Gargi Twitter Review: ಹೇಗಿದೆ ಸಾಯಿ ಪಲ್ಲವಿ ನಟನೆಯ ‘ಗಾರ್ಗಿ’ ಚಿತ್ರ? ಫಸ್ಟ್​ ಡೇ ಫಸ್ಟ್​ ಶೋ ನೋಡಿದವರ ವಿಮರ್ಶೆ ಇಲ್ಲಿದೆ..

ನಟಿ ಸಾಯಿ ಪಲ್ಲವಿ (Sai Pallavi) ಅಭಿಮಾನಿಗಳು ಹಿರಿಹಿರಿ ಹಿಗ್ಗುತ್ತಿದ್ದಾರೆ. ಅದಕ್ಕೆ ಕಾರಣ ‘ಗಾರ್ಗಿ’ ಸಿನಿಮಾಗೆ ಸಿಗುತ್ತಿರುವ ಉತ್ತಮ ಪ್ರತಿಕ್ರಿಯೆ. ಹೌದು, ಇಂದು (ಜುಲೈ 15) ಈ ಚಿತ್ರ ಬಿಡುಗಡೆ ಆಗಿದೆ. ತಮಿಳು, ತೆಲುಗು ಮತ್ತು ಕನ್ನಡದಲ್ಲಿ ‘ಗಾರ್ಗಿ’ (Gargi Movie) ತೆರೆಕಂಡಿದೆ. ಈ ಮೂರು ಭಾಷೆಗಳಿಗೆ ಸ್ವತಃ ಸಾಯಿ ಪಲ್ಲವಿ ಅವರೇ ಡಬ್​ ಮಾಡಿದ್ದಾರೆ. ಸಾಯಿ ಪಲ್ಲವಿ ಅವರಿಗೆ ತಮಿಳು ಮತ್ತು ತೆಲುಗು ಹೊಸದಲ್ಲ. ಆದರೆ ಕನ್ನಡದಲ್ಲಿ ಅವರು ಡಬ್​ ಮಾಡಿದ್ದು ಇದೇ ಮೊದಲು. ತುಂಬ ಕಷ್ಟಪಟ್ಟು ಅವರು ತಮ್ಮ ಪಾತ್ರಕ್ಕೆ ಕನ್ನಡದಲ್ಲಿ ಧ್ವನಿ ನೀಡಿದ್ದಾರೆ. ಆ ಕಾರಣದಿಂದಲೂ ಅವರಿಗೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಸಿನಿಮಾ ನೋಡಿದ ಬಹುತೇಕರು ಸೂಪರ್​ ಎನ್ನುತ್ತಿದ್ದಾರೆ. ಫಸ್ಟ್​ ಡೇ ಫಸ್ಟ್​ ಶೋ ನೋಡಿದ ವೀಕ್ಷಕರು ಟ್ವಿಟರ್​ ಮೂಲಕ ವಿಮರ್ಶೆ (Gargi Twitter Review) ಹಂಚಿಕೊಂಡಿದ್ದಾರೆ. ಅನೇಕರು ಫುಲ್​ ಮಾರ್ಕ್ಸ್​ ನೀಡಿದ್ದಾರೆ.

ಯಾವಾಗಲೂ ವಿಶೇಷವಾದ ಕಥಾಹಂದರ ಆಯ್ಕೆ ಮಾಡಿಕೊಳ್ಳುವ ಕಾರಣದಿಂದಲೇ ಸಾಯಿ ಪಲ್ಲವಿ ಅವರು ಅಭಿಮಾನಿಗಳಿಗೆ ಇಷ್ಟ ಆಗುತ್ತಾರೆ. ಈ ಬಾರಿ ‘ಗಾರ್ಗಿ’ ಸಿನಿಮಾದಲ್ಲೂ ಅದು ಮರುಕಳಿಸಿದೆ. ಉತ್ತಮವಾದ ಕಥೆ, ಪ್ರತಿಭಾವಂತ ಕಲಾವಿದರ ನಟನೆ, ಬಿಗಿಯಾದ ಚಿತ್ರಕಥೆ ಇರುವುದರಿಂದ ಈ ಸಿನಿಮಾ ತಮಗೆ ಇಷ್ಟವಾಗಿದೆ ಎಂದು ಪ್ರೇಕ್ಷಕರು ಟ್ವೀಟ್​ ಮಾಡುತ್ತಿದ್ದಾರೆ.

