ದುಷ್ಟಶಕ್ತಿಗಳಿಂದ ನನ್ನನ್ನು ಕಾಪಾಡಿ ಹೊಸ ಜೀವನ ಕೊಟ್ಟ ಮಹಾಪುರುಷ ನರೇಶ್: ಪವಿತ್ರಾ ಲೋಕೇಶ್ ಬಣ್ಣನೆ

ನಟಿ ಪವಿತ್ರಾ ಲೋಕೇಶ್ (Pavithra Lokesh) ಹಾಗೂ ತೆಲುಗು ನಟ ನರೇಶ್ (Naresh) ಸಂಬಂಧದ ಬಗ್ಗೆ ಕಳೆದ ವರ್ಷದಿಂದಲೂ ಚರ್ಚೆ ಜೋರಾಗಿ ನಡೆಯುತ್ತಿದೆ. ನರೇಶ್​ರ ಮೂರನೇ ಪತ್ನಿ ರಮ್ಯಾ ರಘುಪತಿ ಮಾಧ್ಯಮಗಳ ಮುಂದೆ ಬಂದು ನರೇಶ್ ತಮಗೆ ಅನ್ಯಾಯ ಮಾಡಿದ್ದಾರೆ, ಪವಿತ್ರಾ ನನ್ನ ಮನೆ ಒಡೆದಿದ್ದಾರೆ ಎಂದು ಅಳಲು ತೋಡಿಕೊಂಡಿದ್ದರು. ಆ ಸಂದರ್ಭದಲ್ಲಿ ನರೇಶ್ ಹಾಗೂ ಪವಿತ್ರಾ ಲೋಕೇಶ್​ ಸಂಬಂಧದ ಬಗ್ಗೆ ವಿವಾದ ಎದ್ದಿತ್ತು. ಈಗ ಅದೇ ವಿಷಯ ಮುಖ್ಯವಾಗಿರಿಸಿಕೊಂಡು ನರೇಶ್ ಹಾಗೂ ಪವಿತ್ರಾ ಮುಖ್ಯ ಪಾತ್ರದಲ್ಲಿ ನಟಿಸಿರುವ ಮಳ್ಳಿ ಪೆಳ್ಳಿ (ಮತ್ತೆ ಮದುವೆ) (Malli Pelli) ಹೆಸರಿನ ಸಿನಿಮಾ ನಿರ್ಮಿಸಲಾಗಿದೆ. ಈ ಸಿನಿಮಾದ ಪ್ರೀ ರಿಲೀಸ್ ಕಾರ್ಯಕ್ರಮ ನಿನ್ನೆಯಷ್ಟೆ ನಡೆದಿದ್ದು, ಕಾರ್ಯಕ್ರದಲ್ಲಿ ಪವಿತ್ರಾ, ನರೇಶ್​ ಬಗ್ಗೆ ಬಹುವಾಗಿ ಹೊಗಳಿ ಮಾತನಾಡಿದ್ದಾರೆ.

ಕಾರ್ಯಕ್ರಮದಲ್ಲಿ ಮಾತನಾಡುವ ಮುನ್ನ ಪಕ್ಕದಲ್ಲಿಯೇ ಇದ್ದ ನರೇಶ್​ರ ಆಶೀರ್ವಾದ ಹಾಗೂ ವೇದಿಕೆ ಮೇಲಿದ್ದ ಕೆಲವು ಹಿರಿಯರ ಆಶೀರ್ವಾದ ಪಡೆದ ನಟಿ ಪವಿತ್ರಾ ಲೋಕೇಶ್, ನಾನು ಹೊಸ ಜೀವನ ಆರಂಭಿಸುತ್ತಿದ್ದೇನೆ ಇದಕ್ಕೆ ನಿಮ್ಮೆಲ್ಲರ ಆಶೀರ್ವಾದ ಬೇಕು ಎಂದರು. ದೇವರು ಎಲ್ಲರಿಗೂ ಹೊಸ ಜೀವನ ನೀಡುವುದಿಲ್ಲ, ಯಾರ ಜೀವನ ಹೇಗಿರುತ್ತದೆಯೋ ಹಾಗೆಯೇ ಮುಂದುವರೆಯುತ್ತದೆ, ಆದರೆ ನನಗೆ ಹೊಸ ಜೀವನ ಪ್ರಾರಂಭಿಸುವ ಅವಕಾಶವನ್ನು ದೇವರು ಕಲ್ಪಿಸಿದ್ದಾನೆ” ಎಂದಿದ್ದಾರೆ.

”ಪ್ರತಿಯೊಬ್ಬ ಹೆಣ್ಣುಮಕ್ಕಳಿಗೂ ಕನಸುಗಳು ಇರುತ್ತವೆ. ನನ್ನ ಬದುಕು ಹೀಗಿರಬೇಕು, ಒಂದು ಮನೆ ಇರಬೇಕು, ಕಾರಿರಬೇಕು, ನನ್ನದೇ ಆದ ಹೆಸರು ಇರಬೇಕು ಎಂದೆಲ್ಲ. ಅಂತೆಯೇ ನನಗೂ ಇತ್ತು. ಆದರೆ ನನ್ನ ತಂದೆ ನಾನು ಚಿಕ್ಕವಳಿದ್ದಾಗಲೇ ತೀರಿಕೊಂಡರು. ಆ ಕನಸುಗಳನ್ನು ನನಸು ಮಾಡಿಕೊಳ್ಳಲೆಂದು ನಾನು ಚಿತ್ರರಂಗಕ್ಕೆ ಬಂದೆ. ಕನಸುಗಳನ್ನು ಯಾರೊಬ್ಬರ ಸಹಾಯವಿಲ್ಲದೆ ನಾನೊಬ್ಬಳೇ ನನಸು ಮಾಡಿಕೊಂಡೆ, ಕಾರು, ಮನೆ ಎಲ್ಲವನ್ನೂ ಕಟ್ಟಿಕೊಂಡೆ ನನಗಾಗಿ ಬದುಕು ಸಹ ಕಟ್ಟಿಕೊಂಡೆ. ನಾನು ಕಟ್ಟಿಕೊಂಡ ಬದುಕನ್ನು ಒಡೆಯುವ ಅಧಿಕಾರವನ್ನು ನಾನು ಯಾರಿಗೂ ಕೊಟ್ಟಿರಲಿಲ್ಲ” ಎಂದಿದ್ದಾರೆ ಪವಿತ್ರಾ ಲೋಕೇಶ್.

