Sai Pallavi: ‘ಗಾರ್ಗಿ’ ಒಟಿಟಿ ರಿಲೀಸ್ ಬಗ್ಗೆ ಕೇಳಿಬಂತು ಸುದ್ದಿ; ಹೆಚ್ಚಿತು ಸಾಯಿ ಪಲ್ಲವಿ ಅಭಿಮಾನಿಗಳ ಕಾತರ
Gargi Movie OTT: ಸಾಯಿ ಪಲ್ಲವಿ ಸಿನಿಮಾಗಳು ಬಾಕ್ಸ್ ಆಫೀಸ್ನಲ್ಲಿ ಸೋತರೂ ಒಟಿಟಿಯಲ್ಲಿ ಮಿಂಚುತ್ತವೆ ಎಂಬುದು ಈಗಾಗಲೇ ಸಾಬೀತಾಗಿದೆ. ‘ಗಾರ್ಗಿ’ ಚಿತ್ರದ ಒಟಿಟಿ ರಿಲೀಸ್ ಬಗ್ಗೆ ಸುದ್ದಿ ಕೇಳಿಬಂದಿದೆ.
ನಟಿ ಸಾಯಿ ಪಲ್ಲವಿ (Sai Pallavi) ಅವರು ಸಿನಿಮಾ ವಿಚಾರದಲ್ಲಿ ಹೊಸ ಹೊಸ ಪ್ರಯೋಗಗಳನ್ನು ಮಾಡುತ್ತಲೇ ಇರುತ್ತಾರೆ. ಬರೀ ಹೀರೋ ಜತೆ ಮರ ಸುತ್ತುವ ಪಾತ್ರವನ್ನು ಅವರು ಆಯ್ಕೆ ಮಾಡಿಕೊಳ್ಳುವುದಿಲ್ಲ. ತಮ್ಮ ಪಾತ್ರಕ್ಕೆ ಮಹತ್ವ ಇದ್ದರೆ ಮಾತ್ರ ಅವರು ಸಿನಿಮಾಗೆ ಸಹಿ ಮಾಡುತ್ತಾರೆ. ಆದರೂ ಕೂಡ ಬಾಕ್ಸ್ ಆಫೀಸ್ನಲ್ಲಿ ಸಾಯಿ ಪಲ್ಲವಿ ಅವರಿಗೆ ಇತ್ತೀಚಿನ ದಿನಗಳಲ್ಲಿ ನಿರೀಕ್ಷಿತ ಮಟ್ಟದ ಗೆಲುವು ಸಿಗುತ್ತಿಲ್ಲ ಎಂಬುದು ಬೇಸರದ ಸಂಗತಿ. ಹಾಗಂತ ಅವರು ಅದರಿಂದ ನಿರಾಶರಾಗಿಲ್ಲ. ಸಾಯಿ ಪಲ್ಲವಿ ನಟನೆಯ ಚಿತ್ರಗಳು ಥಿಯೇಟರ್ನಲ್ಲಿ ಗೆಲ್ಲದಿದ್ದರೂ ಒಟಿಟಿಯಲ್ಲಿ (OTT platform) ಧೂಳೆಬ್ಬಿಸುತ್ತವೆ ಎಂಬುದು ಸಾಬೀತಾಗಿದೆ. ‘ವಿರಾಟ ಪರ್ವಂ’ ಸಿನಿಮಾ ಇತ್ತೀಚೆಗೆ ಒಟಿಟಿಯಲ್ಲಿ ರಿಲೀಸ್ ಆಗಿತ್ತು. ಅದರ ಬೆನ್ನಲೇ ‘ಗಾರ್ಗಿ’ (Gargi Movie) ಚಿತ್ರ ಕೂಡ ಒಟಿಟಿ ಹಾದಿ ಹಿಡಿಯುತ್ತಿದೆ. ಮೂಲಗಳ ಪ್ರಕಾರ ಆಗಸ್ಟ್ 2ನೇ ವಾರದಲ್ಲಿ ‘ಸೋನಿ ಲಿವ್’ ಮೂಲಕ ಈ ಸಿನಿಮಾ ಬಿತ್ತರ ಆಗಲಿದೆ.
