ಪ್ರಧಾನಿ ನರೇಂದ್ರ ಮೋದಿಯವರ ಮುಜ್ರಾ ಹೇಳಿಕೆ ವಿವಾದ; ವಿಪಕ್ಷ ಕಿಡಿ

ದೆಹಲಿ ಮೇ 25: ಮುಸ್ಲಿಂ ವೋಟ್ ಬ್ಯಾಂಕ್‌ಗಾಗಿ ಪ್ರತಿಪಕ್ಷಗಳು “ಗುಲಾಮಗಿರಿ” ಮಾಡುತ್ತಿದ್ದು, ಅವರು ಮತಬ್ಯಾಂಕ್ ಮೆಚ್ಚಿಸಲು “ಮುಜ್ರಾ” (mujra) ಬೇಕಾದರೂ ಮಾಡುತ್ತಾರೆ ಎಂಬ ಪ್ರಧಾನಿ ನರೇಂದ್ರ ಮೋದಿ (Narendra Modi) ಹೇಳಿಕೆ ವಿರುದ್ಧ ಇಂಡಿಯಾ ಬಣದ (INDIA bloc)ನಾಯಕರು ಗರಂ ಆಗಿದ್ದಾರೆ. ಬಿಹಾರದ ಕರಕಟ್ ಮತ್ತು ಪಾಟ್ಲಿಪುತ್ರ ಲೋಕಸಭಾ ಕ್ಷೇತ್ರಗಳಲ್ಲಿ ಬ್ಯಾಕ್ ಟು ಬ್ಯಾಕ್ ರ‍್ಯಾಲಿಗಳನ್ನು ಉದ್ದೇಶಿಸಿ ಮಾತನಾಡಿದ ಪ್ರಧಾನಿ ನರೇಂದ್ರ ಮೋದಿ, ಬಿಹಾರ ಸಾಮಾಜಿಕ ನ್ಯಾಯದ ಹೋರಾಟಕ್ಕೆ ಹೊಸ ದಿಕ್ಕನ್ನು ನೀಡಿದ ಭೂಮಿಯಾಗಿದೆ. ಎಸ್​​ಸಿ, ಎಸ್​​ಟಿ ಮತ್ತು ಒಬಿಸಿ ಗಳ ಹಕ್ಕುಗಳನ್ನು ಕಸಿದುಕೊಳ್ಳುವ ಮತ್ತು ಅವುಗಳನ್ನು ಮುಸ್ಲಿಮರಿಗೆ ನೀಡುವ ಇಂಡಿಯಾ ಬಣದ ಯೋಜನೆಗಳನ್ನು ನಾನು ವಿಫಲಗೊಳಿಸುತ್ತೇನೆ ಎಂದು ನಾನು ಈ ನೆಲದಲ್ಲಿ ಘೋಷಿಸಲು ಬಯಸುತ್ತೇನೆ. ಅವರು ತಮ್ಮ ಮತ ಬ್ಯಾಂಕ್ ಅನ್ನು ಮೆಚ್ಚಿಸಲು ಗುಲಾಮರಾಗಿದ್ದುಕೊಂಡು ‘ಮುಜ್ರಾ’ ಬೇಕಾದರೂ ಮಾಡುತ್ತಾರೆ ಎಂದು ಮೋದಿ ಹೇಳಿದ್ದಾರೆ. ಮುಜ್ರಾ ಎಂಬುದು ಭಾರತೀಯ ಉಪಖಂಡದಲ್ಲಿ ಮೊಘಲ್ ಯುಗದಲ್ಲಿ ಹುಟ್ಟಿಕೊಂಡ ಸಾಂಪ್ರದಾಯಿಕ ನೃತ್ಯವಾಗಿದೆ.

