Rs 500 Notes: ಮುದ್ರಣಗೊಂಡ ಕೋಟ್ಯಂತರ 500 ರೂ ನೋಟುಗಳು ಆರ್ಬಿಐಗೆ ತಲುಪುವ ಮುನ್ನವೇ ಕಾಣೆಯಾಗಿವೆಯಾ? ಆರ್ಬಿಐ ಏನು ಹೇಳುತ್ತೆ?
RBI Denies Reports Of Missing Rs 500 Notes: ಪ್ರಿಂಟಿಂಗ್ ಪ್ರೆಸ್ಗಳಿಂದ ಮುದ್ರಣಗೊಂಡ 881 ಕೋಟಿ ನೋಟುಗಳಲ್ಲಿ 726 ಕೋಟಿ ನೋಟುಗಳು ಮಾತ್ರ ಆರ್ಬಿಐ ತಲುಪಿವೆ. ಉಳಿದ ನೋಟುಗಳು ಕಾಣೆಯಾಗಿವೆ ಎನ್ನುವಂತಹ ವರದಿ ಫ್ರೀ ಪ್ರೆಸ್ ಜರ್ನಲ್ನಲ್ಲಿ ಪ್ರಕಟವಾಗಿದ್ದು, ಇದನ್ನು ಆರ್ಬಿಐ ನಿರಾಕರಿಸಿದೆ.
Updated on: Jun 18, 2023 | 1:58 PM
ನವದೆಹಲಿ: ಭಾರತದ ಅರ್ಥವ್ಯವಸ್ಥೆಯಿಂದ 88,032.5 ಕೋಟಿ ರೂ ಮೊತ್ತದ ಕರೆನ್ಸಿ ನೋಟುಗಳು ಕಾಣೆ ಅಗಿವೆ ಎನ್ನುವಂತಹ ಸುದ್ದಿ ಬಹಳ ಮಂದಿಯ ಗಮನ ಸೆಳೆದಿದೆ. ಫ್ರೀ ಪ್ರೆಸ್ ಜರ್ನಲ್ (Free Press Journal) ಎಂಬ ಆನ್ಲೈನ್ ನ್ಯೂಸ್ ವೆಬ್ಸೈಟ್ನಲ್ಲಿ ಇಂಥದ್ದೊಂದು ಸುದ್ದಿ ಶನಿವಾರ ಪ್ರಕಟವಾಗಿದೆ. ಮಾಹಿತಿ ಹಕ್ಕು ಕಾಯ್ದೆ ಬಳಸಿ ಮನೋರಂಜನ್ ರಾಯ್ ಎಂಬ ವ್ಯಕ್ತಿ ಕಲೆಹಾಕಿದ ಮಾಹಿತಿಯನ್ನಾಧರಿಸಿ ಈ ವರದಿ ಪ್ರಕಟವಾಗಿತ್ತು. ಅದರ ಪ್ರಕಾರ, 881.065 ಕೋಟಿಯಷ್ಟು ಹೊಸ 500 ರೂ ಮುಖಬೆಲೆಯ ನೋಟುಗಳನ್ನು (Rs 500 Note) ಮುದ್ರಿಸಲಾಗಿತ್ತು. ಇದರಲ್ಲಿ 726 ಕೋಟಿ ನೋಟುಗಳು ಮಾತ್ರ ಆರ್ಬಿಐಗೆ ಸ್ವೀಕೃತವಾಗಿವೆ. ಉಳಿದ ನೋಟುಗಳು ನಾಪತ್ತೆಯಾಗಿವೆ. ಈ ನಾಪತ್ತೆಯಾಗಿರುವ ನೋಟುಗಳ ಮೌಲ್ಯ 88,032.50 ಕೋಟಿ ರೂ ಆಗುತ್ತದೆ ಎಂದು ಈ ವರದಿಯಲ್ಲಿ ಹೇಳಲಾಗಿದೆ.
