ಅಮೆರಿಕದ ಭಾರೀ ಸಾಲ; ಬಡ್ಡಿ ಕಟ್ಟಲು ಹೊಸ ಸಾಲ; ಬಾಂಡ್ ಈಲ್ಡ್ ಕುಸಿತ; ಚಿನ್ನದ ಬೆಲೆ ಏರುತ್ತಾ?
US huge debt may lead to crisis in global finance market: ಅಮೆರಿಕ ತನ್ನ ಜಿಡಿಪಿಗೆ ಸಮನಾದಷ್ಟು ಮೊತ್ತದ ಸಾಲಗಳನ್ನು ಮಾಡಿ ಕೂತಿದೆ. ವಿಶ್ವದ ದೊಡ್ಡಣ್ಣನ ಮೈದುಂಬಿರುವ ಸಾಲ ಜಾಗತಿಕ ಹಣಕಾಸು ಮಾರುಕಟ್ಟೆಯನ್ನು ತಲ್ಲಣಗೊಳಿಸುತ್ತಿದೆ. ಅಮೆರಿಕ ತನ್ನ ಸಾಲಕ್ಕೆ ಬಡ್ಡಿ ಕಟ್ಟಲೇ ಹೊಸ ಸಾಲ ಮಾಡಬೇಕಾದ ಅನಿವಾರ್ಯತೆ ಇದೆ. ಬಾಂಡ್ಗಳ ಮೇಲೆ ಬಾಂಡ್ಗಳನ್ನು ಅಮೆರಿಕ ವಿತರಿಸುತ್ತಿದೆ. ಇದರಿಂದ ಚಿನ್ನದ ಬೆಲೆ ಗಣನೀಯವಾಗಿ ಏರುತ್ತಾ?
Updated on:Aug 26, 2026 | 5:51 PM
ಮುಖ್ಯಾಂಶಗಳು
- ಅಮೆರಿಕ ತನ್ನ ಜಿಡಿಪಿಗೆ ಸಮನಾದಷ್ಟು ಮೊತ್ತದ ಸಾಲಗಳನ್ನು ಮಾಡಿ ಕೂತಿದೆ.
- ವಿಶ್ವದ ದೊಡ್ಡಣ್ಣನ ಮೈದುಂಬಿರುವ ಸಾಲ ಜಾಗತಿಕ ಹಣಕಾಸು ಮಾರುಕಟ್ಟೆಯನ್ನು ತಲ್ಲಣಗೊಳಿಸುತ್ತಿದೆ.
- ಬಾಂಡ್ಗಳ ಮೇಲೆ ಬಾಂಡ್ಗಳನ್ನು ಅಮೆರಿಕ ವಿತರಿಸುತ್ತಿದೆ. ಇದರಿಂದ ಚಿನ್ನದ ಬೆಲೆ ಗಣನೀಯವಾಗಿ ಏರುತ್ತಾ?
ನವದೆಹಲಿ, ಆಗಸ್ಟ್ 26: ಅಮೆರಿಕ ಸರ್ಕಾರದ ಹೆಚ್ಚುತ್ತಿರುವ ರಾಷ್ಟ್ರೀಯ ಸಾಲವು ಜಾಗತಿಕ ಹಣಕಾಸು ಮತ್ತು ಬಾಂಡ್ ಮಾರುಕಟ್ಟೆಗೆ ದೊಡ್ಡ ಬೆದರಿಕೆಯಾಗಿ ಪರಿಣಮಿಸುತ್ತಿದೆ. $160 ಟ್ರಿಲಿಯನ್ ಮೌಲ್ಯದ ಜಾಗತಿಕ ಬಾಂಡ್ ಮಾರುಕಟ್ಟೆಯು ಹೂಡಿಕೆದಾರರಿಗೆ ಎಚ್ಚರಿಕೆಯ ಕರೆ ನೀಡುತ್ತಿದೆ. ಅಮೆರಿಕದ ಒಟ್ಟು ರಾಷ್ಟ್ರೀಯ ಸಾಲವು $40 ಟ್ರಿಲಿಯನ್ ಗಡಿಯನ್ನು ತಲುಪಿದೆ. ಪ್ರಸಕ್ತ ಹಣಕಾಸು ವರ್ಷದಲ್ಲಿ ಸಾಲದ ಬಡ್ಡಿ ಪಾವತಿಯೊಂದಕ್ಕೇ ಅಮೆರಿಕ $1.17 ಟ್ರಿಲಿಯನ್ ವೆಚ್ಚ ಮಾಡಿದೆ. ಇದು ಅಮೆರಿಕದ ಒಟ್ಟು ಸರ್ಕಾರಿ ವೆಚ್ಚದ ಶೇ. 19 ರಷ್ಟಾಗುತ್ತದೆ. ಅಮೆರಿಕದ ಆದಾಯದಲ್ಲಿ ಪ್ರತಿ 5 ಡಾಲರ್ನಲ್ಲಿ 1 ಡಾಲರ್ ಬಡ್ಡಿಗೆ ತಗುಲುತ್ತದೆ. ಇದಕ್ಕಿರುವ ಸಾಲ ಎಷ್ಟಿದೆ ಎಂದರೆ, ಅನೇಕ ದೇಶಗಳ ಒಟ್ಟು ಆಂತರಿಕ ಉತ್ಪಾದನೆಗಿಂತ (GDP) ಹೆಚ್ಚಾಗಿದೆ.
