‘ಆಡಿಷನ್ ವೇಳೆ ಸೊಂಟ, ಎದೆ ಸೈಜ್ ಬಗ್ಗೆ ಪ್ರಶ್ನೆ ಕೇಳಲಾಗಿತ್ತು’; ನಟಿಯ ಶಾಕಿಂಗ್ ಹೇಳಿಕೆ
Surveen Chawla: ಕಿರುತೆರೆಯಲ್ಲಿ ಗುರುತಿಸಿಕೊಂಡವರು ಸುರ್ವೀನ್. ಅವರು ನಂತರ ಕನ್ನಡ ಚಿತ್ರದ ಮೂಲಕ ಹಿರಿತೆರೆಗೆ ಕಾಲಿಟ್ಟರು. ನಂತರ ತಮಿಳು ಹಾಗೂ ಹಿಂದಿ ಸಿನಿಮಾಗಳಲ್ಲಿ ನಟಿಸಿದರು.
ಕಾಸ್ಟಿಂಗ್ ಕೌಚ್ ಬಗ್ಗೆ ಇತ್ತೀಚಿನ ವರ್ಷಗಳಲ್ಲಿ ಸಾಕಷ್ಟು ಚರ್ಚೆ ಆಗುತ್ತಿದೆ. ಹಲವು ನಟಿಯರು ತಮಗಾದ ಕಹಿ ಘಟನೆಗಳ ಬಗ್ಗೆ ಮಾಹಿತಿ ಹಂಚಿಕೊಳ್ಳುತ್ತಿದ್ದಾರೆ. ಇದು ದೊಡ್ಡ ಮಟ್ಟದಲ್ಲಿ ಚರ್ಚೆ ಆಗುತ್ತಿದೆ. ಅನೇಕ ಹೀರೋ, ನಿರ್ಮಾಪಕರ ವಿರುದ್ಧ ಗಂಭೀರ ಆರೋಪ ಕೇಳಿಬಂದಿದೆ. ಕನ್ನಡದ ‘ಪರಮೇಶ ಪಾನ್ವಾಲಾ’ ಚಿತ್ರದಲ್ಲಿ ನಟಿಸಿದ ಸುರ್ವೀನ್ ಚಾವ್ಲಾ ಕೂಡ ಕಾಸ್ಟಿಂಗ್ ಕೌಚ್ ಬಗ್ಗೆ ಮಾತನಾಡಿದ್ದಾರೆ. ಸಿನಿಮಾ ಬಗ್ಗೆ ಮಾತನಾಡೋಕೆ ಬಂದಾಗ ಚಿತ್ರತಂಡದವರು ಅವರ ಎದೆಯ ಸೈಜ್ ಕೇಳಿದ್ದರಂತೆ. ಈ ಬಗ್ಗೆ ತುಂಬಾನೇ ಬೇಸರದಿಂದ ಸುರ್ವೀನ್ ಮಾತನಾಡಿದ್ದಾರೆ.
ಕಿರುತೆರೆಯಲ್ಲಿ ಗುರುತಿಸಿಕೊಂಡವರು ಸುರ್ವೀನ್. ಅವರು ನಂತರ ಕನ್ನಡ ಚಿತ್ರದ ಮೂಲಕ ಹಿರಿತೆರೆಗೆ ಕಾಲಿಟ್ಟರು. ನಂತರ ತಮಿಳು ಹಾಗೂ ಹಿಂದಿ ಸಿನಿಮಾಗಳಲ್ಲಿ ನಟಿಸಿದರು. ಕಳೆದ ಕೆಲ ವರ್ಷಗಳಿಂದ ಅವರು ಚಿತ್ರರಂಗದಿಂದ ದೂರ ಉಳಿದುಕೊಂಡಿದ್ದಾರೆ. ಈಗ ಅವರು ಸಂದರ್ಶನದಲ್ಲಿ ಮಾತನಾಡುತ್ತಾ ಕಾಸ್ಟಿಂಗ್ ಕೌಚ್ ಬಗ್ಗೆ ಮಾತನಾಡಿದ್ದಾರೆ. ದಕ್ಷಿಣ ಭಾರತದಲ್ಲಿ ಕಾಸ್ಟಿಂಗ್ ಕೌಚ್ ಸಮಸ್ಯೆ ಹೆಚ್ಚಿತ್ತು ಎಂಬುದು ಅವರ ಅಭಿಪ್ರಾಯ.