ಫ್ರೀ ಪ್ರೆಸ್ ಜರ್ನಲ್ ವೆಬ್ಸೈಟ್ನಲ್ಲಿ ಬಂದ ಈ ವರದಿಯಲ್ಲಿರುವ ಅಂಶವನ್ನು ಆರ್ಬಿಐ ತಳ್ಳಿಹಾಕಿದೆ. ‘ಮುದ್ರಿತವಾಗಿರುವ ಬ್ಯಾಂಕ್ನೋಟುಗಳು ಕಾಣೆಯಾಗಿರುವ ಬಗ್ಗೆ ಕೆಲ ಮಾಧ್ಯಮಗಳಲ್ಲಿ ವರದಿಗಳು ಬಂದಿರುವುದು ಆರ್ಬಿಐನ ಗಮನಕ್ಕೆ ಬಂದಿದೆ. ಆದರೆ, ಈ ವರದಿಗಳು ಸತ್ಯವಲ್ಲ. ಪ್ರಿಂಟಿಂಗ್ ಪ್ರೆಸ್ಗಳಿಂದ ಆರ್ಟಿಐ ಕಾಯ್ದೆ ಅಡಿ ಪಡೆದ ಮಾಹಿತಿಯನ್ನು ತಪ್ಪಾಗಿ ಅರ್ಥೈಸಿಕೊಳ್ಳಲಾಗಿದೆ’ ಎಂದು ರಿಸರ್ವ್ ಬ್ಯಾಂಕ್ ಹೇಳಿದೆ.
ಇದನ್ನೂ ಓದಿ: Salary Gap: ಛೇ ಛೇ..! ಸರ್ಕಾರಿ ವರ್ಸಸ್ ಖಾಸಗಿ ಸಂಸ್ಥೆ; ಎಸ್ಬಿಐ ಛೇರ್ಮನ್ಗೆ ಸಿಗೋ ಸಂಬಳ ಇಷ್ಟೇನಾ?
ಪ್ರಿಂಟಿಂಗ್ ಪ್ರೆಸ್ಗಳಲ್ಲಿ ನೋಟುಗಳ ಮುದ್ರಣ ಆಗುವುದರಿಂದ ಹಿಡಿದು ಆರ್ಬಿಐಗೆ ಈ ನೋಟುಗಳು ಸರಬರಾಜು ಆಗುವವರೆಗೂ ಪ್ರತಿಯೊಂದು ಹಂತದಲ್ಲೂ ಬಹಳ ನಿಗಾ ಇರುವ ವ್ಯವಸ್ಥೆಯನ್ನು ಅಳವಡಿಸಲಾಗಿದೆ. ಸಾರ್ವಜನಿಕರು ಆರ್ಬಿಐನಿಂದ ಪ್ರಕಟವಾಗುವ ಮಾಹಿತಿಯ ಮೇಲೆ ಮಾತ್ರ ವಿಶ್ವಾಸ ಇಡಬೇಕು ಎಂದು ಅದು ಮನವಿ ಮಾಡಿದೆ.
ಬೆಂಗಳೂರಿನ ಭಾರತೀಯ ರಿಸರ್ವ್ ಬ್ಯಾಂಕ್ ನೋಟ್ ಮುದ್ರಣ್ ಲಿ, ಮಹಾರಾಷ್ಟ್ರದ ನಾಶಿಕ್ನ ಕರೆನ್ಸಿ ನೋಟ್ ಪ್ರೆಸ್ ಮತ್ತು ಮಧ್ಯಪ್ರದೇಶದ ದೇವಸ್ನ ಬ್ಯಾಂಕ್ ನೋಟ್ ಪ್ರೆಸ್ ಸಂಸ್ಥೆಗಳು ರೂಪಾಯಿ ಕರೆನ್ಸಿ ನೋಟುಗಳನ್ನು ಮುದ್ರಿಸುತ್ತವೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
