Infosys-InSemi: ಬೆಂಗಳೂರಿನ ಸೆಮಿಕಂಡಕ್ಟರ್ ಡಿಸೈನ್ ಕಂಪನಿ ಇನ್ಸೆಮಿಯನ್ನು ಖರೀದಿಸಲು ಮುಂದಾದ ಇನ್ಫೋಸಿಸ್
Infosys To Buy Semiconductor Design Company: ಬೆಂಗಳೂರಿನ ಚಿಪ್ ಡಿಸೈನಿಂಗ್ ಕಂಪನಿ ಇನ್ಸೆಮಿಯನ್ನು 280 ಕೋಟಿ ರೂಗೆ ಇನ್ಫೋಸಿಸ್ ಖರೀದಿಸುತ್ತಿದೆ. ಮಾರ್ಚ್ವೊಳಗೆ ಇನ್ಸೆಮಿಯನ್ನು ಖರೀದಿಸುವ ಪ್ರಕ್ರಿಯೆಯನ್ನು ಇನ್ಫೋಸಿಸ್ ಪೂರ್ಣಗೊಳಿಸುವ ಸಾಧ್ಯತೆ ಇದೆ. ಇನ್ಸೆಮಿ ಸಂಸ್ಥೆ 2013ರಲ್ಲಿ ಆರಂಭವಾಗಿದ್ದು, ಅದರಲ್ಲಿ 900 ಉದ್ಯೋಗಿಗಳು ಕೆಲಸ ಮಾಡುತ್ತಿದ್ದಾರೆ.
Updated on: Jan 12, 2024 | 11:26 AM
ಬೆಂಗಳೂರು, ಜನವರಿ 12: ಬೆಂಗಳೂರಿನ ಸೆಮಿಕಂಡಕ್ಟರ್ ಡಿಸೈನಿಂಗ್ ಸಂಸ್ಥೆಯಾದ ಇನ್ಸೆಮಿಯನ್ನು (InSemi) ಖರೀದಿಸಲು ಇನ್ಫೋಸಿಸ್ ಮುಂದಾಗಿದೆ. ವರದಿ ಪ್ರಕಾರ 280 ಕೋಟಿ ರೂಗೆ ಡೀಲ್ ನಡೆಯಲಿದೆ. ಹತ್ತು ವರ್ಷಗಳ ಹಿಂದೆ ಆರಂಭಗೊಂಡ ಎನ್ಸೆಮಿ ಸೆಮಿಕಂಡಕ್ಟರ್ ಮತ್ತು ಎಂಬೆಡೆಡ್ ಸಿಸ್ಟಂಗಳ ಡಿಸೈನ್ ಸೇವೆ ಒದಗಿಸುವ ಸಂಸ್ಥೆಯಾಗಿದೆ. ಇದನ್ನು ಖರೀದಿಸುವುದರಿಂದ ಮುಂದಿನ ಹಂತದ ಬೆಳವಣಿಗೆಗೆ ಸಹಕಾರಿಯಾಗಬಹುದು ಎನ್ನುವ ವಿಶ್ವಾಸದಲ್ಲಿ ಇನ್ಫೋಸಿಸ್ ಇದೆ. ಈ ಹಣಕಾಸು ವರ್ಷದ ಕೊನೆಯ ಕ್ವಾರ್ಟರ್ನಲ್ಲಿ, ಅಂದರೆ, 2024ರ ಜನವರಿಯಿಂದ ಮಾರ್ಚ್ 31ರವರೆಗಿನ ಅವಧಿಯೊಳಗೆ ಇನ್ಸೆಮಿ ಖರೀದಿ ಪ್ರಕ್ರಿಯೆಯನ್ನು ಇನ್ಫೋಸಿಸ್ ಪೂರ್ಣಗೊಳಿಸುವ ನಿರೀಕ್ಷೆ ಇದೆ.
