ಟಾಟಾ ಗ್ರೂಪ್​ನಿಂದ ಭಾರತದ ಮೊದಲ ಸೆಮಿಕಂಡಕ್ಟರ್ ತಯಾರಿಕೆ ಘಟಕ ಸ್ಥಾಪನೆ ನಿಶ್ಚಿತ; ತೈವಾನ್​ನ ಪಿಎಸ್​​ಎಂಸಿ ಜೊತೆ ಒಪ್ಪಂದ

ನವದೆಹಲಿ, ಸೆಪ್ಟೆಂಬರ್ 26: ಟಾಟಾ ಗ್ರೂಪ್​ನಿಂದ ಭಾರತದ ಮೊದಲ ಸೆಮಿಕಂಡಕ್ಟರ್ ಮ್ಯಾನುಫ್ಯಾಕ್ಚರಿಂಗ್ ಘಟಕ ಸ್ಥಾಪನೆಯಾಗುವುದು ನಿಶ್ಚಿತವಾಗಿದೆ. ಗುಜರಾತ್​ನ ಧೋಲೇರಾದಲ್ಲಿ ಚಿಪ್ ಫ್ಯಾಕ್ಟರಿ ಶುರುವಾಗಲಿದೆ. ತೈವಾನ್​ನ ಪವರ್​ಚಿಪ್ ಸೆಮಿಕಂಡಕ್ಟರ್ ಮ್ಯಾನುಫ್ಯಾಕ್ಚರಿಂಗ್ ಕಾರ್ಪೊರೇಶನ್ (ಪಿಎಸ್​ಎಂಸಿ) ಮತ್ತು ಟಾಟಾ ಎಲೆಕ್ಟ್ರಾನಿಕ್ಸ್ ನಡುವೆ ಒಪ್ಪಂದ ಆಗಿದೆ. ಈ ಒಪ್ಪಂದ ಪ್ರಕಾರ, ತೈವಾನ್ ದೇಶದ ಈ ಕಂಪನಿಯು ಚಿಪ್ ಫ್ಯಾಬ್ರಿಕೇಶನ್ ಘಟಕಕ್ಕೆ ಬೇಕಾದ ವಿನ್ಯಾಸ ಮತ್ತು ನಿರ್ಮಾಣ ನೆರವನ್ನು ಒದಗಿಸಲಿದೆ.

ಗುಜರಾತ್ ಕರಾವಳಿಯಲ್ಲಿರುವ ಧೋಲೇರಾ ನಗರದಲ್ಲಿ ಸ್ಥಾಪನೆಯಾಗಲಿರುವ ಈ ಸೆಮಿಕಂಡಕ್ಟರ್ ಚಿಪ್ ಫ್ಯಾಬ್ರಿಕೇಶನ್ ಫ್ಯಾಕ್ಟರಿಯು ಒಂದು ತಿಂಗಳಲ್ಲಿ 50,000 ವೇಫರ್​ಗಳನ್ನು ತಯಾರಿಸುವ ಸಾಮರ್ಥ್ಯದ್ದಾಗಿರಲಿದೆ. ವೇಫರ್ ಎಂದರೆ ಚಿಪ್​ಗಳಿರುವ ತೆಳು ಹಾಳೆ. ಈ ವೇಫರ್​ಗಳು ಎಷ್ಟು ಗಾತ್ರದ್ದು, ಒಂದು ವೇಫರ್​ನಲ್ಲಿ ಎಷ್ಟು ಚಿಪ್​ಗಳನ್ನು ತಯಾರಿಸಬಹುದು ಇತ್ಯಾದಿ ಮಾಹಿತಿ ಸದ್ಯಕ್ಕೆ ಲಭ್ಯ ಆಗಿಲ್ಲ. ಕೆಲ ಆಧುನಿಕ ಸೆಮಿಕಂಡಕ್ಟರ್ ಫ್ಯಾಬ್ ಘಟಕಗಳಲ್ಲಿ 300 ಎಂಎಂ ದಪ್ಪದ ವೇಫರ್​ಗಳನ್ನು ತಯಾರಿಸಲಾಗುತ್ತದೆ. ಒಂದು ಎಂಎಂನ ಚಿಪ್​ಗಳಾದರೆ ಒಂದು ವೇಫರ್​ನಲ್ಲಿ 70,000 ಚಿಪ್​ಗಳಿರಬಹುದು. ಆದರೆ, ಟಾಟಾ ಎಲೆಕ್ಟ್ರಾನಿಕ್ಸ್​ನ ಫ್ಯಾಬ್ ಘಟಕದಲ್ಲಿ ತಯಾರಾಗುವ ಚಿಪ್​ಗಳನ್ನು ಎಐ, ವಾಹನ, ಕಂಪ್ಯೂಟಿಂಗ್, ಟೆಲಿಕಾಂ ಕ್ಷೇತ್ರಗಳಿಗೆ ಬಳಕೆ ಆಗಬಹುದು.

