LIC Premium Income: ಪ್ರೀಮಿಯಮ್ಗಳಿಂದ ಎಲ್ಐಸಿ ಈ ವರ್ಷ ಗಳಿಸಿದ ಆದಾಯ ಎಷ್ಟು? ಖಾಸಗಿ ವಿಮಾ ಕಂಪನಿಗಳದ್ದೆಷ್ಟು?
Life Insurance Corporation Market Share: ಭಾರತೀಯ ವಿಮಾ ಮಾರುಕಟ್ಟೆಯಲ್ಲಿ ಬಹಳಷ್ಟು ಇನ್ಷೂರೆನ್ಸ್ ಕಂಪನಿಗಳು ಸ್ಪರ್ಧಿಸುತ್ತಿವೆಯಾದರೂ ಭಾರತೀಯ ಜೀವ ವಿಮಾ ನಿಗಮದ ಪ್ರಾಬಲ್ಯ ಹೆಚ್ಚು ಕುಂದಿಲ್ಲ. ಪ್ರೀಮಿಯಮ್ ಕಲೆಕ್ಷನ್ ವಿಚಾರಕ್ಕೆ ಬಂದರೆ ಮಾರುಕಟ್ಟೆಯಲ್ಲಿ ಎಲ್ಐಸಿ ಹೊಂದಿರುವ ಪಾಲು ಬರೋಬ್ಬರಿ ಶೇ. 62.58ರಷ್ಟು.
ನವದೆಹಲಿ: ಭಾರತದ ಅತಿದೊಡ್ಡ ಹಾಗು ಸರ್ಕಾರಿ ಸ್ವಾಮ್ಯದ ಜೀವ ವಿಮಾ ಕಂಪನಿ ಎಲ್ಐಸಿ (LIC- Life Insurance Corporation) ಕಳೆದ ಹಣಕಾಸು ವರ್ಷದಲ್ಲಿ ಒಳ್ಳೆಯ ಪ್ರೀಮಿಯಮ್ ಕಲೆಕ್ಷನ್ ಮಾಡಿದೆ. 2022-23ರ ಹಣಕಾಸು ವರ್ಷದಲ್ಲಿ ಪಾಲಿಸಿ ಪ್ರೀಮಿಯಮ್ಗಳಿಂದಲೇ ಎಲ್ಐಸಿ ಗಳಿಸಿದ ಆದಾಯ (Income From Policy Premiums) 2.32ಲಕ್ಷ ಕೋಟಿ ರೂ ಆಗಿದೆ. ಹಿಂದಿನ ಹಣಕಾಸು ವರ್ಷದಲ್ಲಿ (2021-22) ಪ್ರೀಮಿಯಮ್ಗಳಿಂದ ಬಂದ ಆದಾಯ 1.99 ಲಕ್ಷ ಕೋಟಿ ರೂ ಆಗಿತ್ತು. 2023ರ ಹಣಕಾಸು ವರ್ಷದಲ್ಲಿ ಈ ಆದಾಯದಲ್ಲಿ ಶೇ. 17ರಷ್ಟು ಹೆಚ್ಚಳವಾಗಿದೆ. ಗಮನಾರ್ಹ ಎಂದರೆ ಭಾರತೀಯ ವಿಮಾ ಮಾರುಕಟ್ಟೆಯಲ್ಲಿ ಬಹಳಷ್ಟು ಇನ್ಷೂರೆನ್ಸ್ ಕಂಪನಿಗಳು ಸ್ಪರ್ಧಿಸುತ್ತಿವೆಯಾದರೂ ಭಾರತೀಯ ಜೀವ ವಿಮಾ ನಿಗಮದ ಪ್ರಾಬಲ್ಯ ಹೆಚ್ಚು ಕುಂದಿಲ್ಲ. ಪ್ರೀಮಿಯಮ್ ಕಲೆಕ್ಷನ್ ವಿಚಾರಕ್ಕೆ ಬಂದರೆ ಮಾರುಕಟ್ಟೆಯಲ್ಲಿ ಎಲ್ಐಸಿ ಹೊಂದಿರುವ ಪಾಲು ಬರೋಬ್ಬರಿ ಶೇ. 62.58ರಷ್ಟು.
