ವಿಜಯ್ ದೇವರಕೊಂಡ ಕಟ್ಟು ಮಸ್ತಾದ ದೇಹ ನೋಡಿ ಫ್ಯಾನ್ಸ್ ಫಿದಾ; ‘ಲೈಗರ್’ ಥೀಮ್ ರಿಲೀಸ್

ನಟ ವಿಜಯ್​ ದೇವರಕೊಂಡ ಅವರು (Vijay Devarakonda) ಇಂದು (ಮೇ 9) ಬರ್ತ್​ಡೇ ಸಂಭ್ರಮದಲ್ಲಿದ್ದಾರೆ. ‘ಗೀತ ಗೋವಿಂದಂ’, ‘ಡಿಯರ್​ ಕಾಮ್ರೇಡ್​’, ‘ಅರ್ಜುನ್​ ರೆಡ್ಡಿ’ ಮೊದಲಾದ ಚಿತ್ರಗಳ ಮೂಲಕ ಅವರು ಜನರನ್ನು ರಂಜಿಸಿದ್ದಾರೆ. ಈಗ ‘ಲೈಗರ್​ ಸಿನಿಮಾ ಮೂಲಕ ಬೇರೆಯದೇ ಗೆಟಪ್​ ತಾಳಿದ್ದಾರೆ. ಪ್ಯಾನ್​ ಇಂಡಿಯಾ ಮಟ್ಟದಲ್ಲಿ ಮೂಡಿಬರುತ್ತಿರುವ ಈ ಚಿತ್ರದ ಮೇಲೆ ಸಾಕಷ್ಟು ನಿರೀಕ್ಷೆ ಇದೆ. ಈ ಮೊದಲು ರಿಲೀಸ್ ಆಗಿದ್ದ ‘ಲೈಗರ್’​ ಸಿನಿಮಾದ (Liger Movie) ಗ್ಲಿಂಪ್ಸ್​ ವಿಡಿಯೋ ಕೋಟಿಕೋಟಿ ವೀಕ್ಷಣೆ ಕಂಡಿತ್ತು. ಈಗ ಬರ್ತ್​ಡೇ ಪ್ರಯುಕ್ತ ಚಿತ್ರದ ಥೀಮ್ ಲಿರಿಕಲ್ ಟೀಸರ್ ​ ರಿಲೀಸ್ ಆಗಿದೆ. ‘ಲೈಗರ್ ಹಂಟ್​’ ಹೆಸರಲ್ಲಿ ರಿಲೀಸ್ ಆದ ವಿಡಿಯೋ​ ನೋಡಿ​ ದೇವರಕೊಂಡ ಫ್ಯಾನ್ಸ್​ ಫಿದಾ ಆಗಿದ್ದಾರೆ. ಚಿತ್ರಕ್ಕೆ ಪುರಿ ಜಗನ್ನಾಥ್ (Puri Jagannadh)​ ನಿರ್ದೇಶನ ಮಾಡುತ್ತಿದ್ದು, ವಿಜಯ್​ ದೇವರಕೊಂಡಗೆ ಜೋಡಿಯಾಗಿ ಅನನ್ಯಾ ಪಾಂಡೆ ನಟಿಸುತ್ತಿದ್ದಾರೆ.

‘ಲೈಗರ್​’ ಚಿತ್ರದಲ್ಲಿ ವಿಜಯ್​ ದೇವರಕೊಂಡ ಅವರು ಬಾಕ್ಸಿಂಗ್​ ಪಟುವಾಗಿ ಕಾಣಿಸಿಕೊಳ್ಳಲಿದ್ದಾರೆ. ಅವರ ಪಾತ್ರದ ಝಲಕ್​ ಹೇಗಿರಲಿದೆ ಎಂಬುದನ್ನು ತೋರಿಸುವಲ್ಲಿ ‘ಲೈಗರ್ ಹಂಟ್’ ಥೀಮ್ ಲಿರಿಕಲ್ ಟೀಸರ್​ ಯಶಸ್ವಿ ಆಗಿದೆ. ಬಿಡುಗಡೆಯಾದ ಕೆಲವೇ ನಿಮಿಷಗಳಲ್ಲಿ ಈ ವಿಡಿಯೋ ಸಾವಿರಾರು ವೀವ್ಸ್ ಪಡೆದಿದೆ. ಇದು ವಿಜಯ್ ಫ್ಯಾನ್ಸ್​ಗೆ ಫರ್ಪೆಕ್ಟ್​ ಬರ್ತ್​​ಡೇ ಗಿಫ್ಟ್ ಆಗಿದೆ.