ಮೋದಿ ಹೇಳಿಕೆ ವಿರುದ್ಧ ಗುಡುಗಿದ ವಿಪಕ್ಷ

ಪ್ರಧಾನಿಯವರ ಟೀಕೆಗಳಿಗೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ ಕಾಂಗ್ರೆಸ್ ವಕ್ತಾರ ಪವನ್ ಖೇರಾ ಅವರು ಎಕ್ಸ್ ಪೋಸ್ಟ್‌ನಲ್ಲಿ ಹಿಂದಿಯಲ್ಲಿ ಹೀಗೆ ಬರೆದಿದ್ದಾರೆ: “ಇಂದು, ನಾನು ಪ್ರಧಾನಿಯವರ ಬಾಯಿಂದ ‘ಮುಜ್ರಾ’ ಪದವನ್ನು ಕೇಳಿದೆ. ಮೋದಿ ಜಿ ಏನು ಈ ಮನಸ್ಥಿತಿ? ನೀವು ಏನೆನ್ನಾದರೂ ತೆಗೆದುಕೊಳ್ಳಬಾರದೇ? ಅಮಿತ್ ಶಾ ಮತ್ತು ಜೆಪಿ ನಡ್ಡಾ ಅವರೇ ಮೋದಿಗೆ ತಕ್ಷಣ ಚಿಕಿತ್ಸೆ ನೀಡಬೇಕು. ಬಹುಶಃ ಬಿಸಿಲಿಗೆ ನಿಂತು ಭಾಷಣಗಳನ್ನು ಮಾಡುವುದು ಅವರ ಮೆದುಳಿನ ಮೇಲೆ ಹೆಚ್ಚು ಪರಿಣಾಮ ಬೀರಿದೆ.

ತೃಣಮೂಲ ಕಾಂಗ್ರೆಸ್ ಸಂಸದ ಸಾಕೇತ್ ಗೋಖಲೆ ಕೂಡ ಮೋದಿಯವರ ಹೇಳಿಕೆಗೆ ಟೀಕೆ ಮಾಡಿದ್ದು, “ನಾರಿ ಶಕ್ತಿ’ಯಿಂದ ಆ ವ್ಯಕ್ತಿ ಈಗ ‘ಮುಜ್ರಾ’ ಪದಗಳನ್ನು ಬಳಸುವುದಕ್ಕೆ ಇಳಿದಿದ್ದಾರೆ ಎಂದು ಹೇಳಿದ್ದಾರೆ. 10 ವರ್ಷಗಳ ಪಿಆರ್ ಮತ್ತು ಎಚ್ಚರಿಕೆಯಿಂದ ಕಾಪಿಟ್ಟ ಘನತೆಯ ನಂತರ, ಮೋದಿ ಅವರು ಇನ್ನು ಮುಂದೆ ತಮ್ಮ ನೈಜತೆಯನ್ನು ಮರೆಮಾಡಲು ಸಾಧ್ಯವಿಲ್ಲ. ಇದೆಂಥಾ ಕೀಳು ಭಾಷೆ ಎಂದು ಸಾಕೇತ್ ಗೋಖಲೆ ಎಕ್ಸ್‌ನಲ್ಲಿ ಬರೆದಿದ್ದಾರೆ. ಪ್ರಧಾನಿಯಾಗಿ ಅವರ ವಿದೇಶ ಪ್ರವಾಸದ ಸಮಯದಲ್ಲಿ ಅವರು ಏನೇನು ಹೇಳಿದ್ದಾರೆ ಎಂದು ಯೋಚಿಸಲೂ ಭಯವಾಗುತ್ತದೆ ಎಂದು ಅವರು ಹೇಳಿದರು.

ಆರ್‌ಜೆಡಿಯ ಮನೋಜ್ ಝಾ ಅವರು “ಅವರು (ಪಿಎಂ ಮೋದಿ) ಏನು ಹೇಳುತ್ತಿದ್ದಾರೆ ಎಂಬುದರ ಬಗ್ಗೆ ನಾವು ಚಿಂತಿತರಾಗಿದ್ದಾರೆ” ಎಂದು ಹೇಳಿದರು. “ನಾನು ಈಗ ಅವರ ಬಗ್ಗೆ ಚಿಂತಿತನಾಗಿದ್ದೇನೆ. ನಿನ್ನೆಯವರೆಗೂ ನಾವು ಅವರೊಂದಿಗೆ ಭಿನ್ನಾಭಿಪ್ರಾಯ ಹೊಂದಿದ್ದೆವು, ಈಗ ನಾವು ಅವನ ಬಗ್ಗೆ ಚಿಂತಿಸುತ್ತಿದ್ದೇವೆ. ಅವರು ಶ್ರೇಷ್ಠತೆಯ ಭ್ರಮೆಗೆ ಬಲಿಯಾಗುತ್ತಿದ್ದಾರೆ ಎಂದು ಇತ್ತೀಚೆಗೆ ಹೇಳಿದ್ದೆ. ‘ಮಚ್ಲಿ’, ಮಟನ್, ಮಂಗಳಸೂತ್ರ ಮತ್ತು ‘ಮುಜ್ರಾ’… ಇದು ಪ್ರಧಾನಿಯ ಭಾಷೆಯೇ? ಎಂದು ಮನೋಜ್ ಝಾ ಹೇಳಿರುವುದಾಗಿ ಸುದ್ದಿ ಸಂಸ್ಥೆ ಪಿಟಿಐ ವರದಿ ಮಾಡಿದೆ. ಶಿವಸೇನಾದ (ಯುಬಿಟಿ) ಪ್ರಿಯಾಂಕಾ ಚತುರ್ವೇದಿ ಅವರು ಪ್ರಧಾನಿ ಭಾಷಣದ ವಿಡಿಯೊ ಕ್ಲಿಪ್ ಅನ್ನು ಶೇರ್ ಮಾಡಿದ್ದು, “ಮೋದಿ ಜಿ, ಬೇಗ ಗುಣಮುಖರಾಗಿರಿ” ಎಂದು ಬರೆದಿದ್ದಾರೆ.

