ಎಟರ್ನಲ್ ಎಂದು ಹೆಸರು ಬದಲಿಸಿಕೊಂಡ ಜೊಮಾಟೊ; ಅದರ ಆ್ಯಪ್ ಹೆಸರಲ್ಲಿ ಇರೋದಿಲ್ಲ ಬದಲಾವಣೆ

ನವದೆಹಲಿ, ಫೆಬ್ರುವರಿ 6: ಜೊಮಾಟೊ ಲಿ ಎಂದಿದ್ದ ಕಂಪನಿಯ ಹೆಸರನ್ನು ಎಟರ್ನಲ್ ಲಿ ಎಂದು ಬದಲಿಸಲಾಗಿದೆ. ಈ ನಾಮ ಬದಲಾವಣೆಗೆ ಜೊಮಾಟೊದ ನಿರ್ದೇಶಕರ ಮಂಡಳಿ ಅನುಮೋದನೆ ನೀಡಿದೆ ಎಂದು ಆ ಸಂಸ್ಥೆ ಇಂದು ಗುರುವಾರ ಸಲ್ಲಿಸಿದ ರೆಗ್ಯುಲೇಟರಿ ಫೈಲಿಂಗ್​ನಲ್ಲಿ ತಿಳಿಸಿದೆ. ಜೊಮಾಟೋದ ಕಾರ್ಪೊರೇಟ್ ಹೆಸರು ಬದಲಾಗಿದೆ. ಆದರೆ, ಅದರ ಫೂಡ್ ಆ್ಯಪ್​ನಲ್ಲಿನ ಜೊಮಾಟೋ ಹೆಸರು ಹಾಗೇ ಇರುತ್ತದೆ. ಅಂದರೆ, ಜೊಮಾಟೋ ಆ್ಯಪ್​ನ ಹೆಸರಲ್ಲಿ ಬದಲಾವಣೆ ಇರುವುದಿಲ್ಲ.

ಯಾಕೆ ಈ ಹೆಸರು ಬದಲಾವಣೆ?

ಜೊಮಾಟೋ ಸಂಸ್ಥೆ ಮೂಲತಃ ಫೂಡ್ ಟೆಕ್ ಕಂಪನಿ. ನಂತರ ಅದರ ಕಾರ್ಯಕ್ಷೇತ್ರ ವಿಸ್ತರಿಸುತ್ತಾ ಬಂದಿದೆ. ಬ್ಲಿಂಕಿಟ್ ಎನ್ನುವ ಕ್ವಿಕ್ ಕಾಮರ್ಸ್ ಕಂಪನಿಯನ್ನು ಖರೀದಿಸಿತು. ಲಾಜಿಸ್ಟಿಕ್ಸ್ ಬಿಸಿನೆಸ್ ಹೊಂದಿದೆ. ಈ ಹಿನ್ನೆಲೆಯಲ್ಲಿ ಕಾರ್ಪೊರೇಟ್ ಕಂಪನಿಗೆ ಪ್ರತ್ಯೇಕ ಐಡೆಂಟಿಟಿ ಇರುವ ಅವಶ್ಯಕತೆ ಇತ್ತು. ಹೀಗಾಗಿ, ಎಟರ್ನಲ್ ಎಂದು ಹೆಸರು ಬದಲಾವಣೆ ಮಾಡಲಾಗಿದೆ.

ಇದನ್ನೂ ಓದಿ: ಹೆಸರಿಗೆ ಮೇಡ್ ಇನ್ ಇಂಡಿಯಾ; ಒಳಗಿರೋವೆಲ್ಲವೂ ಚೀನೀ ಬಿಡಿಭಾಗಗಳೇ… ಪಕ್ಕಾ ದೇಶೀ ಡ್ರೋನ್​ಗಳಿಗೆ ಪರದಾಡುತ್ತಿರುವ ಭಾರತೀಯ ಸೇನೆ

