LIC IPO GMP: ಎಲ್​ಐಸಿ ಐಪಿಒಗೆ ಗ್ರೇ ಮಾರ್ಕೆಟ್​ನಲ್ಲಿ ಕುಸಿದ ಪ್ರೀಮಿಯಂ; ವಿತರಣೆಗಿಂತ ಕಡಿಮೆಗೆ ಲಿಸ್ಟಿಂಗ್ ಆಗುತ್ತಾ?

ಎಲ್​ಐಸಿ ಐಪಿಒ (LIC IPO) ಸಬ್​ಸ್ಕ್ರಿಪ್ಷನ್ ಮೇ 9ನೇ ತಾರೀಕಿಗೆ ಮುಕ್ತಾಯ ಆಗಿದೆ. ಯಾರು ಬಿಡ್ ಮಾಡಿದ್ದರೋ ಅವರೀಗ ವಿತರಣೆ ಆಗಬಹುದಾ ಎಂದು ಕಾಯುತ್ತಿದ್ದಾರೆ. ಮೇ 12ನೇ ತಾರೀಕಿನಂದು ಷೇರು ವಿತರಣೆ ಆಗುವ ಸಾಧ್ಯತೆ ಇದೆ. ಆದರೆ ಎಲ್​ಐಸಿ ಐಪಿಒ ಜಿಎಂಪಿ (ಗ್ರೇ ಮಾರ್ಕೆಟ್ ಪ್ರೀಮಿಯಂ) ಹತ್ತಿರ ಹತ್ತಿರ ಒಂದು ವಾರದಿಂದ ಸತತವಾಗಿ ಕಡಿಮೆ ಆಗುತ್ತಲೇ ಬರುತ್ತಿದೆ. ವಿಶ್ಲೇಷಕರ ಪ್ರಕಾರ, ಇವತ್ತಿಗೆ (ಮೇ 11, 2022ಕ್ಕೆ) ಗ್ರೇ ಮಾರ್ಕೆಟ್​ನಲ್ಲಿ 8 ರೂಪಾಯಿ ರಿಯಾಯಿತಿಗೆ ಎಲ್​ಐಸಿ ಷೇರುಗಳ ಬೆಲೆ ಇದೆ. ಸೆಕೆಂಡರಿ ಮಾರ್ಕೆಟ್​ನಲ್ಲಿ ದುರ್ಬಲ ಭಾವನೆಗಳ ಕಾರಣಕ್ಕೆ ಎಲ್​ಐಸಿ ಐಪಿಒ ಗ್ರೇ ಮಾರ್ಕೆಟ್ ಪ್ರೀಮಿಯಂ ಕಳೆದ ಒಂದು ವಾರದಿಂದ ಸತತವಾಗಿ ಇಳಿಕೆ ಆಗುತ್ತಿದೆ ಮತ್ತು ಇದೀಗ ವಿತರಣೆ ಬೆಲೆಗಿಂತ ಕೆಳಗೆ ಇಳಿದಿದೆ. ಇವತ್ತಿಗೆ (ಮೇ 11) ಮೈನಸ್ 8 ಹಾಗೂ ನಿನ್ನೆಯ ಗ್ರೇ ಮಾರ್ಕೆಟ್ ಪ್ರೀಮಿಯಂಗಿಂತ ರೂ. 33 ಕಡಿಮೆಗಿದೆ. ಮೇ 10ನೇ ತಾರೀಕು ಗ್ರೇ ಮಾರ್ಕೆಟ್ ಪ್ರೀಮಿಯಂ ಪ್ಲಸ್ 25 ರೂಪಾಯಿ ಇತ್ತು.

ಇನ್ನೇನು ಐಪಿಒ ಸಬ್​ಸ್ಕ್ರಿಪ್ಷನ್ ಶುರುವಾಗಬೇಕು ಅಂತಿದ್ದಾಗ 92 ರೂಪಾಯಿ ತನಕ ಇತ್ತು. ಆದರೆ ಆ ನಂತರದಲ್ಲಿ ಜಾಗತಿಕವಾಗಿಯೇ ಮಾರುಕಟ್ಟೆಗಳಲ್ಲಿ ನಕಾರಾತ್ಮಕ ಭಾವನೆಗಳು ಕಾಣಿಸಿಕೊಳ್ಳಲು ಆರಂಭವಾದ ಮೇಲೆ ಇದರ ಬೆಲೆ ಕೂಡ ಇಳಿಯಲು ಆರಂಭವಾಯಿತು. ಗ್ರೇ ಮಾರ್ಕೆಟ್​ ಅನ್ನು ಅನುಸರಿಸುವವರ ಪ್ರಕಾರ, ದೊಡ್ಡ ಹೂಡಿಕೆದಾರರ ಭಾಗವಹಿಸುವಿಕೆ ಕಡಿಮೆ ಆಗಿದ್ದು ಮತ್ತು ಮಾರುಕಟ್ಟೆ ಭಾವನೆಯಲ್ಲಿನ ಹಿಂಜರಿಕೆ ಸೇರಿ ಎಲ್​ಐಸಿ ಲಿಸ್ಟಿಂಗ್​ಗೆ ಪೆಟ್ಟು ನೀಡುತ್ತಿದೆ.

