Reliance: 1592 ಕೋಟಿಗೆ ಶುಭಲಕ್ಷ್ಮಿ ಪಾಲಿಯಸ್ಟರ್ಸ್ ಖರೀದಿಸಿದ ರಿಲಯನ್ಸ್​

ಮುಂಬೈ: ರಿಲಯನ್ಸ್​ ಪಾಲಿಯೆಸ್ಟರ್ ಎಂದು ಹೊಸದಾಗಿ ಹೆಸರು ಬದಲಿಸಿಕೊಂಡಿರುವ ರಿಲಯನ್ಸ್ ಪೆಟ್ರೋಲಿಯಂ ರೀಟೇಲ್ ಕಂಪನಿಯು ಶನಿವಾರ ಶುಭಲಕ್ಷ್ಮಿ ಪಾಲಿಯೆಸ್ಟರ್ಸ್ Shubhalakshmi Polyesters – SPL) ಕಂಪನಿಯನ್ನು ₹ 1,522 ಕೋಟಿ ಮತ್ತು ಶುಭಲಕ್ಷ್ಮಿ ಪಾಲಿಟೆಕ್ಸ್ (Shubhlaxmi Polytex – SPTex) ಕಂಪನಿಯನ್ನು ₹ 70 ಕೋಟಿಗೆ ಖರೀದಿಸಿದೆ. ರಿಲಯನ್ಸ್​ ಪಾಲಿಯೆಸ್ಟರ್ ಕಂಪನಿಯು ಸಂಪೂರ್ಣವಾಗಿ ಮುಕೇಶ್ ಅಂಬಾನಿ ಅವರ ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ (Reliance Industries Ltd – RIL) ಅಧೀನದಲ್ಲಿದೆ. ‘ಭಾರತೀಯ ಸ್ಪರ್ಧಾ ಆಯೋಗ’ದ (Competition Commission of India – CCI) ಅನುಮೋದನೆ ದೊರೆತ ನಂತರ ಈ ಖರೀದಿ ಒಪ್ಪಂದವು ಅಂತಿಮವಾಗಿ ಊರ್ಜಿತಕ್ಕೆ ಬರಲಿದೆ.

ಶುಭಲಕ್ಷ್ಮೀ ಕಂಪನಿಯು ವರ್ಷಕ್ಕೆ 2.52 ಕೋಟಿ ಟನ್​ನಷ್ಟು ಪಾಲಿಯೆಸ್ಟರ್​ ಎಳೆಗಳನ್ನು ಉತ್ಪಾದಿಸುವ ಸಾಮರ್ಥ್ಯದ ಘಟಕಗಳನ್ನು ಹೊಂದಿದೆ. ಗುಜರಾತ್​ನ ದಹೆಜ್ ಮತ್ತು ದಾದ್ರಾ ನಗರ್ ಹವೇಲಿಯ ಸಿಲ್​ವಸಾ ಪಟ್ಟಣಗಳಲ್ಲಿ ಕಂಪನಿಯ ಘಟಕಗಳಿವೆ. ಇತ್ತೀಚಿನ ದಿನಗಳಲ್ಲಿ ಜವಳಿ ಕ್ಷೇತ್ರದಲ್ಲಿ ರಿಲಯನ್ಸ್​ ದೃಢವಾಗಿ ಹೆಜ್ಜೆ ಊರುತ್ತಿದೆ. ಹೊಸ ಕಂಪನಿಗಳನ್ನು ಸ್ವಾಧೀನಪಡಿಸಿಕೊಳ್ಳುವ ಮೂಲಕ ಉದ್ಯಮ ವಿಸ್ತರಿಸಲು ರಿಲಯನ್ಸ್ ಪ್ರಯತ್ನಿಸುತ್ತಿದೆ. ಶುಭಲಕ್ಷ್ಮೀ ಕಂಪನಿಯ ಘಟಕಗಳನ್ನು ಖರೀದಿಸುವ ಒಪ್ಪಂದವು ಸಹ ಕಂಪನಿಯ ಮಹತ್ವಾಕಾಂಕ್ಷೆಯ ಭಾಗವಾಗಿದೆ.

