ಸರಿಯಾಗಿ ಹಿಂದಿ ತಿಳಿಯದ ಸೈಫ್​ಗೆ ತಾಯಿ ಶರ್ಮಿಳಾ ಕ್ಲಾಸ್​; ವಿಡಿಯೋ ವೈರಲ್​

ಕರಣ್​ ಜೋಹರ್​ ನಡೆಸಿಕೊಡುವ ‘ಕಾಫಿ ವಿತ್​ ಕರಣ್​’ (Koffee With Karan) ಕಾರ್ಯಕ್ರಮಕ್ಕೂ ವಿವಾದಕ್ಕೂ ಎಲ್ಲಿಲ್ಲದ ನಂಟು. ಪ್ರತಿ ಎಪಿಸೋಡ್​ನಲ್ಲಿ ಒಂದಲ್ಲ ಒಂದು ಕಾಂಟ್ರವರ್ಸಿ ಆಗುತ್ತದೆ. ಇತ್ತೀಚೆಗೆ ಈ ಶೋನಲ್ಲಿ ಭಾಗವಹಿಸಿದ್ದ ನಟ ಸೈಫ್​ ಅಲಿ ಖಾನ್​ (Saif Ali Khan) ಅವರು ಭಾರಿ ಟೀಕೆಗೆ ಒಳಗಾಗುತ್ತಿದ್ದಾರೆ. ಅವರಿಗೆ ಸರಿಯಾಗಿ ಹಿಂದಿ ಭಾಷೆಯ ಬಗ್ಗೆ ತಿಳಿವಳಿಕೆ ಇಲ್ಲ ಎಂಬುದು ಜಗಜ್ಜಾಹೀರಾಗಿದೆ. ಆ ಕಾರಣಕ್ಕಾಗಿ ಸೈಫ್​ ಅಲಿ ಖಾನ್​ ಮಾತ್ರವಲ್ಲದೇ ಕರಣ್​ ಜೋಹರ್​ ಕೂಡ ಟ್ರೋಲ್​ ಆಗುತ್ತಿದ್ದಾರೆ. ಇಬ್ಬರಿಗೂ ಹಿರಿಯ ನಟಿ ಶರ್ಮಿಳಾ ಟ್ಯಾಗೋರ್ (Sharmila Tagore) ಛಾಟಿ ಬೀಸಿದ್ದಾರೆ. ಆ ವಿಡಿಯೋ ವೈರಲ್​ ಆಗುತ್ತಿದೆ.

ಸೈಫ್​ ಅಲಿ ಖಾನ್​ ಮತ್ತು ಅವರ ತಾಯಿ ಶರ್ಮಿಳಾ ಟ್ಯಾಗೋರ್ ಜೊತೆಯಾಗಿ ‘ಕಾಫಿ ವಿತ್​ ಕರಣ್​’ ಶೋನಲ್ಲಿ ಭಾಗವಹಿಸಿದ್ದಾರೆ. ಈ ವೇಳೆ ಸೈಫ್​ ಜೊತೆ ತಮ್ಮ ಬಾಂಧವ್ಯ ಹೇಗಿದೆ ಎಂಬುದನ್ನು ತಿಳಿಸುವಾಗ ‘ಪುತ್ರ ಮೋಹ್​’ ಎಂಬ ಹಿಂದಿ ಪದವನ್ನು ಶರ್ಮಿಳಾ ಬಳಸಿದ್ದಾರೆ. ಇದರ ಅರ್ಥ ಏನು ಎಂಬುದು ಸೈಫ್​ ಮತ್ತು ಕರಣ್​ ಜೋಹರ್​ ಅವರಿಗೆ ತಿಳಿದಿಲ್ಲ! ಅದರಿಂದ ಶರ್ಮಿಳಾಗೆ ಅಚ್ಚರಿ ಆಗಿದೆ.

‘ಮೋಹ್​’ ಎಂಬುದನ್ನು ಬೆಂಗಾಲಿ ಪದ ಇರಬಹುದು ಎಂದು ಸೈಫ್​ ಊಹಿಸಿದ್ದಾರೆ. ಕರಣ್​ ಜೋಹರ್​ ಕೂಡ ಅದಕ್ಕೆ ಸಹಮತ ಸೂಚಿಸಿದ್ದಾರೆ. ‘ಎಕ್ಸ್​ಕ್ಯೂಸ್​ ಮೀ.. ನೀನು ಹಿಂದಿ ನಟ. ಪುತ್ರ ಎಂಬ ಪದದ ಅರ್ಥ ನಿನಗೆ ಗೊತ್ತಿಲ್ಲವೇ’ ಎಂದು ಶರ್ಮಿಳಾ ಖಡಕ್​ ಆಗಿ ಪ್ರಶ್ನಿಸಿದ್ದಾರೆ. ಈ ಜನಪ್ರಿಯ ಕಾರ್ಯಕ್ರಮದ ವೇದಿಕೆಯಲ್ಲಿ ಯಾವ ಮುಲಾಜೂ ಇಲ್ಲದೇ ಮಗನಿಗೆ ಅವರು ಪಾಠ ಮಾಡಿದ್ದಾರೆ. ಪುತ್ರ ಮೋಹ್​ ಎಂದರೆ ಮಗನ ಜೊತೆಗಿನ ಬಾಂಧವ್ಯ ಎಂದು ಅವರು ತಿಳಿಸಿ ಹೇಳಿದ್ದಾರೆ.

ಇದನ್ನೂ ಓದಿ: ತಾಯಿ ಎದುರಲ್ಲಿ ಹೆಂಡತಿ ಬಗ್ಗೆ ಪ್ರಶ್ನೆ ಕೇಳಿದ ಕರಣ್​ ಜೋಹರ್​; ಸೈಫ್​​ಗೆ ಮುಜುಗರ

ಹಿಂದಿ ಚಿತ್ರರಂಗದಲ್ಲಿ ಕೆಲಸ ಮಾಡುವ ಬಹುತೇಕರು ಇಂಗ್ಲಿಷ್​ ವ್ಯಾಮೋಹ ಹೊಂದಿದ್ದಾರೆ. ತಮಗೆ ಸರಿಯಾಗಿ ಹಿಂದಿ ಬರುವುದಿಲ್ಲ ಎಂಬುದನ್ನು ಅವರು ಕೂಲ್​ ಆಗಿ ಪರಿಗಣಿಸಿದ್ದಾರೆ. ಇಂಥ ನಟ-ನಟಿಯರು ಮತ್ತು ತಂತ್ರಜ್ಞರನ್ನು ನೆಟ್ಟಿಗರು ಟ್ರೋಲ್​ ಮಾಡುತ್ತಿದ್ದಾರೆ. ‘ಜೀವನ ಕಟ್ಟಿಕೊಳ್ಳಲು ಹಿಂದಿ ಚಿತ್ರರಂಗ ಬೇಕು. ಆದರೆ ನಿಮಗೆ ಸರಿಯಾಗಿ ಹಿಂದಿ ಕಲಿಯಲು ಮನಸ್ಸು ಇಲ್ಲ’ ಎಂದು ಜನರು ಛಾಟಿ ಬೀಸಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.