ಕೇಸ್ ನಡೆಸಲ್ಲಾ ಎಂದಿದ್ದಕ್ಕೆ ವಕೀಲನ ಮೇಲೆ ಹಲ್ಲೆ ಆರೋಪ: ಪ್ರಕರಣ ದಾಖಲು
ಕೇಸ್ ನಡೆಸುವುದಿಲ್ಲ ಎಂದು ಹೇಳಿದ್ದ ವಕೀಲನ ಮೇಲೆ ಕಚೇರಿಗೆ ನುಗ್ಗಿ ಹಲ್ಲೆ ನಡೆಸಿ 20 ಲಕ್ಷ ಹಣ ನೀಡುವಂತೆ ಧಮ್ಕಿ ಹಾಕಿದ ಆರೋಪ ಸಂಬಂಧ ಬೆಂಗಳೂರಿನ ಗಿರಿನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.
ಬೆಂಗಳೂರು: ಕೇಸ್ ನಡೆಸುವುದಿಲ್ಲ ಎಂದು ಹೇಳಿದ್ದಕ್ಕೆ ವಕೀಲನ ಮೇಲೆ ಹಲ್ಲೆ (Assault on advocate) ನಡೆಸಿದ ಆರೋಪ ಸಂಬಂಧ ನಗರದ ಗಿರಿನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಭಾವನ ಎಂಬ ಮಹಿಳೆಯ ಎರಡು ಕೇಸ್ಗಳನ್ನು ವಕೀಲ ಲಕ್ಷ್ಮೀಶ್ ನಡೆಸುತ್ತಿದ್ದರು. ಈ ವೇಳೆ ಹಣದ ವಿಚಾರಕ್ಕೆ ಭಾವನ ಜೊತೆಗೆ ವಾಗ್ವಾದ ನಡೆದಿದೆ. ಹೀಗಾಗಿ ಕೇಸ್ ನಡೆಸುವುದಲ್ಲಿ ಎಂದು ಲಕ್ಷ್ಮೀಶ್ ಅವರು ಹೇಳಿದ್ದಾರೆ. ಇದಕ್ಕೆ ತಾನು ಕೊಟ್ಟ ಹಣವನ್ನು ವಾಪಸ್ ನೀಡುವಂತೆ ಭಾವನ ಹೇಳಿದ್ದಾರೆ. ಇದನ್ನು ನಿರಾಕರಿಸಿದ ಲಕ್ಷ್ಮೀಶ್ಗೆ ತನಗೆ ಹಣ ವಾಪಸ್ಸು ನೀಡುವಂತೆ ಅವಾಜ್ ಹಾಕಿದಾಗಿ ಹಾಗೂ ಕೊಲೆ ಯತ್ನ ನಡೆಸಿರುವುದಾಗಿ ಆರೋಪಿಸಲಾಗಿದೆ.
ಹಣ ನೀಡಿಲ್ಲ ಎಂದು ಕಚೇರಿಗೆ ನುಗ್ಗಿದ ಭಾವನಾಳ ನಾಲ್ವರು ಸಹಚರರು, ಮೊಬೈಲ್ ಕಿತ್ತುಕೊಂಡು ಹಲ್ಲೆ ನಡೆಸಿ ಇಪ್ಪತ್ತು ಲಕ್ಷ ಹಣ ಕೊಡಬೇಕು ಎಂದು ದಮ್ಕಿ ಹಾಕಿದ್ದಾರೆ. ಇದೇ ವೇಳೆ ತಮಗೆ ಅಂಡರ್ವರ್ಡ್ ಗೊತ್ತಿದೆ ಎಂದು ಅವಾಜ್ ಕೂಡ ಹಾಕಿದ್ದಾರೆ ಎಂದು ವಕೀಲ ಲಕ್ಷ್ಮೀಶ್ ಅವರು ಗಿರಿನಗರ ಠಾಣೆಗೆ ದೂರು ನೀಡಿದ್ದಾರೆ. ದೂರಿನ ಅನ್ವಯ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕ್ರಮ ಕೈಗೊಂಡಿದ್ದಾರೆ.
