ಶಾರುಖ್ ‘ಕಿಂಗ್ ಸಿನಿಮಾದಿಂದ ಹೊರಬಂದ ಅನಿರುದ್ಧ್​; ಮದುವೆ ಕಮಿಟ್​​ಮೆಂಟ್​?

ಬಾಲಿವುಡ್ ಬಾದ್‌ಷಾ ಶಾರುಖ್ ಖಾನ್ ಅಭಿನಯದ ಮುಂಬರುವ ‘ಕಿಂಗ್‘ ಚಿತ್ರದಿಂದ ಪ್ರಸಿದ್ಧ ಸಂಗೀತ ನಿರ್ದೇಶಕ ಅನಿರುದ್ಧ್ ರವಿಚಂದರ್ ಹೊರಬಂದಿದ್ದಾರೆ. ಮದುವೆ ಕಾರಣಕ್ಕೆ ಅವರು ಹೊರ ಬಂದಿದ್ದಾರೆ ಎನ್ನಲಾಗಿತ್ತು. ಆದರೆ, ಹಾಗಲ್ಲವಂತೆ. ದಕ್ಷಿಣ ಭಾರತದ ಸಾಲು ಸಾಲು ಸಿನಿಮಾಗಳ ಕೆಲಸದಲ್ಲಿದ್ದ ಅನಿರುದ್ಧ್, ಸಮಯದ ಅಭಾವದಿಂದ ಈ ನಿರ್ಧಾರ ತಳೆದಿದ್ದಾರೆ. ಕೊನೆಯ ಕ್ಷಣದವರೆಗೂ ತಂಡದ ಜೊತೆ ಚರ್ಚಿಸಿ ಅವರು ಈ ನಿರ್ಧಾರಕ್ಕೆ ಬಂದಿದ್ದಾರೆ. ಸದ್ಯಕ್ಕೆ ಈ ಸುದ್ದಿ ಶಾರುಖ್ ಖಾನ್ ಹಾಗೂ ಅನಿರುದ್ಧ್ ಅಭಿಮಾನಿಗಳಿಗೆ ತೀವ್ರ ನಿರಾಸೆ ಮೂಡಿಸಿದೆ.

ಅನಿರುದ್ಧ್ ಸಿನಿಮಾ ತೊರೆದರೂ ಒಂದು ವಿಶೇಷ ಕೊಡುಗೆ ನೀಡಿದ್ದಾರೆ. ಅವರು ಈ ಚಿತ್ರಕ್ಕಾಗಿ ಒಂದು ಭರ್ಜರಿ ಥೀಮ್ ಟ್ರ್ಯಾಕ್ ಸಂಯೋಜಿಸಿದ್ದಾರೆ. ಈ ವಿಷಯದಲ್ಲಿ ಚಿತ್ರತಂಡಕ್ಕೆ ಸಂಪೂರ್ಣ ತೃಪ್ತಿಯಿದೆ. ಹೀಗಾಗಿ ಅನಿರುದ್ಧ್ ಅವರ ಸಂಗೀತದ ಸ್ಪರ್ಶ ಚಿತ್ರದಲ್ಲಿ ಉಳಿಯಲಿದೆ. ದಕ್ಷಿಣದ ಬ್ಯುಸಿ ಷೆಡ್ಯೂಲ್‌ನಿಂದಾಗಿ ಅವರು ಪೂರ್ಣ ಮಟ್ಟದ ಸಂಗೀತ ನೀಡಲು ಸಾಧ್ಯವಾಗಿಲ್ಲ.

