Selfiee Total Collection: ‘ಸೆಲ್ಫೀ’ ಚಿತ್ರ ಫ್ಲಾಪ್​: 8 ದಿನ ಪ್ರದರ್ಶನ ಕಂಡ ಅಕ್ಷಯ್​ ಕುಮಾರ್​ ಸಿನಿಮಾ ಗಳಿಸಿದ್ದೆಷ್ಟು?

ಒಂದೆಡೆ ನಟ ಶಾರುಖ್​ ಖಾನ್​ ಅವರು ಗೆದ್ದು ಬೀಗುತ್ತಿದ್ದಾರೆ. ಇನ್ನೊಂದೆಡೆ ಅಕ್ಷಯ್​ ಕುಮಾರ್​ (Akshay Kumar) ಅವರ ಸೋತು ಸುಣ್ಣವಾಗಿದ್ದಾರೆ. ಸತತ ಸೋಲಿನ ಸುಳಿಗೆ ಸಿಲುಕಿರುವ ಅವರಿಗೆ 2022ರ ವರ್ಷ ತುಂಬ ನಿರಾಶಾದಾಯಕವಾಗಿತ್ತು. 2023ರಲ್ಲಿ ಗೆಲುವಿಗಾಗಿ ಹಂಬಲಿಸಿದ್ದ ಅವರು ‘ಸೆಲ್ಫೀ’ ಸಿನಿಮಾ (Selfiee Movie) ಮೇಲೆ ಸಖತ್​ ಭರವಸೆ ಇಟ್ಟುಕೊಂಡಿದ್ದರು. ಆದರೆ ಈ ಚಿತ್ರ ಹೀನಾಯವಾಗಿ ಸೋತಿದೆ. ಫೆಬ್ರವರಿ 24ರಂದು ‘ಸೆಲ್ಫೀ’ ತೆರೆಕಂಡಿತು. ಇಮ್ರಾನ್​ ಹಷ್ಮಿ ಕೂಡ ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ಇಬ್ಬರು ಸ್ಟಾರ್​ ಕಲಾವಿದರು ಇದ್ದರೂ ಕೂಡ ಜನರಿಗೆ ಈ ಚಿತ್ರ ಹಿಡಿಸಿಲ್ಲ. ಸತತ 8 ದಿನ ಪ್ರದರ್ಶನ ಕಂಡ ‘ಸೆಲ್ಫೀ’ ಗಳಿಸಿದ್ದು (Selfiee Total Box Office Collection) ಕೇವಲ 14.25 ಕೋಟಿ ರೂಪಾಯಿ ಮಾತ್ರ.

ಒಂದು ಕಾಲದಲ್ಲಿ ಅಕ್ಷಯ್​ ಕುಮಾರ್​ ಅವರು ಮುಟ್ಟಿದ್ದೆಲ್ಲವೂ ಚಿನ್ನ ಆಗುತ್ತಿತ್ತು. ಆದರೆ ಇತ್ತೀಚಿನ ವರ್ಷಗಳಲ್ಲಿ ಅವರಿಗೆ ಅದೃಷ್ಟ ಕೈ ಕೊಟ್ಟಿದೆ. ಬ್ಯಾಕ್​ ಟು ಬ್ಯಾಕ್​ ಸೋಲು ಅವರ ಬೆನ್ನು ಹತ್ತಿದೆ. ‘ಸೆಲ್ಫೀ’ ಸಿನಿಮಾ ಮೊದಲ ದಿನ ಗಳಿಸಿದ್ದು ಕೇವಲ 2.33 ಕೋಟಿ ರೂಪಾಯಿ ಮಾತ್ರ. ಅಕ್ಷಯ್​ ಕುಮಾರ್​ ಅವರಂತಹ ಸ್ಟಾರ್​ ನಟನ ಚಿತ್ರಕ್ಕೆ ಈ ಕಲೆಕ್ಷನ್​ ಏನೇನೂ ಸಾಲದು. ಎರಡನೇ ದಿನ 3.80 ಕೋಟಿ ರೂಪಾಯಿ ಗಳಿಸುವ ಮೂಲಕ ಕೊಂಚ ಚೇತರಿಕೆ ಕಂಡಿತು. ಆದರೆ ಮೂರನೇ ದಿನ ಹೇಳಿಕೊಳ್ಳುವಂತಹ ಏರಿಕೆ ಆಗಲಿಲ್ಲ.