ಇದನ್ನೂ ಓದಿ: ರೌಡಿಶೀಟರ್ ಶಿವಶಂಕರ್ ರೆಡ್ಡಿ ಮೇಲೆ ಗುಂಡಿನ ದಾಳಿ ಪ್ರಕರಣ: ಆರೋಪಿಗಳ ಬಂಧನಕ್ಕೆ ಮೂರು ತನಿಖಾ ತಂಡ ರಚನೆ
ಬಸ್ನಲ್ಲಿ ಚಿನ್ನದ ವ್ಯಾಪಾರಿಯ ಚಿನ್ನಾಭರಣ ಕದ್ದಿದ್ದ ವ್ಯಕ್ತಿ ಬಂಧನ
ರಾಯಚೂರು: ಬಸ್ನಲ್ಲಿ ಚಿನ್ನದ ವ್ಯಾಪಾರಿಯ ಚಿನ್ನಾಭರಣ ಕದ್ದಿದ್ದ ಖದೀಮನನ್ನು ಜಿಲ್ಲೆಯ ಸಿರವಾರ ಠಾಣಾ ಪೊಲೀಸರು ಬಂಧಿಸಿದ್ದಾರೆ. ಚಿನ್ನದ ವ್ಯಾಪಾರಿ ಕುಮಾರಸ್ವಾಮಿ ಎಂಬವರು ನವೆಂಬರ್ 6 ರಂದು ಸಿರವಾರ ಮಾರ್ಗವಾಗಿ ಬಾಗಲಕೋಟೆಯ ಇಳಕಲ್ಗೆ ಬಸ್ನಲ್ಲಿ ಪ್ರಯಾಣ ಮಾಡುತ್ತಿದ್ದಾಗ ಮೂರು ಲಕ್ಷ ಮೌಲ್ಯದ ಚಿನ್ನಾಭರಣಗಳಿದ್ದ ಬ್ಯಾಗ್ ಮಾರ್ಗ ಮಧ್ಯೆ ಕಳವಾಗಿತ್ತು. ಈ ಬಗ್ಗೆ ಕುಮಾರಸ್ವಾಮಿಯವರು ಠಾಣೆಗೆ ದೂರು ನೀಡಿದ್ದರು. ಪ್ರಕರಣ ದಾಖಲಿಸಿದ ಪೊಲೀಸರು ತನಿಖೆ ಆರಂಭಿಸಿದ್ದಾರೆ. ದೂರು ದಾರನ ಮೊಬೈಲ್ ಕಳವಾದ ಬ್ಯಾಗ್ನಲ್ಲಿದ್ದ ಹಿನ್ನೆಲೆ ತಾಂತ್ರಿಕ ಮಾಹಿತಿ ಕಲೆ ಹಾಕಿ ಆರೋಪಿ ಹನುಮಂತನನ್ನು ಪೊಲೀಸರು ಬಂಧಿಸಿ 12 ಗ್ರಾಂ ಕಿವಿ ಓಲೆ, 37 ಗ್ರಾಂ ನೂಗುನತ್ತು, 10 ಗ್ರಾಂ ಮೂಗುತಿಗಳು ಸೇರಿ 3 ಲಕ್ಷ ಮೌಲ್ಯದ ಚಿನ್ನಾಭರಣಗಳನ್ನು ವಶಕ್ಕೆ ಪಡೆದಿದ್ದಾರೆ.
ಆರ್ಟಿಓ ಅಧಿಕಾರಿಗಳಿಂದ ಹಗಲು ದರೋಡೆ
ಕೊಪ್ಪಳ: ರಾಷ್ಟ್ರೀಯ ಹೆದ್ದಾರಿ 50ರಲ್ಲಿ ಸಂಚರಿಸುವ ಲಾರಿ ಚಾಲಕರಿಂದ ಆರ್ಟಿಓ ಅಧಿಕಾರಿಗಳು ಹಗಲು ದರೋಡೆ ನಡೆಸುತ್ತಿರುವ ಆರೋಪ ಕೇಳಿಬಂದಿದೆ. ಕೊಪ್ಪಳ ತಾಲೂಕಿನ ಬೂದಗುಂಪಾ ಬಳಿ ಹಣ ವಸೂಲಿ ಮಾಡುತ್ತಿದ್ದಾಗ ಮಾಧ್ಯಮಗಳ ಕ್ಯಾಮೆರಾ ಕಂಡ ಅಧಿಕಾರಿ ಸ್ಥಳದಿಂದ ಪರಾರಿಯಾಗಿದ್ದಾರೆ. ಲಾರಿ ಚಾಲಕ ಕೈಯಲ್ಲಿ ದುಡ್ಡು ಹಿಡಿದು ಅಧಿಕಾರಿಗೆ ಕೊಡಲು ಬಂದಿದ್ದ. ಈ ವೇಳೆ ಮಾಧ್ಯಮದವರು ವಿಡಿಯೋ ಮಾಡುವುದನ್ನು ಕಂಡು ಗಡಿಬಿಡಿಗೊಂಡ ಆರ್ಟಿಓ ಅಧಿಕಾರಿ ಬ್ಯಾಗ್ ಸಹಿತ ಸ್ಥಳದಿಂದ ಕಾಲ್ಕಿತ್ತಿದ್ದಾರೆ.
ಮತ್ತಷ್ಟು ಅಪರಾಧ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 1:22 pm, Fri, 9 December 22