Karnataka Election: ಕರ್ನಾಟಕ ವಿಧಾನಸಭೆ ಚುನಾವಣೆ ಪ್ರಚಾರ; ಇಲ್ಲಿದೆ ಇಂಟರೆಸ್ಟಿಂಗ್ ಮಾಹಿತಿ

ಬೆಂಗಳೂರು: ರಾಜ್ಯ ವಿಧಾನಸಭೆ ಚುನಾವಣೆಯ (Karnataka Assembly Elections 2023) ಬಿರುಸಿನ ಪ್ರಚಾರ ಸೋಮವಾರ ಸಂಜೆ ಮುಕ್ತಾಯಗೊಂಡಿದೆ. ಚುನಾವಣೆ ಗೆಲ್ಲಲು ಬಿಜೆಪಿ ಶತಾಯಗತಾಯ ಪ್ರಯತ್ನಿಸಿದ್ದು, ಪ್ರಚಾರದ ಅಖಾಡದಲ್ಲಿ ಬಹಳ ಚುರುಕಿನಿಂದ ತೊಡಗಿಸಿಕೊಂಡಿತ್ತು. ಪಕ್ಷವು ತನ್ನ ರಾಷ್ಟ್ರೀಯ ನಾಯಕರ ಸುದೀರ್ಘ ಸೇನೆಯನ್ನೇ ಪ್ರಚಾರದ ಕಣಕ್ಕಿಳಿಸಿತ್ತು. ಬಿಜೆಪಿ ಒಟ್ಟು 128 ರಾಷ್ಟ್ರ ಮಟ್ಟದ ನಾಯಕರು ಚುನಾವಣಾ ಪ್ರಚಾರದಲ್ಲಿ ಭಾಗವಹಿಸಿದ್ದರು. ಈ ರಾಷ್ಟ್ರೀಯ ನಾಯಕರು ಒಳಗೊಂಡ 3116 ಚುನಾವಣಾ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿತ್ತು. ಬಿಜೆಪಿ ರಾಷ್ಟ್ರ ಮಟ್ಟದ ನಾಯಕರು ಪ್ರಚಾರದ ವೇಳೆ ರಾಜ್ಯದ 311 ಮಠಗಳು ಮತ್ತು ದೇವಾಲಯಗಳಿಗೆ ಭೇಟಿ ನೀಡಿದ್ದಾರೆ.

ಕಾಂಗ್ರೆಸ್ ಪಕ್ಷದ ನಾಯಕರು ಕೂಡ ಬಿರುಸಿನ ಪ್ರಚಾರ ನಡೆಸಿದ್ದಾರೆ. ಪಕ್ಷದ ನಾಯಕರು ಒಟ್ಟು 173 ಸಮಾವೇಶ/ಸಭೆಗಳು ಹಾಗೂ 55 ರೋಡ್​ ಶೋ ನಡೆಸಿದ್ದಾರೆ.

ರಾಜ್ಯದಲ್ಲಿ ಬಹಿರಂಗ ಪ್ರಚಾರದ ಅವಧಿ ಮುಗಿದಿದ್ದು, ಮೇ 10 ರಂದು ಮತದಾನ ನಡೆಯಲಿದೆ. ಮೇ 13 ರಂದು ಫಲಿತಾಂಶ ಪ್ರಕಟವಾಗಲಿದೆ.

