Xiaomi: ಅರಬ್ ದೇಶಗಳಿಗೆ ರಫ್ತಾಗಲಿವೆಯಾ ‘ಮೇಡ್ ಇನ್ ಇಂಡಿಯಾ’ ಶಿಯೋಮಿ ಫೋನ್ಗಳು? ಡಿಕ್ಸಾನ್ ಜೊತೆಗೂ ಶಿಯೋಮಿ ಮಾತುಕತೆ
Export of Made In India Xiaomi Phone: ಬ್ಯುಸಿನೆಸ್ ಸ್ಟಾಂಡರ್ಡ್ ಪತ್ರಿಕೆಯ ವರದಿ ಪ್ರಕಾರ ಚೀನಾದ ಶಿಯೋಮಿ ಸಂಸ್ಥೆ ಭಾರತದಲ್ಲಿ ಅಸೆಂಬಲ್ ಮಾಡಿದ ತನ್ನ ಸ್ಮಾರ್ಟ್ಫೋನ್ಗಳನ್ನು ದುಬೈ ಮತ್ತಿತರ ಕಡೆ ರಫ್ತು ಮಾಡಲು ಪ್ರಯತ್ನಿಸುತ್ತಿದೆ.
ನವದೆಹಲಿ, ಜುಲೈ 14: ಭಾರತೀಯ ಮಾರುಕಟ್ಟೆಯಲ್ಲಿರುವ ಮೂರನೇ ಅತಿದೊಡ್ಡ ಸ್ಮಾರ್ಟ್ಫೋನ್ ಕಂಪನಿ ಶಿಯೋಮಿ (Xiaomi) ಇದೀಗ ಭಾರತದಲ್ಲಿ ತಯಾರಿಸಿದ ಮೊಬೈಲ್ ಫೋನ್ಗಳನ್ನು ಪಶ್ಚಿಮ ಏಷ್ಯನ್ ದೇಶಗಳಿಗೆ ರಫ್ತು ಮಾಡಲು ಪ್ರಯತ್ನಿಸುತ್ತಿದೆ. ಇದೇನಾದರೂ ಸಾಕಾರವಾದರೆ ಅರಬ್ ಮೊದಲಾದ ಪ್ರದೇಶಗಳಲ್ಲಿ ಮೊದಲ ಬಾರಿಗೆ ಮೇಡ್ ಇನ್ ಇಂಡಿಯಾ ಶಿಯೋಮಿ ಫೋನ್ಗಳು ಸಿಗಲಿವೆ. ಬ್ಯುಸಿನೆಸ್ ಸ್ಟಾಂಡರ್ಡ್ ಪತ್ರಿಕೆಯಲ್ಲಿ ಪ್ರಕಟವಾಗಿರುವ ವರದಿ ಪ್ರಕಾರ ಈ ವರ್ಷದ ಮೂರನೇ ಕ್ವಾರ್ಟರ್ ಮುಗಿಯುವುದರೊಳಗಾಗಿ ಶಿಯೋಮಿ ತನ್ನ ಮೇಡ್ ಇನ್ ಇಂಡಿಯಾ ಪೋನ್ಗಳನ್ನು ಪಶ್ಚಿಮ ಏಷ್ಯನ್ ದೇಶಗಳಿಗೆ ರಫ್ತು ಮಾಡಬಹುದು ಎನ್ನಲಾಗಿದೆ.
ಚೀನಾ ಮೂಲದ ಶಿಯೋಮಿ ಸಂಸ್ಥೆಯ ಫೋನ್ಗಳನ್ನು ಸದ್ಯ ಭಾರತದಲ್ಲಿ ಅಸೆಂಬಲ್ ಮಾಡಲಾಗುತ್ತಿದೆ. ತೈವಾನ್ ಮೂಲದ ಫಾಕ್ಸ್ಕಾನ್ ಹಾಗೂ ಚೀನಾದ ಡಿಬಿಜಿ ಮತ್ತು ಬಿವೈಡಿ ಕಂಪನಿಗಳು ಭಾರತದಲ್ಲಿ ಶಿಯೋಮಿ ಸ್ಮಾರ್ಟ್ಫೋನ್ಗಳನ್ನು ಅಸೆಂಬಲ್ ಮಾಡುತ್ತಿವೆ. ಆ್ಯಪಲ್ನ ಐಪೋನ್ಗಳ ರೀತಿ ಶಿಯೋಮಿ ಸ್ಮಾರ್ಟ್ಫೋನ್ಗಳ ಬಿಡಿಭಾಗಗಳು ಬಹುತೇಕ ವಿದೇಶಗಳಲ್ಲೇ ತಯಾರಾಗುತ್ತವೆ. ಬಳಿಕ ಭಾರತದಲ್ಲಿ ಅವುಗಳನ್ನು ಅಸೆಂಬ್ಲಿಂಗ್ ಮಾಡಿ ಅಂತಿಮ ರೂಪು ಕೊಡಲಾಗುತ್ತದೆ.