ಇನ್ನು, 2022-23ರ ಹಣಕಾಸು ವರ್ಷದಲ್ಲಿ ಪ್ರೀಮಿಯಮ್ಗಳಿಂದ ಬಂದ ಅದಾಯದಲ್ಲಿ ಅತಿಹೆಚ್ಚಳ ಕಂಡ ವಿಮಾ ಕಂಪನಿಗಳ ಪಟ್ಟಿಯಲ್ಲಿ ಎಲ್ಐಸಿ ಎರಡನೇ ಸ್ಥಾನಕ್ಕೆ ಬರುತ್ತದೆ. ಎಚ್ಡಿಎಫ್ಸಿ ಲೈಫ್ ಸಂಸ್ಥೆ ಶೇ. 18.83ರಷ್ಟು ಬೆಳವಣಿಗೆ ಕಂಡಿದೆ. ಎಲ್ಐಸಿ ಶೇ. 17, ಎಸ್ಬಿಐ ಲೈಫ್ ಇನ್ಷೂರೆನ್ಸ್ ಕಂಪನಿ ಶೇ. 16.22 ಮತ್ತು ಐಸಿಐಸಿಐ ಪ್ರೂಡೆನ್ಷಿಯಲ್ ಶೇ. 12.55ರಷ್ಟು ಪ್ರೀಮಿಯಮ್ ಆದಾಯ ಪ್ರಗತಿ ಸಾಧಿಸಿವೆ.
ಇನ್ನು, ವೈಯಕ್ತಿಕ ಸಿಂಗಲ್ ಪ್ರೀಮಿಯಮ್ ವಿಷಯಕ್ಕೆ ಬಂದರೆ ಎಲ್ಐಸಿ ಶೇ. 3.30ರಷ್ಟು ಬೆಳವಣಿಗೆ ಹೊಂದಿದೆ. ವೈಯಕ್ತಿಕ ನಾನ್–ಸಿಂಗಲ್ ಪ್ರೀಮಿಯಮ್ಗಳಿಂದ ಬಂದ ಆದಾಯ ಶೇ. 10ರಷ್ಟು ಹೆಚ್ಚಾಗಿದೆ.
ಇದನ್ನೂ ಓದಿ: Google vs PhonePe: ಗೂಗಲ್ಗೆ ಸೆಡ್ಡುಹೊಡೆಯುತ್ತಿರುವ ಫೋನ್ಪೆ; ಪ್ಲೇಸ್ಟೋರ್ಗೆ ಪ್ರತಿಯಾಗಿ ಬರಲಿದೆ ಹೊಸ ಆ್ಯಪ್ ಸ್ಟೋರ್
ಎಲ್ಐಸಿಯ ಗ್ರೂಪ್ ಸಿಂಗಲ್ ಪ್ರೀಮಿಯಮ್ 2022ರ ಹಣಕಾಸು ವರ್ಷದಲ್ಲಿ 1,39,350.36ಕೋಟಿ ಆದಾಯ ಇದ್ದದ್ದು 2023ರ ವರ್ಷದಲ್ಲಿ 1,67,235 ಕೋಟಿ ರೂಗೆ ಏರಿದೆ. ಅಂದರೆ ಗ್ರೂಪ್ ಸಿಂಗಲ್ ಪ್ರೀಮಿಯಮ್ಗಳಿಂದ ಬಂದ ಆದಾಯ ಶೇ. 21.76ರಷ್ಟು ಹೆಚ್ಚಾಗಿದೆ.
ಮಾರ್ಚ್ ತಿಂಗಳಲ್ಲಿ ಪ್ರೀಮಿಯಮ್ಗಳ ಭರ್ಜರಿ ಏರಿಕೆ; ಏನು ಕಾರಣ?
