‘ಪ್ಲೀಸ್​ ನನ್ನ ಹೊಟ್ಟೆ ಮೇಲೆ ಹೊಡಿಬೇಡಿ’; ಧೋನಿ ಬಳಿ ಮನವಿ ಮಾಡಿಕೊಂಡ ಬಾಲಿವುಡ್​ ವಿಲನ್​

ಭಾರತ ಕ್ರಿಕೆಟ್​ ತಂಡದ ಮಾಜಿ ನಾಯಕ ಎಂ.ಎಸ್​. ಧೋನಿ (MS Dhoni) ಅವರಿಗೂ ಚಿತ್ರರಂಗಕ್ಕೂ ಮೊದಲಿನಿಂದಲೂ ನಂಟು ಇದೆ. ಅವರ ಜೀವನ ಆಧರಿಸಿ ಬಂದ ‘ಎಂ.ಎಸ್​. ಧೋನಿ: ದಿ ಅನ್​ಟೋಲ್ಡ್​ ಸ್ಟೋರಿ’ ಸಿನಿಮಾ ಸೂಪರ್ ಹಿಟ್​ ಆಗಿತ್ತು. ಅನೇಕ ಬಾಲಿವುಡ್ ಸ್ಟಾರ್​ ನಟ-ನಟಿಯರು ಕೂಡ ಧೋನಿಗೆ ಫ್ಯಾನ್​. ಹೀಗೆ ಎಲ್ಲರ ಜೊತೆ ಒಳ್ಳೆಯ ಒಡನಾಟ ಹೊಂದಿರುವ ಅವರು ಒಬ್ಬ ಕಲಾವಿದನ ವೃತ್ತಿಜೀವನಕ್ಕೆ ಮಾರಕ ಆಗುವ ಸಾಧ್ಯತೆ ಇದೆ! ಧೋನಿ ಬಗ್ಗೆ ಹೀಗೊಂದು ಅಭಿಪ್ರಾಯ ಕೇಳಿಬಂದಿದೆ. ಹಾಗಂತ ಈ ಮಾತನ್ನು ಗಂಭೀರವಾಗಿ ಪರಿಗಣಿಸಬೇಕಿಲ್ಲ. ಖ್ಯಾತ ನಟ ಗುಲ್ಶನ್​ ಗ್ರೋವರ್​ (Gulshan Grover) ಅವರು ಧೋನಿಯ ಹೊಸ ಲುಕ್​ ಬಗ್ಗೆ ಹೊಗಳುವಾಗ ತಮಾಷೆಯಾಗಿ ಈ ರೀತಿ ಹೇಳಿದ್ದಾರೆ ಅಷ್ಟೇ.

ಇತ್ತೀಚೆಗೆ ಧೋನಿ ಹೊಸ ಕೇಶವಿನ್ಯಾಸ ಮಾಡಿಕೊಂಡಿದ್ದರು. ಅವರ ಹೊಸ ಫೋಟೋಗಳು ಸೋಶಿಯಲ್​ ಮೀಡಿಯಾದಲ್ಲಿ ವೈರಲ್​ ಆಗಿವೆ. ತುಂಬ ಸ್ಟೈಲಿಶ್​ ಆಗಿರುವ ಈ ಲುಕ್​ಗೆ ಅಭಿಮಾನಿಗಳು ಫಿದಾ ಆಗಿದ್ದಾರೆ. ಅಷ್ಟೇ ಅಲ್ಲ, ಸೆಲೆಬ್ರಿಟಿಗಳು ಕೂಡ ಬೆರಗಾಗಿ ನೋಡುತ್ತಿದ್ದಾರೆ. ಸೆಲೆಬ್ರಿಟಿ ಕೇಶವಿನ್ಯಾಸಕಾರ ಆಲಿಮ್​ ಹಕಿಮ್​ ಅವರು ಈ ಹೇರ್​ಸ್ಟೈಲ್​ ಮಾಡಿದ್ದಾರೆ. ಅದನ್ನು ಕಂಡು ಫೇಮಸ್​ ಖಳನಟ ಗುಲ್ಶನ್​​ ಗ್ರೋವರ್​ ಫನ್ನಿಯಾಗಿ ಟ್ವೀಟ್​ ಮಾಡಿದ್ದಾರೆ.