ಮೋದಿಯಿಂದ 19 ಸಭೆ, 6 ರೋಡ್​ ಶೋ

ಚುನಾವಣಾ ಪ್ರಚಾರದ ಸಮಯದಲ್ಲಿ ಬಿಜೆಪಿ 9125 ಸಮಾವೇಶಗಳನ್ನು ಮತ್ತು ಒಟ್ಟು 1377 ರೋಡ್ ಶೋಗಳನ್ನು ನಡೆಸಿದೆ. ಇದಲ್ಲದೇ 9077 ಸಣ್ಣ ಸಭೆಗಳು ನಡೆದಿವೆ. ಪ್ರಧಾನಿ ನರೇಂದ್ರ ಮೋದಿ ಅವರು 6 ದಿನಗಳಲ್ಲಿ 19 ಸಾರ್ವಜನಿಕ ಸಮಾವೇಶಗಳನ್ನು ಉದ್ದೇಶಿಸಿ ಮಾತನಾಡಿದ್ದು, 6 ರೋಡ್ ಶೋಗಳಲ್ಲಿ ಭಾಗವಹಿಸಿದ್ದಾರೆ. ಗೃಹ ಸಚಿವ ಅಮಿತ್ ಶಾ ಅವರು 16 ಚುನಾವಣಾ ಪ್ರಚಾರ ಸಭೆಗಳು ಮತ್ತು 15 ರೋಡ್ ಶೋಗಳಲ್ಲಿ ಭಾಗವಹಿಸಿದ್ದಾರೆ. ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಜೆಪಿ ನಡ್ಡಾ ಅವರು 10 ಸಭೆಗಳಲ್ಲಿ ಭಾಗವಹಿಸುವುದರ ಜತೆಗೆ 16 ರೋಡ್‌ಶೋಗಳಲ್ಲಿ ಮತಬೇಟೆ ನಡೆಸಿದ್ದಾರೆ.

ಇದನ್ನೂ ಓದಿ: ಕರ್ನಾಟಕ ವಿಧಾನಸಭೆ ಚುನಾವಣೆ ಹೈವೋಲ್ಟೇಜ್ ಬಹಿರಂಗ ಪ್ರಚಾರಕ್ಕೆ ತೆರೆ; ಯಾವುದಕ್ಕೆಲ್ಲ ನಿರ್ಬಂಧ? ಇಲ್ಲಿದೆ ಮಾಹಿತಿ

ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಕೂಡ ಚುನಾವಣೆ ಪ್ರಚಾರದಲ್ಲಿ ಸಕ್ರಿಯವಾಗಿ ತೊಡಗಿಕೊಂಡಿದ್ದರು. ಅವರು 9 ಸಭೆಗಳು ಮತ್ತು 3 ರೋಡ್ ಶೋಗಳನ್ನು ಮಾಡಿದ್ದಾರೆ. ಕೇಂದ್ರ ಸಚಿವೆ ಸ್ಮೃತಿ ಇರಾನಿ ಅವರು 17 ಸಭೆಗಳು ಮತ್ತು 2 ರೋಡ್‌ಶೋಗಳಲ್ಲಿ ಭಾಗವಹಿಸಿದ್ದಾರೆ. ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವಾ ಶರ್ಮಾ ಅವರು 15 ಸಭೆಗಳು ಮತ್ತು 1 ರೋಡ್ ಶೋ ನಡೆಸಿದ್ದಾರೆ. ಮಹಾರಾಷ್ಟ್ರದ ಉಪಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ 13 ಸಭೆಗಳನ್ನು ನಡೆಸಿದ್ದಾರೆ.

