‘ಬೆತ್ಲಹೆಮ್ ಕುಟುಂಬ ಯೂನಿಟ್’ ಹೊಸ ದಾಖಲೆ; ಮಲಯಾಳಂ ಸಿನಿಮಾ ರಂಗದಲ್ಲೇ ಅತಿ ಹೆಚ್ಚು ಗಳಿಸಿದ ಸಿನಿಮಾ

ನಿವಿನ್ ಪೌಳಿ-ಮಮಿತಾ ಬೈಜು ನಟನೆಯ ‘ಬೆತ್ಲಹೆಮ್ ಕುಟುಂಬ ಯೂನಿಟ್’ ಮಲಯಾಳಂ ಚಿತ್ರರಂಗದಲ್ಲಿ ಹೊಸ ಇತಿಹಾಸ ಬರೆದಿದೆ. ಈ ಸಿನಿಮಾ ಎಲ್ಲ ಚಿತ್ರರಂಗಗಳು ಹುಬ್ಬೇರಿಸುವಂತೆ ಗಳಿಕೆ ಮಾಡುತ್ತಿದೆ. ‘ಲೋಕ ಚಾಪ್ಟರ್ 1’ ಬರೆದಿದ್ದ ದಾಖಲೆಯನ್ನು ಇದು ಉಡಾಯಿಸಿದೆ. ‘ಲೋಕಃ’ ಮಾಡಿದ್ದ 305 ಕೋಟಿ ರೂಪಾಯಿ ಗಳಿಕೆಯ ಗಡಿಯನ್ನು ಯಶಸ್ವಿಯಾಗಿ ದಾಟಿದೆ. ಮಲಯಾಳಂ ಚಿತ್ರರಂಗದ ಸಾರ್ವಕಾಲಿಕ ದೊಡ್ಡ ಹಿಟ್ ಆಗಿ ಈ ಚಿತ್ರ ಹೊರಹೊಮ್ಮಿದೆ.

ಇತ್ತೀಚಿನ ದಿನಗಳಲ್ಲಿ ದೊಡ್ಡ ಮಟ್ಟದ ಆ್ಯಕ್ಷನ್ ಸಿನಿಮಾಗಳು ಮಾತ್ರ ಗಲ್ಲಾಪೆಟ್ಟಿಗೆಯಲ್ಲಿ ಸದ್ದು ಮಾಡುತ್ತಿವೆ. ಆದರೆ ‘ಬೆತ್ಲಹೆಮ್ ಕುಟುಂಬ ಯೂನಿಟ್’ ಒಂದು ಸರಳ ಪ್ರೇಮಕಥೆ. ಹಾಸ್ಯ ಮತ್ತು ಮುದ್ದಾದ ಪ್ರೇಮಕಥೆಯೇ ಚಿತ್ರಕ್ಕೆ ಬಲ ತುಂಬಿದೆ. ಈ ಯಶಸ್ಸು ಎಲ್ಲರಿಗೂ ಆಶ್ಚರ್ಯ ತಂದಿದೆ. ಬೃಹತ್ ಸಾಹಸ ದೃಶ್ಯಗಳಿಲ್ಲದೇ ಈ ಸಿನಿಮಾ ಬಾಕ್ಸ್ ಆಫೀಸ್ ಕೊಳ್ಳೆ ಹೊಡೆದಿದೆ.

ಮಲಯಾಳಂ ಚಿತ್ರರಂಗದ ವಿಶಿಷ್ಟತೆಗೆ ಈ ಯಶಸ್ಸು ಸಾಕ್ಷಿಯಾಗಿದೆ. ಪ್ರೇಕ್ಷಕರಿಗೆ ಹತ್ತಿರವೆನಿಸುವ ಪಾತ್ರಗಳು ಇಲ್ಲಿವೆ. ನಟರ ನೈಜ ಅಭಿನಯ ಪ್ರೇಕ್ಷಕರ ಮನ ಗೆದ್ದಿದೆ. ಭಾವನಾತ್ಮಕ ಬೆಸುಗೆಗೆ ಜನರು ಮನಸೋತಿದ್ದಾರೆ. ಕೇವಲ 20 ಕೋಟಿ ರೂಪಾಯಿ ಬಜೆಟ್​​ನಲ್ಲಿ ನಿರ್ಮಾಣವಾದ ಈ ಸಿನಿಮಾ ನಿರ್ಮಾಪಕರಿಗೆ ಸಾಕಷ್ಟು ಲಾಭ ತಂದಿದೆ. ಚಿತ್ರದ ಗಳಿಕೆ 309 ಕೋಟಿ ರೂಪಾಯಿ ಆಗಿದೆ.

ಮಲಯಾಳಂ ಸಿನಿಮಾಗಳು 100 ಕೋಟಿ ರೂಪಾಯಿ ಗಳಿಕೆ ಮಾಡೋದು ಒಂದು ದೊಡ್ಡ ಸಾಧನೆ. ಹೀಗಿರುವಾಗ ಈ ಚಿತ್ರ 300 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ ಎಂದರೆ ಅದು ನಿಜಕ್ಕೂ ದೊಡ್ಡ ಸಂಗತಿ. ಈ ಚಿತ್ರದ ಜಾಗತಿಕ ಯಶಸ್ಸು ಮಲಯಾಳಂ ಸಿನಿಮಾಗಳ ಮಾರುಕಟ್ಟೆಯನ್ನು ವಿಸ್ತರಿಸಿದೆ. ಪ್ರಪಂಚದಾದ್ಯಂತ ಇರುವ ಚಿತ್ರಪ್ರೇಮಿಗಳು ಈ ಸಿನಿಮಾವನ್ನು ಮುಕ್ತಕಂಠದಿಂದ ಶ್ಲಾಘಿಸುತ್ತಿದ್ದಾರೆ. ಮಲಯಾಳಂ ಚಿತ್ರರಂಗದ ಖ್ಯಾತಿ ವಿಶ್ವಮಟ್ಟದಲ್ಲಿ ಮತ್ತಷ್ಟು ಹೆಚ್ಚಾಗಿದೆ.

ಇದನ್ನೂ ಓದಿ: ಮಲಯಾಳಂ ಚಿತ್ರರಂಗದಲ್ಲಿ ಬದಲಾದ ಟ್ರೆಂಡ್; ಸ್ಟಾರ್‌ಗಳಿಗಿಂತ ಕಂಟೆಂಟ್‌ಗೇ ಪ್ರೇಕ್ಷಕರ ಜೈಕಾರ

ಮಲಯಾಳಂ ಚಿತ್ರರಂಗವು ಹೊಸ ಪ್ರಯೋಗಗಳಿಗೆ ಹೆಸರುವಾಸಿಯಾಗಿದೆ. ವಿಭಿನ್ನ ರೀತಿಯ ಕಥೆಗಳ ಮೂಲಕ ಜನರನ್ನು ಬೆರಗುಗೊಳಿಸುತ್ತಿದೆ. ಈ ಸಿನಿಮಾದಲ್ಲಿ ಮಮಿತಾ ಬೈಜು ನಾಯಕಿಯಾಗಿ ನಟಿಸಿದ್ದಾರೆ. ನಿವಿನ್ ಪೌಲಿ ಮತ್ತು ಮಮಿತಾ ನಡುವಿನ ಕೆಮಿಸ್ಟ್ರಿ ಅದ್ಭುತವಾಗಿದೆ. ಈ ಜೋಡಿಯ ಅಭಿನಯವೇ ಸಿನಿಮಾದ ದೊಡ್ಡ ಪ್ಲಸ್ ಪಾಯಿಂಟ್ ಆಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.