2023ರ ಮಾರ್ಚ್ ತಿಂಗಳಲ್ಲಿ ಎಲ್ಐಸಿ ಭರ್ಜರಿ ಪ್ರೀಮಿಯಮ್ಗಳನ್ನು ಕಲೆಹಾಕಿದೆ. ಆ ತಿಂಗಳು ವೈಯಕ್ತಿಕ ವಿಭಾಗದಲ್ಲಿ ಬಂದ ಪ್ರೀಮಿಯಮ್ಗಳು 10,000 ಕೋಟಿ ರೂ. ಇತರ ಎಲ್ಲಾ ಖಾಸಗಿ ಇನ್ಷೂರೆನ್ಸ್ ಕಂಪನಿಗಳಿಗಿಂತಲೂ ಹೆಚ್ಚು.
2023 ಮಾರ್ಚ್ನಲ್ಲಿ ವಿಮಾ ಕಂಪನಿಗಳ ವೈಯಕ್ತಿಕ ವಿಭಾಗದ ಪ್ರೀಮಿಯಮ್ ಕಲೆಕ್ಷನ್ಸ್ ವಿವರ ಇಲ್ಲಿದೆ:
ಎಲ್ಐಸಿ: 10,000 ಕೋಟಿ ರೂ
ಎಚ್ಡಿಎಫ್ಸಿ ಲೈಫ್: 2,989.17 ಕೋಟಿ ರೂ
ಎಸ್ಬಿಐ ಲೈಫ್: 2,318.77 ಕೋಟಿ ರೂ
ಟಾಟಾ ಎಐಎ ಲೈಫ್: 1,884.41 ಕೋಟಿ ರೂ
ಇದನ್ನೂ ಓದಿ: Adani Bonds: ಹೂಡಿಕೆದಾರರ ವಿಶ್ವಾಸ ಗಳಿಸಲು ಅದಾನಿ ಹರಸಾಹಸ; ಡಾಲರ್ ಸಾಲಪತ್ರಗಳ ಮರುಖರೀದಿಗೆ ಹೆಜ್ಜೆ; ಅದಾನಿ ನಡೆಯ ಮರ್ಮವೇನು?
ವೈಯಕ್ತಿಕ ನಾನ್–ಸಿಂಗಲ್ ಪ್ರೀಮಿಯಮ್ ವಿಭಾಗದಲ್ಲಿ ಆದಾಯ ಶೇ. 10.49ರಷ್ಟು ಏರಿಕೆ ಕಂಡಿದೆ ಎಲ್ಐಸಿ. 2022 ಮಾರ್ಚ್ನಲ್ಲಿ ಈ ವಿಭಾಗದಲ್ಲಿ ಎಲ್ಐಸಿ ಪ್ರೀಮಿಯಮ್ ಕಲೆಕ್ಷನ್ 5,501.12 ಕೋಟಿ ರೂ ಇತ್ತು. 2023 ಮಾರ್ಚ್ನಲ್ಲಿ ಇದು 6,077.97 ಕೋಟಿ ರೂ ಆಗಿದೆ.
ಮಾರ್ಚ್ ತಿಂಗಳಲ್ಲಿ ಎಲ್ಐಸಿ ಮಾತ್ರವಲ್ಲ ಹಲವು ಖಾಸಗಿ ಇನ್ಷೂರೆನ್ಸ್ ಕಂಪನಿಗಳೂ ಅತಿಹೆಚ್ಚು ಪ್ರೀಮಿಯಮ್ ಕಲೆಕ್ಷನ್ ಕಂಡಿವೆ. ಏಪ್ರಿಲ್ 1ಕ್ಕೆ ಮುನ್ನ ನಾನ್–ಲಿಂಕ್ಡ್ ಇನ್ಷೂರೆನ್ಸ್ ಪಾಲಿಸಿಗಳ ತೆರಿಗೆ ಸೌಲಭ್ಯಗಳನ್ನು ಹಿಂಪಡೆಯುವ ಹಿನ್ನೆಲೆಯಲ್ಲಿ ಮಾರ್ಚ್ ತಿಂಗಳಲ್ಲಿ ಪ್ರೀಮಿಯಮ್ ವಹಿವಾಟು ಅತಿಹೆಚ್ಚು ಆಗಿದೆ.
Published On - 10:44 am, Tue, 25 April 23