ಮೈನಸ್ 8 ರೂಪಾಯಿ ಗ್ರೇ ಮಾರ್ಕೆಟ್ ಪ್ರೀಮಿಯಂನಲ್ಲಿ ಎಲ್​ಐಸಿ ಐಪಿಒ ಇದೆ ಅಂದರೆ, ಲಿಸ್ಟಿಂಗ್ 941 ರೂಪಾಯಿಗೆ (949- 8) ಆಗಬಹುದು ಎಂಬ ನಿರೀಕ್ಷೆ ಇದೆ ಎಂದರ್ಥ. ಗ್ರೇ ಮಾರ್ಕೆಟ್ ಅನುಸರಿಸಿ ಹೇಳುವುದಾದರೆ, ಸ್ವಲ್ಪ ಮಟ್ಟಿಗೆ ರಿಯಾಯಿತಿಯಲ್ಲಿ ಲಿಸ್ಟಿಂಗ್ ಆಗಬಹುದು.

ಒಟ್ಟಾರೆಯಾಗಿ ಎಲ್​ಐಸಿ ಐಪಿಒ 2.95 ಪಟ್ಟು ಸಬ್​ಸ್ಕ್ರೈಬ್ ಆಗಿದೆ. ಕಂಪೆನಿಯ ಷೇರಿಗೆ ತಲಾ 902ರಿಂದ 949 ದರ ನಿಗದಿ ಆಗಿದ್ದು, ಅರ್ಹ ಪಾಲಿಸಿದಾರರಿಗೆ 60 ರೂಪಾಯಿ ರಿಯಾಯಿತಿ ಮತ್ತು ರೀಟೇಲ್ ಬಿಡ್​ದಾರರು ಮತ್ತು ಕಂಪೆನಿ ಉದ್ಯೋಗಿಗಳು 45 ರೂಪಾಯಿ ರಿಯಾಯಿತಿ ಇದೆ.

ಎಲ್​ಐಸಿಯಲ್ಲಿನ ಶೇ 3.5ರಷ್ಟು ಪಾಲನ್ನು ಮಾರಾಟ ಮಾಡುವ ಮೂಲಕ ಕೇಂದ್ರ ಸರ್ಕಾರವು 20,500 ಕೋಟಿ ರೂಪಾಯಿ ಸಂಗ್ರಹ ಮಾಡಲು ಮುಂದಾಗಿದೆ. 245 ಖಾಸಗಿ ಲೈಫ್ ಇನ್ಷೂರೆನ್ಸ್ ಕಂಪೆನಿಗಳನ್ನು ವಿಲೀನ ಹಾಗೂ ರಾಷ್ಟ್ರೀಕರಣಗೊಳಿಸುವ ಮೂಲಕ ಸೆಪ್ಟೆಂಬರ್ 1, 1956ರಂದು ಎಲ್​ಐಸಿ ಇಂಡಿಯಾ ರೂಪಿಸಲಾಯಿತು. ಆರಂಭಿಕ ಬಂಡವಾಳ 5 ಕೋಟಿ ರೂಪಾಯಿ ಇತ್ತು. ಇದರ ಉತ್ಪನ್ನಗಳ ಪೋರ್ಟ್​​ಫೋಲಿಯೋದಲ್ಲಿ 32 ವೈಯಕ್ತಿಕ ಯೋಜನೆಗಳಿವೆ (16 ಪಾರ್ಟಿಸಿಪೇಟಿಂಗ್ ಮತ್ತು 16 ನಾನ್ ಪಾರ್ಟಿಸಿಪೇಟಿಂಗ್) ಹಾಗೂ ಏಳು ವೈಯಕ್ತಿಕ ಐಚ್ಛಿಕ ರೈಡರ್ ಅನುಕೂಲಗಳಿದ್ದು, ಎಲ್​ಐಸಿಯಿಂದ 11 ಗುಂಪು ಉತ್ಪನ್ನಗಳಿವೆ.

ಎಲ್​ಐಸಿ ಐಪಿಒ ಲಿಸ್ಟಿಂಗ್ ಮೇ 17, 2022ರಂದು ಆಗುವ ಸಾಧ್ಯತೆ ಇದೆ.

ಇನ್ನೂ ಹೆಚ್ಚಿನ ವಾಣಿಜ್ಯ ಸುದ್ದಿಗೆ ಇಲ್ಲಿ ಕ್ಲಿಕ್ ಮಾಡಿ, ಪ್ರಮುಖ ಸುದ್ದಿಗೆ ಇಲ್ಲಿ ಕ್ಲಿಕ್ ಮಾಡಿ

ಇದನ್ನೂ ಓದಿ: ಎಲ್​ಐಸಿ ಆ್ಯಂಕರ್ ಬುಕ್​ನಲ್ಲಿ ಭಾಗವಹಿಸುತ್ತಿಲ್ಲ 28 ಮ್ಯೂಚುಯಲ್ ಫಂಡ್​ಗಳು: ಇಲ್ಲಿದೆ ಪಟ್ಟಿ