸೌಲಭ್ಯ ಒದಗಿಸಲಾಗಿದೆ. ಮಾಸ್ಕ್ಡ್ ಆಧಾರ್ ಎಂದರೆ ಆಧಾರ್ ನಂಬರ್​ನ ಕೆಲ ಅಂಕಿಗಳನ್ನು ಮಸುಕು ಮಾಡಲಾಗಿರುತ್ತದೆ. ಇದರಿಂದ ಪೂರ್ಣ ಸಂಖ್ಯೆ ಬಹಿರಂಗವಾಗಿ ಕಾಣುವುದಿಲ್ಲ.

ಮಾಸ್ಕ್ಡ್ ಆಧಾರ್ ಅಥವಾ ಮಸುಕು ಮಾಡಿದ ಆಧಾರ್​ನಲ್ಲಿ ಕೊನೆ ನಾಲ್ಕಂಕಿ ಬಿಟ್ಟು ಉಳಿದ ಅಂಕಿಗಳು ಮುಚ್ಚಿರುತ್ತವೆ. ಆದರೆ, ಹೆಸರು, ಫೋಟೋ ಇತ್ಯಾದಿ ಡೆಮೋಗ್ರಾಫಿಕ್ ಮಾಹಿತಿ ಕಾಣುತ್ತದೆ. ಆಧಾರ್ ಸಂಖ್ಯೆ ದುರ್ಬಳಕೆ ಆಗದಂತೆ ತಡೆಯಲು ಈ ವ್ಯವಸ್ಥೆ ಮಾಡಲಾಗಿದೆ.

ಇದನ್ನೂ ಓದಿ: FD Rates: ಎಚ್​ಡಿಎಫ್​ಸಿ, ಎಸ್​ಬಿಐ, ಐಸಿಐಸಿಐ ಬ್ಯಾಂಕುಗಳಲ್ಲಿ ನಿಶ್ಚಿತ ಠೇವಣಿಗಳಿಗೆ ಬಡ್ಡಿದರ ಎಷ್ಟಿದೆ? ಇಲ್ಲಿದೆ ತುಲನೆ

ಮಾಸ್ಕ್ ಮಾಡಿದ ಆಧಾರ್ ಡೌನ್​ಲೋಡ್ ಮಾಡುವುದು ಹೇಗೆ?

• ಮೊದಲಿಗೆ ಯುಐಡಿಎಐ ವೆಬ್​ಸೈಟ್​ಗೆ ಹೋಗಿ: uidai.gov.in
• ಮುಖ್ಯಪುಟದಲ್ಲಿ ಮೈ ಆಧಾರ್ ಸೆಕ್ಷನ್​ಗೆ ಹೋಗಿ, ಅಲ್ಲಿ ‘ಡೌನ್​ಲೋಡ್ ಆಧಾರ್’ ಅನ್ನು ಕ್ಲಿಕ್ ಮಾಡಿ
• ಈಗ ಆಧಾರ್ ಡೌನ್​ಲೋಡ್ ಪುಟ ತೆರೆದುಕೊಳ್ಳುತ್ತದೆ.
• ಇಲ್ಲಿ 12 ಅಂಕಿಗಳ ಆಧಾರ್ ಸಂಖ್ಯೆಯನ್ನು ನಮೂದಿಸಿ. ಅಥವಾ 16 ಅಂಕಿಗಳ ವರ್ಚುವಲ್ ಐಡಿ ಸಂಖ್ಯೆ ನಮೂದಿಸಿ.
• ಜೊತೆಗೆ, ಆಧಾರ್​ನಲ್ಲಿರುವಂತೆ ಪೂರ್ಣ ಹೆಸರು, ಪಿನ್ ಕೋಡ್, ಸೆಕ್ಯುರಿಟಿ ಕೋಡ್ ವಿವರವನ್ನು ಈ ಪುಟದಲ್ಲಿ ನಮೂದಿಸಿ.
• ಬಳಿಕ ‘ಸೆಲೆಕ್ಟ್ ಯುವರ್ ಪ್ರಿಫರೆನ್ಸ್’ ಸೆಕ್ಷನ್​ನಲ್ಲಿ ‘ಮಾಸ್ಕ್ಡ್ ಆಧಾರ್’ ಅನ್ನು ಆಯ್ಕೆ ಮಾಡಿ.
• ನೊಂದಾಯಿತ ಮೊಬೈಲ್ ನಂಬರ್​ಗೆ ಬರುವ ಒಟಿಪಿ ಪಡೆದು, ಅದನ್ನು ನಮೂದಿಸಿದರೆ ವೆರಿಫಿಕೇಶನ್ ಪ್ರಕ್ರಇಯೆ ಪೂರ್ಣಗೊಳ್ಳುತ್ತದೆ.
• ಈಗ ಮಸುಕು ಮಾಡಿದ ಆಧಾರ್ ಅನ್ನು ಪಿಡಿಎಫ್ ಫಾರ್ಮ್ಯಾಟ್​ನಲ್ಲಿ ಡೌನ್​ಲೋಡ್ ಮಾಡಬಹುದು. ಈ ಪಿಡಿಎಫ್ ಫೈಲ್ ಪಾಸ್​ವರ್ಡ್ ರಕ್ಷಿತವಾಗಿರುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