‘ಬ್ಲಿಂಕಿಟ್ ಸಂಸ್ಥೆಯನ್ನು ಖರೀದಿಸಿದಾಗಲೇ ಜೊಮಾಟೋ ಸಂಸ್ಥೆ ಆಂತರಿಕವಾಗಿ ‘ಎಟರ್ನಲ್’ ಐಡೆಂಟಿಟಿಯನ್ನು ಬಳಸುತ್ತಿತ್ತು. ಕಂಪನಿ ಹಾಗೂ ಅದರ ಬ್ರ್ಯಾಂಡ್ ನಡುವೆ ಪ್ರತ್ಯೇಕ ಗುರುತಿಗೆ ಈ ಕ್ರಮ ಅನುಸರಿಸಲಾಗುತ್ತಿತ್ತು. ಜೊಮಾಟೋ ಹೊರತಾದ ಬೇರೆ ಬಿಸಿನೆಸ್ ನಮ್ಮ ಭವಿಷ್ಯಕ್ಕೆ ಹೊಸ ದೊಡ್ಡ ಹಾದಿ ಕಲ್ಪಿಸುತ್ತಿದೆ ಎಂದ ದಿನ ಕಂಪನಿಯ ಹೆಸರನ್ನು ಎಟರ್ನಲ್ ಎಂದು ಸಾರ್ವತ್ರಿಕವಾಗಿ ಬದಲಿಸುವುದು ಎಂದು ಮೊದಲೇ ನಿಶ್ಚಯಿಸಿದ್ದೆವು. ಇವತ್ತು ಬ್ಲಿಂಕಿಟ್​ನೊಂದಿಗೆ ನಮಗೆ ಆ ದಿನ ಬಂದಿದೆ’ ಎಂದು ಜೊಮಾಟೋ ಸಂಸ್ಥೆಯ ಸಹ-ಸಂಸ್ಥಾಪಕ ಹಾಗೂ ಗ್ರೂಪ್ ಸಿಇಒ ದೀಪಿಂದರ್ ಗೋಯಲ್ ಗುರುವಾರ ಬಿಎಸ್​ಇಗೆ ಸಲ್ಲಿಸಿದ ಫೈಲಿಂಗ್​ನಲ್ಲಿ ಸ್ಪಷ್ಟಪಡಿಸಿದ್ದಾರೆ.

ಈಗ ಜೊಮಾಟೊದ ಹೆಸರು ಬದಲಾವಣೆಯನ್ನು ಷೇರು ವಿನಿಮಯ ಕೇಂದ್ರಗಳ ಲಿಸ್ಟಿಂಗ್​ನಲ್ಲಿ ಕಾಣಬಹುದು. ಜೊಮಾಟೊ ಬದಲು ಎಟರ್ನಲ್ ಹೆಸರನ್ನು ಕಾಣುತ್ತೀರಿ. ನಿಮ್ಮ ಊಟಕ್ಕೆ ಬುಕ್ ಮಾಡಲು ಬಳಸುವ ಜೊಮಾಟೊ ಆ್ಯಪ್​ನ ಹೆಸರು ಮತ್ತು ಅದರ ಬ್ರ್ಯಾಂಡಿಂಗ್ ಹಾಗೆಯೇ ಇರುತ್ತದೆ.

ಇದನ್ನೂ ಓದಿ: ಭಾರತದಲ್ಲಿ ವಾಹನಗಳ ರೀಟೇಲ್ ಮಾರಾಟ ಜನವರಿಯಲ್ಲಿ ಶೇ. 7ರಷ್ಟು ಹೆಚ್ಚಳ

ಎಟರ್ನಲ್ ಸಂಸ್ಥೆಯ ಅಡಿಯಲ್ಲಿ ಈ ಕೆಳಗಿನ ನಾಲ್ಕು ಬ್ರ್ಯಾಂಡ್ ಅಥವಾ ಬಿಸಿನೆಸ್ ಇವೆ: ಜೊಮಾಟೊ, ಬ್ಲಿಂಕಿಟ್, ಹೈಪರ್​ಪ್ಯೂರ್, ಡಿಸ್ಟ್ರಿಕ್ಟ್.

ಇಲ್ಲಿ ಹೈಪರ್​ಪ್ಯೂರ್ ಎಂಬುದು ರೆಸ್ಟೋರೆಂಟ್, ಕೆಫೆ, ಹೋಟೆಲ್​ಗಳಿಗೆ ಬೇಕಾದ ತರಕಾರಿ, ದಿನಸಿ ಇತ್ಯಾದಿ ಆಹಾರವಸ್ತುಗಳನ್ನು ಹೋಲ್​ಸೇಲ್ ದರದಲ್ಲಿ ಸರಬರಾಜು ಮಾಡುವ ಒಂದು ಸೇವೆ. ಡಿಸ್ಟ್ರಿಕ್ಟ್ ಎಂಬುದು ಬುಕ್ ಮೈ ಶೋ ರೀತಿಯಲ್ಲಿ ವಿವಿಧ ಕಾರ್ಯಕ್ರಮಗಳಿಗೆ ಟಿಕೆಟ್ ಬುಕ್ ಮಾಡುವುದು ಇತ್ಯಾದಿ ಸೇವೆ ನೀಡುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