Sonu Sood: 4 ಕಾಲು, 4 ಕೈ ಇರುವ ಬಾಲಕಿಗೆ ಸರ್ಜರಿ ಮಾಡಿಸಿದ ಸೋನು ಸೂದ್​; ರಿಯಲ್​ ಹೀರೋಗೆ ಜನರ ಆಶೀರ್ವಾದ

ನಟ ಸೋನು ಸೂದ್​ (Sonu Sood) ಅವರನ್ನು ಜನರು ದೇವರ ರೀತಿಯಲ್ಲಿ ಕಾಣುತ್ತಾರೆ. ಅದಕ್ಕೆ ಕಾರಣ ಆಗಿರುವುದು ಅವರ ರಿಯಲ್​ ಲೈಫ್​ ವ್ಯಕ್ತಿತ್ವ. ಲೆಕ್ಕವಿಲ್ಲದಷ್ಟು ಜನರಿಗೆ ಅವರು ಸಹಾಯ ಮಾಡಿದ್ದಾರೆ. ಮೊದಲ ಬಾರಿಗೆ ಲಾಕ್​ಡೌನ್​ ಆದಾಗ ಸೋನು ಸೂದ್​ ಅವರು ಜನಪರ ಕಾರ್ಯಗಳನ್ನು ಮಾಡಲು ಆರಂಭಿಸಿದರು. ಸೂದ್​ ಚಾರಿಟಿ ಫೌಂಡೇಷನ್ (Sood Charity Foundation) ಮೂಲಕ ಇಂದಿಗೂ ಅವರು ಈ ಸಮಾಜಮುಖಿ ಕೆಲಸಗಳನ್ನು ಮುಂದುವರಿಸಿದ್ದಾರೆ. ಅವರಿಂದ ಸಹಾಯ ಕೋರಿ ಪ್ರತಿ ದಿನ ನೂರಾರು ಮಂದಿ ಮನವಿ ಸಲ್ಲಿಸುತ್ತಾರೆ. ಆ ಪೈಕಿ ಯೋಗ್ಯವಾದವರಿಗೆ ಸೋನು ಸೂದ್​ ಸಹಾಯ ಮಾಡುತ್ತಾರೆ. ಈಗ ಅವರು ಬಾಲಕಿಯೊಬ್ಬಳಿಗೆ ಶಸ್ತ್ರ ಚಿಕಿತ್ಸೆ (Surgery) ಮಾಡಿಸಿ ಗಮನ ಸೆಳೆದಿದ್ದಾರೆ. 4 ಕೈ ಮತ್ತು 4 ಕಾಲುಗಳನ್ನು ಹೊಂದಿದ್ದ ಚಾಹುಮುಖಿ ಎಂಬ ಬಾಲಕಿಗೆ ಹೊಸ ಜೀವನ ಸಿಕ್ಕಂತೆ ಆಗಿದೆ. ಈ ಕುರಿತು ಸೋನು ಸೂದ್​ ಅವರು ಸೋಶಿಯಲ್​ ಮೀಡಿಯಾದಲ್ಲಿ ಮಾಹಿತಿ ಹಂಚಿಕೊಂಡಿದ್ದಾರೆ.

ಚಾಹುಮುಖಿ ಬಡ ಕುಟುಂಬದಲ್ಲಿ ಜನಿಸಿದ ಮಗು. ಆಕೆ ಹುಟ್ಟುವಾಗ 4 ಕೈ, 4 ಕಾಲು ಇದ್ದಿದ್ದು ಕಂಡು ಪೋಷಕರು ಕಂಗಾಲಾಗಿದ್ದರು. ಶಸ್ತ್ರ ಚಿಕಿತ್ಸೆ ಮಾಡಿಸಲು ಅವರ ಬಳಿ ಹಣ ಇರಲಿಲ್ಲ. ಆಕೆಯ ಬಗ್ಗೆ ತಿಳಿದ ಸೋನು ಸೂದ್​ ಅವರು ನೆರವಿಗೆ ಧಾವಿಸಿದ್ದಾರೆ. ಆಪರೇಷನ್​ಗೆ ಬೇಕಾದ ಹಣವನ್ನು ನೀಡಿದ್ದಲ್ಲದೇ ಸೂಕ್ತ ರೀತಿಯಲ್ಲಿ ಚಿಕಿತ್ಸೆ ಸಿಗುವಂತೆ ನೋಡಿಕೊಂದ್ದಾರೆ. ‘ಬಿಹಾರದ ಈ ಬಾಲಕಿಯ ಆಪರೇಷನ್​ ಯಶಸ್ವಿ ಆಗಿದೆ. ಮನೆಗೆ ತೆರಳಲು ಆಕೆ ಸಿದ್ಧಳಾಗಿದ್ದಾಳೆ’ ಎಂದು ಸೋನು ಸೂದ್​ ಪೋಸ್ಟ್​ ಮಾಡಿದ್ದಾರೆ.

ಸೋನು ಸೂದ್ ಅವರ ಈ ಕಾರ್ಯವನ್ನು ಕಂಡು ಜನರು ಮೆಚ್ಚುಗೆ ಸೂಚಿಸಿದ್ದಾರೆ. ‘ನೀವೇ ನಿಜವಾದ ಹೀರೋ’ ಎಂದು ಅನೇಕರು ಕಮೆಂಟ್​ ಮಾಡುತ್ತಿದ್ದಾರೆ. ಅಭಿಮಾನಿಗಳು ಮಾತ್ರವಲ್ಲದೇ ಸೆಲೆಬ್ರಿಟಿಗಳು ಕೂಡ ಸೋನು ಸೂದ್​ಗೆ ಭೇಷ್​ ಎಂದಿದ್ದಾರೆ. ಸುನೀಲ್ ಶೆಟ್ಟಿ, ಇಶಾ ಗುಪ್ತಾ ಸೇರಿದಂತೆ ಅನೇಕರು ಸೋನು ಸೂದ್​ ಅವರನ್ನು ಪ್ರಶಂಸಿಸಿದ್ದಾರೆ. ಸದ್ಯ ಈ ಫೋಸ್ಟ್​ ವೈರಲ್​ ಆಗಿದೆ.

ಸೋನು ಸೂದ್​ ಅವರು ಸಿನಿಮಾ ಕೆಲಸಗಳಲ್ಲೂ ಬ್ಯುಸಿ ಆಗಿದ್ದಾರೆ. ಹಲವು ಆಫರ್​ಗಳು ಅವರಿಗೆ ಬರುತ್ತಿವೆ. ಕೋಟಿಗಟ್ಟಲೆ ಸಂಭಾವನೆ ಪಡೆಯುವ ಅವರು ಅದನ್ನು ಜನಸೇವೆಗೆ ಬಳಸುತ್ತಾರೆ. ಮೊದಲು ವಿಲನ್​ ಆಗಿ ನಟಿಸುತ್ತಿದ್ದ ಅವರಿಗೆ ಈಗ ಆ ರೀತಿಯ ಪಾತ್ರಗಳನ್ನು ನೀಡಲು ಸಾಧ್ಯವಿಲ್ಲ. ಸಿನಿಮಾದಲ್ಲಿಯೂ ಅವರನ್ನು ಹೀರೋ ಆಗಿಯೇ ನೋಡಲು ಜನರು ಬಯಸುತ್ತಿದ್ದಾರೆ. ಅಷ್ಟರಮಟ್ಟಿಗೆ ಸೋನು ಸೂದ್​ ಇಮೇಜ್​ ಬದಲಾಗಿದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.