Drishyam 3: ‘ದೃಶ್ಯಂ 3’ ಚಿತ್ರಕ್ಕೆ ಒಟ್ಟಿಗೆ ಶೂಟಿಂಗ್​ ಮಾಡ್ತಾರೆ ಅಜಯ್​ ದೇವಗನ್​, ಮೋಹನ್​ ಲಾಲ್​; ಏನಿದು ಟ್ವಿಸ್ಟ್​?

ಸಸ್ಪೆನ್ಸ್​ ಥ್ರಿಲ್ಲರ್​ ಸಿನಿಮಾಗಳನ್ನು ಇಷ್ಟಪಡುವ ಪ್ರೇಕ್ಷಕರ ಫೇವರಿಟ್​ ಪಟ್ಟಿಯಲ್ಲಿ ‘ದೃಶ್ಯಂ’ ಹಾಗೂ ‘ದೃಶ್ಯಂ 2’ ಚಿತ್ರಗಳಿಗೆ ಯಾವಾಗಲೂ ಸ್ಥಾನ ಇದ್ದೇ ಇರುತ್ತದೆ. ಮಲಯಾಳಂನಲ್ಲಿ ಮೂಡಿಬಂದ ಈ ಎರಡೂ ಸಿನಿಮಾಗಳು ಬೇರೆ ಬೇರೆ ಭಾಷೆಗಳಿಗೆ ರಿಮೇಕ್​ ಆಗಿಯೂ ಯಶಸ್ಸು ಕಂಡಿವೆ. ಮೋಹನ್​ ಲಾಲ್ (Mohanlal)​ ಅವರು ಈ ಸಿನಿಮಾಗಳಲ್ಲಿ ನಟಿಸುವ ಮೂಲಕ ಅಭಿಮಾನಿಗಳ ಮನ ಗೆದ್ದರು. ಬಳಿಕ ಅದನ್ನೇ ಹಿಂದಿಯಲ್ಲಿ ರಿಮೇಕ್​ ಮಾಡಿ ಅಜಯ್​ ದೇವಗನ್​ ಕೂಡ ಗೆಲುವಿನ ರುಚಿ ಕಂಡರು. ಈಗ ‘ದೃಶ್ಯಂ 3’ (Drishyam 3 Movie) ಚಿತ್ರಕ್ಕೆ ಸಿದ್ಧತೆ ನಡೆಯುತ್ತಿದೆ. ವಿಶೇಷ ಏನೆಂದರೆ ಅಜಯ್​ ದೇವಗನ್​ (Ajay Devgn) ಹಾಗೂ ಮೋಹನ್​​ ಲಾಲ್​ ಅವರು ಈ ಸಿನಿಮಾಗೆ ಒಟ್ಟಿಗೆ ಚಿತ್ರೀಕರಣ ಮಾಡಲಿದ್ದಾರೆ ಎಂಬ ಮಾಹಿತಿ ಕೇಳಿಬಂದಿದೆ.

‘ದೃಶ್ಯಂ’ ಮತ್ತು ‘ದೃಶ್ಯಂ 2’ ಚಿತ್ರಗಳು ಮಲಯಾಳಂನಲ್ಲಿ ರಿಲೀಸ್​ ಆಗಿ ಹಲವು ತಿಂಗಳು ಕಳೆದ ಬಳಿಕ ಹಿಂದಿಗೆ ರಿಮೇಕ್​ ಆಯಿತು. ಒಟಿಟಿ ವ್ಯಾಪ್ತಿ ಹಿರಿದಾಗಿರುವ ಈ ಕಾಲದಲ್ಲಿ ಪ್ರೇಕ್ಷಕರು ಎಲ್ಲ ಭಾಷೆಯ ಸಿನಿಮಾಗಳನ್ನು ನೋಡುತ್ತಾರೆ. ಹಾಗಾಗಿ ರಿಮೇಕ್​ ಚಿತ್ರಗಳು ಥಿಯೇಟರ್​​ನಲ್ಲಿ ಗೆಲ್ಲುವ ಚಾನ್ಸ್​ ಕಡಿಮೆ ಇರುತ್ತದೆ. ‘ದೃಶ್ಯಂ’ ಮತ್ತು ‘ದೃಶ್ಯಂ 2’ ಚಿತ್ರಗಳು ಹಿಂದಿಯಲ್ಲಿ ರಿಮೇಕ್​ ಆಗಿ ಹೇಗೋ ಗೆದ್ದವು. ಆದರೆ ‘ದೃಶ್ಯಂ 3’ ವಿಚಾರದಲ್ಲಿ ಹೀಗೆಯೇ ಆಗುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ.

