ನಿಮ್ಮ ವಾಟ್ಸ್ಆ್ಯಪ್ ಖಾತೆ ಡಿಲೀಟ್ ಆಗಲಿದೆ; ಪೈರಸಿ ಸಿನಿಮಾ ಲಿಂಕ್ ಕಳಿಸುವವರಿಗೆ ಛಾಟಿ ಬೀಸಿದ ಹೈಕೋರ್ಟ್
Radhe Piracy Link: ಪೈರಸಿ ಸಿನಿಮಾದ ಲಿಂಕ್ ಫಾರ್ವರ್ಡ್ ಮಾಡುವವರ ಖಾತೆಗಳನ್ನು ಮೊದಲು ಸಸ್ಪೆಂಡ್ ಮಾಡಬೇಕು. ಮತ್ತೆ ತಪ್ಪು ಮುಂದುವರಿದರೆ ಖಾತೆಯನ್ನು ಶಾಶ್ವತವಾಗಿ ಡಿಲೀಟ್ ಮಾಡಬೇಕು ಎಂದು ನ್ಯಾಯಾಲಯ ಆದೇಶಿಸಿದೆ.
ಹಾಲಿವುಡ್ನಿಂದ ಸ್ಯಾಂಡಲ್ವುಡ್ವರೆಗೆ ಎಲ್ಲ ಭಾಷೆಯ ಚಿತ್ರರಂಗಗಳಿಗೂ ಪೈರಸಿ ಎಂಬುದು ದೊಡ್ಡ ತಲೆ ನೋವು. ನೂರಾರು ಕೋಟಿ ರೂ. ಬಂಡವಾಳ ಹೂಡಿ, ನೂರಾರು ದಿನ ಕಷ್ಟಪಟ್ಟು ತಯಾರಿಸಿದ ಸಿನಿಮಾವನ್ನು ಕಳ್ಳರು ಪೈರಸಿ ಮಾಡಿಬಿಡುತ್ತಾರೆ. ಅದರಿಂದ ಸಾವಿರಾರು ಜನರ ಶ್ರಮ ನೀರಿನಲ್ಲಿ ಹೋಮ ಆದಂತೆ ಆಗುತ್ತದೆ. ಪೈರಸಿ ವಿರುದ್ಧ ಹೋರಾಡಲು ಕಠಿಣ ಕಾನೂನು ಇದ್ದರೂ ಕೂಡ ಅದರ ಹಾವಳಿ ನಿಂತಿಲ್ಲ. ಸ್ಟಾರ್ ನಟರ ಸಿನಿಮಾಗಳು ಬಿಡುಗಡೆಯಾದ ಮೊದಲ ದಿನವೇ ಎಲ್ಲರ ಮೊಬೈಲ್ಗೆ ಬಂದು ಬಿಡುತ್ತವೆ. ಈ ಆನ್ಲೈನ್ ಯುಗದಲ್ಲಂತೂ ಎಲ್ಲರೂ ಪೈರಸಿ ಲಿಂಕ್ಗಳು ಶೇರ್ ಮಾಡಿಕೊಳ್ಳಲು ಉತ್ಸಾಹ ತೋರಿಸುತ್ತಾರೆ. ಆದರೆ ಇನ್ಮುಂದೆ ಅಂಥ ತಪ್ಪು ಮಾಡಿದರೆ ವಾಟ್ಸ್ಆ್ಯಪ್ ಖಾತೆಯೇ ಡಿಲೀಟ್ ಆಗಲಿದೆ.
ಬಹುಕೋಟಿ ವೆಚ್ಚದಲ್ಲಿ ತಯಾರಾದ, ಸಲ್ಮಾನ್ ಖಾನ್ ನಟನೆಯ ‘ರಾಧೆ: ಯುವರ್ ಮೋಸ್ಟ್ ವಾಂಟೆಂಡ್ ಭಾಯ್’ ಸಿನಿಮಾ ಇತ್ತೀಚೆಗೆ ಬಿಡುಗಡೆ ಆಯಿತು. ಈದ್ ಹಬ್ಬದ ಪ್ರಯುಕ್ತ ಮೇ 13ರಂದು ಓಟಿಟಿಯಲ್ಲಿ ತೆರೆಕಂಡ ಆ ಚಿತ್ರವನ್ನು ಮೊದಲ ದಿನವೇ ಪೈರಸಿ ಮಾಡಲಾಯಿತು. ಪೈರಸಿ ಲಿಂಕ್ಗಳನ್ನು ಅನೇಕರು ವಾಟ್ಸ್ಆ್ಯಪ್ ಮೂಲಕ ಫಾರ್ವರ್ಡ್ ಮಾಡಿಕೊಂಡಿದ್ದಾರೆ. ಅಂಥ ತಪ್ಪು ಮಾಡಿದವರ ವಾಟ್ಸ್ಆ್ಯಪ್ ಖಾತೆಯನ್ನೇ ಸಸ್ಪೆಂಡ್ ಮಾಡುವಂತೆ ದೆಹಲಿ ಹೈಕೋರ್ಟ್ ಆದೇಶ ಹೊರಡಿಸಿದೆ.