‘ಗಾರ್ಗಿ’ ಸಿನಿಮಾ ಮೇಲೆ ಸಾಯಿ ಪಲ್ಲವಿ ಅವರು ಹೆಚ್ಚು ನಿರೀಕ್ಷೆ ಇಟ್ಟುಕೊಂಡಿದ್ದರು. ಸದ್ದು ಗದ್ದಲ ಇಲ್ಲದೇ ಶೂಟಿಂಗ್ ಮುಗಿಸಿದ ನಂತರವೇ ಅವರು ಈ ಚಿತ್ರದ ಬಗ್ಗೆ ಅನೌನ್ಸ್ ಮಾಡಿದ್ದರು. ತಂದೆ-ಮಗಳ ನಡುವಿನ ಬಾಂಧವ್ಯದ ಕಥೆ ಇರುವ ಈ ಸಿನಿಮಾ ಜುಲೈ 15ರಂದು ತೆರೆಕಂಡಿತು. ಚಿತ್ರಕ್ಕೆ ಉತ್ತಮ ವಿಮರ್ಶೆ ವ್ಯಕ್ತವಾಗಿದ್ದರೂ ಕೂಡ ಗಲ್ಲಾಪೆಟ್ಟಿಗೆಯಲ್ಲಿ ಒಳ್ಳೆಯ ಕಮಾಯಿ ಆಗಲಿಲ್ಲ.
ಮೂಲಗಳ ಪ್ರಕಾರ ‘ಗಾರ್ಗಿ’ ಚಿತ್ರದ ಒಟಿಟಿ ಹಕ್ಕುಗಳನ್ನು ‘ಸೋನಿ ಲಿವ್’ ಖರೀದಿಸಿದೆ. ಆಗಸ್ಟ್ ಎರಡನೇ ವಾರದಲ್ಲಿ ಇದರ ಸ್ಟ್ರೀಮಿಂಗ್ ಆರಂಭಿಸಲಾಗುವುದು ಎಂದು ಕೆಲವೆಡೆ ವರದಿ ಆಗಿದೆ. ಈ ಬಗ್ಗೆ ಇನ್ನಷ್ಟೇ ಅಧಿಕೃತ ಮಾಹಿತಿ ಹೊರಬರಬೇಕಿದೆ. ಚಿತ್ರಮಂದಿರದಲ್ಲಿ ಈ ಚಿತ್ರವನ್ನು ಮಿಸ್ ಮಾಡಿಕೊಂಡಿದ್ದವರು ಈಗ ಮನೆಯಲ್ಲೇ ಕುಳಿತು ವೀಕ್ಷಿಸಲು ಕಾದಿದ್ದಾರೆ.
ಒಟಿಟಿಯಲ್ಲಿ ಮಿಂಚಿದ್ದ ‘ವಿರಾಟ ಪರ್ವಂ’:
ರಾಣಾ ದಗ್ಗುಬಾಟಿ ಜೊತೆ ಸಾಯಿ ಪಲ್ಲವಿ ನಟಿಸಿದ್ದ ‘ವಿರಾಟ ಪರ್ವಂ’ ಸಿನಿಮಾ ಗಲ್ಲಾಪೆಟ್ಟಿಗೆಯಲ್ಲಿ ಸೋಲು ಅನುಭವಿಸಿತ್ತು. ಆದರೆ ನೆಟ್ಫ್ಲಿಕ್ಸ್ನಲ್ಲಿ ಪ್ರಸಾರವಾದಾಗ ಅತ್ಯುತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿತು. ನಂಬರ್ ಒನ್ ಟ್ರೆಂಡಿಂಗ್ ಆಗುವ ಮಟ್ಟಕ್ಕೆ ಜನರು ಆ ಚಿತ್ರವನ್ನು ಮುಗಿಬಿದ್ದು ನೋಡಿದರು. ‘ಗಾರ್ಗಿ’ ಚಿತ್ರ ಕೂಡ ಅದೇ ರೀತಿ ಧೂಳೆಬ್ಬಿಸುವ ನಿರೀಕ್ಷೆ ಇದೆ.