LPG cylinder accident insurance: ಅಡುಗೆ ಅನಿಲ ಸಿಲಿಂಡರ್ ಅಪಘಾತಕ್ಕೆ ಡೀಲರ್ ಮೂಲಕವೇ ಸಿಗುತ್ತೆ ಇನ್ಷೂರೆನ್ಸ್

ಎಲ್​ಪಿಜಿ ಅಡುಗೆ ಅನಿಲ ಸಿಲಿಂಡರ್​ನ ಅಪಾಯದ ಬಗ್ಗೆ ಬಳಕೆದಾರರಲ್ಲಿ ಒಂದು ಜಾಗೃತಿ ಇದ್ದೇ ಇದೆ. ಒಂದು ವೇಳೆ ಅನಿಲ ಸೋರಿಕೆಯಾದಲ್ಲಿ ತಕ್ಷಣವೇ ಮಾಡಬೇಕಾದದ್ದು ಏನು ಎಂಬ ಬಗ್ಗೆ ಪ್ರಾಥಮಿಕವಾದ ಮಾಹಿತಿ ಇದೆ. ಆದರೆ ನಿಜವಾಗಿಯೂ ಬಹಳ ಮಂದಿಗೆ ಗೊತ್ತಾಗಬೇಕಾದದ್ದು ಏನೆಂದರೆ, ಎಲ್​ಪಿಜಿ ಅಡುಗೆ ಅನಿಲ ಸಿಲಿಂಡರ್ ಬಳಸುವ ಗ್ರಾಹಕರಿಗೆ ವೈದ್ಯಕೀಯ ವೆಚ್ಚದ ಕವರೇಜ್ 2 ಲಕ್ಷ ರೂಪಾಯಿ ಜತೆಗೆ ಪ್ರತ್ಯೇಕವಾಗಿ 6 ಲಕ್ಷ ರೂಪಾಯಿ ಅಪಘಾತ ವಿಮೆ ಕವರ್ ಆಗುತ್ತದೆ. ಆಯಿಲ್ ಕಾರ್ಪೊರೇಷನ್, ಹಿಂದೂಸ್ತಾನ್ ಪೆಟ್ರೋಲಿಯಂ ಕಾರ್ಪೊರೇಷನ್ ಮತ್ತು ಭಾರತ್ ಪೆಟ್ರೋಲಿಯಂ ಕಾರ್ಪೊರೇಷನ್​ನಂಥ ಸರ್ಕಾರಿ ಸ್ವಾಮ್ಯದ ತೈಲ ಮಾರ್ಕೆಟಿಂಗ್ ಕಂಪೆನಿಗಳು ಮತ್ತು ಆ ಕಂಪೆನಿಗಳ ಡೀಲರ್​ಗಳು ಎಲ್​ಪಿಜಿ ಅನಿಲ ಇನ್ಷೂರೆನ್ಸ್​ ಪಾಲಿಸಿ ಆರಿಸಿಕೊಳ್ಳುತ್ತಾರೆ. ಅದು ಗುಂಪು ಇನ್ಷೂರೆನ್ಸ್ ಕವರ್ ಹೊಂದಿರುತ್ತದೆ.

ಎಲ್​ಪಿಜಿಗೆ ಸಂಬಂಧಿಸಿದ ಅಪಘಾತಗಳಲ್ಲಿ ತೊಂದರೆಗೆ ಈಡಾಗುವ ವ್ಯಕ್ತಿಗೆ ವೇಗವಾಗಿ ಪರಿಹಾರ ದೊರೆಯಲಿ ಎಂಬ ಕಾರಣಕ್ಕೆ ಪಬ್ಲಿಕ್ ಲಯಬಿಲಿಟಿ ಪಾಲಿಸಿ ಫಾರ್ ಆಯಿಲ್ ಇಂಡಸ್ಟ್ರೀಸ್ ಅಡಿಯಲ್ಲಿ ಸಮಗ್ರ ಇನ್ಷೂರೆನ್ಸ್ ಪಾಲಿಸಿ ತರಲಾಗಿದೆ. ಇದಕ್ಕಾಗಿ ಕಂಪೆನಿಗಳು ಮತ್ತು ಡೀಲರ್​ಗಳು ಪ್ರೀಮಿಯಂ ಪಾವತಿಸುತ್ತಾರೆ. ಗ್ರಾಹಕರು ಏನನ್ನೂ ಪಾವತಿಸುವ ಅಗತ್ಯ ಇಲ್ಲ. ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯದಿಂದ 2019ರ ಜುಲೈನಲ್ಲಿ ರಾಜ್ಯಸಭೆಗೆ ಒದಗಿಸಿದ ಮಾಹಿತಿ ಪ್ರಕಾರ, ಎಲ್​ಪಿಜಿ ಸಿಲಿಂಡರ್​ಗಳಿಗೆ ಸಂಬಂಧಿಸಿದ ಅಪಘಾತಗಳಲ್ಲಿ ಎಲ್ಲ ಸಂತ್ರಸ್ತರಿಗೂ ಈ ಕವರೇಜ್ ಉಚಿತವಾಗಿ ದೊರೆಯುತ್ತದೆ.