ಪೈರಸಿ ಮಾಡುವುದು ಎಷ್ಟು ತಪ್ಪೋ, ಪೈರಸಿ ಸಿನಿಮಾದ ಲಿಂಕ್ ಹರಡುವುದು ಕೂಡ ಅಷ್ಟೇ ತಪ್ಪು. ಪೈರಸಿ ಸಿನಿಮಾ ನೋಡುವುದು ಕೂಡ ಅಪರಾಧದ ಭಾಗವೇ ಆಗಿದೆ. ಹಾಗಾಗಿ ಇದರ ವಿರುದ್ಧ ‘ರಾಧೆ’ ಚಿತ್ರತಂಡ ಹೈಕೋರ್ಟ್ ಮೆಟ್ಟಿಲೇರಿತ್ತು. ಪ್ರಕರಣವನ್ನು ಆಲಿಸಿರುವ ನ್ಯಾಯಾಲಯವು ಮಹತ್ವದ ತೀರ್ಪು ನೀಡಿದೆ. ಪೈರಸಿ ಸಿನಿಮಾದ ಲಿಂಕ್ ಫಾರ್ವರ್ಡ್ ಮಾಡುವವರ ವಾಟ್ಸ್ಆ್ಯಪ್ ಖಾತೆಗಳನ್ನು ಮೊದಲು ಸಸ್ಪೆಂಡ್ ಮಾಡಬೇಕು. ಮತ್ತೆ ತಪ್ಪು ಮುಂದುವರಿದರೆ ಖಾತೆಯನ್ನು ಶಾಶ್ವತವಾಗಿ ಡಿಲೀಟ್ ಮಾಡಬೇಕು ಎಂದು ನ್ಯಾಯಾಲಯ ಆದೇಶಿಸಿದೆ.
ವಾಟ್ಸ್ಆ್ಯಪ್ ಬಳಕೆದಾರರು intellectual property rights ಉಲ್ಲಂಘನೆ ಮಾಡುವಂತಿಲ್ಲ ಎಂಬ ನಿಯಮ ಇದೆ. ಇದರ ಆಧಾರದ ಮೇಲೆ ಕೋರ್ಟ್ ತೀರ್ಪು ನೀಡಿದೆ. ಸಿನಿಮಾಗಳನ್ನು ಪೈರಸಿ ಮಾಡುವುದು ಕೂಡ intellectual property rights ಉಲ್ಲಂಘನೆಯೇ ಆಗಿರುವುದರಿಂದ ಪೈರಸಿ ಲಿಂಕ್ ಫಾರ್ವರ್ಡ್ ಮಾಡುವವರ ಖಾತೆಗಳನ್ನು ಅಮಾನತುಗೊಳಿಸಬೇಕು ಎಂದು ಆದೇಶ ಹೊರಡಿಸಿದೆ. ಹಾಗಾಗಿ, ಪೈರಸಿ ಸಿನಿಮಾ ಲಿಂಕ್ ಉಚಿತವಾಗಿ ಸಿಕ್ಕಿದೆ ಎಂದ ಕೂಡಲೇ ಅದನ್ನು ಊರಿಗೆಲ್ಲ ಫಾರ್ವರ್ಡ್ ಮಾಡುವವರು ಇನ್ನುಂದೆ ವಾಟ್ಸ್ಆ್ಯಪ್ ಖಾತೆ ಹೊಂದುವ ಆಸೆಯನ್ನು ಬಿಟ್ಟುಬಿಡುವುದು ಒಳಿತು.
ಇದನ್ನೂ ಓದಿ:
ಥಿಯೇಟರ್ನಲ್ಲಿ ಬಹುಕೋಟಿ ಬಾಚುತ್ತಿದ್ದ ಸಲ್ಮಾನ್ ಖಾನ್ ಈಗ ರಾಧೆ ಚಿತ್ರದಿಂದ ಮೊದಲ ದಿನ ಗಳಿಸಿದ್ದು ಬರೀ 10 ಸಾವಿರ