‘ಸಿನಿಮಾ ಬಗ್ಗೆ ಮಾತನಾಡೋಕೆ ಚಿತ್ರತಂಡದವರು ಮುಂಬೈಗೆ ಬಂದಿದ್ದರು. ನಾನು ಆ ಸಂದರ್ಭದಲ್ಲಿ ಕಿರುತೆರೆಯಲ್ಲಿ ನಟಿಸುತ್ತಿದ್ದೆ. ಮಹಿಳೆಯರು ಹಲವು ವಿಚಾರಗಳಲ್ಲಿ ಪ್ರಶ್ನೆಗೆ ಒಳಪಡುತ್ತಾರೆ. ಆಡಿಷನ್ ವೇಳೆ ದೇಹದ ತೂಕ, ಸೊಂಟದ ಸೈಜ್, ಎದೆಯ ಅಳತೆ ಕೇಳಿದ್ದರು. ಈ ಮೂಲಕ ನನ್ನ ಮೇಲೆ ನನಗೆ ಅನುಮಾನ ಬರುವಂತೆ ಮಾಡಿದ್ದರು. ಮಹಿಳೆಯರನ್ನು ಅಳೆಯುವ ವಿಧಾನ ಇದಲ್ಲ’ ಎಂದಿದ್ದಾರೆ ಸುರ್ವೀನ್. ಈ ಅನುಭವ ತಮ್ಮ ಮೊದಲ ಸಿನಿಮಾ ಮೀಟಿಂಗ್ನಲ್ಲಿ ಆಗಿತ್ತು ಎಂದು ಅವರು ಹೇಳಿದ್ದಾರೆ. ಆ ಚಿತ್ರವನ್ನು ಅವರು ಒಪ್ಪಿಕೊಂಡಿದ್ದರೋ ಅಥವಾ ಇಲ್ಲವೋ ಎನ್ನುವ ಬಗ್ಗೆ ಅವರು ಮಾಹಿತಿ ನೀಡಿಲ್ಲ.
‘ದಕ್ಷಿಣ ಭಾರತದ ಚಿತ್ರರಂಗದಲ್ಲಿ ಕಾಸ್ಟಿಂಗ್ ಕೌಚ್ ಅತಿಯಾಗಿತ್ತು. ಆದರೆ, ಕಾಲ ಬದಲಾದಂತೆ ಇದು ಕಡಿಮೆ ಆಗಿದೆ. ಬಾಡಿ ಶೇಮಿಂಗ್ ಮಾಡುವುದು ಕೂಡ ತಗ್ಗಿದೆ’ ಎಂದು ಅವರು ಸಂತಸ ಹೊರ ಹಾಕಿದ್ದಾರೆ. ಸುರ್ವೀನ್ ಅವರು 2003ರಲ್ಲಿ ಕಿರುತೆರೆಗೆ ಕಾಲಿಟ್ಟರು. ಅದಾದ ಬಳಿಕ ಸಾಕಷ್ಟು ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ. 2008ರಲ್ಲಿ ತೆರೆಗೆ ಬಂದ ಶಿವರಾಜ್ಕುಮಾರ್ ನಟನೆಯ ‘ಪರಮೇಶ ಪಾನ್ವಾಲಾ’ ಅವರ ಮೊದಲ ಚಿತ್ರ. ಇದಾದ ಬಳಿಕ ಹಿಂದಿ, ತಮಿಳು ಪಂಜಾಬಿ ಚಿತ್ರರಂಗದಲ್ಲಿ ಬಣ್ಣ ಹಚ್ಚಿದ್ದರು.
ಇದನ್ನೂ ಓದಿ: ‘ಪರಮೇಶ ಪಾನ್ವಾಲ’ ನಟಿ ಸುರ್ವೀನ್ ಚಾವ್ಲಾಗೆ ಹಲವು ಬಾರಿ ಕಾಸ್ಟಿಂಗ್ ಕೌಚ್ ಕಾಟ; ಕೆಟ್ಟ ಅನುಭವ ತೆರೆದಿಟ್ಟಿದ್ದ ನಟಿ
Published On - 1:37 pm, Wed, 15 December 21