Get well soon, Modi ji. pic.twitter.com/wY7eCciu1W

— Priyanka Chaturvedi🇮🇳 (@priyankac19) May 25, 2024

ಇಂದು ಆರನೇ ಹಂತದ ಮತದಾನ ನಡೆಯುತ್ತಿದ್ದು, ಮುಂದಿನ ಹಂತದ ಪ್ರಚಾರ ನಡೆಯುತ್ತಿರುವಾಗಲೇ ಬಿಜೆಪಿಗೆ ನಿರಾಸೆಯಾಗಿದೆ. ಅವರ ಭಾಷೆ ಬದಲಾಗಿದೆ. ಅವರು ಈಗ ‘ಮುಜ್ರಾ’ ಬಗ್ಗೆ ಮಾತನಾಡುತ್ತಿದ್ದಾರೆ. ಬಿಜೆಪಿಯ ಬಳಿ ಜನರ ಪ್ರಶ್ನೆಗಳಿಗೆ ಉತ್ತರವಿಲ್ಲ ಮತ್ತು ಜನರನ್ನು ದಾರಿ ತಪ್ಪಿಸುವ ಉದ್ದೇಶವಿದೆ. ಜನರು ಚೆನ್ನಾಗಿ ಅರಿತುಕೊಂಡಿದ್ದಾರೆ. ಚುನಾವಣೆಯಲ್ಲಿ ಅವರು ನಮಗೆ ಮತ ಹಾಕುತ್ತಾರೆ. ಇಂಡಿಯಾ ಬಣ ಸರ್ಕಾರವನ್ನು ರಚಿಸಲಿದೆ ಎಂದು ಸಮಾಜವಾದಿ ಪಕ್ಷದ ವಕ್ತಾರ ಫಕ್ರುಲ್ ಹಸನ್ ಚಾಂದ್ ಹೇಳಿದ್ದಾರೆ.

ಪ್ರಧಾನಿ ಹೇಳಿಕೆಗೆ ತಿರುಗೇಟು ನೀಡಿದ ಪ್ರಿಯಾಂಕಾ ಗಾಂಧಿ ವಾದ್ರಾ, ಯಾವುದೇ ಪ್ರಧಾನಿ ಇಂತಹ ಭಾಷೆಯನ್ನು ಬಳಸುತ್ತಿರಲಿಲ್ಲ. ಮೋದಿಜಿ ಏನು ಹೇಳುತ್ತಿದ್ದಾರೆ? ಅವರ ಹುದ್ದೆಯ ಸೌಜನ್ಯವನ್ನು ಕಾಪಾಡಿಕೊಳ್ಳುವುದು ಅವರ ಜವಾಬ್ದಾರಿಯಲ್ಲವೇ? ನಾವು ಪ್ರಧಾನಿ ಹುದ್ದೆಯನ್ನು ಗೌರವಿಸುತ್ತೇವೆ. ಅವರ ನಿಜವಾದ ರೂಪವನ್ನು ಈಗ ನೋಡಬಹುದು. ದೇಶಕ್ಕೆ ಇಷ್ಟು ನೈಜತೆಯನ್ನು ತೋರಿಸಬೇಡಿ. ಅವರು ದೇಶವನ್ನು ಪ್ರತಿನಿಧಿಸುತ್ತಾರೆ ಎಂಬುದನ್ನು ಅವರು ಮರೆತಿದ್ದಾರೆ. ದೇಶದ ಮುಂದಿನ ಪೀಳಿಗೆಗಳು ಏನು ಹೇಳುತ್ತವೆ?, ”ಎಂದು ಉತ್ತರ ಪ್ರದೇಶದ ಗೋರಖ್‌ಪುರದಲ್ಲಿ ಮಿತ್ರ ಮತ್ತು ಸಮಾಜವಾದಿ ಪಕ್ಷದ ಮುಖ್ಯಸ್ಥ ಅಖಿಲೇಶ್ ಯಾದವ್ ಅವರೊಂದಿಗೆ ನಡೆಸಿದ  ರ‍್ಯಾಲಿಯಲ್ಲಿ ಹೇಳಿದರು.

