ಇಂದು ಆರ್​ಬಿಐ ಎಂಪಿಸಿ ಸಭೆ ಆರಂಭ; ರೆಪೋದರವನ್ನು ಶೇ. 5.50ಕ್ಕೆ ಏರಿಸುವ ನಿರೀಕ್ಷೆ; ಬಡ್ಡಿದರ ಹೆಚ್ಚಿದರೆ ಆಗುವ ಪರಿಣಾಮಗಳಿವು

ನವದೆಹಲಿ, ಅಕ್ಟೋಬರ್ 5: ಆರ್​ಬಿಐನ ಈ ಬಾರಿಯ ಎಂಪಿಸಿ ಸಭೆಯಲ್ಲಿ ರೆಪೋ ದರ ಏರಿಸುವ ಮಹತ್ವದ ನಿರ್ಧಾರ ತೆಗೆದುಕೊಳ್ಳಬಹುದು ಎಂದು ಬಹಳ ಪರಿಣಿತರು ನಿರೀಕ್ಷಿಸಿದ್ದಾರೆ. ಭಾರತೀಯ ರಿಸರ್ವ್ ಬ್ಯಾಂಕ್​ನ (RBI) ಹಣಕಾಸು ನೀತಿ ಸಮಿತಿ (MPC) ಸಭೆ ಇವತ್ತು ಚಾಲನೆಗೊಂಡಿದೆ. ದ್ವೈಮಾಸಿಕವಾಗಿ ನಡೆಯುವ ಈ ಸಭೆ ಅಕ್ಟೋಬರ್ 7ರವರೆಗೂ ನಡೆಯಲಿದೆ. ಬುಧವಾರ ಆರ್​ಬಿಐ ಗವರ್ನರ್ ಅವರು ಪತ್ರಿಕಾಗೋಷ್ಠಿಯಲ್ಲಿ ಸಭೆಯ ನಿರ್ಧಾರಗಳನ್ನು ಪ್ರಕಟಿಸಲಿದ್ದಾರೆ. ತಜ್ಞರ ನಿರೀಕ್ಷೆ ಪ್ರಕಾರ ಶೇ. 5.25ರಷ್ಟಿರುವ ರೆಪೋ ದರವನ್ನು 25 ಮೂಲಾಂಕಗಳಷ್ಟು ಏರಿಸಬಹುದು. ಅಂದರೆ, ಬಡ್ಡಿದರ ಶೇ. 5.25ರಿಂದ ಶೇ. 5.50ಕ್ಕೆ ಏರಬಹುದು ಎನ್ನಲಾಗುತ್ತಿದೆ. ಇದೇನಾದರೂ ಹೌದಾದಲ್ಲಿ ಕಳೆದ ಮೂರು ವರ್ಷದಲ್ಲೇ ಮೊದಲ ಬಾರಿಗೆ ರೆಪೋದರ ಏರಿಕೆಯಾಗಲಿದೆ.

ಆರ್‌ಬಿಐ ಕೊನೆಯ ಬಾರಿಗೆ ಫೆಬ್ರವರಿ 2023 ರಲ್ಲಿ ರೆಪೋ ದರವನ್ನು ಏರಿಸಿತ್ತು. ತದನಂತರ ದರ ಕಡಿತ ಹಾಗೂ ಸ್ಥಿರತೆಯನ್ನು ಕಾಯ್ದುಕೊಂಡಿದ್ದ ಬ್ಯಾಂಕ್, ಇತ್ತೀಚಿನ ತಿಂಗಳುಗಳಲ್ಲಿ ಕಂಡು ಬಂದ ಕೆಲ ಬೆಳವಣಿಗೆಗಳು ಅದರ ನಿಲುವನ್ನು ಬದಲಿಸುವಂತೆ ಮಾಡಬಹುದು. ಆಗಸ್ಟ್ ತಿಂಗಳ ರೀಟೇಲ್ ಹಣದುಬ್ಬರವು ಶೇ. 4.82 ಕ್ಕೆ ಏರಿಕೆಯಾಗಿರುವುದರಿಂದ ಮತ್ತು ಜಾಗತಿಕವಾಗಿ ಅಮೆರಿಕದ ಫೆಡರಲ್ ರಿಸರ್ವ್ ಸೇರಿದಂತೆ ಪ್ರಮುಖ ಬ್ಯಾಂಕ್‌ಗಳು ಬಡ್ಡಿದರ ಹೆಚ್ಚಿಸಿರುವುದರಿಂದ ಆರ್‌ಬಿಐ ಈ ಕಠಿಣ ನಿರ್ಧಾರಕ್ಕೆ ಮುಂದಾಗಬಹುದು ಎಂದು ಅಂದಾಜಿಸಲಾಗಿದೆ.