ಇದನ್ನೂ ಓದಿ:ಪವಿತ್ರಾ ಲೋಕೇಶ್ ಅವರನ್ನು ಮದುವೆ ಆಗಿದ್ದೀರಾ? ನರೇಶ್ ಕೊಟ್ಟರು ಉತ್ತರ

”ಆದರೆ ಕೆಲವು ದುಷ್ಟ ಶಕ್ತಿಗಳು ನಾನು ಕಟ್ಟಿದ ನನ್ನ ಪ್ರಪಂಚವನ್ನು ನನ್ನ ಅನುಮತಿ ಇಲ್ಲದೆ ಒಡೆದರು. ಅದರಿಂದ ನಾನು ಸಹ ಜೀವನದಲ್ಲಿ ಮುರಿದು ಹೋದೆ. ಬಹಳ ಕೆಟ್ಟದಾಗಿ ನಾನು ಜೀವನದಲ್ಲಿ ಸೋತುಹೋದೆ. ಅದನ್ನೀಗ ನೆನಪು ಮಾಡಿಕೊಂಡರೆ ಮತ್ತೆ ನನ್ನನ್ನು ದುಃಖ ಆವರಿಸಿಕೊಳ್ಳುತ್ತದೆ. ಆದರೆ ನನಗೆ ಬೆಂಬಲವಾಗಿ ಒಂದು ಶಕ್ತಿ ನಿಂತಿತು ಆ ಶಕ್ತಿಯ ಹೆಸರೇ ನರೇಶ್. ಆ ದುಷ್ಟಶಕ್ತಿಗಳಿಗೆ ನರೇಶ್​ರ ಶಕ್ತಿ ಏನು, ಎಷ್ಟು ಎಂಬುದು ಗೊತ್ತಿಲ್ಲ. ಆಗ ಅವರು ನನ್ನ ಜೀವವನ್ನು ಮುರಿದಿದ್ದಕ್ಕೆ ಈಗ ನನಗೆ ಸಂತೋಶವೇ ಆಗಿದೆ. ಏಕೆಂದರೆ ಈಗ ನಾನು ಹೊಸ ಜೀವನ ಶುರು ಮಾಡಿದ್ದೇನೆ. ನನ್ನದ್ದೆಲ್ಲವನ್ನೂ ಮುರಿದು ಹಾಕಿದರೂ ದೇವರು ನನಗಾಗಿ ಹೊಸ ನೆಲವನ್ನು ಕೊಟ್ಟಿದ್ದಾನೆ, ಮತ್ತೆ ಕಟ್ಟಿಕೊಳ್ಳಲು ಅವಕಾಶ ಮಾಡಿಕೊಟ್ಟಿದ್ದಾನೆ” ಎಂದು ಭಾವುಕವಾಗಿ ನುಡಿದರು ಪವಿತ್ರಾ.

ನರೇಶ್​ರ ತಾಯಿ ವಿಜಯ್ ನಿರ್ಮಲಾ ಅವರಿಗೆ ಒಳ್ಳೆಯ ಸಂಸ್ಕಾರ ನೀಡಿದ್ದಾರೆ. ನನ್ನಂಥಹಾ ಕಷ್ಟದಲ್ಲಿರುವ ಮಹಿಳೆಯನ್ನು ಕಾಪಾಡುವ ಸಂಸ್ಕಾರ, ನನಗೆ ಹೆಚ್ಚು ಹೆಚ್ಚು ಪ್ರೀತಿ ಕೊಡುವ ಸಂಸ್ಕಾರ ನೀಡಿದ್ದಾರೆ. ನಮ್ಮ ಜೀವನವನ್ನು ಮತ್ತೆ ಕಟ್ಟಿಕೊಳ್ಳಲು ನಾವು ಪ್ರಾರಂಭಿಸಿದ್ದೇವೆ. ವಿಜಯ್ ಕೃಷ್ಣ ಮೂವೀಸ್ ಅನ್ನು ಮತ್ತೆ ಪ್ರಾರಂಭ ಮಾಡಿದ್ದೇವೆ, ಆ ನಿರ್ಮಾಣ ಸಂಸ್ಥೆಯಿಂದ ಹಲವು ಒಳ್ಳೆಯ ಸಿನಿಮಾಗಳು ಬರಲಿವೆ. ನಮ್ಮ ಮುಂದೆ ಸಾಕಷ್ಟು ಅವಕಾಶಗಳಿವೆ ನಾವು ಹೊಸದನ್ನು ಮಾಡಬಹುದು ಎಂದು ಆಶಾ ಭಾವ ವ್ಯಕ್ತಪಡಿಸಿದ್ದಾರೆ ಪವಿತ್ರಾ ಲೋಕೇಶ್.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