ಬಾಯ್​ಫ್ರೆಂಡ್​ನನ್ನು ವರಿಸಿದ ಓಪನ್​ಎಐ ಸಿಇಒ ಸ್ಯಾಮ್ ಆಲ್ಟ್​ಮ್ಯಾನ್; ಮಗು ಹೊಂದಲು ನಿರ್ಧಾರ; ಅದು ಹೇಗೆ ಸಾಧ್ಯ?

ನವದೆಹಲಿ, ಜನವರಿ 12: ಓಪನ್​ಎಐ ಸಿಇಒ ಸ್ಯಾಮ್ ಆಲ್ಟ್​ಮ್ಯಾನ್ ಅವರು ತಮ್ಮ ಬಹುಕಾಲದ ಬಾಯ್​ಫ್ರೆಂಡ್ ಆಗಿರುವ ಓಲಿವರ್ ಮುಲೆರಿನ್ (Oliver Mulherin) ಅವರನ್ನು ವಿವಾಹವಾಗಿದ್ದಾರೆ. ಈ ಮೂಲಕ ಎಲ್​ಜಿಬಿಟಿ ಸಮುದಾಯಗಳಿಗೆ (LGBT+ community) ಹೊಸ ರೋಲ್ ಮಾಡೆಲ್ ಸಿಕ್ಕಂತಾಗಿದೆ. ಅಮೆರಿಕದ ಸಮೀಪದ ಹವಾಯಿ ದ್ವೀಪವೊಂದರಲ್ಲಿ ಸ್ಯಾಮ್ ಆಲ್ಟ್​ಮ್ಯಾನ್ ಮತ್ತು ಓಲಿವರ್ ಮುಲೆರಿನ್ ಅವರ ಮದುವೆ ಕಾರ್ಯಕ್ರಮ ನಡೆದಿದೆ. ಇದರ ಫೋಟೋಗಳು ಸೋಷಿಯಲ್ ಮೀಡಿಯಾದಲ್ಲಿ ಶೇರ್ ಆಗಿದ್ದು, ವೈರಲ್ ಆಗುತ್ತಿವೆ. ಸ್ಯಾಮ್ ಆಲ್ಟ್​ಮ್ಯಾನ್ ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ಈ ಬಗ್ಗೆ ಅಧಿಕೃತವಾಗಿ ಎಲ್ಲಿಯೂ ತಿಳಿಸಿದಲ್ಲ. ಮಾಧ್ಯಮಗಳಿಗೆ ಈ ಬೆಳವಣಿಗೆಯನ್ನು ಅವರು ಖಚಿಪಡಿಸಿದ್ದಾರೆ.

ಮೋದಿ ಆತಿಥ್ಯದ ಕಾರ್ಯಕ್ರಮದಲ್ಲಿ ಮೊದಲ ಬಾರಿಗೆ ಕಾಣಿಸಿದ್ದ ಸಲಿಂಗಿ ಜೋಡಿ

ನರೇಂದ್ರ ಮೋದಿ ಅವರು ಅಮೆರಿಕಕ್ಕೆ ಭೇಟಿ ನೀಡಿದ ಸಂದರ್ಭದಲ್ಲಿ ಜೋ ಬೈಡನ್ ಅವರು ವೈಟ್​ಹೌಸ್​ನಲ್ಲಿ ಔತಣಕೂಟ ಇಟ್ಟುಕೊಂಡಿದ್ದರು. ಆಗ ವಿವಿಧ ಅಮೆರಿಕನ್ ಉದ್ಯಮಿಗಳು ಹಾಗು ಇತರ ಕೆಲ ಗಣ್ಯರಿಗೆ ಆಹ್ವಾನ ಕೊಡಲಾಗಿತ್ತು. ಆಗ ಸ್ಯಾಮ್ ಆಲ್ಟ್​ಮ್ಯಾನ್ ಅವರು ಓಲಿವರ್ ಮುಲೆರಿನ್ ಅವರನ್ನೂ ಜೊತೆಗೆ ಕರೆದುಕೊಂಡು ಕಾರ್ಯಕ್ರಮಕ್ಕೆ ಹೋಗಿದ್ದರು. ಅವರಿಬ್ಬರು ಜೋಡಿಯಾಗಿ ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದು ಅದೇ ಮೊದಲು ಎನ್ನಲಾಗಿದೆ.