ಇದನ್ನೂ ಓದಿ: Foxconn: ಸೆಮಿಕಂಡಕ್ಟರ್ ಯೋಜನೆ: ವೇದಾಂತ ಬಿಟ್ಟ ಫಾಕ್ಸ್ಕಾನ್ ಈಗ ಹೊಸ ಜೊತೆಗಾರಿಕೆಗೆ ಟಿಎಸ್ಎಂಸಿ, ಟಿಎಂಎಚ್ ಜೊತೆ ಮಾತುಕತೆ
ಭಾರತದಲ್ಲಿ ತಯಾರಿಕೆಗೆ ಹೆಚ್ಚು ಒತ್ತು; ಡಿಕ್ಸಾನ್ ಮೊದಲಾದ ಕಂಪನಿ ಜೊತೆ ಶಿಯೋಮಿ ಮಾತುಕತೆ
ಭಾರತದ ಸ್ಮಾರ್ಟ್ಫೋನ್ ಮಾರುಕಟ್ಟೆಯಲ್ಲಿ ಚೀನೀ ಕಂಪನಿಗಳು ಸಾಕಷ್ಟು ಪ್ರಾಬಲ್ಯ ಸಾಧಿಸಿವೆ. ಈ ಫೋನ್ಗಳನ್ನು ಭಾರತದಲ್ಲೇ ತಯಾರಿಸಿದರೆ ಇಲ್ಲಿನ ಆರ್ಥಿಕತೆಗೆ ಅನುಕೂಲವಾಗುತ್ತದೆ. ಹೀಗಾಗಿ, ಸರ್ಕಾರ ಮೇಡ್ ಇನ್ ಇಂಡಿಯಾ ಯೋಜನೆಗೆ ಒತ್ತುಕೊಡುತ್ತಿದೆ. ಇದೇ ಕಾರಣಕ್ಕೆ ಚೀನೀ ಮೊಬೈಲ್ ಕಂಪನಿಗಳಿಗೆ ಭಾರತದಲ್ಲೇ ಫೋನ್ಗಳ ತಯಾರಿಕೆ ಆಗಬೇಕು ಹಾಗೂ ಇಲ್ಲಿ ತಯಾರಿಸಿದ ಫೋನ್ಗಳನ್ನು ಬೇರೆಡೆಗೆ ರಫ್ತು ಮಾಡಬೇಕು ಎಂದು ಸೂಚಿಸಿದೆ.
ಜೊತೆಗೆ ಬಿಡಿಭಾಗಗಳ ತಯಾರಿಕೆಗೆ ಸ್ಥಳೀಯ ಕಂಪನಿಗಳನ್ನು ಬಳಸಿಕೊಳ್ಳಬೇಕೆಂದೂ ಸರ್ಕಾರ ಚೀನೀ ಕಂಪನಿಗಳಿಗೆ ತಿಳಿಸಿದೆ. ಈ ಹಿನ್ನೆಲೆಯಲ್ಲಿ ಶಿಯೋಮಿ ಸಂಸ್ಥೆ ಭಾರತದ ಡಿಕ್ಸಾನ್ ಟೆಕ್ನಾಲಜೀಸ್ ಹಾಗೂ ಇತರ ಕೆಲ ಎಲೆಕ್ಟ್ರಾನಿಕ್ ಮ್ಯಾನುಫ್ಯಾಕ್ಚರಿಂಗ್ ಕಂಪನಿಗಳ ಜೊತೆ ಮಾತುಕತೆ ನಡೆಸುತ್ತಿರುವುದು ತಿಳಿದುಬಂದಿದೆ.
ಇದನ್ನೂ ಓದಿ: UPI in France: ಫ್ರಾನ್ಸ್ನಲ್ಲಿ ಯುಪಿಐ ಅಳವಡಿಕೆಗೆ ಒಪ್ಪಂದ; ಭಾರತದ ಪಾವತಿ ವ್ಯವಸ್ಥೆ ವಿದೇಶದಲ್ಲಿ ಹೇಗೆ ಕೆಲಸ ಮಾಡುತ್ತೆ?
ಎಕನಾಮಿಕ್ ಟೈಮ್ಸ್ ವರದಿ ಪ್ರಕಾರ ಮುಂದಿನ ಎರಡು ವರ್ಷದಲ್ಲಿ ಶಿಯೋಮಿ ಸಂಸ್ಥೆ ತನ್ನ ಸ್ಮಾರ್ಟ್ಫೋನ್ನ ಶೇ. 70ರಷ್ಟು ಬಿಡಿಭಾಗಗಳನ್ನು ಭಾರತೀಯ ಕಂಪನಿಗಳಿಂದಲೇ ಪಡೆಯಲು ನಿರ್ಧರಿಸಿದೆ. ಬ್ಲೂಟೂಥ್ ನೆಕ್ಬ್ಯಾಂಡ್ ಇಯರ್ಫೋನ್ಗಳನ್ನು ತಯಾರಿಸಲು ನೋಯ್ಡಾದಲ್ಲಿರುವ ಆಪ್ಟೀಮಸ್ ಎಲೆಕ್ಟ್ರಾನಿಕ್ಸ್ ಎಂಬ ಕಂಪನಿಯ ಜೊತೆ ಶಿಯೋಮಿ ಒಪ್ಪಂದ ಮಾಡಿಕೊಂಡಿತ್ತು. ಅದೇ ರೀತಿ ಹಲವು ಹೊಸ ಕಂಪನಿಗಳನ್ನು ತನ್ನ ಫೋನ್ ತಯಾರಿಕೆಗೆ ಶಿಯೋಮಿ ಬಳಸಿಕೊಳ್ಳಲು ಮುಂದಾಗುತ್ತಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