ELSS: ತೆರಿಗೆ ಉಳಿಸಲು ಎಸ್ಐಪಿಗೆ ಹಣ ಹಾಕುತ್ತಿದ್ದೀರಾ? ಇಎಲ್ಎಸ್ಎಸ್ ಅಂಶದತ್ತ ಗಮನ ಇರಲಿ
ELSS vs SIPs: ಇಎಲ್ಎಸ್ಎಸ್ ಜೋಡಿತ ಯೋಜನೆಗಳಲ್ಲಿ ಅತಿಯಾಗಿ ಹೂಡಿಕೆ ಮಾಡದಿರಿ. ವರ್ಷಕ್ಕೆ ಒಂದೂವರೆ ಲಕ್ಷ ರೂ ಮಾತ್ರ ಅದರಲ್ಲಿ ಹೂಡಿಕೆಯಾಗಲಿ. ಇಎಲ್ಎಸ್ಎಸ್ನಿಂದ ತೆರಿಗೆ ವಿನಾಯಿತಿ ಅಂಶ ಬಿಟ್ಟರೆ ಹೆಚ್ಚಿನ ಲಾಭ ಇಲ್ಲ ಎನ್ನುತ್ತಾರೆ ತಜ್ಞರು. ಈ ಬಗ್ಗೆ ಒಂದಿಷ್ಟು ವಿವರಣೆ ಇಲ್ಲಿದೆ...
ಈಗ ನಮ್ಮ ಆದಾಯದಲ್ಲಿ ಒಂದೂವರೆ ಲಕ್ಷ ರೂವರೆಗೆ ಟ್ಯಾಕ್ಸ್ ಡಿಡಕ್ಷನ್ ಕ್ಲೇಮ್ (Tax Deductions) ಮಾಡುವ ಅವಕಾಶ ಇದೆ. ಅಂದರೆ ಕೆಲ ಉಳಿತಾಯ ಯೋಜನೆಗಳಲ್ಲಿ ಹೂಡಿಕೆ ಮಾಡಿದ ಹಣಕ್ಕೆ ತೆರಿಗೆ ವಿನಾಯಿತಿ ಪಡೆಯಬಹುದು. 1,50,000 ರೂನಷ್ಟು ಹೂಡಿಕೆ ಮಾಡಿದರೆ 46,800 ರೂ ಉಳಿಸಬಹುದು. ನಮ್ಮ ಆದಾಯದಲ್ಲಿ ತೆರಿಗೆ ಅನ್ವಯ ಆಗುವ ಆದಾಯದ ಪ್ರಮಾಣ ಕಡಿಮೆ ಆಗುತ್ತದೆ. ಈ ಮೂಲಕ ತೆರಿಗೆ ಉಳಿಸಬಹುದು. ಆದರೆ, ಬಹಳ ಮಂದಿಗೆ ಗೊಂದಲ ಇರುವುದು ಎಸ್ಐಪಿ ವಿಚಾರದಲ್ಲಿ. ಎಲ್ಲಾ ಎಸ್ಐಪಿಗಳೂ ತೆರಿಗೆ ವಿನಾಯಿತಿ ತಂದುಕೊಡುವುದಿಲ್ಲ ಎಂಬುದು ಗಮನದಲ್ಲಿರಲಿ. ಇಎಲ್ಎಸ್ಎಸ್ಗೆ ಜೋಡಿತವಾಗಿರುವ ಎಸ್ಐಪಿಗಳು ಮಾತ್ರವೇ ತೆರಿಗೆ ರಿಯಾಯಿತಿ ಒದಗಿಸಬಲ್ಲುವು.
ಇಎಲ್ಎಸ್ಎಸ್ ಎಂದರೆ ಈಕ್ವಿಟಿ ಜೋಡಿತ ಉಳಿತಾಯ ಯೋಜನೆ (ELSS- Equity Linked Saving Scheme). ಇವು ಮ್ಯೂಚುವಲ್ ಫಂಡ್ನಲ್ಲಿ (Mutual Fund) ಹೂಡಿಕೆ ಮಾಡಲು ಅವಕಾಶ ಕೊಡುವ ಒಂದು ಸಾಧನ. ಇಎಲ್ಎಸ್ಎಸ್ ಸ್ಕೀಮ್ಗಳಲ್ಲಿ ಹೂಡಿಕೆ ಮಾಡಲಾಗುವ ಹಣಕ್ಕೆ ಟ್ಯಾಕ್ಸ್ ಡಿಡಕ್ಷನ್ಸ್ ಕ್ಲೇಮ್ ಮಾಡಬಹುದು.
ಇಎಲ್ಎಸ್ಎಸ್ ಸ್ಕೀಮ್ಗೆ ಜೋಡಿತವಾದ ಎಸ್ಐಪಿ ಯೋಜನೆಗಳಿಂದಲೂ ಟ್ಯಾಕ್ಸ್ ಡಿಡಕ್ಷನ್ಸ್ ಕ್ಲೇಮ್ ಮಾಡಬಹುದು. ಎಸ್ಐಪಿ ಎಂದರೆ ಸಿಸ್ಟಮ್ಯಾಟಿಕ್ ಇನ್ವೆಸ್ಟ್ಮೆಂಟ್ ಪ್ಲಾನ್. ಇದು ಅಲ್ಪಾವಧಿಗೆ ಅಲ್ಪಪ್ರಮಾಣದಲ್ಲಿ ಈಕ್ವಿಟಿಗಳ ಮೇಲೆ ಹೂಡಿಕೆ ಮಾಡುವ ಯೋಜನೆಗಳಾಗಿವೆ. ಮ್ಯೂಚುವಲ್ ಫಂಡ್ಗಳ ಎಸ್ಐಪಿ ಪ್ಲಾನ್ಗಳೂ ಉಂಟು.