ಎಲ್​ಪಿಜಿ ಸಿಲಿಂಡರ್​ ಅಪಘಾತದಿಂದ ಮೃತಪಟ್ಟಲ್ಲಿ ಈ ಪಾಲಿಸಿಯಲ್ಲಿ 6 ಲಕ್ಷ ರೂಪಾಯಿ ಕವರೇಜ್ ದೊರೆಯುತ್ತದೆ. ಇದರ ಹೊರತುಪಡಿಸಿ ಒಂದು ಕುಟುಂಬಕ್ಕೆ 30 ಲಕ್ಷ ರೂಪಾಯಿ ತನಕ ಹಾಗೂ ಒಬ್ಬ ವ್ಯಕ್ತಿಗೆ ಗರಿಷ್ಠ ರೂ. 2 ಲಕ್ಷದ ತನಕ ವೈದ್ಯಕೀಯ ವೆಚ್ಚ ಕವರೇಜ್ ಆಗುತ್ತದೆ. ಒಂದು ವೇಳೆ ಆಸ್ತಿ ಹಾನಿ ಆಗಿದ್ದಲ್ಲಿ, ಅಧಿಕೃತವಾದ ಗ್ರಾಹಕರು ತಮ್ಮ ಆ ಬಗ್ಗೆ ದಾಖಲಿಸಿದ್ದಲ್ಲಿ ಗರಿಷ್ಠ 2 ಲಕ್ಷ ರೂಪಾಯಿ ದೊರೆಯುತ್ತದೆ.

ಸಂತ್ರಸ್ತರು ಅಥವಾ ಸಂತ್ರಸ್ತರ ಕುಟುಂಬದವರು ಎಲ್​ಪಿಜಿ ಡೀಲರ್​ಗೆ ಬರವಣಿಗೆಯಲ್ಲಿ ವಿಚಾರವನ್ನು ತಿಳಿಸಬೇಕು. ಎಲ್​ಪಿಜಿ ಗ್ರಾಹಕರು/ಸಂತ್ರಸ್ತರು ಬೇರೆ ಯಾರನ್ನೂ ಎಲ್​ಪಿಜಿ ಇನ್ಷೂರೆನ್ಸ್ ವಿಷಯದಲ್ಲಿ ಸಂಪರ್ಕಿಸುವ ಅಗತ್ಯ ಇಲ್ಲ. ಆ ನಂತರ ತೈಲ ಮಾರ್ಕೆಟಿಂಗ್ ಕಂಪೆನಿಗಳನ್ನು ಮತ್ತು ಇನ್ಷೂರೆನ್ಸ್ ಕಂಪೆನಿಗಳನ್ನು ಡೀಲರ್ ಸಂಪರ್ಕಿಸುತ್ತಾರೆ. ತೈಲ ಮಾರ್ಕೆಟಿಂಗ್ ಕಂಪೆನಿ ಮತ್ತು ಇನ್ಷೂರೆನ್ಸ್ ಪರವಾಗಿ ಪರಿಶೀಲನೆ ನಡೆಸಲಾಗುತ್ತದೆ. ಆ ನಂತರ ಕ್ಲೇಮ್ ನಿಯಮಾವಳಿಗಳನ್ನು ಪೂರ್ತಿ ಮಾಡಬೇಕಾಗುತ್ತದೆ.

ಈ ಕ್ಲೇಮ್ ವಿವಿಧ ಹಂತಗಳನ್ನು ದಾಟಿ, ಮೃತರ ಅಥವಾ ಬಾಧಿತ ಕುಟುಂಬದ ಬ್ಯಾಂಕ್ ಖಾತೆಗೆ ಹಣ ಜಮೆ ಆಗುವುದಕ್ಕೆ ಕನಿಷ್ಠ 10ರಿಂದ 14 ವರ್ಕಿಂಗ್ ಡೇಸ್ ತೆಗೆದುಕೊಳ್ಳುತ್ತದೆ.

ಇದನ್ನೂ ಓದಿ: How to book gas cylinder: ವಾಟ್ಸಾಪ್ ಮೂಲಕ ಇಂಡೇನ್, ಎಚ್​ಪಿ, ಭಾರತ್ ಗ್ಯಾಸ್ ಸಿಲಿಂಡರ್ ಬುಕ್ಕಿಂಗ್ ಹೇಗೆ?

(LPG customers covered under insurance in case of accident by cylinder. Premium borne by dealers and OMC)