Kotak Bank: ಕೆನಡಾ ಪೆನ್ಷನ್ ಫಂಡ್ ಬಂಡವಾಳ ಹಿಂತೆಗೆತ; ಕೋಟಕ್ ಮಹೀಂದ್ರ ಬ್ಯಾಂಕ್​ನ 3.3 ಕೋಟಿ ಷೇರು ಬಿಕರಿ; ಬೆಲೆ ಎಷ್ಟಕ್ಕೆ?

ಮುಂಬೈ: ಕೆನಡಾ ಪೆನ್ಷನ್ ಫಂಡ್ ಸಂಸ್ಥೆ (Canada Pension Fund) ಕೋಟಕ್ ಮಹೀಂದ್ರ ಬ್ಯಾಂಕ್​ನಲ್ಲಿ ಹೊಂದಿರುವ ತನ್ನ ಕೆಲ ಷೇರುಪಾಲನ್ನು (Stake) ಮಾರಲು ನಿರ್ಧರಿಸಿದ ಬೆನ್ನಲ್ಲೇ ಕೋಟಕ್​ನ ಷೇರು ಶುಕ್ರವಾರ ಶೇ. 2ರಷ್ಟು ಕಡಿಮೆಬೆಲೆಗೆ ಕುಸಿತ ಕಂಡಿದೆ. ಗುರುವಾರ ಸಂಜೆ 1,885 ರೂ ಇದ್ದ ಕೋಟಕ್ ಬ್ಯಾಂಕ್ (Kotak Mahindra Bank) ಷೇರು ಬೆಲೆ ಶುಕ್ರವಾರ ಬೆಳಗ್ಗಿನ ಒಂದು ಹೊತ್ತಿನಲ್ಲಿ 1,845 ರುಪಾಯಿಗೆ ಕುಸಿತ ಕಂಡಿತ್ತು. ಈ ವರದಿ ಬರೆಯುವಾಗ ಕೋಟಕ್ ಷೇರು ಬೆಲೆ 1,865 ರುಪಾಯಿಯಲ್ಲಿತ್ತು. ಕೆನಡಾ ಪೆನ್ಷನ್ ಫಂಡ್ ತನ್ನ ಕೋಟಕ್ ಷೇರುಗಳನ್ನು ಮಾರಲು ಮುಂದಾದ ಬಳಿಕ ಈ ಬೆಲೆ ಇಳಿಕೆಯಾಗಿದೆ. ಕೋಟಕ್ ಬ್ಯಾಂಕ್​ನಲ್ಲಿ ಕೆನಡಾ ಪೆನ್ಷನ್ ಫಂಡ್ 8.63 ಕೋಟಿ ಷೇರುಗಳನ್ನು ಹೊಂದಿದೆ. ಅದರ ಷೇರುಪಾಲು ಶೇ. 4.34ರಷ್ಟಿದೆ. ಇದರಲ್ಲಿ 3.3 ಕೋಟಿ ಷೇರುಗಳನ್ನು 1792-1886 ರೂ ಬೆಲೆಗೆ ಮಾರುವುದಾಗಿ ಕೆನಡಾ ಪೆನ್ಷನ್ ಫಂಡ್ ಹೇಳಿತ್ತು. ಬಿಎಸ್​ಇ ಎಕ್ಸ್​ಚೇಂಜ್ ಡಾಟಾ ಪ್ರಕಾರ ಇಷ್ಟೂ ಷೇರುಗಳು ಮಾರಾಟವಾಗಿವೆ.

ಬಿಎಸ್​ಇ ಷೇರುಪೇಟೆಯಲ್ಲಿ ಎರಡು ಬ್ಲಾಕ್ ಡೀಲ್​ಗಳಲ್ಲಿ 3.3 ಕೋಟಿ ಷೇರುಗಳು ಮಾರಲಾಗಿರುವುದು ತಿಳಿದುಬಂದಿದೆ. ಬೆಳಗ್ಗೆ 9:15ಕ್ಕೆ 2.2 ಕೋಟಿ ಷೇರುಗಳು 1,855 ರೂ ಬೆಲೆಗೆ ಮಾರಾಟವಾಗಿವೆ. ಇನ್ನು, 1.09 ಕೋಟಿ ಷೇರುಗಳು ನಂತರದ ಸಮಯದಲ್ಲಿ 1,864.15 ರೂ ಬೆಲೆಗೆ ಮಾರಾಟ ಕಂಡಿವೆ. ಕೆನಡಾ ಪೆನ್ಷನ್ ಫಂಡ್​ನಿಂದ ಈ ಎರಡು ಬ್ಲಾಕ್ ಡೀಲ್​ಗಳಾಗಿವೆ ಎನ್ನಲಾಗಿದೆ.

ಇದನ್ನೂ ಓದಿ: HAL: ಷೇರುವಿಭಜನೆ ಅಂತ ಹೇಳಿದ್ದೇ ತಡ ಎಚ್​ಎಎಲ್ ಷೇರಿಗೆ ಭರ್ಜರಿ ಬೇಡಿಕೆ; ಏನಿದು ಷೇರುವಿಭಜನೆ? ಯಾರಿಗೆ ಲಾಭ?

ಒಳ್ಳೆಯ ರೇಟಿಂಗ್ ಹೊಂದಿರುವ ಕೋಟಕ್ ಬ್ಯಾಂಕ್

ಕೋಟಕ್ ಮಹೀಂದ್ರ ಬ್ಯಾಂಕ್​ನಲ್ಲಿ ವಿದೇಶೀ ಪೋರ್ಟ್​ಫೋಲಿಯೋ ಹೂಡಿಕೆದಾರರು (ಎಫ್​ಪಿಐ) ಬಹಳ ದೊಡ್ಡ ಪಾಲು ಹೊಂದಿದ್ದಾರೆ. ಶೇ. 39.43ರಷ್ಟು ಪಾಲು ಎಫ್​ಪಿಐನವರದ್ದೇ ಆಗಿದೆ. ವಿವಿಧ ಮ್ಯೂಚುವಲ್ ಫಂಡ್​ಗಳು ಶೇ. 10.99ರಷ್ಟು ಪಾಲು ಹೊಂದಿವೆ.

ಕೆಲ ಹಣಕಾಸು ಮತ್ತು ಷೇರು ರೇಟಿಂಗ್ ಸಂಸ್ಥೆಗಳು ಕೋಟಕ್ ಮಹೀಂದ್ರ ಬ್ಯಾಂಕಿನ ಷೇರಿಗೆ ಉತ್ತಮ ರೇಟಿಂಗ್ ನೀಡಿವೆ. ಮುಂದಿನ ಒಂದು ವರ್ಷದಲ್ಲಿ ಈ ಬ್ಯಾಂಕ್​ನ ಷೇರುಬೆಲೆ ಸರಾಸರಿ 2,134 ರೂ ಆಗಬಹುದು ಎಂದು ಭವಿಷ್ಯ ನುಡಿದಿವೆ. ಅಂದರೆ ಈಗ ಕೋಟಕ್ ಬ್ಯಾಂಕ್​ನ ಷೇರುಗಳ ಮೇಲೆ ಹೂಡಿಕೆ ಮಾಡಿದರೆ ಒಂದು ವರ್ಷದಲ್ಲಿ ಶೇ. 13ರಷ್ಟು ಲಾಭ ಮಾಡಿಕೊಳ್ಳುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