ಸ್ಯಾಮ್ ಆಲ್ಟ್​​ಮ್ಯಾನ್ ಮತ್ತು ಓಲಿವರ್ ಮುಲೆರಿನ್ ಇಬ್ಬರೂ ದೀರ್ಘಕಾಲದಿಂದ ಒಡನಾಡಿಗಳಾಗಿದ್ದಾರೆ. ಆದರೆ, ಇತ್ತೀಚೆಗಷ್ಟೇ ಅವರ ಸಂಬಂಧ ರಟ್ಟಾಗಿದ್ದು. 2023ರ ಸೆಪ್ಟೆಂಬರ್ ತಿಂಗಳಲ್ಲಿ ನ್ಯೂಯಾರ್ಕ್ ಮ್ಯಾಗಝಿನ್ ಪತ್ರಿಕೆಗೆ ನೀಡಿದ ಸಂದರ್ಶನದಲ್ಲಿ ಸ್ಯಾಮ್ ಆಲ್ಟ್​ಮ್ಯಾನ್ ಅವರು ತನ್ನ ಸ್ನೇಹಿತನನ್ನು ವರಿಸುವ ಹಾಗು ಮಗು ಹೊಂದುವ ಇಚ್ಛೆಯನ್ನು ವ್ಯಕ್ತಪಡಿಸಿದ್ದರು.

ಇದನ್ನೂ ಓದಿ: ಚೀನಾಗೆ ಈ ಅನುಕೂಲ ಸಿಗಲು ಬಹಳ ವರ್ಷ ಬೇಕಾಯಿತು; ಭಾರತಕ್ಕೆ ಈಗಲೇ ಸಿಕ್ಕಿದೆ: ಆರ್ಥಿಕತೆಯ ಒಳನೋಟ ಬಿಚ್ಚಿಟ್ಟ ಫೇರ್​ಫ್ಯಾಕ್ಸ್ ಮುಖ್ಯಸ್ಥ ಪ್ರೇಮ್ ವತ್ಸ

ಸ್ಯಾಮ್ ಆಲ್ಟ್​ಮ್ಯಾನ್ ಬಾಯ್​ಫ್ರೆಂಡ್ ಓಲಿವರ್ ಯಾರು?

ಆಲಿವರ್ ಮುಲೆರಿನ್ ಅವರು ಆಸ್ಟ್ರೇಲಿಯಾ ದೇಶದವರು. 2016ರಲ್ಲಿ ಮೆಲ್ಬೋರ್ನ್ ಯೂನಿವರ್ಸಿಟಿಯಲ್ಲಿ ಬಿಎಸ್​ಸಿ ಮಾಡಿದ್ದಾರೆ. ವೃತ್ತಿಯಲ್ಲಿ ಸಾಫ್ಟ್​ವೇರ್ ಎಂಜಿನಿಯರ್. ಫೇಸ್​ಬುಕ್​ನ ಮಾಲೀಕ ಸಂಸ್ಥೆ ಮೆಟಾದಲ್ಲಿ 2020ರಿಂದ 22ರವರೆಗೆ ಕೆಲಸ ಮಾಡಿದ್ದಾರೆ. ಬ್ರಾಡ್​ವಿಂಗ್, ಸ್ಪಾರ್ಕ್ ನ್ಯೂರೋ ಸಂಸ್ಥೆಗಳಲ್ಲೂ ಆಲಿವರ್ ಮುಲೆರಿನ್ ಕೆಲಸ ಮಾಡಿದ್ದಾರೆ.

ವಿವಿಧ ರೀತಿಯ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಪ್ರಾಜೆಕ್ಟ್​ಗಳಲ್ಲಿ ಅವರು ಅನುಭವ ಹೊಂದಿದ್ದಾರೆ. ಇಂಟರ್ನೆಂಟ್ ಆಫ್ ಥಿಂಗ್ಸ್ ಕ್ಷೇತ್ರದಲ್ಲಿ ನಿಷ್ಣಾತರು ಅವರು.