ಇದನ್ನೂ ಓದಿ: ‘ದೃಶ್ಯಂ 2’ನಿಂದ ದೊಡ್ಡ ಗೆಲುವು ಕಂಡ ಅಜಯ್ ದೇವಗನ್; ಇಲ್ಲಿವೆ ಅವರ ಟಾಪ್ 5 ಚಿತ್ರಗಳು

ಮೊದಲು ಮಲಯಾಳಂನ ‘ದೃಶ್ಯಂ 3’ ರಿಲೀಸ್​ ಆಗಿ, ನಂತರ ಹಿಂದಿಯ ರಿಮೇಕ್​ ಬಂದರೆ ಹಿಂದಿ ಪ್ರೇಕ್ಷಕರಿಗೆ ಸಸ್ಪೆನ್ಸ್​ ಉಳಿದಿರುವುದಿಲ್ಲ. ಅದರ ಬದಲು ಏಕಕಾಲಕ್ಕೆ ರಿಲೀಸ್​ ಮಾಡುವುದು ಉತ್ತಮ ಎಂದು ನಿರ್ಮಾಪಕರು ನಿರ್ಧರಿಸಿದ್ದಾರೆ ಎನ್ನಲಾಗುತ್ತಿದೆ. ಈ ಬಗ್ಗೆ ಚಿತ್ರತಂಡದವರು ಅಧಿಕೃತ ಮಾಹಿತಿ ಹಂಚಿಕೊಳ್ಳುವುದು ಬಾಕಿ ಇದೆ.

ಇದನ್ನೂ ಓದಿ: ಇಂಗ್ಲಿಷ್, ಕೊರಿಯನ್, ಚೈನೀಸ್​ ಸೇರಿ ಹಲವು ಭಾಷೆಗಳಿಗೆ ರಿಮೇಕ್ ಆಗಲಿದೆ ‘ದೃಶ್ಯಂ’ ಸಿನಿಮಾ

ಸದ್ಯಕ್ಕೆ ‘ದೃಶ್ಯಂ 3’ ಚಿತ್ರಕ್ಕೆ ಸ್ಕ್ರಿಪ್ಟ್​ ಕೆಲಸಗಳು ನಡೆಯುತ್ತಿವೆ. ಆದಷ್ಟು ಬೇಗ ಶೂಟಿಂಗ್​ ಕೂಡ ಆರಂಭ ಆಗಲಿದೆ. ಆಗ ಸ್ಪಷ್ಟ ಚಿತ್ರಣ ಸಿಗಲಿದೆ. ಅಜಯ್​ ದೇವಗನ್​ ಅವರಿಗೆ ರಿಮೇಕ್​ ಸಿನಿಮಾಗಳು ಕೈ ಹಿಡಿದಿವೆ. ಈ ವರ್ಷ ಅವರು ‘ಭೋಲಾ’ ಸಿನಿಮಾ ಮೂಲಕ ಪ್ರೇಕ್ಷಕರ ಎದುರು ಬರಲಿದ್ದಾರೆ. ಅದು ತಮಿಳಿನ ‘ಕೈದಿ’ ಚಿತ್ರದ ರಿಮೇಕ್​.

ಮಾರ್ಚ್​ 30ರಂದು ‘ಭೋಲಾ’ ಸಿನಿಮಾ ತೆರೆ ಕಾಣಲಿದೆ. ಇದು 3ಡಿ ಅವತರಣಿಕೆಯಲ್ಲಿ ಮೂಡಿಬಂದಿದೆ ಎಂಬುದು ವಿಶೇಷ. ಈ ಚಿತ್ರದಲ್ಲಿ ನಟಿಸುವುದರ ಜೊತೆಗೆ ನಿರ್ದೇಶನವನ್ನೂ ಅಜಯ್​ ದೇವಗನ್​ ಮಾಡಿದ್ದಾರೆ. ಇನ್ನೊಂದು ಮುಖ್ಯ ಪಾತ್ರದಲ್ಲಿ ಟಬು ನಟಿಸಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.