‘ಮಾಹೀ ಬ್ರದರ್​ ನಿಮ್ಮ ಲುಕ್​ ಸೂಪರ್​ ಆಗಿದೆ. ಯಾವುದೇ ಡಾನ್​ ಪಾತ್ರಗಳನ್ನು ಒಪ್ಪಿಕೊಳ್ಳಬೇಡಿ ಪ್ಲೀಸ್​. ನೀವು ಡಾನ್​ ಪಾತ್ರ ಮಾಡಿದರೆ ನನ್ನ ಹೊಟ್ಟೆ ಮೇಲೆ ಹೊಡೆದಂತೆ ಆಗುತ್ತದೆ. ಈಗಾಗಲೇ ನನ್ನ ಆತ್ಮೀಯ ಸಹೋದರರಾದ ಜಾಕಿ ಶ್ರಾಫ್​, ಸಂಜಯ್​ ದತ್ ಹಾಗೂ ಸುನೀಲ್​ ಶೆಟ್ಟಿ ನನಗೆ ಕೆಲಸ ಇಲ್ಲದಂತೆ ಮಾಡಲು ಈ ರೀತಿ ಪಾತ್ರಗಳನ್ನು ಮಾಡುತ್ತಿದ್ದಾರೆ’ ಎಂದು ಗುಲ್ಶನ್​​ ಗ್ರೋವರ್ ಟ್ವೀಟ್​ ಮಾಡಿದ್ದಾರೆ. ಈ ತಮಾಷೆಯ ಟ್ವೀಟ್​ ಸದ್ಯ ವೈರಲ್​ ಆಗುತ್ತಿದೆ.

ಹಿಂದಿ ಸಿನಿಮಾಗಳಲ್ಲಿ ವಿಲನ್​ ಪಾತ್ರ ಮಾಡುವ ಮೂಲಕ ಗುಲ್ಶನ್​​ ಗ್ರೋವರ್​ ಫೇಮಸ್​ ಆಗಿದ್ದಾರೆ. 400ಕ್ಕೂ ಅಧಿಕ ಚಿತ್ರಗಳಲ್ಲಿ ಅವರು ನಟಿಸಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಸ್ಟಾರ್​ ಹೀರೋಗಳು ವಿಲನ್​ ಪಾತ್ರ ಮಾಡುವುದು ಟ್ರೆಂಡ್​ ಆಗಿದೆ. ಬಹುನಿರೀಕ್ಷಿತ ‘ಕೆಜಿಎಫ್​: ಚಾಪ್ಟರ್​ 2’ ಸಿನಿಮಾದಲ್ಲಿ ಸಂಜಯ್​ ದತ್​ ವಿಲನ್​ ಆಗಿದ್ದಾರೆ. ಸಲ್ಮಾನ್​ ಖಾನ್​ ನಟನೆಯ ‘ಟೈಗರ್​ 3’ ಚಿತ್ರದಲ್ಲಿ ಇಮ್ರಾನ್​ ಹಷ್ಮಿಗೆ ಖಳನ ಪಾತ್ರ ನೀಡಲಾಗಿದೆ. ಆ ಕಾರಣಕ್ಕಾಗಿ ಎಂ.ಎಸ್​. ಧೋನಿ ಬಗ್ಗೆ ಗುಲ್ಶನ್​​ ಗ್ರೋವರ್​ ಹೀಗೆ ಟ್ವೀಟ್​ ಮಾಡಿದ್ದಾರೆ. ಅದಕ್ಕೆ ಕ್ಯಾಪ್ಷನ್​ ಕೂಲ್​ ಕಡೆಯಿಂದ ಯಾವ ರೀತಿ ಪ್ರತಿಕ್ರಿಯೆ ಬರಲಿದೆ ಎಂದು ಅಭಿಮಾನಿಗಳು ಕಾಯುತ್ತಾರೆ.

ಇದನ್ನೂ ಓದಿ:

ಖಡಕ್​ ಪೋಸ್ಟರ್​ ಮೂಲಕ ಅಧೀರ ಸಂಜಯ್​ ದತ್​ ಹುಟ್ಟುಹಬ್ಬಕ್ಕೆ ಶುಭಕೋರಿದ ‘ಕೆಜಿಎಫ್ 2’ ತಂಡ

MS Dhoni: ಹೊಸ ಕೇಶ ವಿನ್ಯಾಸದಿಂದ ಮಿಂಚುತ್ತಿದ್ದಾರೆ ಕ್ಯಾಪ್ಟನ್ ಕೂಲ್ ಧೋನಿ!