ಚ್ಯಾಟ್​ಜಿಪಿಟಿ ಬಿಡುಗಡೆ ಮಾಡಿದ ಓಪನ್​ಎಐನ ಸಿಇಒ ಆಗಿರುವ ಸ್ಯಾಮ್ ಆಲ್ಟ್​ಮ್ಯಾನ್ ಮತ್ತು ಓಲಿವರ್ ಮುಲೆರಿನ್ ನಡುವಿನ ಸ್ನೇಹ ಹಲವು ವರ್ಷಗಳ ಹಿಂದಿನದ್ದು. ಇಬ್ಬರೂ ಕೂಡ ವಾರದ ದಿನಗಳಲ್ಲಿ ಸ್ಯಾನ್ ಫ್ರಾನ್ಸಿಸ್ಕೋದ ರಷ್ಯನ್ ಹಿಲ್​ನ ಮನೆಯೊಂದರಲ್ಲಿ ಒಟ್ಟಿಗೆ ವಾಸಿಸುತ್ತಿದ್ದಾರೆ. ವೀಕೆಂಡ್ ದಿನಗಳಲ್ಲಿ ಅವರು ಕ್ಯಾಲಿಫೋರ್ನಿಯಾದ ನಾಪಾಗೆ ಹೋಗುತ್ತಿರುತ್ತಾರೆ ಎಂದು ಹೇಳಲಾಗಿದೆ.

ಇದನ್ನೂ ಓದಿ: Infosys-InSemi: ಬೆಂಗಳೂರಿನ ಸೆಮಿಕಂಡಕ್ಟರ್ ಡಿಸೈನ್ ಕಂಪನಿ ಇನ್​ಸೆಮಿಯನ್ನು ಖರೀದಿಸಲು ಮುಂದಾದ ಇನ್ಫೋಸಿಸ್

ಸಲಿಂಗಿ ಪುರುಷರಿಗೆ ಸಂತಾನ ಸಾಧ್ಯವೇ?

ಸ್ಯಾಮ್ ಆಲ್ಟ್​ಮ್ಯಾನ್ ಮತ್ತು ಓಲಿವರ್ ಮುಲೆರಿನ್ ಅವರು ಶೀಘ್ರದಲ್ಲೇ ಸಂತಾನ ಪಡೆಯಲಿದ್ದೇವೆ ಎಂದು ಹೇಳಿದ್ದಾರೆ. ಈ ಸಲಿಂಗಿಗಳಿಗೆ ಮಗು ಹೇಗೆ ಆಗಬಹುದು? ಒಬ್ಬ ಸಂಗಾತಿಯು ಮೂಲತಃ ಮಹಿಳೆಯಾಗಿದ್ದು ಪುರುಷನಾಗಿ ಬದಲಾಗಿದ್ದರೆ ಸಂತಾನ ಹೊಂದಲು ಸಾಧ್ಯ. ಆದರೆ, ಇವರಿಬ್ಬರೂ ಮೂಲತಃ ಗಂಡುಗಳೇ ಎಂಬುದು ಈವರೆಗೆ ತಿಳಿದಿರುವ ಮಾಹಿತಿ.

ಈ ಪರಿಸ್ಥಿತಿಯಲ್ಲಿ, ಸಂತಾನ ಸಾಧ್ಯವಾಗಬೇಕೆಂದರೆ ಅದು ಕೃತಕವಾಗಿ ಗರ್ಭಧಾರಣೆ ಮಾಡಿ ಬಾಡಿಗೆ ತಾಯಿ ಮೂಲಕ ಮಗು ಹೆರುವುದು ಸದ್ಯಕ್ಕೆ ಇರುವ ಆಯ್ಕೆ. ಇಲ್ಲಿ ಈ ಜೋಡಿಯಲ್ಲಿ ಒಬ್ಬ ವ್ಯಕ್ತಿಯ ವೀರ್ಯವನ್ನು ಮಾತ್ರ ಬಳಸಬಹುದು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