ಈ ಚಿತ್ರವನ್ನು ಕರಣ್​ ಜೋಹರ್​ ನಿರ್ಮಾಣ ಮಾಡುತ್ತಿದ್ದಾರೆ. ಪ್ರಮುಖ ಪಾತ್ರವೊಂದರಲ್ಲಿ ವಿಶ್ವ ವಿಖ್ಯಾತ ಬಾಕ್ಸರ್​ ಮೈಕ್​ ಟೈಸನ್​ ಕೂಡ ಅಭಿನಯಿಸಿರುವುದು ವಿಶೇಷ. ಬಾಕ್ಸಿಂಗ್​ ಜಗತ್ತಿನಲ್ಲಿ ಮೈಕ್​ ಟೈಸನ್​ ಅವರದ್ದು ದೊಡ್ಡ ಹೆಸರು. ಎದುರಾಳಿಗಳಿಗೆ ನಡುಕ ಹುಟ್ಟಿಸುವ ಅವರ ಬಾಕ್ಸಿಂಗ್​ ಪರಾಕ್ರಮಕ್ಕೆ ಸರಿಸಾಟಿ ಆಗಬಲ್ಲ ಮತ್ತೊಬ್ಬ ವ್ಯಕ್ತಿಯೇ ಇಲ್ಲ. ಅಂಥ ದಿಗ್ಗಜನನ್ನು ‘ಲೈಗರ್​’ ಸಿನಿಮಾ ತಂಡ ಭಾರತಕ್ಕೆ ಕರೆತರುತ್ತಿದೆ.

2022ರ ಆಗಸ್ಟ್​​ 25ಕ್ಕೆ ‘ಲೈಗರ್’ ತೆರೆಗೆ ಬರುತ್ತಿದೆ. ಈ ಸಿನಿಮಾ ಸುಮಾರು 125 ಕೋಟಿ ರೂಪಾಯಿ ವೆಚ್ಚದಲ್ಲಿ ತಯಾರಾಗುತ್ತಿದ್ದು, ಪುರಿ ಜಗನ್ನಾಥ್​, ಕರಣ್​ ಜೋಹರ್​, ಚಾರ್ಮಿ ಕೌರ್​, ಅಪೂರ್ವ ಮೆಹ್ತಾ, ಹೀರೂ ಯಶ್​ ಜೋಹರ್​ ಒಟ್ಟಾಗಿ ನಿರ್ಮಿಸುತ್ತಿದ್ದಾರೆ. ಈ ಚಿತ್ರ ಕನ್ನಡದಲ್ಲೂ ತೆರೆಗೆ ಬರುತ್ತಿದೆ.

‘ಅರ್ಜುನ್​ ರೆಡ್ಡಿ’ ಸಿನಿಮಾದಲ್ಲಿ ವಿಜಯ್ ದೇವರಕೊಂಡ ದೊಡ್ಡ ಮಟ್ಟದಲ್ಲಿ ಹೆಸರು ಮಾಡಿದ್ದಾರೆ. ಈ ಚಿತ್ರ ಹಿಂದಿಗೆ ‘ಕಬೀರ್ ಸಿಂಗ್’ ಹೆಸರಲ್ಲಿ ರಿಮೇಕ್ ಆಗಿತ್ತು. ಈ ಕಾರಣದಿಂದಲೂ ವಿಜಯ್ ಹೆಸರು ಬಾಲಿವುಡ್ ಮಂದಿಗೆ ಪರಿಚಯ ಆಗಿತ್ತು.

ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.