ಮ್ಯೂಚುವಲ್ ಫಂಡ್ಗಳು ತಮ್ಮಲ್ಲಿನ ಹೂಡಿಕೆದಾರರ ಹಣವನ್ನು ವಿವಿಧ ಕಂಪನಿಗಳ ಷೇರುಗಳ ಮೇಲೆ ಹೂಡಿಕೆ ಮಾಡುತ್ತವೆ. ಒಂದೇ ಕಂಪನಿ ಬದಲು ಮಾರುಕಟ್ಟೆಯ ಏರಿಳಿತಗಳನ್ನು ಗಮನದಲ್ಲಿರಿಸಿಕೊಂಡು ವಿವಿಧ ಕ್ಷೇತ್ರಗಳ ಕಂಪನಿಗಳ ಷೇರುಗಳಿಗೆ ಇನ್ವೆಸ್ಟ್ ಮಾಡಲಾಗುತ್ತದೆ. ಒಂದು ಷೇರು ಬಿದ್ದರೂ ಇತರ ಷೇರುಗಳು ಲಾಭ ತರಬಹುದು ಎನ್ನುವ ಲೆಕ್ಕಾಚಾರ. ಹೀಗಾಗಿ, ಮ್ಯೂಚುವಲ್ ಫಂಡ್ಗಳು ತೀರಾ ಹೆಚ್ಚು ಲಾಭವನ್ನೂ ತರುವುದಿಲ್ಲ, ನಷ್ಟವನ್ನೂ ಕೊಡುವುದಿಲ್ಲ.
ಇಎಲ್ಎಸ್ಎಸ್ಗೆ ಲಿಂಕ್ ಆದ ಮ್ಯೂಚುವಲ್ ಫಂಡ್ಗಳು ಹಲವಿವೆ. ಎಸ್ಬಿಐ ಲಾಗ್ ಟರ್ಮ್ ಈಕ್ವಿಟಿ ಫಂಡ್, ಆ್ಯಕ್ಸಿಸ್ ಲಾಂಗ್ ಟರ್ಮ್ ಈಕ್ವಿಟಿ ಫಂಡ್, ಐಸಿಐಸಿಐ ಪ್ರುಡೆನ್ಷಿಯಲ್ ಲಾಂಗ್ ಟರ್ಮ್ ಈಕ್ವಿಟಿ ಫಂಡ್, ಐಡಿಎಫ್ಸಿ ಟ್ಯಾಕ್ಸ್ ಅಡ್ವಾಂಟೇಜ್ ಈಕ್ವಿಟಿ ಫಂಡ್, ಡಿಎಸ್ಪಿ ಟ್ಯಾಕ್ಸ್ ಸೇವರ್ ಫಂಡ್, ಮಿರೇ ಅಸೆಟ್ ಟ್ಯಾಕ್ಸ್ ಸೇವರ್ ಫಂಡ್ ಇತ್ಯಾದಿ ಹಲವು ಹೂಡಿಕೆ ಯೋಜನೆಗಳು ಇಎಲ್ಎಸ್ಎಸ್ಗೆ ಜೋಡಿತವಾಗಿವೆ.
ತೀರಾ ಹೆಚ್ಚು ಇಎಲ್ಎಸ್ಎಸ್ಗೆ ಜೋತು ಬೀಳದಿರಿ…
ಇಎಲ್ಎಸ್ಎಸ್ ಜೋಡಿತ ಮ್ಯೂಚುವಲ್ ಫಂಡ್ಗಳಿಗಿಂತ ಇತರ ಎಸ್ಐಪಿಗಳು ಹೆಚ್ಚು ರಿಟರ್ನ್ಸ್ ತಂದುಕೊಡಬಲ್ಲುವು. ಇಎಲ್ಎಸ್ಎಸ್ನಿಂದ ಹೆಚ್ಚು ಲಾಭ ಇರುವುದು ಅದರ ತೆರಿಗೆ ವಿನಾಯಿತಿ ಫೀಚರ್ನಲ್ಲಿ. ಸದ್ಯ 1,50,000 ರೂವರೆಗೆ ಟ್ಯಾಕ್ಸ್ ಡಿಡಕ್ಷನ್ಸ್ ಸೌಲಭ್ಯ ಇದೆ. ಅಂದರೆ ನೀವು ವರ್ಷಕ್ಕೆ ಒಂದೂವರೆ ಲಕ್ಷ ರೂವರೆಗೂ ಇಎಲ್ಎಸ್ಎಸ್ ಜೋಡಿತ ಯೋಜನೆಗಳಲ್ಲಿ ಹಣ ತೊಡಗಿಸಿಕೊಳ್ಳಬಹುದು. ಅದಕ್ಕಿಂತ ಹೆಚ್ಚು ಹಣ ಹೂಡಿಕೆ ಮಾಡಬಲ್ಲಿರೆಂದರೆ ಹೆಚ್ಚು ರಿಟರ್ನ್ಸ್ ತಂದುಕೊಡಬಲ್ಲ ಇತರ ಎಸ್ಐಪಿಗಳತ್ತ ಗಮನ ಕೊಡುವುದು ಉತ್ತಮ. ಇದು ತಜ್ಞರ ಸಲಹೆ.