ಒಲಾ ಎಲೆಕ್ಟ್ರಿಕ್ ಸ್ಕೂಟರ್ಗಳ ವಿರುದ್ಧ ಹೆಚ್ಚಾದ ದೂರು; ಗ್ರಾಹಕ ರಕ್ಷಣಾ ಪ್ರಾಧಿಕಾರದಿಂದ ತನಿಖೆ
Ola Electric scooter face probe from CCPA: ಗ್ರಾಹಕರಿಂದ ದೂರು ಬರುವುದು ಹೆಚ್ಚಾದ ಹಿನ್ನೆಲೆಯಲ್ಲಿ ಒಲಾ ಎಲೆಕ್ಟ್ರಿಕ್ ವಿರುದ್ಧ ಗ್ರಾಹಕ ರಕ್ಷಣಾ ಪ್ರಾಧಿಕಾರವಾದ ಸಿಸಿಪಿಎ ತನಿಖೆ ಆರಂಭಿಸಿರುವುದು ತಿಳಿದುಬಂದಿದೆ. ಮಾಧ್ಯಮ ವರದಿಗಳ ಪ್ರಕಾರ ನವೆಂಬರ್ 6ರಂದು ತನಿಖೆಗೆ ಆದೇಶ ಹೊರಡಿಸಲಾಗಿದೆ. 15 ದಿನದೊಳಗೆ ತನಿಖೆಯ ವರದಿ ಸಲ್ಲಿಸಬೇಕೆಂದು ಸೂಚಿಸಲಾಗಿದೆ.
ನವದೆಹಲಿ, ನವೆಂಬರ್ 14: ಒಲಾ ಎಲೆಕ್ಟ್ರಿಕ್ನ ಸ್ಕೂಟರ್ಗಳ ವಿರುದ್ಧ ಗ್ರಾಹಕರಿಂದ ಬರುತ್ತಿರುವ ದೂರು ದಿನೇ ದಿನೇ ಹೆಚ್ಚುತ್ತಿದೆ. ಈ ಹಿನ್ನೆಲೆಯಲ್ಲಿ ಕೇಂದ್ರೀಯ ಗ್ರಾಹಕ ರಕ್ಷಣಾ ಪ್ರಾಧಿಕಾರ (ಸಿಸಿಪಿಎ) ತನಿಖೆ ಕೈಗೊಂಡಿದೆ. ಗ್ರಾಹಕ ವ್ಯವಹಾರಗಳ ಸಚಿವಾಲಯದ ನಿರ್ದೇಶನದ ಮೇರೆಗೆ ಸಿಸಿಪಿಎ ಕಳೆದ ವಾರವೇ ತನಿಖೆ ಆರಂಭಿಸಿದೆ ಎಂದು ಸಿಎನ್ಬಿಸಿ ಟಿವಿ18 ವಾಹಿನಿ ತನ್ನ ಮೂಲಗಳನ್ನು ಉಲ್ಲೇಖಿಸಿ ವರದಿ ಮಾಡಿದೆ.
ಒಲಾ ಎಲೆಕ್ಟ್ರಿಕ್ ವಿರುದ್ಧ ಕೇಳಿಬರುತ್ತಿರುವ ದೂರಿನ ಬಗ್ಗೆ ಕೂಲಂಕಷವಾಗಿ ತನಿಖೆ ಕೈಗೊಳ್ಳುವಂತೆ ಬ್ಯೂರೋ ಆಫ್ ಇಂಡಿಯನ್ ಸ್ಟ್ರ್ಯಾಂಡರ್ಡ್ಸ್ನ (ಬಿಐಎಸ್) ಡೈರೆಕ್ಟರ್ ಜನರಲ್ ಅವರಿಗೆ ಸಿಸಿಪಿಎ ಸೂಚಿಸಿದೆ. ನವೆಂಬರ್ 6ರಂದು ಈ ಸಂಬಂಧ ಆದೇಶ ಹೊರಡಿಸಲಾಗಿದೆ. 15 ದಿನದೊಳಗೆ ತನಿಖೆ ಮುಗಿಸಿ ವರದಿ ಸಲ್ಲಿಸುವಂತೆ ನಿರ್ದೇಶನವನ್ನೂ ನೀಡಲಾಗಿರುವುದು ಕಂಡು ಬಂದಿದೆ. ಅಂದರೆ, ಇದೇ ತಿಂಗಳೊಳಗೆ ಡಿಜಿ ಅವರಿಂದ ವರದಿ ಸಲ್ಲಿಕೆಯಾಗುವ ನಿರೀಕ್ಷೆ ಇದೆ.