ಬಿಜೆಪಿ ನಾಯಕರ ಪ್ರಚಾರ ವಿವರ

• ರಕ್ಷಣಾ ಸಚಿವ ರಾಜನಾಥ್ ಸಿಂಗ್ 4 ಸಭೆಗಳನ್ನು ನಡೆಸಿದ್ದಾರೆ.
• ಕೇಂದ್ರ ರಸ್ತೆ ಸಾರಿಗೆ ಸಚಿವ ನಿತಿನ್ ಗಡ್ಕರಿ ಅವರು 3 ಚುನಾವಣಾ ಸಭೆಗಳನ್ನು ನಡೆಸಿದ್ದಾರೆ.
• ಮಧ್ಯಪ್ರದೇಶ ಮುಖ್ಯಮಂತ್ರಿ ಶಿವರಾಜ್ ಸಿಂಗ್ ಚೌಹಾಣ್ ಒಟ್ಟು 6 ಸಭೆಗಳನ್ನು ನಡೆಸಿದ್ದಾರೆ
• ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಒಟ್ಟು 8 ಚುನಾವಣಾ ಸಭೆಗಳನ್ನು ನಡೆಸಿದ್ದಾರೆ
• ಬಿಎಸ್ ಯಡಿಯೂರಪ್ಪ ಗರಿಷ್ಠ 44 ಚುನಾವಣಾ ಸಭೆಗಳನ್ನು ನಡೆಸಿದ್ದಾರೆ.
• ಮುಖ್ಯಮಂತ್ರಿ ವಾಸವರಾಜ್ ಬೊಮ್ಮಾಯಿ 4 ಸಭೆ ಹಾಗೂ 40 ರೋಡ್ ಶೋ ನಡೆಸಿದ್ದಾರೆ.
• ಬಿಜೆಪಿ ಪಕ್ಷದ ರಾಜ್ಯಾಧ್ಯಕ್ಷ ನಳಿನ್ ಕುಮಾರ್ ಕಟೀಲ್ ಒಟ್ಟು 24 ಚುನಾವಣಾ ಸಭೆ ಹಾಗೂ 3 ರೋಡ್ ಶೋ ನಡೆಸಿದ್ದಾರೆ.
• ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ಅವರು 5 ಚುನಾವಣಾ ಸಭೆ ನಡೆಸಿದ್ದಾರೆ.
• ಕೇಂದ್ರ ಸಚಿವೆ ಶೋಭಾ ಕರಂದ್ಲಾಜೆ ಒಟ್ಟು 8 ಸಭೆ ನಡೆಸಿದ್ದಾರೆ.
• ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸಿಟಿ ರವಿ 16 ಸಭೆ, 4 ರೋಡ್ ಶೋ ನಡೆಸಿದ್ದಾರೆ.

ಕಾಂಗ್ರೆಸ್ ನಾಯಕರ ಪ್ರಚಾರ ವಿವರ

• ರಾಹುಲ್ ಗಾಂಧಿ ಅವರು 14 ಸಾರ್ವಜನಿಕ ಸಮಾವೇಶ, 4 ರೋಡ್​ ಶೋ ನಡೆಸಿದ್ದಾರೆ.
• ಪ್ರಿಯಾಂಕಾ ಗಾಂಧಿ ಅವರು 26 ಸಾರ್ವಜನಿಕ ಸಮಾವೇಶ, 8 ರೋಡ್​ ಶೋ ನಡೆಸಿದ್ದಾರೆ.
• ಮಲ್ಲಿಕಾರ್ಜುನ ಖರ್ಗೆ ಅವರು 25 ಸಾರ್ವಜನಿಕ ಸಮಾವೇಶ, 1 ರೋಡ್​ ಶೋ ನಡೆಸಿದ್ದಾರೆ.
• ಸಿದ್ದರಾಮಯ್ಯ ಅವರು 50 ಸಾರ್ವಜನಿಕ ಸಮಾವೇಶ, 7 ರೋಡ್​ ಶೋ ನಡೆಸಿದ್ದಾರೆ.
• ಡಿಕೆ ಶಿವಕುಮಾರ್ ಅವರು 57 ಸಾರ್ವಜನಿಕ ಸಮಾವೇಶ, 35 ರೋಡ್​ ಶೋ ನಡೆಸಿದ್ದಾರೆ.
• ಸೋನಿಯಾ ಗಾಂಧಿ ಅವರು 1 ಸಾರ್ವಜನಿಕ ಸಮಾವೇಶದಲ್ಲಿ ಭಾಗವಹಿಸಿದ್ದಾರೆ.

ವಿಧಾನಸಭೆ ಚುನಾವಣೆ ತಾಜಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