ಈಗಾಗಲೇ ಐಫೋನ್​ಗಳನ್ನು ಅಸೆಂಬ್ಲಿಂಗ್ ಮಾಡುತ್ತಿರುವ ಟಾಟಾ ಗ್ರೂಪ್ ಸಂಸ್ಥೆಗೆ ಈ ಸೆಮಿಕಂಡಕ್ಟರ್ ಉತ್ಪಾದನಾ ಕ್ಷೇತ್ರ ಹೊಸ ವಿಸ್ತಾರತೆ ತಂದುಕೊಟ್ಟಿದೆ. ಪಿಎಸ್​ಎಂಸಿ ಸಹಯೋಗದಲ್ಲಿ ಟಾಟಾ ಎಲೆಕ್ಟ್ರಾನಿಕ್ಸ್ ಸಂಸ್ಥೆ ನಿರ್ಮಿಸುತ್ತಿರುವ ಈ ಫ್ಯಾಕ್ಟರಿಗೆ 91,000 ಕೋಟಿ ರೂ ಬಂಡವಾಳ ಸಿಗಲಿದೆ. 20,000 ಸಂಖ್ಯೆಯಲ್ಲಿ ನೇರ ಮತ್ತು ಪರೋಕ್ಷ ಉದ್ಯೋಗಗಳು ಸೃಷ್ಟಿಯಾಗಲಿವೆ. ಟಾಟಾದ ಮುಂಬರುವ ಪರಿಕಲ್ಪನೆಗಳು ಜಾರಿಯಾದರೆ ಈ ಘಟಕವೊಂದೇ ಒಂದು ಲಕ್ಷ ಜನರಿಗೆ ಉದ್ಯೋಗ ಕೊಡಬಲ್ಲುದು.

ಇದನ್ನೂ ಓದಿ: ಶಂಖ್ ಏರ್; ಭಾರತದಲ್ಲಿ ಪದಾರ್ಪಣೆ ಮಾಡಲಿದೆ ಹೊಸ ಏರ್​ಲೈನ್ಸ್ ಸಂಸ್ಥೆ

ಈ ಘಟಕದಲ್ಲಿ ಪವರ್ ಮ್ಯಾನೇಜ್ಮೆಂಟ್ ಇಂಟಿಗ್ರೇಟೆಡ್ ಸರ್ಕ್ಯೂಟ್ (ಐಸಿ), ಡಿಸ್​ಪ್ಲೇ ಡ್ರೈವರ್ಸ್, ಮೈಕ್ರೋಕಂಟ್ರೋಲರ್ಸ್, ಹೈಪರ್ಫಾರ್ಮೆನ್ಸ್ ಕಂಪ್ಯೂಟಿಂಗ್ ಚಿಪ್​ಗಳನ್ನು ತಯಾರಿಸುವ ಉದ್ದೇಶ ಇದೆ. ಈ ಮೇಲೆ ತಿಳಿಸಿದ ಚಿಪ್​ಗಳು ಜಾಗತಿಕವಾಗಿ ಬೇಡಿಕೆ ಇರುವಂತಹವು. ಹೀಗಾಗಿ, ಜಾಗತಿಕ ಸೆಮಿಕಂಡಕ್ಟರ್ ಇಕೋಸಿಸ್ಟಂನಲ್ಲಿ ಭಾರತದ ಪಾತ್ರವೂ ಗಮನಾರ್ಹವಾಗಿರುವಂತೆ ಮಾಡಲಿದೆ ಈ ಟಾಟಾ ಫ್ಯಾಕ್ಟರಿ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