ಮಹಿಳೆಯರ ಮಂಗಳಸೂತ್ರಗಳನ್ನು ಕಸಿದುಕೊಳ್ಳುವ ಕಾಂಗ್ರೆಸ್ ಸಂಪತ್ತು ಮರುಹಂಚಿಕೆ ಯೋಜನೆಗೆ ಮುಂದಾಗಿದೆ ಎಂಬ ಆರೋಪದ ಬಗ್ಗೆ ಪ್ರಧಾನಿಯನ್ನು ಗುರಿಯಾಗಿಸಿದ ಪ್ರಿಯಾಂಕಾ ವಾದ್ರಾ, “ಕೆಲವು ದಿನಗಳಲ್ಲಿ ಮೋದಿಜಿ ಎಮ್ಮೆಗಳ ಬಗ್ಗೆ ಮಾತನಾಡುತ್ತಾರೆ. ಇತರ ದಿನಗಳಲ್ಲಿ ಮಂಗಳಸೂತ್ರದ ಬಗ್ಗೆ ಮಾತನಾಡುತ್ತಾರೆ. ಬೀಡಾಡಿ ಪ್ರಾಣಿಗಳು ಅವರ ಅವಧಿಯಲ್ಲಿ ಪ್ರಾರಂಭವಾದವು. ಮತ್ತೆ ಅಧಿಕಾರಕ್ಕೆ ಬಂದರೆ ಸಂವಿಧಾನ ಬದಲಿಸುತ್ತೇವೆ ಎಂದು ಬಿಜೆಪಿಯ ಅಭ್ಯರ್ಥಿಗಳೇ ಹೇಳಿಕೊಂಡು ತಿರುಗುತ್ತಿದ್ದಾರೆ ಎಂದಿದ್ದಾರೆ ಪ್ರಿಯಾಂಕಾ.

ಇದನ್ನೂ ಓದಿ: ಇಂಡಿಯಾ ಬಣ ತನ್ನ ಮತ ಬ್ಯಾಂಕ್‌ಗಾಗಿ ಮುಜ್ರಾ ಬೇಕಾದರೂ ಮಾಡುತ್ತದೆ: ಬಿಹಾರದಲ್ಲಿ ನರೇಂದ್ರ ಮೋದಿ

ಪ್ರಧಾನಿ ಮೋದಿ ಹೇಳಿದ್ದೇನು?

ಪಂಜಾಬ್ ಮತ್ತು ತೆಲಂಗಾಣದಲ್ಲಿ ಕಾಂಗ್ರೆಸ್ ಮತ್ತು ತಮಿಳುನಾಡು ಮತ್ತು ಪಶ್ಚಿಮ ಬಂಗಾಳದ ಡಿಎಂಕೆ ಮತ್ತು ಟಿಎಂಸಿ ನಾಯಕರಿಂದ ರಾಜ್ಯದ ವಲಸಿಗರ ವಿರುದ್ಧ ಅವಮಾನಕರ ಹೇಳಿಕೆಗಳಿಂದ ಬಿಹಾರದ ಜನರಿಗೆ ನೋವಾಗಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಆರೋಪಿಸಿದ್ದಾರೆ. ಆದರೆ “ಈ ಆರ್‌ಜೆಡಿ ಜನರು ತಮ್ಮ ಲ್ಯಾಂಟರ್ನ್‌ನೊಂದಿಗೆ (ಚುನಾವಣೆ ಚಿಹ್ನೆ) ‘ಮುಜ್ರಾ’ ಮಾಡುವವರಿಗೆ ಪ್ರತಿಭಟಿಸಲು ಒಂದು ಮಾತನ್ನೂ ಹೇಳುವ ಧೈರ್ಯವಿಲ್ಲ.