ಹೆಚ್ಚುತ್ತಿರುವ ದೂರಿನ ಸಂಬಂಧ ಸಿಸಿಪಿಎ ಅಕ್ಟೋಬರ್ 21ರಂದು ಒಲಾ ಎಲೆಕ್ಟ್ರಿಕ್ ಸಂಸ್ಥೆಗೆ ಶೋಕಾಸ್ ನೋಟೀಸ್ ನೀಡಿತ್ತು. ಇದಕ್ಕೆ ಒಲಾದಿಂದ ಸ್ಪಷ್ಟನೆ ಕೂಡ ಬಂದಿತ್ತು. ಶೇ. 99.10ರಷ್ಟು ದೂರುಗಳನ್ನು ಪರಿಹರಿಸಿರುವುದಾಗಿ ಸಂಸ್ಥೆ ಹೇಳಿತ್ತು. ಆದರೆ, ಗ್ರಾಹಕ ರಕ್ಷಣಾ ಪ್ರಾಧಿಕಾರ ಸ್ವಂತವಾಗಿ ನಡೆಸಿದ ಪರಿಶೀಲನೆಯಲ್ಲಿ ಇದಕ್ಕೆ ಪೂರಕವಾದ ಸಂಗತಿ ವ್ಯಕ್ತವಾಗಿರಲಿಲ್ಲ. ಹೀಗಾಗಿ, ಈ ವಿಚಾರದಲ್ಲಿ ಕೂಲಂಕಷವಾಗಿ ತನಿಖೆ ನಡೆಸುವ ಅಗತ್ಯತೆ ಇರುವುದನ್ನು ಗಮನಿಸಿದ ಪ್ರಾಧಿಕಾರವು, ಆಳದ ತನಿಖೆಗೆ ಆದೇಶ ನೀಡಿದೆ.
ಇದನ್ನೂ ಓದಿ: Trade Deficit: ಅಕ್ಟೋಬರ್ನಲ್ಲಿ ಭಾರತದ ಟ್ರೇಡ್ ಡೆಫಿಸಿಟ್ 27.14 ಬಿಲಿಯನ್ ಡಾಲರ್ಗೆ ಇಳಿಕೆ
ನ್ಯಾಷನಲ್ ಕನ್ಸೂಮರ್ ಹೆಲ್ಪ್ಲೈನ್ನ (ಎನ್ಸಿಎಚ್) ಏಜೆಂಟ್ಗಳು ಒಲಾದ ಸರ್ವಿಸ್ನಿಂದ ಅಸಮಾಧಾನಗೊಂಡ ಗ್ರಾಹಕರನ್ನು ಸಂಪರ್ಕಿಸಿದಾಗ, ಅವರ ಅನಿಸಿಕೆ ಋಣಾತ್ಮಕವಾಗಿರುವುದು ಕಂಡುಬಂದಿತ್ತು. ವರದಿ ಪ್ರಕಾರ ಎನ್ಸಿಎಚ್ ಕಾಲ್ ಏಜೆಂಟ್ಗಳು 287 ಒಲಾ ಗ್ರಾಹಕರನ್ನು ಸಂಪರ್ಕಿಸಲು ಯತ್ನಿಸಿದ್ದು, ಅವರಲ್ಲಿ 130 ಮಂದಿ ಮಾತನಾಡಿದ್ದಾರೆ. ಈ ಪೈಕಿ 103 ಮಂದಿಗೆ ಇನ್ನೂ ಅತೃಪ್ತಿ ಇದೆ ಎನ್ನಲಾಗಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