ಸಾಯಿ ಪಲ್ಲವಿ ನಟನೆಯ ‘ವಿರಾಟ ಪರ್ವಂ’ ಸಿನಿಮಾ ಜೂನ್​ 17ರಂದು ತೆರೆಕಂಡಿತ್ತು. ಚಿತ್ರಮಂದಿರದಲ್ಲಿ ಆ ಸಿನಿಮಾಗೆ ನಿರೀಕ್ಷಿತ ಮಟ್ಟದ ಗೆಲುವು ಸಿಗಲಿಲ್ಲ. ಅಂದುಕೊಂಡ ರೀತಿಯಲ್ಲಿ ಕಲೆಕ್ಷನ್​ ಆಗಲಿಲ್ಲ. ಆದರೆ ನಂತರ ಒಟಿಟಿಯಲ್ಲಿ ರಿಲೀಸ್​ ಆಗಿ ಧೂಳೆಬ್ಬಿಸಿತು. ಈಗ ‘ಗಾರ್ಗಿ’ ಸಿನಿಮಾ ಚಿತ್ರಮಂದಿರದಲ್ಲೇ ಗೆಲ್ಲುವ ಸೂಚನೆ ಸಿಕ್ಕಿದೆ. ವಿಮರ್ಶಕರಿಂದಲೂ ಈ ಚಿತ್ರಕ್ಕೆ ಪ್ರಶಂಸೆ ವ್ಯಕ್ತವಾಗುತ್ತಿದೆ.

‘ಪ್ರತಿ ಬಾರಿಯೂ ಸಾಯಿ ಪಲ್ಲವಿ ಅವರು ತಮ್ಮ ಪಾತ್ರ ಮತ್ತು ಸ್ಕ್ರಿಪ್ಟ್​ನಲ್ಲಿ ಪ್ರಯೋಗಗಳನ್ನು ಮಾಡುತ್ತಲೇ ಬಂದಿದ್ದಾರೆ. ಅವರನ್ನು ದೂಷಿಸುವವರಿಗೆ ‘ಗಾರ್ಗಿ’ ಚಿತ್ರವೇ ಸೂಕ್ತ ಪ್ರತಿಕ್ರಿಯೆ. ಈ ಸಿನಿಮಾವನ್ನು ಪ್ರೇಕ್ಷಕರು ಸೆಲೆಬ್ರೇಟ್​ ಮಾಡಬೇಕು’ ಎಂದು ನೆಟ್ಟಿಗರೊಬ್ಬರು ಟ್ವೀಟ್​ ಮಾಡಿದ್ದಾರೆ.

‘ಕೋರ್ಟ್​ ರೂಮ್​ ಡ್ರಾಮಾ ಈ ಚಿತ್ರದಲ್ಲಿ ಇದೆ. ತಂದೆ-ಮಗಳ ಬಾಂಧವ್ಯದ ಕಥೆ ಚೆನ್ನಾಗಿದೆ. ಸಾಯಿ ಪಲ್ಲವಿ ನಟನೆ ಇಷ್ಟವಾಗುತ್ತದೆ. ನಿಧಾನಗತಿಯ ನಿರೂಪಣೆ ಇದ್ದರೂ ಚಿತ್ರಕಥೆ ಉತ್ತಮವಾಗಿದೆ’ ಎಂದು ಕೂಡ ಪ್ರೇಕ್ಷಕರು ತಮ್ಮ ವಿಮರ್ಶೆ ಹಂಚಿಕೊಂಡಿದ್ದಾರೆ.