ವೋಟ್ ಜಿಹಾದ್‌ನಲ್ಲಿ ತೊಡಗಿರುವವರ ಬೆಂಬಲವನ್ನು ಪ್ರತಿಪಕ್ಷಗಳ ಒಕ್ಕೂಟವು ಬ್ಯಾಂಕಿಂಗ್ ಮಾಡುತ್ತಿದೆ ಎಂದು ಮೋದಿ ಆರೋಪಿಸಿದ್ದು ಒಬಿಸಿಗಳ ಪಟ್ಟಿಗೆ ಹಲವಾರು ಮುಸ್ಲಿಂ ಗುಂಪುಗಳನ್ನು ಸೇರಿಸುವ ಪಶ್ಚಿಮ ಬಂಗಾಳ ಸರ್ಕಾರದ ನಿರ್ಧಾರವನ್ನು ತಳ್ಳಿಹಾಕಿದ ಕಲ್ಕತ್ತಾ ಹೈಕೋರ್ಟ್ ಆದೇಶವನ್ನು ಉಲ್ಲೇಖಿಸಿದ್ದಾರೆ.

ಏನಿದು ಮುಜ್ರಾ?

ಮುಜ್ರಾ- ಭಾರತದಲ್ಲಿ ಮೊಘಲ್ ಯುಗದಲ್ಲಿ ಮುನ್ನೆಲೆಗೆ ಬಂದ ಶಾಸ್ತ್ರೀಯ ನೃತ್ಯ ಪ್ರಕಾರವಾಗಿದೆ.  ಪ್ರಾಥಮಿಕವಾಗಿ ರಾಜರು ಮತ್ತು ಗಣ್ಯರ ಆಸ್ಥಾನಗಳಲ್ಲಿ ವೇಶ್ಯೆಯರು ಪ್ರದರ್ಶಿಸಿದರು. ಇದು ಕಥಕ್ ಮತ್ತು ಪರ್ಷಿಯನ್ ನೃತ್ಯದ ಸಂಯೋಜನೆಯಾಗಿದ್ದು, ಇದನ್ನು ಸಾಮಾನ್ಯವಾಗಿ ಗಜಲ್ ಅಥವ   ಶಾಸ್ತ್ರೀಯ ಸಂಗೀತಕ್ಕೆ ಪ್ರದರ್ಶಿಸಲಾಗುತ್ತದೆ. ಸಾಂಪ್ರದಾಯಿಕವಾಗಿ, ಮುಜ್ರಾ ನರ್ತಕರು ಅಥವಾ ತವೈಫ್‌ಗಳು ನೃತ್ಯ, ಸಂಗೀತ ಮತ್ತು ಉರ್ದು  ಕಾವ್ಯಗಳಲ್ಲಿ ಹೆಚ್ಚು ಪರಿಣತಿ ಹೊಂದಿದ್ದರು. ಇವರು ಆಸ್ಥಾನದಲ್ಲಿ  ಮುಜ್ರಾ ಮೂಲಕ ಗಣ್ಯರನ್ನು ರಂಜಿಸಿದರು. ಹಿಂದಿ ಸಿನಿಮಾ ಅಥವಾ ಬಾಲಿವುಡ್ ನಲ್ಲಿ ಮುಜ್ರಾ ನೃತ್ಯವನ್ನು ಕಾಣಬಹುದು. ಹಳೇ ಹಿಂದಿ ಸಿನಿಮಾಗಳಲ್ಲಿ ವೈಜಯಂತಿಮಾಲಾ, ಮಧುಬಾಲಾ, ಹೇಮಮಾಲಿನಿ, ರೇಖಾ, ಮಾಧುರಿ ದೀಕ್ಷಿತ್  ಮುಜ್ರಾ ನೃತ್ಯ ಮಾಡಿರುವುದನ್ನು ಕಾಣಬಹುದು. ದೇವದಾಸ್, ಮೊಘಲ್ ಎ- ಆಜಂ,ಸಾಧನಾ ಮೊದಲಾದ  ಸಿನಿಮಾಗಳಲ್ಲಿ ಮುಜ್ರಾ ನೃತ್ಯವಿದೆ.

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 5:25 pm, Sat, 25 May 24