ಇದನ್ನೂ ಓದಿ: Akshay Kumar: ‘ಸೆಲ್ಫೀ’ ಹೀನಾಯ ಸೋಲು; ‘ಎಲ್ಲ ತಪ್ಪು ನನ್ನದೇ’ ಎಂದು ಹೊಣೆ ಹೊತ್ತುಕೊಂಡ ಅಕ್ಷಯ್​ ಕುಮಾರ್​

ಮೂರನೇ ದಿನ ‘ಸೆಲ್ಫೀ’ ಸಿನಿಮಾ 3.95 ಕೋಟಿ ರೂಪಾಯಿ ಕಲೆಕ್ಷನ್​ ಮಾಡಿತು. ಬಳಿಕ ದಿಢೀರ್​ ಅಂತ ಕಲೆಕ್ಷನ್​ ಕುಸಿಯಿತು. ನಾಲ್ಕನೇ ದಿನ 1.10 ಕೋಟಿ ರೂಪಾಯಿ ಮಾತ್ರ ಸಂಗ್ರಹ ಆಯಿತು. ಹಂಗೂ ಹಿಂಗೂ 8 ದಿನಗಳ ಕಾಲ ಪ್ರದರ್ಶನ ಕಂಡಿರುವ ಈ ಸಿನಿಮಾ ಕೇವಲ 14.25 ಕೋಟಿ ರೂಪಾಯಿ ಗಳಿಸುವಷ್ಟರಲ್ಲಿ ಸುಸ್ತಾಗಿದೆ. ಅಲ್ಲಿಗೆ, ಇದರ ಬಿಸ್ನೆಸ್​ ಬಹುತೇಕ ಅಂತ್ಯವಾದಂತೆ ಆಗಿದೆ.

ಇದನ್ನೂ ಓದಿ: Akshay Kumar: ಛತ್ರಪತಿ ಶಿವಾಜಿ ಪಾತ್ರ ಮಾಡಲು ಹೋಗಿ ಟ್ರೋಲ್​ ಆದ ಅಕ್ಷಯ್​ ಕುಮಾರ್​; ಇಲ್ಲಿದೆ ಕಾರಣ

ಅಕ್ಷಯ್​ ಕುಮಾರ್​ ಅವರ ವೃತ್ತಿಜೀವನದ ಬಹು ದೊಡ್ಡ ಫ್ಲಾಪ್​ ಎಂಬ ಕುಖ್ಯಾತಿಗೆ ‘ಸೆಲ್ಫೀ’ ಸಿನಿಮಾ ಒಳಗಾಗಿದೆ. ಇದರಿಂದ ಅವರ ಮಾರ್ಕೆಟ್​ ಕುಸಿಯುವ ಸಾಧ್ಯತೆ ಇದೆ. ಮುಂಬರುವ ದಿನಗಳಲ್ಲಿ ಅವರು ಸ್ಕ್ರಿಪ್ಟ್​ ಆಯ್ಕೆಯಲ್ಲಿ ತುಂಬ ಎಚ್ಚರಿಕೆ ವಹಿಸಬೇಕಾಗಿದೆ.

ತುಂಬ ವೇಗವಾಗಿ ಅಕ್ಷಯ್​ ಕುಮಾರ್​ ಅವರು ಸಿನಿಮಾದ ಕೆಲಸಗಳನ್ನು ಮುಗಿಸುತ್ತಾರೆ. ಇದರಿಂದ ಚಿತ್ರದ ಗುಣಮಟ್ಟ ಕುಸಿಯುತ್ತಿದೆ ಎಂಬುದು ಹಲವರ ಅಭಿಪ್ರಾಯ. ಅವರು ರಿಮೇಕ್​ ಮಾಡಬಾರದು ಎಂದು ಕೂಡ ನೆಟ್ಟಿಗರು ಕಮೆಂಟ್​ ಮಾಡುತ್ತಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.