ಸೋಲಾರ್ ಎನರ್ಜಿಯಲ್ಲಿ ರಿಲಯನ್ಸ್ ದಾಪುಗಾಲು

ಟೆಲಿಕಾಂ ಕ್ಷೇತ್ರದಲ್ಲಿ ಕ್ರಾಂತಿಕಾರಕ ಬದಲಾವಣೆ ತಂದ ರಿಲಯನ್ಸ್​ ಇಂಡಸ್ಟ್ರೀಸ್ ಲಿಮಿಟೆಡ್ ಇದೀಗ ಸೌರವಿದ್ಯುತ್ ಕ್ಷೇತ್ರದಲ್ಲಿ ಅಂಥದ್ದೇ ಪ್ರಯತ್ನಕ್ಕೆ ಮುನ್ನುಡಿ ಬರೆದಿದೆ. ಸೌರವಿದ್ಯುತ್ ಉತ್ಪಾದಕ ಕಂಪನಿಗಳಿಗೆ ಸಾಫ್ಟ್​ವೇರ್ ಸೇವೆ ಒದಗಿಸುವ ಅಮೆರಿಕದ ಸೆನ್ಸ್​ಹಾಕ್ (SenseHawk) ಕಂಪನಿಯಲ್ಲಿ ಶೇ 79.4ರ ಪಾಲು ಖರೀದಿಸಲು ರಿಲಯನ್ಸ್​ ಇಂಡಸ್ಟ್ರೀಸ್ (Reliance Industries – RIL) ಮುಂದಾಗಿದೆ. ಈ ಸಂಬಂಧ ಸೆನ್ಸ್​ಹಾಕ್​ ಕಂಪನಿಯ ಪ್ರವರ್ತಕರೊಂದಿಗೆ ರಿಯಲನ್ಸ್​ ಒಪ್ಪಂದ ಮಾಡಿಕೊಂಡಿದ್ದು, ಇದಕ್ಕಾಗಿ ರಿಲಯನ್ಸ್​ 3.2 ಕೋಟಿ ಅಮೆರಿಕನ್ ಡಾಲರ್ ವ್ಯಯಿಸಲಿದೆ. 2018ರಲ್ಲಿ ಆರಂಭವಾದ ಸೆನ್ಸ್​ಹಾಕ್ ಕ್ಯಾಲಿಫೋರ್ನಿಯಾ ಮೂಲದ ಸಾಫ್ಟ್​ವೇರ್ ಕಂಪನಿ. ಇದು ಸೌರಶಕ್ತಿ ಕಂಪನಿಗಳಿಗೆ ದೈನಂದಿನ ಕಾರ್ಯನಿರ್ವಹಣೆಯ ಸಾಫ್ಟ್​ವೇರ್ ಟೂಲ್​ಗಳನ್ನು ಒದಗಿಸುತ್ತದೆ.

ಸೆನ್ಸ್​ಹಾಕ್ ಕಂಪನಿಯ 2021-2022ನೇ ಆರ್ಥಿಕ ವರ್ಷದ ವಹಿವಾಟು 2.32 ಕೋಟಿ ಅಮೆರಿಕನ್ ಡಾಲರ್​ ಇದೆ. 2020-21ರಲ್ಲಿ 1.16 ಕೋಟಿ ಅಮೆರಿಕನ್ ಡಾಲರ್, 2019-20ರಲ್ಲಿ 1.29 ಕೋಟಿ ಅಮೆರಿಕನ್ ಡಾಲರ್​ ವಹಿವಾಟು ನಡೆಸಿತ್ತು. ‘ಸೆನ್ಸ್​ಹಾಕ್ ಕಂಪನಿಯು ಸೋಲಾರ್ ಯೋಜನೆಗಳನ್ನು ರೂಪಿಸಲು, ಸ್ಥಾಪಿಸಲು ಮತ್ತು ಸೌರವಿದ್ಯುತ್ ಉತ್ಪಾದಿಸಲು ನೆರವಾಗುತ್ತದೆ. ಸೌರಶಕ್ತಿಯು ಉತ್ಪಾದನೆ ಮತ್ತು ಸರಬರಾಜನ್ನು ಸ್ವಯಂಚಾಲಿಕಗೊಳಿಸಲು ಹಲವು ಟೂಲ್​ಗಳನ್ನು ಸೆನ್ಸ್​ಹಾಕ್ ಒದಗಿಸುತ್ತದೆ’ ಎಂದು ರಿಲಯನ್ಸ್​ ಇಂಡಸ್ಟ್ರೀಸ್ ಲಿಮಿಟೆಡ್​ ಭಾರತ ಸರ್ಕಾರಕ್ಕೆ ನೀಡಿರುವ ಮಾಹಿತಿಯಲ್ಲಿ ತಿಳಿಸಿದೆ.