ರೆಪೋ ದರ ಏರಿಸುವ ವಿಚಾರದಲ್ಲಿ ವಿಶ್ಲೇಷಕರ ಮಿಶ್ರ ಅಭಿಪ್ರಾಯ

ಮಾರುಕಟ್ಟೆಯ ಹೆಚ್ಚಿನ ಆರ್ಥಿಕ ತಜ್ಞರು ಶೇ. 0.25 ರಷ್ಟು ಬಡ್ಡಿದರ ಏರಿಕೆಯನ್ನು ನಿರೀಕ್ಷಿಸುತ್ತಿದ್ದರೆ, ಲಾರ್ಸನ್ & ಟೂಬ್ರೊ (L&T) ಗ್ರೂಪ್‌ನ ಮುಖ್ಯ ಅರ್ಥಶಾಸ್ತ್ರಜ್ಞ ಸಚ್ಚಿದಾನಂದ ಶುಕ್ಲಾ ಅವರಂತಹ ಕೆಲವು ತಜ್ಞರು “ದೇಶೀಯ ಮಾರುಕಟ್ಟೆಯಲ್ಲಿ ಬೇಡಿಕೆ ಆಧಾರಿತ ಹಣದುಬ್ಬರ ಇನ್ನು ತೀವ್ರಗೊಂಡಿಲ್ಲದಿರುವುದರಿಂದ ಆರ್‌ಬಿಐ ಪ್ರಸ್ತುತ ಬಡ್ಡಿದರದಲ್ಲಿ ಯಾವುದೇ ಬದಲಾವಣೆ ಮಾಡದೆ ಯಥಾಸ್ಥಿತಿ ಕಾಯ್ದುಕೊಳ್ಳಬಹುದು” ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಇದನ್ನೂ ಓದಿ: ಬೆಂಗಳೂರು ಥರ ಮತ್ತೊಂದು ನಗರ ಇಲ್ಲ; ಕಂಪನಿ ಶಿಫ್ಟ್ ಮಾಡಿದ್ದು ಒಳ್ಳೇದಾಯ್ತು: ಬ್ಯುಸಿನೆಸ್​ಮ್ಯಾನ್ ಹರೀಶ್ ವರದರಾಜನ್

ಕೆಲ ಆರ್ಥಿಕ ತಜ್ಞರು ಅಕ್ಟೋಬರ್​ನಲ್ಲಿ 25 ಮೂಲಾಂಕ ಮತ್ತು ಡಿಸೆಂಬರ್​ನಲ್ಲಿ 25 ಮೂಲಾಂಕಗಳಷ್ಟು ಬಡ್ಡಿ ಏರಿಕೆ ಮಾಡಬಹುದು ಎಂದು ನಿರೀಕ್ಷಿಸಿದ್ದಾರೆ.

ಉತ್ತಮ ಜಿಡಿಪಿ ಬೆಳವಣಿಗೆಯಿಂದ ಆರ್​ಬಿಐ ನಿರಾಳ

ರಿಸರ್ವ್ ಬ್ಯಾಂಕ್​ಗೆ ತತಕ್ಷಣದ ದೊಡ್ಡ ಗುರಿ ಎಂದರೆ ಹಣದುಬ್ಬರವನ್ನು ಶೇ. 4 ಅನ್ನು ಮೀರದಂತೆ ನೋಡಿಕೊಳ್ಳುವುದು. ಜಿಡಿಪಿ ನಿರೀಕ್ಷೆಮೀರಿ ಬೆಳವಣಿಗೆ ಹೊಂದುತ್ತಿರುವುದು ಆರ್​ಬಿಐ ಮೇಲೆ ಒತ್ತಡ ಕಡಿಮೆ ಮಾಡಿದೆ. ಹಣದುಬ್ಬರಕ್ಕೆ ಕಡಿವಾಣ ಹಾಕಲು ಹೆಚ್ಚು ನಿರ್ಭೀಡೆಯಿಂದ ಅದು ಅಡಿ ಇಡಲು ಸಾಧ್ಯ. ಹೀಗಾಗಿ, ರೆಪೋ ದರವನ್ನು ಏರಿಸಿದರೆ ಅಚ್ಚರಿ ಇರುವುದಿಲ್ಲ.

