ಕಳೆದ ವರ್ಷ ಬಿಡುಗಡೆ ಆಗಿ ಗಳಿಕೆಯಲ್ಲಿ ದಾಖಲೆಗಳನ್ನು ಬರೆದ ಜೊತೆಗೆ ವಿಶ್ವಮಟ್ಟದಲ್ಲಿ ಪ್ರತಿಷ್ಠಿತ ಪ್ರಶಸ್ತಿಗಳನ್ನು ಬಾಚಿಕೊಂಡ, ಬಾಚಿಕೊಳ್ಳುತ್ತಿರುವ ರಾಜಮೌಳಿ ನಿರ್ದೇಶನದ ಆರ್ಆರ್ಆರ್ (RRR) ಸಿನಿಮಾ ಇದೀಗ ಮರು ಬಿಡುಗಡೆ ಆಗುತ್ತಿದ್ದು ಇದಕ್ಕಾಗಿ ಎಂದೇ ಹೊಸ ಟ್ರೈಲರ್ (Trailer) ಅನ್ನು ಚಿತ್ರತಂಡ ಬಿಡುಗಡೆ ಮಾಡಿದೆ.
ಸಿನಿಮಾದ ನಿರ್ಮಾಣ ಸಂಸ್ಥೆ ಡಿವಿವಿ ಎಂಟರ್ಟೈನ್ಮೆಂಟ್ ಯೂಟ್ಯೂಬ್ ಚಾನೆಲ್ನಲ್ಲಿ ಇಂದು (ಫೆಬ್ರವರಿ 27) ಸಂಜೆ ವೇಳೆಗೆ ಹೊಸ ಟ್ರೈಲರ್ ಅನ್ನು ಬಿಡುಗಡೆ ಮಾಡಲಾಗಿದ್ದು, ಈ ಹಿಂದಿನ ಟ್ರೈಲರ್ನಲ್ಲಿ ಇಲ್ಲದ ಕೆಲವು ದೃಶ್ಯಗಳನ್ನು ಸೇರಿಸಲಾಗಿದೆ. ಅಲ್ಲದೆ ಸಿನಿಮಾದಲ್ಲಿಯೂ ಇಲ್ಲದ ಕೆಲವು ದೃಶ್ಯದ ತುಣುಕುಗಳನ್ನು ಸಹ ಹೊಸ ಟ್ರೈಲರ್ನಲ್ಲಿ ಸೇರಿಸಲಾಗಿದೆ.
2021ರ ಡಿಸೆಂಬರ್ ತಿಂಗಳಲ್ಲಿ ಸಿನಿಮಾದ ಮೊದಲ ಟ್ರೈಲರ್ ಬಿಡುಗಡೆ ಆಗಿತ್ತು. ಆ ಟ್ರೈಲರ್ 3:15 ನಿಮಿಷಗಳಿತ್ತು. ಈಗ ಬಿಡುಗಡೆ ಆಗಿರುವ ಟ್ರೈಲರ್ 1:47 ನಿಮಿಷ ಮಾತ್ರವೇ ಇದೆ. ಮೂಲ ಟ್ರೈಲರ್ನಲ್ಲಿ ಕೆಲವು ಸಂಭಾಷಣೆಗಳು ಇದ್ದವು, ಆದರೆ ಈಗ ಬಿಡುಗಡೆ ಆಗಿರುವ ಟ್ರೈಲರ್ನಲ್ಲಿ ಕೇವಲ ಆಕ್ಷನ್ ದೃಶ್ಯಗಳು ಹಾಗೂ ನಾಯಕರಿಬ್ಬರ ಗೆಳೆತನ ಸಾರುವ ದೃಶ್ಯದ ತುಣುಕಗಳಷ್ಟೆ ಇವೆ.
ಅದರಲ್ಲಿಯೂ ಬಹುವಾಗಿ ಚರ್ಚೆಯಾದ ಸಿನಿಮಾದ ಇಂಟರ್ವೆಲ್ ಫೈಟ್ನ ಕೆಲ ದೃಶ್ಯಗಳನ್ನು ರೀ ರಿಲೀಸ್ ಟ್ರೈಲರ್ನಲ್ಲಿ ಸೇರಿಸಲಾಗಿದೆ. ಇದರ ಜೊತೆಗೆ ಹಾಲಿವುಡ್ ದಿಗ್ಗಜ ನಿರ್ದೇಶಕರಾದ ಸ್ಟಿಫನ್ ಸ್ಪೀಲ್ಬರ್ಗ್, ಜೇಮ್ಸ್ ಕ್ಯಾಮರನ್, ಎಡ್ಗರ್ ವೈಟ್ ಅವರುಗಳು ಆರ್ಆರ್ಆರ್ ಸಿನಿಮಾ ಬಗ್ಗೆ ಹೇಳಿದ ಮಾತುಗಳನ್ನು ಟ್ರೈಲರ್ನಲ್ಲಿ ಸೇರಿಸಲಾಗಿದೆ. ಒಟ್ಟಾರೆಯಾಗಿ ಅಮೆರಿಕ ಪ್ರೇಕ್ಷಕರನ್ನು ಗಮನದಲ್ಲಿರಿಸಿಕೊಂಡೆ ಟ್ರೈಲರ್ ಅನ್ನು ತಯಾರು ಮಾಡಲಾಗಿದ್ದು, ಬಿಡುಗಡೆ ಆದ ಕೆಲವೇ ಗಂಟೆಗಳಲ್ಲಿ ಲಕ್ಷಾಂತರ ಮಂದಿ ಈ ರೀ ರಿಲೀಸ್ ಟ್ರೈಲರ್ ಅನ್ನು ವೀಕ್ಷಿಸಿದ್ದಾರೆ.
Narendra Modi: ಆರ್ಆರ್ಆರ್ ಹಾಡಿಗೆ ಕುಣಿದ ಕೊರಿಯನ್ನರು, ಭೇಷ್ ಎಂದ ಪ್ರಧಾನಿ ಮೋದಿ
ಆರ್ಆರ್ಆರ್ ಸಿನಿಮಾದ ನಾಟು-ನಾಟು ಹಾಡು ಆಸ್ಕರ್ಗೆ ನಾಮಿನೇಟ್ ಆಗಿದ್ದು, ಆಸ್ಕರ್ ಪ್ರಶಸ್ತಿ ಪ್ರದಾನ ಸಮಾರಂಭವು ಮಾರ್ಚ್ 12 ರಂದು ಅಮೆರಿಕದ ಲಾಸ್ ಏಂಜಲ್ಸ್ನಲ್ಲಿ ನಡೆಯಲಿದೆ. ಇದರ ನಡುವೆ ಆರ್ಆರ್ಆರ್ ಸಿನಿಮಾವನ್ನು ಅಮೆರಿಕದಲ್ಲಿ ಮರು ಬಿಡುಗಡೆ ಮಾಡಲಾಗುತ್ತಿದೆ. ಮಾರ್ಚ್ 03 ರಂದು ಸಿನಿಮಾ ಮರು ಬಿಡುಗಡೆ ಆಗಲಿದ್ದು, ನಟ ರಾಮ್ ಚರಣ್ ಅವರು ಅಮೆರಿಕದಲ್ಲಿ ಸಿನಿಮಾದ ಪ್ರಚಾರದಲ್ಲಿ ಪಾಲ್ಗೊಂಡಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 7:57 pm, Mon, 27 February 23