ಈಗ ಈ ಜವಾಬ್ದಾರಿಯನ್ನು ಬಾಲಿವುಡ್‌ನ ಪ್ರಸಿದ್ಧ ಸಂಗೀತ ಜೋಡಿ ಸಚಿನ್-ಜಿಗರ್ ವಹಿಸಿಕೊಂಡಿದ್ದಾರೆ. ಅನಿರುದ್ಧ್ ಸಂಯೋಜಿಸಿದ ಥೀಮ್ ಟ್ರ್ಯಾಕ್ ಅನ್ನು ಇವರು ಮರುರೂಪಿಸಲಿದ್ದಾರೆ. ಅದನ್ನು ಸಿನಿಮಾದ ಹಿನ್ನೆಲೆ ಸಂಗೀತಕ್ಕೆ ಬಳಸಿಕೊಳ್ಳಲಿದ್ದಾರೆ. ಉಳಿದ ಹಾಡುಗಳ ಸಂಯೋಜನೆಯನ್ನೂ ಸಚಿನ್-ಜಿಗರ್ ಅವರೇ ಪೂರ್ಣಗೊಳಿಸಲಿದ್ದಾರೆ. ದೊಡ್ಡ ಸಿನಿಮಾವನ್ನು ಕೈಗೆತ್ತಿಕೊಂಡಿರುವ ಈ ಜೋಡಿಯ ಮೇಲೆ ಈಗ ಭಾರಿ ನಿರೀಕ್ಷೆಯಿದೆ.

ಸಿದ್ಧಾರ್ಥ್ ಆನಂದ್ ನಿರ್ದೇಶನದ ‘ಕಿಂಗ್’ ಅತ್ಯಂತ ದುಬಾರಿ ಹಾಗೂ ನಿರೀಕ್ಷಿತ ಯೋಜನೆಯಾಗಿದೆ. ಶಾರುಖ್ ಖಾನ್ ಹುಟ್ಟುಹಬ್ಬದ ಸಂದರ್ಭದಲ್ಲಿ ಪ್ರಚಾರ ಕಾರ್ಯ ಆರಂಭಿಸಲು ಚಿತ್ರತಂಡ ಯೋಜನೆ ಹಾಕಿಕೊಂಡಿದೆ. ಕ್ರಿಸ್‌ಮಸ್ ಹಬ್ಬದ ರಜೆಯ ಅವಧಿಯಲ್ಲಿ ಸಿನಿಮಾ ಬಿಡುಗಡೆಯಾಗಲಿದೆ. ಆದ್ದರಿಂದ ಯಾವುದೇ ಕಾರಣಕ್ಕೂ ಶೂಟಿಂಗ್ ತಡವಾಗಬಾರದು ಎಂಬುದು ನಿರ್ಮಾಪಕರ ಸ್ಪಷ್ಟ ನಿಲುವಾಗಿದೆ.

ಇದನ್ನೂ ಓದಿ: ಶಾರುಖ್ ಖಾನ್ ಹುಟ್ಟುಹಬ್ಬಕ್ಕೆ ಬಿಡುಗಡೆಯಾಗಲಿದೆ ‘ಕಿಂಗ್’ ಸಿನಿಮಾದ ಟೀಸರ್

ಶಾರುಖ್ ಖಾನ್ ಅವರಂತಹ ದೊಡ್ಡ ನಟನ ಸಿನಿಮಾವನ್ನು ಕೈಬಿಡುವುದು ಸಣ್ಣ ವಿಷಯವಲ್ಲ. ಅನಿರುದ್ಧ್ ಪ್ರಸ್ತುತ ರಜನಿಕಾಂತ್ ಅಭಿನಯದ ‘ಜೈಲರ್ 2’ ಸಿನಿಮಾದ ಹಿನ್ನೆಲೆ ಸಂಗೀತದಲ್ಲಿ ತೀವ್ರ ಬ್ಯುಸಿಯಾಗಿದ್ದಾರೆ. ಅವರ ಮಾಸ್ ಸಂಗೀತ ದಕ್ಷಿಣದಲ್ಲಿ ಹೊಸ ಅಲೆಯನ್ನು ಸೃಷ್ಟಿಸಿದೆ. ಈಗ ಸಚಿನ್-ಜಿಗರ್ ಈ ಸವಾಲನ್ನು ಹೇಗೆ ಎದುರಿಸುತ್ತಾರೆ ಎಂಬುದನ್ನು ಕಾದು ನೋಡಬೇಕಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.