ರೆಪೋ ದರ ಏರಿದರೆ ಜನಸಾಮಾನ್ಯರ ಮೇಲಿನ ಪರಿಣಾಮಗಳೇನು?

• ಗೃಹ ಮತ್ತು ವಾಹನ ಸಾಲಗಳ ಇಎಂಐ ಏರಿಕೆ: ರೆಪೋ ದರ ಹೆಚ್ಚಳವಾದರೆ ಬ್ಯಾಂಕ್‌ಗಳು ತಮ್ಮ ಎಂಸಿಎಲ್​ಆರ್ ದರಗಳನ್ನು (MCLR) ಹೆಚ್ಚಿಸುತ್ತವೆ. ಇದರಿಂದ ಗೃಹ, ವಾಹನ ಮತ್ತು ವೈಯಕ್ತಿಕ ಸಾಲಗಾರರಿಗೆ ಮಾಸಿಕ ಕಂತು (EMI) ಅಥವಾ ಸಾಲದ ಅವಧಿ ಹೆಚ್ಚಾಗಲಿದೆ.
• ಷೇರು ಮಾರುಕಟ್ಟೆ ಮೇಲೆ ಪರಿಣಾಮ: ಬಡ್ಡಿದರ ಏರಿಕೆಯು ಕಾರ್ಪೊರೇಟ್ ಸಂಸ್ಥೆಗಳ ಸಾಲದ ವೆಚ್ಚವನ್ನು ಹೆಚ್ಚಿಸುವುದರಿಂದ, ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆದಾರರ ಉತ್ಸಾಹ ತಾತ್ಕಾಲಿಕವಾಗಿ ತಗ್ಗುವ ಸಾಧ್ಯತೆಯಿರುತ್ತದೆ.
• ಠೇವಣಿಗಳಿಗೆ ಅನುಕೂಲ: ಬ್ಯಾಂಕ್‌ಗಳು ಸಾಲದ ಬಡ್ಡಿದರಗಳ ಜೊತೆಗೆ ಠೇವಣಿ ದರಗಳನ್ನು (Fixed Deposits/FD) ಹೆಚ್ಚಿಸಬೇಕಾಗುತ್ತದೆ. ಇದರಿಂದ ಹಿರಿಯ ನಾಗರಿಕರು ಮತ್ತು ಬ್ಯಾಂಕ್ ಡೆಪಾಸಿಟ್‌ದಾರರು ತಮ್ಮ ಉಳಿತಾಯದ ಮೇಲೆ ಹೆಚ್ಛಿನ ಬಡ್ಡಿ ಆದಾಯವನ್ನು ಪಡೆಯಲಿದ್ದಾರೆ.

ಇದನ್ನೂ ಓದಿ: ‘ಕಷ್ಟ ಕಾಲ ಬರ್ತಿದೆ, ಸಾಲ ಬೇಡ, ಮೂರು ವರ್ಷದ ಎಮರ್ಜೆನ್ಸಿ ಫಂಡ್ ಇಡಿ’; ರಾಹುಲ್ ಗಾಂಧಿ ಸಲಹೆಗಾರನ ಪೋಸ್ಟ್ ವೈರಲ್

ಅಕ್ಟೋಬರ್ 7 ರಂದು ಆರ್‌ಬಿಐ ಗವರ್ನರ್ ನೇತೃತ್ವದ ಸಮಿತಿಯು ತನ್ನ ಅಂತಿಮ ನಿರ್ಧಾರವನ್ನು ಅಧಿಕೃತವಾಗಿ ಪ್ರಕಟಿಸಲಿದೆ. ಅಂದು ಆರ್​ಬಿಐ ಗವರ್ನರ್ ಅವರು ಬ್ಯಾಂಕ್ ದರಗಳನ್ನು ಪ್ರಕಟಿಸುತ್ತಾರೆ. ಜಿಡಿಪಿ, ಹಣದುಬ್ಬರಗಳು ಮುಂದಿನ ವರ್ಷದವರೆಗೆ ಹೇಗಿರಬಹುದು ಎಂಬ ಅಂದಾಜು ನೀಡಲಿದ್ದಾರೆ. ಒಟ್ಟಾರೆ ದೇಶ ವಿದೇಶಗಳ ಆರ್ಥಿಕ ವಾತಾವರಣ, ಹಾಗು ಅದರ ಅಪಾಯ ಭಾರತದ ಆರ್ಥಿಕತೆ ಮೇಲೆ ಎಷ್ಟಾಗಬಹುದು ಎಂಬುದನ್ನು ವಿಶ್ಲೇಷಿಸಲಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