‘ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್, ಸ್ಮಾರ್ಟ್ ಡಿವೈಸ್, 5ಜಿ, ಎಲೆಕ್ಟ್ರಿಕ್ ವಾಹನಗಳ ಕಾಲ ಘಟ್ಟ ಬಂದಿದೆ. ಮುಂದಿನ ತಲೆಮಾರಿನ ಸೆಮಿಕಂಡಕ್ಟರ್ ಡಿಸೈನ್ ಸರ್ವಿಸ್ಗಳು ಬಹಳ ಮುಖ್ಯ ಎನಿಸುತ್ತವೆ. ಎನ್ಸೆಮಿಗೆ ನಾವು ಮಾಡುವ ಹೂಡಿಕೆಯು ಹೊಸ ಅಲೆಯ ಬೆಳವಣಿಗೆಗೆ ಎಡೆ ಮಾಡಿಕೊಡಬಲ್ಲುದು. ಎಂಜಿನಿಯರಿಂಗ್ ಆರ್ ಅಂಡ್ ಡಿಯಲ್ಲಿ ನಮ್ಮನ್ನು ಮುಂಚೂಣಿಗೆ ನಿಲ್ಲಿಸಬಲ್ಲುದು,’ ಎಂದು ಇನ್ಫೋಸಿಸ್ನ ಹಿರಿಯ ಅಧಿಕಾರಿ ದಿನೇಶ್ ಆರ್ ಹೇಳಿದ್ದಾರೆ.
ಇನ್ಸೆಮಿ ಸಂಸ್ಥೆ 2013ರಲ್ಲಿ ಆರಂಭವಾಗಿದ್ದು, ಅದರಲ್ಲಿ 900 ಉದ್ಯೋಗಿಗಳು ಕೆಲಸ ಮಾಡುತ್ತಿದ್ದಾರೆ. 2022-23ರ ಹಣಕಾಸು ವರ್ಷದಲ್ಲಿ ಇನ್ಸೆಮಿ 154 ಕೋಟಿ ರೂ ಆದಾಯ ಗಳಿಸಿದೆ.
ಸೆಮಿಕಂಡಕ್ಟರ್ ಡಿಸೈನ್ ಸೇವೆಗಳನ್ನು ಪ್ರಮುಖವಾಗಿ ನೀಡುತ್ತದೆ. ಸೆಮಿಕಂಡಕ್ಟರ್, ಕನ್ಸೂಮರ್ ಎಲೆಕ್ಟ್ರಾನಿಕ್ಸ್, ವಾಹನ, ಹೈಟೆಕ್ ಉದ್ಯಮ ಇತ್ಯಾದಿ ಕ್ಷೇತ್ರಗಳ ಜಾಗತಿಕ ಸಂಸ್ಥೆಗಳಿಗೆ ಅದು ಚಿಪ್ ಡಿಸೈನ್ ಮಾಡಿಕೊಡುತ್ತದೆ.
ಇದನ್ನೂ ಓದಿ: ಭಾರತದ ಈಗಿನ ಪಠ್ಯಕ್ರಮದಿಂದ ಚಿಪ್ ಎಂಜಿನಿಯರ್ಗಳ ನಿರ್ಮಾಣ ಸಾಧ್ಯವಿಲ್ಲವಾ? ಮೈಕ್ರೋನ್ ಸಿಇಒ ಬಿಚ್ಚಿಟ್ಟಿದ್ದಾರೆ ವಾಸ್ತವ ಸ್ಥಿತಿ
‘ನಮಗೆ ಇನ್ಫೋಸಿಸ್ ವೇಗವರ್ಧಕವಾಗಿ (catalyst) ಪ್ರಭಾವ ಬೀರಬಹುದು. ಹೆಚ್ಚೆಚ್ಚು ಕ್ಷೇತ್ರಗಳಲ್ಲಿ ಜಾಗತಿಕ ಗ್ರಾಹಕರಿಗೆ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್, ಎಂಜಿನಿಯರಿಂಗ್ ಆರ್ ಅಂಡ್ ಟಿ, ಮುಂದಿನ ತಲೆಮಾರಿನ ತಂತ್ರಜ್ಞಾನವನ್ನು ಒದಗಿಸಲು ಇನ್ಸೆಮಿಗೆ ಶಕ್ತಿ ಕೊಡಬಹುದು,’ ಎಂದು ಇನ್ಸೆಮಿ ಸಹ-ಸಂಸ್ಥಾಪಕರಾದ ಶ್ರೀಕಾಂತ್ ಸಂಪಿಗೆತ್ತಾಯ ಮತ್ತು ಅರುಪ್ ದಾಶ್ ಹೇಳಿದ್ದಾರೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