ಸಾಲ ತೀರಿಸಲು ಮತ್ತಷ್ಟು ಸಾಲ; ಬಾಂಡ್ ಈಲ್ಡ್ ಏರಿಕೆ
ಸಾಲ ತೀರಿಸಲು ಸರ್ಕಾರ ಮತ್ತಷ್ಟು ಬಾಂಡ್ಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡುತ್ತಿರುವುದರಿಂದ, ಹೂಡಿಕೆದಾರರು ಹೆಚ್ಚಿನ ಆದಾಯಕ್ಕೆ (Yields) ಬೇಡಿಕೆ ಇಡುತ್ತಿದ್ದಾರೆ. 30 ವರ್ಷಗಳ ಯುಎಸ್ ಟ್ರೆಷರಿ ಬಾಂಡ್ ಈಲ್ಡ್ 5.23% ಕ್ಕಿಂತ ಹೆಚ್ಚಿದ್ದರೆ, 10 ವರ್ಷಗಳ ಬಾಂಡ್ ಈಲ್ಡ್ 4.7% ಗಡಿ ದಾಟಿದ್ದು, ಹಲವು ದಶಕಗಳ ಗರಿಷ್ಠ ಮಟ್ಟಕ್ಕೆ ತಲುಪಿದೆ.
ಇದನ್ನೂ ಓದಿ: ಬೀಟಾ ಗ್ರೂಪ್ ಮುಖ್ಯಸ್ಥರ ಸ್ಫೂರ್ತಿಯುತ ಕತೆ; ಸತತ ಕಷ್ಟ, ಸವಾಲುಗಳ ನಡುವೆ ಯಶಸ್ಸಿನ ಉದ್ಯಮ ಕಟ್ಟಿದ ರಾಜಮೋಹನ್ ಪಿಳ್ಳೈ
ಯುಎಸ್ ಟ್ರೆಷರಿ ಬಾಂಡ್ಗಳಲ್ಲಿ ವಿದೇಶಿ ಹೂಡಿಕೆದಾರರ (ಮುಖ್ಯವಾಗಿ ಚೀನಾ ಮತ್ತು ಜಪಾನ್) ಪಾಲು ಈ ಹಿಂದೆ ಶೇ. 50 ಕ್ಕಿಂತ ಹೆಚ್ಚಿತ್ತು, ಅದು ಈಗ ಶೇ. 40 ಕ್ಕೆ ಕುಸಿದಿದೆ. ವಿದೇಶಿ ಹೂಡಿಕೆದಾರರು ಅಮೆರಿಕನ್ ಬಾಂಡ್ಗಳನ್ನು ಮಾರಾಟ ಮಾಡುತ್ತಿರುವುದು ಜಾಗತಿಕ ಮಟ್ಟದಲ್ಲಿ ಆತಂಕ ಮೂಡಿಸಿದೆ.
ಸರ್ಕಾರದ ಮಧ್ಯಪ್ರವೇಶ: ಪರಿಸ್ಥಿತಿಯನ್ನು ತಿಳಿಗೊಳಿಸಲು ಯುಎಸ್ ಟ್ರೆಷರಿ ಇಲಾಖೆಯು ಸೆಪ್ಟೆಂಬರ್ ಮತ್ತು ನವೆಂಬರ್ ನಡುವೆ ದೀರ್ಘಾವಧಿಯ ಬಾಂಡ್ಗಳ ಮರುಖರೀದಿ (Buyback) ಮೊತ್ತವನ್ನು $2 ಬಿಲಿಯನ್ನಿಂದ $4 ಬಿಲಿಯನ್ಗೆ ದ್ವಿಗುಣಗೊಳಿಸುವುದಾಗಿ ಘೋಷಿಸಿದೆ. ಆದರೆ ಮಾರುಕಟ್ಟೆಯ ಮೇಲೆ ಇದರ ಪ್ರಭಾವ ತೀರಾ ಕಡಿಮೆಯಾಗಿದೆ.
ಯುಎಸ್ ಬಾಂಡ್ಗಳ ಕುಸಿತದ ಎಫೆಕ್ಟ್, ಚಿನ್ನಕ್ಕೆ ಬೇಡಿಕೆ?
ಸುರಕ್ಷಿತ ಹೂಡಿಕೆ ಎಂದು ಪರಿಗಣಿಸಲಾಗುತ್ತಿದ್ದ ಅಮೆರಿಕನ್ ಬಾಂಡ್ಗಳು ಮೌಲ್ಯ ಕಳೆದುಕೊಳ್ಳುತ್ತಿರುವುದರಿಂದ, ಹೂಡಿಕೆದಾರರು ಚಿನ್ನದತ್ತ ಮುಖ ಮಾಡುತ್ತಿದ್ದಾರೆ.
ಇದನ್ನೂ ಓದಿ: ಸಿಸ್ಟಮ್ಯಾಟಿಕ್ ಇನ್ವೆಸ್ಟ್ಮೆಂಟ್ ಪ್ಲಾನ್ ಮೂಲಕ ಹೂಡಿಕೆ ಮಾಡುವ ಮುನ್ನ ಈ ವಿಷಯಗಳು ತಿಳಿದಿರಲಿ
ಅಮೆರಿಕ ಮಾತ್ರವಲ್ಲದೆ ಬ್ರಿಟನ್, ಫ್ರಾನ್ಸ್ ಮತ್ತು ಜಪಾನ್ನಂತಹ ಅಭಿವೃದ್ಧಿ ಹೊಂದಿದ ದೇಶಗಳಲ್ಲೂ ಸರ್ಕಾರಿ ಸಾಲ ಮತ್ತು ಬಾಂಡ್ ಈಲ್ಡ್ಗಳು ಹೆಚ್ಚುತ್ತಿದ್ದು, ಜಾಗತಿಕ ಆರ್ಥಿಕ ಚೇತರಿಕೆಗೆ ದೊಡ್ಡ ಸವಾಲಾಗಿ ಪರಿಣಮಿಸಿವೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 5:45 pm, Wed, 26 August 26
